Nuntak Nasepte Hilh Ding Thupi

Dear ALL,

            Israel mite’ hun lai mah bangin tu-in zong khangno khempeuh, nuntak nasepte a kihilh ding kisam hi. Amaute in khut tawh nasep pawl khat peuhmah a theih ciat ding uh kisam hi; a kisap leh zong tua pen a kivaakna ding uh hi pah hi. Tua pen nuntak kikhualna-a kimang ding bek hi lo-in, thatang, lungsim leh gamtat khantohna ah zong a kitangsam a hihi.

            Ih sangte ah khut leh kol(set) tawh nasepna a tuamtuam ih om sak ding kisam hi. Tua siamsinnate sungah sazian bawl dan, sing lep siamna, lo khawh dan leh gan khawi dan cih khawng te hi ding hi. Sik sek dan, za zut dan, khedap khui dan cih te-a kipan an huan dan, moh bawl dan, puan sawp dan, puan phop dan, sik tawh lai khet dan, set tawh lai khet dan cih te a kihilh theihna dingin zong mapat ding hi. Sang naupangte in nuntak nasepte a sep theih pah liana dingun hih bang nasep pattahnate ah ih hih theih zaha ih hanciam ding a hihi.

            Sang naupang numeite in zong a kicing a zat theih pah ding uh pilna a ngah theihna dingun nasep ding tampi vai hawm sak ding kisam hi. Puan khui dan leh huan bawl dan khawng hilh ding a hihi. Paakte ciingin stawbery(thankik tangmai) khawng suan ding a hihi. Tua bangin kimanna nei pilna a sin kawmun, amaute in cidamna ding inn pua thasaanna a nei uh a hihi. CT, laimai 307-312.

            Lungsim in pumpi a huzapna, pumpi in zong lungsim a huzap kikna pen theih ding kisam hi. Lungsim thasaanna tawh tha a ngah khuak’ hatna in pumpi bup gamtang saka, tua bangin natna dalna ding a manpha mahmah huhna piang hi.

            Lai Siangtho sungah, ih ngaihsut dinga a kisam, pumpi tawh kisai thumaan khat oma, tua in: “Lungnopna in zatui bangin a pha bawl hi,” cih a hihi Ed, laimai 197.

            Naupangte leh khangnote in cidamna, maitaina, tangzanna leh, thatang leh khuak hoih a neih theihna dingun, inn pua lamah hun tam a om ding, hun maana nasepna leh kimawhlna a neih ding uh kisam hi. Sang sung bek ah oma lai a sim niloh naupangte leh khangnote in a cidam thatang hoih nei thei lo uh hi. Thatang saanna om lo-a lai bek simna tawh khuak zatna in, khuak lam ah sisan tung sak khin a hih manin, pumpi sung tenga sisan pai dan kikim sak nawn lo hi. Khuak in sisan tam ngah lua-in, mun dang teng ah tawm lua leuleu hi. Naupangte leh khangnote in maanmaana lai a sim hun ding uh seh sak dinga, a hun khat uh pen thatang nasepna in zang sak ding hi. An nekna, puan silhna leh ihmuhna te a hun maanin nei thei peuh le-uh, lungsim leh pumpi cidamna sukha lo-in pilna hong ngah thei ding uh hi. CG, laimai 83.

Nasep A Manphatna

            Nasep a manphatna khangnote theih sak ding kisam hi. Pasian in na sem den a hih lam amaute thei sak un. Na khempeuh in amau’ sep ding ciat sem uh hi. A kipiang sak na khempeuh a gamtang hi-a, ei zong ih masuan ih zawhna dingin ih gamtat kul hi. Ed, laimai 214

            Lungsim ngaihsutna tawh kop khawma kimanna a  a nei ding thatang nasepna in, nuntakna ah kisekna hoih khat hi-a, lam tuamtuam tawh mite in a sep ding uha Pasian in a sawl nasepte a sep siam zawkna dingun, lungsim leh pumpi kisin sakna leh, hilh pilna hi. Ci-a ngaihsutna in thanuam sak tawntung hi. FE, laimai 229.

            Za-neu huai-in sila nasep a bang phial zongin, nasep khat peuh pen kuamah in maizum pih ding hi lo hi. Nasep in mi-manpha hong suak sak hi. Lu tawh a hi-a khut tawh a hi zongin na a sem khempeuh in, na a sem numei, na a sem pasal a hihi. Kikhawm dinga a pai uh mah tawh kibangin, puan a sawp laitak, kuang a sil laitak mahun zong a masuan uh a sem, a biakna uh a zahtak hi veve uh hi. Khutte in nasep thupi lo bel khat a sep laitak mahin zong, a siangtho ngaihsutnate in lungsim pen dom to-in pi suak sak hi. 4T,laimai590.

            Thatang nasep a ki-et neuna pen, a hoih theithei ding ngaihsun lo-a zulhtat sepna hang hipi pen hi. Sepnopna tawh hi lo-in sep loha phamawh a hih man peuh tawh kisem hi mai hi. A sem te in zong lungsim tak tawh sem lo-in, amahmah in zong thupi ngaihsut lo a hih manin, midangte in zong thupi ngaihsut lo pah hi. Khut tawh nasep kipat tahna in tua khialhna hong puah pha ding hi. Tua in kiciatna leh belna zong hong guan ding hi. Sang naupangte in sianthona leh navakna a sin ding uh kisam hi; hun zat siam ding leh gamtatna khempeuh man nei a suah sakna ding uh a sin ding uh a hihi. Sep zia a hoih pen te bek hilh lo-in, siam zawk sem nopna lungsim a neihna dingun hansuah ding hi. Mihing’ khuak leh khut in a sep theih zah a hoih pen a suahna ding dong tupna nei sak un. Ed, laimai 222.

            Naupangte thadahna tawh khan sakna in mawhna a hihi. Tawl a kisa phial uh zongin a khut, a khe, a sazang te uh saan sak un. A khengvala sem hi kei peuh le-uh, tawlna in nang hong gim sak sangin amaute bang ci gim sak zaw thei ding hiam? Tawlna leh tha kiamna kilamdang mahmah hi. Naupangte in khanghamsate sangin nasep khel kawikawina leh a kallaka tawlngakna kitam sap zaw uh hi; a hi zongin a neu mahmah lai mah un nasep kisin sak dinga, amaute in kimanna nei a hih lam uh hong ngaihsun thei le-un hong lungdam ding uh hi. Cidam huai nate a sep uh ciangin a ihmut uh hong lim dinga, a zing cianga sep kikna ding tha thak hong ngah ding uh hi. AH, laimai 289.

(Pawlpi thulam lak bu nih na pan)

Lungdam
Jk,Lianpu
Lai SiangTho in, leisung pan hong pusuak to sapi a cih na gam kiukhat pan.

Khristian Pilsinna Ah Lai Siangtho

Dear ALL,

                                                      Khristian Pilsinna Ah Lai Siangtho

            Pil sinna-a zat dingin Lai Siangtho pen laibu dang khat peuh, a hih kei leh laibu dang khempeuh kigawm sangin mui bun zaw hi. A thu-I thupina, a kammalte-I hoihna leh a gen khiat dan-I kilawmna te in na dang khat peuh sangin ngaihsutna hong phawngin hong dom to zaw hi. Lai Siangtho thumaante theih theihna ding hanciamna zaha lungsim hatna hong pia zo zaw laisim ding dang om lo hi. Pasian’ ngaihsutna tawh tua banga a kizom lungsim pen tanzau lo, thahat lo-in om lo ding hi.

            Khalam omzia khantoh sakna ah Lai Siangtho in nakpi-in sem zo zaw hi. Pasian tawh a kikhawl dinga kipiang sak mihing in, tua pan mah bekin ama nuntakna leh khantohna ding ngah thei hi. A sang bel lungdamna Pasian’ kiang pan beka a ngah dinga a kipiang sak a hih mah bangin, a lungtang-I deihgawhna a kam sak thei, a kha-I duhna leh deihna a lungkim sak thei ding pen  mun dang ah mu zo lo ding hi. Lungsim takpi leh zuih nopna tawh Pasian’ Thu sina, a thumaante a theihna dinga a hanciam mi pen a Thuphuanpa tawh hong kimu ding hi; a khantoh nop nak leh ama khahtoh theihna ding ciangtan om lo hi.

            Lai sinna tawh a kizom Lai Siangtho mun a thupi zaw diak te, gim huai-in ngaihsun lo-in hamphatna bangin ngaihsunin lotngah ding hanciam in. A masa-in lim takin ngah zo kei zongin, hanciamin kisinsin lecin, a sawtna ciangin thumaan kammalte tua banga na khol ding nuam na sa ding hi. Tua bangin na zongsang lecin khalam khantohna ah hong manpha mahmah ding hi.

A Moi Lua-a Sang Kah Sak A Lauhuaina

            Eden huana omte in nate panin pilna a muha, Mose in Arabia gam a mual a zang ah, naupang Jesu in zong Nazaret gam mual pang khawng ah, Pasian’ laigelhte a sin mah bangin, tu huna naupangte in zong Ama thu sin thei ding uh hi. A kimu thei lo pen a kimu thei te ah hong kilang hi.

            A hi thei zahzahin, hih a lamdang laisim bu pi amaute’ mai-ah a kilem theihna ding mun ah a neutung uha kipan naupangte om sak un.

            Na tanote uh a neu (moi) lua laipi-in sang ah kha kei un. Midangte’ khut sungah a moi lai lungsimte a kipuah phat ding a muan pen nu in lim taka a ngaihsut ding kisam hi. A tanote uh kum giat hiam kum sawm hiam bang a phak masiah nute pate pen amau’ sia hoih bel a hihi. Amau’ sanginn pen inn pua khawng, paak leh vasate a omna mun khawng hi dinga, a laisim buding uh pen a piang nate hi ding hi. A lungsim un a theih zawh ding  a hih nak leh nute pate in a tate uh mai ah Pasian’ nate-laibu pi a lem pah ding uh a hihi. Tua bang muna a kihilh, pilna pen kimangngilh kik pak lo hi.

            Naupangte sang kah sak baih luat pen a thatang leh a lungsim cidamna uh a lau huai bek hi lo-in, gamtat hoihna panin zong supna ngah uh hi. A omzia uh akipuah lo naupangte tawh amaute hong kikhawl kha uh hi. Zuau a gen, a tomlo, a guta, a khem hat mi, amaute sanga a moi zaw te’ tungah gamtat hoih lo a hilh nuam mite, a awtol, a ngongtat mihon lak amaute a tung uh a hihi. Naupang neu te amau’ thu-in khah khong lehang, a hoih lam sangin a sia lam hong thei pah uh hi. Pianpih lungsim leh zongsatna hoih lo te kilem mahmaha, a neu lai, a naupang lai uha a muh a zak te uh pen amaute’ lungsim sungah teeng cip den pah hi. A moi lai lungsim sunga a kivawh khaici hoih lo in zung hong kha dinga, nute pate’ lungtang a sun ding ling hiam mahmah hong suak ding hi.

Nuntak Nasepte Hilh Ding Thupi

            Israel mite’ hun lai mah bangin tu-in zong khangno khempeuh, nuntak nasepte a kihilh ding kisam hi. Amaute in khut tawh nasep pawl khat peuhmah a theih ciat ding uh kisam hi; a kisap leh zong tua pen a kivaakna ding uh hi pah hi. Tua pen nuntak kikhualna-a kimang ding bek hi lo-in, thatang, lungsim leh gamtat khantohna ah zong a kitangsam a hihi.

            Ih sangte ah khut leh kol(set) tawh nasepna a tuamtuam ih om sak ding kisam hi. Tua siamsinnate sungah sazian bawl dan, sing lep siamna, lo khawh dan leh gan khawi dan cih khawng te hi ding hi. Sik sek dan, za zut dan, khedap khui dan cih te-a kipan an huan dan, moh bawl dan, puan sawp dan, puan phop dan, sik tawh lai khet dan, set tawh lai khet dan cih ta a kihilh theihna dingin zong mapat ding hi. Sang naupangte in nuntak nasepte a sep theih pah liana dingun hih bang nasep pattahnate ah ih hih theih zaha ih hanciam ding a hihi.

            Sang naupang numeite in zong a kicing a zat theih pah ding uh pilna a ngah theihna dingun nasep ding tampi vai hawm sak ding kisam hi. Puan khui dan leh huan bawl dan khawng hilh ding a hihi. Paakte ciingin stawbery(thankik tangmai) khawng suan ding a hihi. Tua bangin kimanna nei pilna a sin kawmun, amaute in cidamna ding inn pua thasaanna a nei uh a hihi.

            Lungsim in pumpi a huzapna, pumpi in zong lungsim a huzap kikna pen theih ding kisam hi. Lungsim thasaanna tawh tha a ngah khuak’ hatna in pumpi bup gamtang saka, tua bangin natna dalna ding a manpha mahmah huhna piang hi.

            Lai Siangtho sungah, ih ngaihsut dinga a kisam, pumpi tawh kisai thumaan khat oma, tua in: “Lungnopna in zatui bangin a pha bawl hi,” cih a hihi

            Naupangte leh khangnote in cidamna, maitaina, tangzanna leh, thatang leh khuak hoih a neih theihna dingun, inn pua lamah hun tam a om ding, hun maana nasepna leh kimawlna a neih ding uh kisam hi. Sang sung bek ah oma lai a sim niloh naupangte leh khangnote in a cidam thatang hoih nei thei lo uh hi. Thatang saanna om lo-a lai bek simna tawh khuak zatna in, khuak lam ah sisan tung sak khin a hih manin, pumpi sung tenga sisan pai dan kikim sak nawn lo hi. Khuak in sisan tam ngah lua-in, mun dang teng ah tawm lua leuleu hi. Naupangte leh khangnote in maanmaana lai a sim hun ding uh seh sak dinga, a hun khat uh pen thatang nasepna in zang sak ding hi. An nekna, puan silhna leh ihmuhna te a hun maanin nei thei peuh le-uh, lungsim leh pumpi cidamna sukha lo-in pilna hong ngah thei ding uh hi.

Aki cing zaw in na sim nop leh,

Lungdam

Jk,Lianpu

Pawlpi thulam lak bu 2na.

Lai SiangTho in, leisung pan hong pusuak to sapi a cih na gam kiukhat pan.

Pasian’ Khut Nuai-a Siate

            Topa in a ki-ap sia khempeuh tawh na sem hi; tua thu siate in a theih ding lawp huai mahmah hi. Pasian’ hilhna nuai-a om siate in, naupangte’ tunga a piak sawn ding uh hehpihna, thumaan leh khawvak te, Kha Siangtho tung tawnin ngah uh hi. Leitung in a theih ngei Sia Lianbelpa’ khut nuai ah amaute a om hi-a, amaute in lungsim gi lo khawng, awtol khawng leh hihna khawng a neih ding uh pen kilawm het lo ding hi. Tua bangin amaute in naupangte’ sungah amau’ ginat lohna a teeng sak ding uh a hihi.

            Pasian in A Kha Siangtho tawh mite hong hopih hi. Lai Siangtho na sim kawmin, “Na thukham panin a lamdang nate ka muh theihna dingin, ka mitte hong hon sak in,” ci-in thu ngen in. Psalm 119:18. Siate in thungetna tawh Pasian a belh uh leh amaute’ tungah Khris’ Kha hong kum dinga, Pasian in Kha Siangtho zangin ama tung tawnin sang naupangte’ lungsim ah na sem ding hi. Kha Siangtho in sang naupangte’ lungsim leh ngaihsutna ah na semin, lametna, hanna leh Lai Siangtho theih theihna guan ding hi. Thumaan kammalte thupi sa semsem dinga, nidanga a theih ngei loh pen a khiatna a zai leh a kicingin hong mu ding hi. Pasian’ Thu a hoihna leh a thupina in lungsim leh zia-leh-tong kikhelna piang sak hi. Naupangte’ lungtang tungah vantung ki-itna mei-amte va tu-in, lawpna piang sak ding hi. Naupang’a dingin na ih sep nak leh amaute a zalom a tullomin Khris kiang ih tun thei ding hi. CT, laimai171,172.

            Mite a pil taktakna dingin Pasian’ hang beka nungta a hih lam uh a kiphawk uh kula, tua hi leh Ama pilna tawh kidim thei pan ding uh hi. Theih siamna leh khalam hatna pen Pasian’ kiang pan bekin kingah hi. Pilna lamah a sang mahmaha mite in a ngaihsut uh milian belt e nangawn pahtak Johan leh sawltak Paul te tawh the ding hi nai lo hi. Theih siamna leh khalam hatna a kigawm ciangin mihing dinmun sang bel a kitung thei hi pan hi. Tua bang mite, mihing lungsim pattahna ah Amah tawh nasem khawm dingin Pasian in zang hi. CT,laimai66.

            Tu huna ih pil sinna sangpite’ nasep thupi bel in, mite’ mai ah Pasian’ min a thang sak ding lim hoih lahna a hihi. Mihing mah zangin vantung mite in tua nasep hong vaan ding uha, sepna bawlna khempeuh ah Pasian’ hoihna lim kilang sak ding hi. CT, laimai57.

Sangsiate’ Neih Ding Siamnate

            Na sang uah siapi a sem dingin mi-thahatte teel un. Mite a hilh-pilna ah lim taka a sep zawhna dingin tha tang a hat mi, sang naupangte hi-sinsina, siangtho-a, hanciama a om theihna ding uh a pantah thei ding mi hi ding. Na sep ding khempeuh lim takin sem in. Nasepna pen thugen-siamte, laibu-zuak-siamte leh thu hilh-siamte suak thei pah ding uh hi. Nasem khempeuh in pilna-sang neih kul hi cih, ngaihsutna ih neih ding lo hi. CT, laimai 213,213.

            Sangsia ding te teelna ah thuhilhsia ding te teelna zah mahin a thupi a hih lam phawkin, ngaihsut kholh mahmah ding kisam hi. Zia-leh-tong a thei thei mipilte in a teel ding uh kisam hi. Khangnote’ lungsim puah pha-a a hilh thei, ih pawlpi sangte-a siate in a sep ding uha a phamawh, nasep tuamtuam te hoih taka a sem zo ding talent nei mahmah te nai lo a khangno lai siate’ khut sungah na tate uh koih kei un. Amaute’ hanciamna in buiana piang sak zaw ding hi. CT, laimai 174,175.

            Pasian ita, Pasian’ tungah a khialh ding lau a hih lam sittelna leh zia-etna tawh na theih cian lohpi uh sia khat peuh na cial ding uh hi lo hi. Sangsiate pen Pasian’ hilh a hiha, Khris’ sang ah amaute in ni simin pilna a sin nak uh leh, amaute in Khris’ deihna bangin na hong sem ding uh hi. Amaute in Khris tawh pawl leh gual huai ding uh hi; bang hang hiam cih leh naupang khempeuh leh khangnote khempeuh manpha hi. FE, laimai260.

            Sangsiate pen amau’lai-siamnate sangin amau’ zong satnate leh lungsim puakziate a thupi zaw thama ih ngaihsut ding a hihi. AMaute in huzap maan a neih theihna dingun, amau mahmah hoih takin ki-uk zo dinga, amau’ lungtang pen a sang naupangte a itna uh tawh kidim phitphet ding hi; tua pen a mithek, a kampau leh a gamtatna uah kilang khia ding hi. FE, laimai19.

            Siate pen Khristian hoih khat bangin gamta den ding hi. A sang naupangte’ tungah lawm lungsim leh sia lungsim nei khawm ding hi. Ih mite khempeuh-sang siate, thuhilhsiate leh pawlpi mite-in Khristian thusiamna lungsim nei uh hi leh, amaute in mite’ lungsim neh zo khin tham ding uha, mi a tam zaw in thumaan kan telin hong sang khin ta ding uh hi. Sia khempeuh in amau’ angsung mangngilh hen la, a sang naupangte zong Pasian’ neihsa mah a hih lam phawkin, amaute’ lungsim leh zia-leh-tong tungah amau’ huzap tawh kisai-in thusitna thuak ding a hih lam uh thei-in, a khantoh a mainawt ding uh deih sakna taktak nei le-uh, ih sangte ah vantung mite hong khawl den nuam ding uh hi. CT,laimai93,94.

            Ih pawlpi sangte in gamtat hoih mahmah a nei siate kiphamawh hi; a muanhuai mite, upna ah a kho te, navakna leh lungduaina a nei te, Pasian tawh a ton khawm te leh a sia ding lamsang khempeuh a pelh te kipha mawh hi.

            Kiphasaka ki-itna a nei lo mite, khangnote’ sia dinga koih ding pen gitlohna a hihi. Zia-leh-tong a nawh khan mahmah khangnote’a dingin hih bang siate in siatna lianpi piang sak ding hi. Siate in Pasian’ thu a man kei uha, a khut nuai uha om naupangte itna a neih kei uh leh; amau a lungdam sak te pakta tuama, a pahtak loh te uh leh a meidawi leh a ommawh khawng te a don kei uh leh amaute sia dingin cial ding hi lo hi; amau’ nasepna hangin Khris’a ding mi kitaan zaw ding hi.

            Sangsia ih kisam hi; a diakdiakin naupangte’a ding a hi hithiat, a migi, itna leh thuak zawhna a kisam phadiakte’ tungah itna leh thuakzawhna a nei siate ih kisam hi. CT, laimai 175,176.

            Siate in thungetna a kisap lam a phawk kei uha, Pasian’ mai ah a lungsim uh a niam khiat kei uh leh, amaute in pil sinna-I deihna bulpi sia sak ding uh hi. CT, laimai213.

            Siate’ thatang zong thupi a hih lam gengen kul lo hi; bang hang hiam cih leh a ci dam semsem leh a nasep zong zo zawsem ding hi Thatang hatna in zawng khalna leh natna khawng a thuak ciangin lungsim zong siangtho lo-in hat zo lo hi. Lungtang pen lungsim in gim sak hi; thatang a hat kei leh lungsim hatna zong kiama, a sang zaw ngaihsutnate leh ngimnate zong kisia a hih manin, tua bang siate in a maan leh a maan lo khen tel thei lo zawsem uh hi. Dammawhna hanga gimna ih thuak ciangin, lungduai ding a hi-a maitai ding a hi zongin, cihtak ding a hi a thutan ding a hi zongin hong thu baih nawn lo hi. CT,laimai177.

Lai at,

Jk,Lianpu

Pawlpi thulam lak bu 2na.

KHRISTIAN PILSINNA

            Leitung tangthu sunga a thupi hun nunung ih naih hanhan ta hi. Tua a hih manin ei’ sangte pana kipia pilsinna lam hamphatnate pen mun dang sangte in a piak tawh kilam dang ding a hihna zong ih theih ding thupi hi. CT, laimai 56.

            Pilsinna tawh kisai-a ih ngaihsut dan pen toi lua-in niam lua lai hi. A zai zaw muhna leh a sang zaw ngimna ih neih ding kisam hi. Pilsinna maan in lai sinna nam khat bek hi lo hi. Tu-a nuntakna ding kigin kholhna bek zong hi lo hi. Tua in mihing pumpi bup, mihing’ nuntakna hun bup huam hi. Thatang, lungsim leh kha lam hatnate kituak taka khantoh sakna a hihi. Tua in a sin mite, hih leitung nasepna ah nuam a sa ding, hong tung ding leitunga nasepna zai zaw ah zong nuam a sa zaw dingin kiging khol sak hi. Ed, laimai 13.

            Pilsinna nasep leh tatkhiatna nasep pen pum khat hi kici thei hi. Pilsinna leh tatkhiatna ah “Jesu Khris a hi bulpi longal kuamah in bulpi dang a phah kei hi.” Ed, laimai 30.

            Pasian tawh kilem dinga mihing bawl kikna, Piangsakpa’ lim a kilang sak kik thei dinga mihing’ pianzia a hoih dinga domkangna in, pilsinna leh hilh pilna khempeuh-I ngimna pi a hihi. Tua nasep thupi mahmah a hih manin, Honpa in vantung munpi nusia-in, nuntakna a sang zaw tawh kilawmna a ngah theihna dingun mihingte a hilh theihna dingin, hih leitung ah Amahmah a hong pai a hihi. CT,laimai 49.

            Leitung tawh kipawl ngimnate, hihdante leh ngeina te zuih khak ding baih mahmaha, Noah hun lai-a mite sangin eite in, ih nuntak hun tawh kisai hi ta leh, ih sep ding nasep lianpi tawh kisai hi ta leh ngaihsutna  ih nei zaw tuan kei hi. Ih sangsiate in Judah mite’ totna mun mah tawnin, Pasian’ piak a hi lo ngeinate, gamtatnate leh khanglui thuciinte a zuih khak ding uh patauh huai den hi. Kim khatte in zongsatna luite lenkenkon uha, a kisam lo thusinna a tuamtuamte khenglah tentanin, tuate’ hanga hot khiatna a ngah kisa lai uh hi. Tua banga a hihna uh tawh Pasian’ nasep a thupi amaute in sem kha lo uha, sang naupangte’ tungah pilsinna a kicing lopi, a maan lopi pia kha uh hi. 6T, laimai 150,151.

            Pawlpi sungah na a sem ding, mite in Jesu a muh theihna dingin nasepna lam tuamtuam ah ih khangnote a pantah ding siamna a nei numei pasal ih kisam hi. Eite’ phuh sangte in hih ngimna a neih ding uh hi-a, pawl dangte’ phuh pawlpi sangte’ paizia, leitung tawh kipawl sangpite’ paizia a zuih ding uh hi lo hi. Paizia zong a lut lohna, a kideih lohna mun hi sak ding hi. Sang naupangte pen Khristian taktak hihna hilh dinga, Lai Siangtho pen a sang bel, a thupi bel laisimbu-in ngaihsut ding hi. FE, laimai 231.

Pawlpi’ Nasep Ding

            Zana ka mangmuhna ah a kikhawm khempeuh’ lungsim a phawng pilsinna lam kikuma om mi honpi khat lakah ka om hi. Kum tampi ih sangsia a sem khat in thu gena: “Pilsinna thu in Seventh-day Adventist buppi a phawn ding kisam hi,” ci hi. 6T, laimai 162.

            Sang a kahna uah a hi-a, a kikholhna dangte uah a hi zongin, zongsatna hoih lote in amaute a huzap theih lohna dingin, ih naupangte ih pattah ding leh pilna ih sin sak ding nasep thupi khat pawlpi in ih nei hi. Leitung in mawhna leh Pasian’ deihna awlmawh lohna tawh kidim hi. Khuapite Sodom bang hi uha, ih naupangte in ni simin siatna tampi mu uh hi. Mipi sangte-a a kahte pen amaute’ sanga a ki-awlmawh lo zaw mite, sang sung a om hun sung longal uha konglak pilna a ngah dinga kizan khah te tawh kikhawl pahpah uh hi. Khangnote’ lungsim pen zawh nop mahmah hi. Zia-leh-tong a maan in amaute a kimum kei leh lim taka kipantah zaw te a zol zahna dingin Satan in tua a kizan khah naupangte hong zang ding hi. Tua bangin, Sabbath a tang nute pate in bang teng piang cih a theih ma-un, gamtat sia teng kihih khina, a tanote uh’ nuntakna kisia khin hi.

            Innkuan tampi in a tate uh’ pilsinna ding a ngaihsutna-un ih sang golte a omna mun ah peem uh hi. Amaute a teenna mun mah uah om suak hi le-uh Topa’n dingin na hoih sem thei zaw ding uh hi. Amaute in pawlpi sang a phut dingin a min uh a omna pawlpi hansuah thei ding uha, khua sunga om naupangte in Khristian pilna namkim sin thei ding uh hi. Amaute a kisap lohna mun ah khalam thadahna sung a tung dingin mawh zolna om pah a hih manin, pawlpi golte’ kiangah a pai uh sangin amau’ huhna a kisapna pawlpi neuter ah om suak zaw le-uh a tate uh’a ding amau mahmah’a ding leh Pasian’na sepna’a dingin hoih zaw tham pek ding hi.

            Sabbath tang mi hon khat a omna peuh ah, nute pate in a tate uh leh khangnote a kihilh theihna ding sang khat kipawla a vai hawm ding uh ahihi. Amaute in Khristian sia khat a cial ding uh a hihi. Amah in a hanciam thuhilhsia bangin, naupangte zong thuhilhsia a suah sak theihna dingin amaute a hilh ding ahihi. CT, laimai 173,174.

            Eite in ih tate, leitung’a ding hi lo, Pasian’a dinga a khoi dingin; a khutte uh leitung-I khut sungah koih lo-a, Pasian ita a zahtak ding, Ama thupiakte a zui dingin, amaute a hilh dingin Pasian’ tungah kiciamna siangtho a nei ih hihi. Amaute a Piangsakpa’ lim suuna amaute a kibawl a hihna leh, Khris in amaute’ etteh ding lim a hihna phawk den sak ding kisam hi. Hot khiatna thu a thei sak ding leh Pasian’ lim suuna a nuntakna uh leh a zia a tong uh a zuun ding pilsinna neih sak ding pen ngaihsut bela neih ding a hihi. 6T, laimai 127.

            A kisam nasemte a kingahna dingin, amuan huai khangnote in pilna a tuamtuam leh Lai Siangtho thumaan a sin theihna ding uh pilsinna phualpite gam tuamtuam ah a kiphuh ding Pasian in deih hi. Tua mite in na hong sep uh ciangin, mun thak te-a tu lai thumaan tangkona ah hong madawk ding uh hi.

            Ih munpi lute panin thuhilhsia dinga ih sawl khiat ding te’ pilsinna banah, amau’ gam mite leh amau’ vengte’a dinga na a sem dingin, leitung mun tuamtuam ah mite pattah ding kisam hi. A hih theih liai nak leh amau’ nasepna ding mun mah ah pilsinna nei le-uh amaute’a dingin hoih zaw in muan huai zaw hi. A nasempa’a ding a hi-a, nasep mai nawtna dingin a hi zongin, khual gamlapi-a pilna va zon pen a hoih bel hi khol lo hi. 6T, laimai 137.

            A pawlpi-in a hi-a a mimalin ih hi zongin, thu khenna ah ih pen nop leh, ih khut sungah hong kipianasep lianpi pen lam tuamtuam tawh a sem siam dingin ih khangnote ih pattahna ding ah ih hanciam mahmah lai kul ding hi. A masuan uh cihtakna leh hanciamna tawh a sem ding nasem siamte a kisap manin Khris’ nasepna a nawngkai lohna dingin, kivakna (talent) a nei lungsim siangthote tha pia-a a kihilh theihna ding , a sang bel paizia dung zila a kipuah theihna dingin vaihawmna hoih ih neih ding kisam hi. CT, laimai 43.

Ih Sangte A hoih Na’nga Panpihna

            Nute pate in a tate uh a pianthakna dingin sang siate tawh kikopin hanciamin a sep ding uh a hihi. Ih inn uah khalam lawpna thaksuaha a cidam denna ding leh, a tate uh Topa’ deihna bangin pantaha a hilhna dingun hanciam uh hen. A tate uh tawh ni simin lai Siangtho sin khopna hun khatta zang uh hen. Tua hi leh pilsinna hun pen a nuam leh phattuamna a nei khat suak sak thei ding uha, a tate uh hot khiatna a ngah sak theihna ding uha a hanciamna uah a tate un amaute a muanna uh hong khang ding hi. 6T, laimai 199.

            Sang naupang kim khatte a phunsa leh a lungkim losa-in inn hong ciah uha, nute pate leh pawlpi mite in amau’ thu-uanggen leh thu-langgente na ngai uh hi. Amaute in a thu a lang nih tuaka a ngaihsut siam ding uh kisam hi. Tua hi lo-in amaute in tua deih kaih thu zak saknate pen, sangpi tawh amaute kikal ah kidalna suak sak zaw uh hi. Tua tak ciangin amaute in sangpi-a a paiziate a lauthawngna uh, a lungkim lohnate uh leh a muanmawhnate uh hong pulak ta uh hi. Tua banga hihna in siatna lianpi piang sak hi. Lungkim lohna kammalte a kilawh thei natna bangin kizelin, mite’ lungsim sung a tun khit ciangin phiat kik ding haksa ta hi. Lim takin kikan tel hi leh siate leh siapite’ tungah khialhna a kimu lo ding kim lai, a thu a kigengen ciangin behlapna hong tam semsemin, a sawtna ciangin thusiapi khat hong suak hi. Siate in sang ki-ukna zanga a sep ding uh a sem na hi lela, tua bangin sem kei leh lah sang pen a gina lo ding na hi zaw hi.

            Siate’ mun ah a om dingin nute pate kiseh uh hen la, lai tan khempeuha lungsim tuamtuam tawh a om sang naupang a zalomte’ omna sang uka; hilh ding pen bang zahta-in haksa ding cih mu le-uh, a ngaihsutna uh hong kilamdang pah ding hi. Naupang kimkhatte a inn uah kihilh ngei lo a hih lam zong a ngaihsut ding uh a hihi. A citak lo nute pate in a don loh uh naupangte’a dingin bang hiam khat a kihih kei leh Jesu in amaute sang zo lo ding hi. Amaute lim taka a ki-uk zawh kei leh tu-a amaute’ nuntakna in man nei lo dinga, tawntung nuntakna zong ngah kha lo ding uh hi. 4T, laimai428,429.

            A citak siate’ hanciamna a thukim pih lohna uah nute pate tampi in khial uh hi. Theihna lah a kicing nai lo, khen tel siamna lah a nei nai lo khangnote leh naupangte in, siate’ ngimna leh sepziate a vekin thei khin zo den lo uh hi. Hi napi sang ah a kihih a kigente inn ah a hong gen uh ciangin nute pate in innkuan bup kikup pihin, siate’ sepzia pen gensiat talai ciam thei uh hi. Hih mun ah naupangte in a mangngilh kik pak theih lo ding uh thute sin kha uh hi. Amaute in a kingeina-seh nai loh uh ukna a thuak khak uha, nakpi-a lai sim ding khawnga a kisawl ciangin, khen tel siamna a nei lo a nute a pate uh kiangah hihpihna leh noptatna ngen uh hi. Tua bangin lung haamna leh lungkim lohnate tha kipia a hih manin sang buppi in ginat lohna huzap thuak lawha, siate’ van puak hong gik semsem hi. A hi zongin supna lian a thuak pen nute pate in a uk sim loh tanote hi zaw hi. Maan taka pattahna tawh a kibawl pha thei ding ginat lohnate pen kum tampi ki-awi-am a hih manin, a mite’ kiman theihna kisia mang khin sak hi. FE, laimai 64,65.

Lungdam

Jk,Lianpu

Pawlpi thulam lak bu 2na.

Zia-leh-tang Khantohna A Thupina

               Pasian in nute pate tungah nasep pia hi. Pasian’ lim-leh-lai a sun dinga a tate uh’ zia-leh-tong a puah ding uh a hihi. Ama hehpihna tawh tua nasep amaute in sem zo ding hi. Amaute’ utna makaiha a lunggulhna uh a uk zawhna dingun, lungduaina, hanciamna banah thukhona leh khensatna kisam hi. A kikho lo lo sungah ling leh lopa bek po ding hi. Kimanna leh hoih na an a la nuam mi in, a leitang hahin khaici a vawh kula, an kungno phung teng to-in, kiakte kho khia-in a phungvuh kul hi. Tua hi leh an kung hoihin a puah a sepna thaman tampi ngah ding hi.

              Mihing’ tunga a kipia ngei nasep khempeuh lakah zia-leh-tong puah tohna a thupi bel hi-a, ni dang sang in tu hunin hanciam mahmah zawk ding kisam lai hi. Khang masa te’ hun lai-in tu-a zaha a thupi nasep ding kisawl ngei nai lo hi. Tu lai nungak tangvalte in a phut khak uh lauhuainate zaha a lian ni dangin kiphu kha ngei lo hi. CG, laimai 169.

           Zia-leh-tong thakhauhna ah thu nih kihela – utna-I hatna leh pumpi ki-ukna-I hatna a hihi. Khangno tampi in a ki-uk lo lunggulhna-I hatna pen zia-leh-tong hatna sa kha uh hi. A taktakin a lunggulhna in a uk zawh mi pen a thanem mi a hihi. Mihing’ liatna leh thupina taktak pen amah a uk zo lawpna-I hatna tawh hi zaw lo-in, ama uk zawh zawk lawpna-I hatna tawh kiteh zaw hi. Mi thahat ih cih te in a kikhel bawl lam thei gige napi-a, a hehna iip zo-a a galte a mai sak zo te a hihi. Tua bang mite galhang taktak a hihi.

                 Pasian in amaute a piak hatnate zang uh hi leh amaute in zia-leh-tong hoih nei ding uha, Khris lamah mi tampi ngah theihna ding huzap nei ding uh hi napi in, mi tampi in a pian dan ding uh neu ngaihsut uh a hih manin, amaute khangto lo-in guautau den ding uh hi. Thu theihna in hatna a hihi; a hi zongin pilna tawh kisai siamna in, lungsim hoihna a om kei leh siatna lamah hatna a hihi.

            Pasian in eite, pilna leh gamtat hatnate hong pia-a, a hi zongin mi-kim in eima zia-leh-tong ciat a lam ding ih hi zaw hi. Ni sima a kilam toto ding ih hihi. Bang ci lam ih hiam cih ih kingaihsut ding, tawntung Suangpi tungah a lam ih hih ding Pasian’ Thu in eite hong hilh hi. Ih nasepna a hi bang liana hong kidawk hun hong tung ding hi. Tu mahmaha kimanna a nei ding leh nung cianga a sang zaw nuntakna’a ding zia-leh-tong ih neih theihna dingin, mi khempeuh in Pasian’ hong piak hatnate ih puah ding hun pen tu laitak a hihi.

        Nuntak gamtat khempeuh in bang zahta-in a thupi kei zongin zia-leh-tong zuunna ah huzap nei veve hi. Zia-leh-tong hoih pen leitung neih-leh-lamte sangin manpha zawa, tua zia-leh-tong zuunna nasep in mihing’ sep theih khempeuh lak panin a thupi bel a hihi.

            Thu khat peuh tawh kizuun zia-leh-tongte pen kikhel thei-in kithuhual lo-a, teknek nianua hi. Tua bang zia-leh-tong a neite in nuntakna ah ngimna leh tupna a sang nei lo hi. Mi dangte’ zia-leh-tong tungah zong huzap hoih nei zo lo uh hi. Amaute tupna nei lo, hatna nei lo-in om lel uh hi.

                 Tu-a hong kipia tom kal ih nuntakna pen hoih taka ih puah toh ding a hihi. Pasian in A pawlpi pen a hing, a ki-ap, na a sem pawlpi a hih ding deih hi. A hi zongin ih mite, pawlpi khat hihna tawh tu laitakin tua bang dinmun tawh kigamla lai hi. Pasian in, etteh tham cing Pa’ nung a zui ding, Pasian leh thumaan’a ding kician taka huzap a nei ding-a hat, a hang mite, a thanuam, a hing Khristiante hong sam hi. Thupi-a a siangtho bel thumaante Topa in eite hong kem sak a hih mah bangin, eite in ih nuntakna leh ih zia ih tong ah tua te’ huzap ih kilat sak ding a hihi. 4T, laimai656,657.

Tate Hilhna Ah Ka Thu Theih Khat

          Nupi kim khatte in a tate uh a bawl dan kibang kim lo hi. Khat veivei a lauhuai zah dong dingin a nop uh zui napi-in, khat veivei lah a naupang lungsim uh a lungdam mahmah sak thei ding siatna a om lo gual nopnate ah kham thei zel uh hi. Hih mun ah amaute in Khris etteh lo uh hi. Khris in naupangnote it hi. A lungsim ding uh zong theih saka, nuam a saknate uh leh haksa a saknate uh zong theih pih hi. MH,389,390.

        Naupangte in kikholhpih a tuak peuh tawh vak ding a hi-a, pawi a tuak peuh ah pai ding a hi zongin a hong nget ciangin, “Tate aw, hong pai sak zo kei ning; tu dih un, a hang hong gen ning. A tawntung’a ding leh Pasian’a dinga na a sem hi’ng. Pasian in kei’ kep dingin note ka khut sungah hong pia hi. Ka tate aw, note’a dingin Pasian’ taanga a om hi’ng; Pasian’ thukhen ni ciangin thusitna thuak ding ka hih mah bangin note kong vil kul hi. A tate’ tunga a masuan a zo lo khat, kei’ luah ding mun pen galpa a luah masa sak khata vantung laibu sungah na nu uh’ min a kiciapteh ding deih na hi uh hiam? Tate aw, lam maan koi hiam cih kong gen ding hi. Tua ciangin na nu uh’ kiang panin pai khia-a siatna lampi tot ding na teel zawk uh leh na nu uh ka peng dinga, no na hih uh leh na mawhna uh hangin na thuak ding uh hi,” ci un.

          Hih bang danin ka tate ka hih hi. Gen ding teng ka khit ma-in amaute kapin, “Thu hong nget sak lo ding na hiam?” hong ci uh hi. Amaute thu ka nget sak ding ka nial ngei kei hi. A kiang uah khuk dinin amaute tawh thu ka ngen hi. Tua ciangin kei pai khia-in, zingsang ni suah dong zan thapai-in, galpa’ hong bum na a kileh zawhna dingin thu ka ngena, gual zawhna ka ngah hi. Zan khawvakin gimna ka thuak hangin, ka tate in hong ngawng kawi-a, “Nu aw, ka pai nopna mun uha nong pai sak loh lungdam mahmah ung. Pai hi le ung kikhial mahmah ding cih ka thei uh hi,” a hong cih uh ciangin kimeet ka sa peuhmah hi.

                Nute pate aw, deihna taktak na neih uh leh hih bang dana na hih ding uh a hihi. Pasian’ gam sungah na tate uh na tun sak nop uh leh hih nasep pen masuana na neih ding uh a hihi. AH, laimai 528,529.

              Hih gam ah a hi-a, gam dang khat peuh ah a hi zongin, khuapi liante panin a gamla zek ah amaute a kikhen khiat kei uh leh, khangnote tungah pilna hoih kipia thei ngei lo ding hi. Khawpi lian sunga ngeinate leh gamtatnate in khangnote’ lungsim ah thumaan lutsak thei lo hi. FE, laimai 312.

Pasian’ Makaihna Tam Zaw Kisam

                 Na tate lim taka pattah ding don kei lecin gawtna thuak lo-in na om kei ding hi. Amaute’ ginat lohna in nang’ cihtak lohna hong selpho ding hi. Taai lo-a na khah khong tatsiatnte, ngongtatnate, zahtak lohna leh thuman lohnate, thadahna leh awlmawh mel neih loh na te in na min uh hong dai sak dinga, na nuntakna uah dahna hong tun ding hi. Na tate uh’ masuan ding a tam pen no’ khut sungah om hi. Na sep ding uh na sep kei uh leh galpa’ khut sungah amaute na tung kha sak ding uha, mi dangte a susia dingin ama khutzat na suak kha sak ding uh hi. A hi zongin lim takin amaute na hilh uha, na nuntakna mahmah uh tawh amaute’ mai ah lim hoih na lah uh leh, amaute Khris kiang na tun thei ding uha, amaute in zong mi dangte’ tungah huzap nei sawnin, tua bangin nangma hangin mi tampi in hatkhiatna a ngah thei ding uh hi. 7T, laimai 66.

             Ih tate tawh a ol thei thei-a ih kizop ding Pasian in deih hi. Khanghamsate in kum tampi a na sin khaksate uh naupangte in sin kha nai lo uh a hih lam ih mangngilh kha thei hi. Na khempeuh ah ei’ ngaihsutna banga naupangte hong tat kei uh leh amaute pai pih in la, a thu khempeuh Ama kiangah gen in Tua ciangin amaute’ tungah Ama thupha tung ding hi ci’n um in. CG, laimai 287.

           Naupangte in thunget hun zahtaka a pi-bawlna dingun hilh ding a hihi. Na sem dingin inn pan kuan khiat ma-in, innkuan bup kikai khawmin, pa in, pa a om loh ciangin nu in, sun tawntung amaute a kepna dingin Pasian’ kiangah deihna tak tawh thu ngen ding hi. Lungnemna a dim lungsim leh, no mahmah leh na tate uh’ mai-a om mawh zolna leh lau huainate phawk kawmsa in kiniam khiatin zuan un. Upna tawh biakna tau ah amaute hen un la, Topa in amaute a kepna dingin thum un. Topa’ tungah tua banga a ki-ap naupangte, nasem vantung mite in cing ding uh hi. Zingsang leh nitak, deih taka thungetna leh upna kho tawh a tate uh’ kimkot ah dai a kaih ding uh pen Khristan nute pate’ na sep a hihi. Pasian’ lungkimna dingin bang ci nuntak ding cih lungduai takin amaute hilha, cimtak het lo-in, mite takin amaute a hilh ding uh a hihi. 1T, laimai 397,398.

                Kha Siangtho baptisna ni sima a ngah ding uh hamphatna khat a hih lam na tate uh hilh un. A ma deihnate a sem khia dinga Ama khutzat na hih lam uh Khris mu sak un. Na tate’a dinga na na sepna na zawh theihna ding siamna pen thungetna tawh na ngah thei ding hi. CT, laimai 131.

             Nu’ thungetna-I phattuamna pen ciangtan theih hi lo hi. A neutung uha kipan nupi-papi a suah dong uh, lauhuaina a tuamtuam lakah a tanu a tapate uh’ kianga a khukdin nupi in, a tate’a ding thu a ngetsakna a phattaumna pen thukhenna ni masiah thei kha lo ding hi. Upna tawh Pasian’ Tapa tawh a kizop leh, nu’ khut neem in mawh zolna lak panin a tapa kai khia thei dinga, mawhna sung a tun khak lohna dingin a tanu kham thei ding hi. Leitung lunggulhna in zawhna a ngahna dingin a do ciangin, nu-I itna, khaamna, hanciamna leh cihtakna huzap in thumaan lamah a tate tun pih thei ding hi. AH, laimai266.

            Na tate tunga na sep ding teng hoih taka na sep khit ciangin, amaute Pasian’ kiangah pai pih in la, Ama hong huh na’ng ngen in. Nang’ sep ding teng sem na hihna gen in la, nang’ hih theih loh a hi, Ama hong sepsak ding teng hong sepna dingin upna tawh Pasian’ kiangah ngen in. A lungsim uh a nip sak ding, A Kha Siangtho tawh a neem sak a migit sakna dingin Ama kiangah ngen in. Na thunget hong za ding hi. Na thungetnate Ama’n hong pia nuam hi. Na tate na taai ding a hihna, “a kah uh hangin awi-am loh ding” a hihna leh, hih thute ah Ama Thu man ding a hihna, Ama Thu panin Ama’n nang hong han thawn hi. CG,laimai 256,257.

Zahtak-siamna Leh Thusiamna Hilh In

              Khanghamsate zahtak bawl ding Pasian in deih mahmah hi. “Thumaan lampi ah a om nak leh sam a kang lu in minthanna lukhu a hihi.” Ci hi. Paunak16:31. Tua in gal a donate, a gual zawhnate hong gen hi; vangik a puaknate leh mawh zolna a nialnate hong gen hi. A tawlnga baih ding a gim khete’ thu hong gen in, mun awng om ding a hih lam zong hong gen hi. Hih thu naupangte ngaihsun sak un. Tua hi leh amaute in thusiamna leh zahtak bawlna tawh khanghamte’ lampi a nuam sak suak dinga, “sam kang biaibuai te’ mai ah ding uh la, khanghamte’ maitang zahtak un,” Siam19:32 cih thupiak a zuih uh leh a khang moi lai mahun hoihna leh etlawmna a nei ding uh hi. Ed, laimai 241.

               Thusiamna zong Kha Siangtho thupha khat mah hi-a, mi khempeuh in a neih ding uh a hihi. Tua in pianziate nunnem sak zo-a, tua om kei leh ngongtatin hiam gam ding hi. Khris’ nung a zui hi’ng ci napi-a, a ngongtat, a gilo, a thusiam lo te in Jesu a thei nai lo a hihi. Amau’ cihtaknate muan lah huai lo kha ding, amau’ thumaannate kawk bang lo kha ding a hih hangin, cihtakna leh thumaanna in migit lohna leh thusiam lohna mai sak thei lo ding hi. PK, laimai 237.

Lai at,

Jk,Lianpu

Pawlpi thulam lak 2na.