Pasian Tawlngak Ni Leh Zeisu Thoh Kik Ni

1.Lai Siangtho Bu 66, Piancilna pan Maangmuhna ih Laisiangtho Bu kibang

2.PA,TA, KHASIANGTHO, zong ih up na kibang

3.Abraham,Issac,Jacob Pasian ci in ih biak Pasian zong kibang

4.Vantung gam tunding zong ih lam et na, ih upna kibang .... hih a tung a teng zong ki bang napi in,bang hang in NIPI ni nam nih ki nei sese???




Pasian Tawlngak Ni .....tawh kisai Laisiangtho mun pawlkhat

Piancilna 2:2-3
Tua ahih ciangin Pasian in ni sagih ni thupha pia-in siangthosak hi. Bang hang hiam cih leh pian'sak nasepna ama nasep khempeuh panin tua ni-in Pasian a tawlnga hi.

Paikhiatna16:22-31
22.A ni guk ni-in amaute in an a zah nih, lawhta nih ciat, khawm uh hi. Mihon makaite khempeuh hong pai-in Moses kiangah a gen uh ciangin ²³amah in amaute kiangah, “ Topa' hong thupiak hih bang ahi hi: ‘Zing ciang pen a thupi-a tawlngak ni, Topa-a' dingin sabbath siangtho ni ahi hi. Na em dingte uh emin, na huan dingte uh huan un la, a omlai teng zingsang ciangdong koih un,’ ci hi,” ci-in a gen hi.* ²⁴Tua ahih ciangin amaute in Moses' sawl bangin zingsang dong koih uh hi. Ninglo a, than zong tulo hi. ²⁵Moses in, “Tuni-in ne un; tuni pen Topa-a' dingin Sabbath ahi hi. Tuni-in a pualamah na mu kei ding uh hi. ²⁶Note in ni guk sung na khawm ding uh a, ahi zongin sabbath ni ahi a ni sagih ni-in bangmah omlo ding hi,” a ci hi.

²⁷A ni sagih ni-in a kaikhawm dingin mi pawlkhat kuankhia uh a, ahi zongin amaute in bangmah mulo uh hi. ²⁸ Topa in Moses kiangah, “Ka thupiakte leh ka thute zuih ding bang tanvei nial ding na hi uh hiam? ²⁹Thei un! Topa in note' tungah sabbath hong piazo hi. Tua ahih ciangin ni guk ni-in amah in note tungah ni nih khom ding an hong pia hi. Note na milipun nomau' omna ciatah om un. A ni sagih ni-in ama omna panin kuamah paikhia kei hen,” a ci hi. ³⁰Tua ahih ciangin a ni sagih ni-in mite tawlnga uh hi.
³¹Tu-in Israel mite in a min manna ci uh hi. Tua pen nannan tang tawh kibangin a meel kang a, a limna pen khuaizu tawh a kibawl mohpheng tawh kibang hi.

Paikhiatna 20:8-11

8“Sabbath ni a siangtho-a zat ding phawk un.*⁹Ni guk sung nomau' na semin na nasep ding khempeuh uh na hih ding uh hi. ¹⁰Ahi zongin a ni sagih ni pen Topa note' Pasian' Sabbath ni ahi hi. Tua ni-in note, na tapate, na tanute, na nasempate, na nasemnute, na ganhing uh ahi a, peemtate in ahi zongin na bangmah na sem kei ding uh hi.* ¹¹Bang hang hiam cih leh a ni guk sung tengin Topa in van leh lei, tuipi leh tuate sunga om khempeuh bawl a, a ni sagih ni tawlnga hi. Tua ahih ciangin Topa in Sabbath ni thupha pia-in siangthosak hi.

Paikhiatna 31:12-17

12 Topa in Moses kiangah, ¹³“Israel mite tungah hih bangin gen in: ‘Keima Sabbath ni-in note na tawlnga ding uh hi. Bang hang hiam cih leh hih pen Topa ahi keimah in note a hong siangthosak ka hihna na theihna dingun na khang tawntungun keimah leh note' kikalah lim khat hi ding hi. ¹⁴Sabbath ni-in note na tawlnga ding uh hi. Bang hang hiam cih leh note-a' dingin a siangtho ahi hi. Tua ni-in a tawlngalo mi peuhmah kithat ding a, tua ni-in na a sem mi peuhmah ama mite' kiang panin kikhenkhia ding hi. ¹⁵Ni guk sungin nasep kizo ding hi. Ahih hangin a ni sagih ni pen a thupi-a tawlngakna Sabbath ni hi a, Topa' tungah siangtho hi. Sabbath ni-in nasep khat peuhpeuh a sem mi peuhmah kithat ding hi.* ¹⁶Tua ahih ciangin a tawntung thuciamna-in amau' khang tawntungin Sabbath tangin, Israel mite in Sabbath kem ding uh hi. ¹⁷Ni guk sung teng Topa in van leh lei bawlin, a ni sagih ni-in amah tawlnga a, a tha dimsak kik hi. Keimah leh Israel mite' kikalah hih Sabbath ni pen lim khat hi tawntung ding hi, ci hi,’ ci in,” a ci hi.
Siampi Laibu 23:3
3Ni guk sungin nasep kizo ding a, ahih hangin a ni sagih ni pen a thupi tawlngakna Sabbath, a siangtho kikhopna ahi hi. Note in tua ni-in na na sem kei ding uh hi. Tua pen note' ten'na khempeuhah Topa-a' dingin Sabbath ahi hi.

Thu Hilhkikna 5:12-15

12“‘ Topa note' Pasian in hong thupiak bangin na sian'thosakna dingun Sabbath ni tang un.* ¹³Ni guk sung na semin na nasep ding khempeuh uh na hih ding uh hi.¹⁴Ahih hangin a ni sagih ni pen Topa note' Pasian' Sabbath ni ahi hi. Tua ni-in note bangin na nasem numei leh na nasem pasalte uh a tawlngak theihna dingin note, na tapate, na tanute, na nasemnute, na nasempate, na bawngtal, na la, na ganhing khat peuhpeuh uh leh na huang sung uha om zinte in na khat peuhpeuh semlo ding uh hi.* ¹⁵Egypt-ah nasem na hihna uh leh tua lai panin Topa na Pasian un a vangliatna khut leh a thahatna tawh hong paikhiatpihna na phawk ding uh hi. Tua ahih ciangin Sabbath ni na tan' ding uh Topa note' Pasian in thu hong pia hi.

Isaiah 56:6-7

6“Ama na a sem ding, Topa' min a it ding,

• ama nasem a suak dingin Topa pawlin
• amah a beel gamdang mite,
• Sabbath ni tangin a siasaklo,
• ka thuciamna hoihtakin
• a lenkip mi peuhmah,
• 
  

⁷ka mual siangtho-ah paipihin

• keima thungetna innsungah
• ka lungdamsak ding a,

• amaute' meihal biakna leh
• a biakpiaknate uh
• ka biakna tau tungah kisang ding hi.
• Bang hang hiam cih leh ka inn pen
• mi khempeuh-a' dingin
• thungetna inn kici ding hi.
• 
  

  Isaiah 58:13-14

• 13Note in Sabbath siangtho sakin,
  • keima ni siangtho ni-in
• na nasepna panun khawlin
• Sabbath ni pen deihhuai sa-in,
• Topa' ni siangtho pen
• pahtawihuai na cih uh a,
• note in pahtawi-in
• note' deihbang zuiloin,
• note' ut bang hiloin
• motpau loin na om uh leh,
• 
  

¹⁴keimah biakna hangin

• lungdamna na ngah ding uh a,
• leitung khempeuhah
• pahtawina kong ngahsak ding hi.
• Na pu uh Jakob tungah ka piak leitang
• luahin nuam na sa ding uh hi.
• Topa ahi keimah in
• hih thu ka gen khin hi, a ci hi.
• 
  

  Ezekiel 20:12-24

• 
  12 Topa ahi keimah in amaute pen mi siangtho-in ka bawlna thu a phawkna dingun kote' kikalah thukimna limin Sabbath tan' ding thu ka pia hi.* ¹³Ahi zongin Israel mite in gamlak nangawnah kei hong dem uh a, a zui peuhpeuh in nuntakna a ngahna ding uh ahi keima thukhamte leh ka thupiaknate a nial uh hi. Ka Sabbath-te zong nakpi takin siasak uh hi. Tua ahih manin amaute a maiman'na dingin ka hehnateng gamlakah a thuaksakgawp dingin ka kithawi hi.* ¹⁴Ahi zongin Egypt gam panin amaute ka paikhiatpihna minam dangte in hong mu khin ahih manin tua bangin gamta leng, keima mindaina ding mah hi zel ahih manin amaute bangmah ka cih kei hi. ¹⁵Tua ahih manin bawngnawi leh khuaizu tui bangin a luan'na, gam hoihpen ahi, amaute tungah ka piaksa gamah amaute ka paipih lohna ding thu, gamlakah ka kiciam hi.* ¹⁶Tua bangin kiciamna ka bawlna pen, amaute in ka thupiaknate nialin, ka thukhamte zuilo uh a, ka Sabbath-te siasak uh hi. Amaute in kei hong biak ding uh sangin milim biak ding utzaw uh ahihna hang ahi hi. ¹⁷“Ahi zongin amaute ka khasiat a, gamlakah amaute ka susia kei a, ka maimangsak kei hi. ¹⁸A tate uh kiangah, ‘Na pu na pate un a bawl thukhamte zui kei un la, amaute' tat ngeinate zui kei un. A milim biakte uh tawh zong kininsak kei un. ¹⁹Kei pen Topa ahi note' Pasian ka hi hi. Ka thukhamte zui un la, ka thupiaknate bangin gamta un. ²⁰Kei pen Topa ahi note' Pasian ka hihna na phawkna ding uh leh note tawh i bawlsa thukimna lim dingin Sabbath-te na siangthosak un,’ ka ci hi.
  ²¹“Ahi zongin a tate nangawn un kei hong dem uh hi. A zuite in nuntakna a ngahna ding ahi ka thukhamte palsatin ka thupiaknate manglo uh a, Sabbath-te siasak uh hi. Tua ahih manin, ka hehnateng gamlakah thuaksak gawpin, amaute a sumai dingin ka kithawi hi. ²²Ahi zongin tua bangin hih leng, Egypt gam panin Israel mite ka paikhiatpih hong mu mite' lakah ka min dai ding ahih manin amaute ka susia kei hi. ²³Tua ahih manin leitung gam khempeuhah amaute ka thehthang gawpna ding thu, amaute tungah kiciamna dang khat tua gamlakah ka bawl leuleu hi.* ²⁴Hih bangin kiciamna ka bawlna pen, amaute in ka thupiaknate nialin, ka thukhamte zuilo uh a, ka Sabbath-te siasak uh hi. Tua banah a pu a pate un a biak milimte mah a biakna hang uh ahi hi.

• Ezekiel 22

  Jerusalem' Mawhnate

• 8.Mun siangthote zong zahtakna mel kinei loin, Sabbath-te zong kitanglo hi.
• 
  

  Ezekiel 23:38-39

• ³⁸Amaute' gamtatna tu-a bangteng bek hilo lai hi. Ka biakinn ninsak uh a, ka Sabbath-te zong palsat lai uh hi. ³⁹Milim biakna-in ka tate a gawh khit uh ciangin tua ni mahin ka biakinn-ah pai-in ninsak uh hi. Ka biakinn sungah hih bangin gamta tazen uh hi.
• 
  

  Nehemiah 13:15-22

• 15Tua hun lai-in Judah gamsungah mite in Sabbath ni-in leenggah sukin, a khawhsate uh khawmin late tungah suanin, leenggah, thei, leh van namkim, Sabbath ni-in Jerusalem-ah hong puakna ka mu hi. Tua ni-in na a zuakna uh hangin ka lungkimlohna amaute tungah ka gen hi.* ¹⁶Jerusalem khuasunga teng Taia khuamite in zong ngasa leh van namkim hong paipihin Judah mite tung leh Jerusalem khuasungah Sabbath ni-in zuak uh hi. ¹⁷Tua ciangin Judah uliante tungah lungkim loin amaute kiangah,“Bang hangin hih bangin hoihlohna gamta-in Sabbath ni ninsak ngam na hi uh hiam? ¹⁸Na pu na pate uh tu-a bang teekin a gamtat manin eite tung leh hih khuapi tungah hih bang siatna khempeuh hong tung hilo ahi hiam? Tua hinapi-in note in Sabbath ni nitsakna tawh Israel tungah hehna tamzaw na tungsak uh hi,” ka ci hi. ¹⁹Tua hi a, Sabbath ni ding khuamial ciangin kongpite a kikhakna ding ka sawl a, Sabbath bei khit mateng a kihon'lohna dingin thu ka pia hi. Tua ciangin, Sabbath ni-in khua sungah van hong kilutpih lohna dingin kongpite a cing dingin ka nasemte pawlkhat ka koih hi. ²⁰Tua ahih manin sumbukte leh na nam tuamtuam a zuakte, khatvei nihvei khawng Jerusalem khua pualamah giak uh hi. ²¹Ahi zongin amaute hilhkholin amaute kiangah, “Bang hangin kulh gei-ah giak na hi uh hiam? Nong giah kik uh leh note tungah thu kong bawl ding hi,” ka ci hi. Tua huna kipanin Sabbath ni-in amaute hong pai nawnlo uh hi. ²²Tua ciangin Sabbath ni a siangtho-in a omsak theihna dingun amaute kisian'suah tawmin kongpite hong cin'na dingun Levi mite ka sawl hi. Ka Pasian aw, hih thu-ah zong hong phawk in la, na itna tawh kizui-in siatna panin kei hong pengsak in.

--
Topa Zeisu in Pasian Tawkngak Ni Bang ci Zat

Matthai 12:1,8,10,12

1.Tua zawh a sawtloin Sabbath ni khatin mangbuh lo nawkin Jesuh a pai hi. A nungzuite a gil uh kial ahih manin mangbuhvuite zutin a ne uh hi.

8.Bang hang hiam cih leh Mihing Tapa pen Sabbath ni a ukpa ahi hi," ci-in a dawng hi.10.Tua lai-ah a khut langkhat a zaw mi khat a na om hi. Jesuh gamta khial hi, ci-in a mawhna a zong nuam mi pawlkhat tua lai-ah om uh ahih manin tua mite in Jesuh kiangah, "Sabbath ni-in cina damsak ding a kilawm mah ahi hiam?" ci-in a dong uh hi.
12.Mi pen tuu sangin nakpi takin manphazaw ahih manin Sabbath ni-in a hoih sep ding a kilawm ahi hi," ci-in a dawn' khit ciangin.

Mark 2:27-28

27 Tua ciangin amah in amaute kiangah, “Mite adingin Sabbath kibawl hi-a Sabbath ni adingin mite a kibawl kei hi.28 Tua hi-a Mihing Tapa, Sabbath ni Topa nangawn ahi hi,” a ci hi.

Luke 13:13-16

13 Tua ciangin amah in tuanu tungah a khutte nga-a, tua khit phetin tuanu dingtang thei-a Pasian a phat hi.14 Sabbath ni-in Jesu in cina damsak ahi manin synagogue ukpa lungkim lo a mipite kiangah, “Nasep hun ding ni guktak a om hi. Tua ahi ciangin a kidamsak dingin tua nite in hong pai unla, Sabbath ni-in hong pai kei zaw un,” a ci hi.15 Topa in tuapa kiangah, “No kineihsiamte, Sabbath ni-in na bawngte na laate uh a buk pan sutin nomau ciat in tui pia dingin paipih hi lo na hi uh hiam?16 Tua ahileh kum sawm le giat sungtak Satan in a hencip hih Abraham tanu a kihencipna pan Sabbath ni-in khahkhiat huaizaw lo ding ahi hiam?” ci-in a dawng hi.

Luke 14:1-6

1 Sabbath ni khat, a kipi-et mahmah Pharisee khat innah Jesu an ne dingin a pai ciangin amah limtakin a encik uh hi.2 Tua lai-ah, ama mai-ah tuipuak natna a vei mi khat a om hi.3 Jesu in Pharisee-te le thukham siamte kiangah, “Sabbath ni-a cina damsak ding thukham tawh kituak hiam, kituak lo hiam?” ci-in a dong hi.4 Ahi hangin amaute a dai khipkhep uh hi. Tua ciangin amah in, tua mipa lenin damsaka, a ciahsak hi.5 Tua khit ciangin Jesu in amaute kiangah, “Note lakah khatpeuh in a tapa ahikeh a bawngtal khat, Sabbath ni-in tuikhuk sungah kia leh a kaikhiapah lo ding kua om ahi hiam?” ci-in a dong hi.6 Amaute in gen ding a nei kei uh hi.
John 5:16-1816 Tua ciangin Jesu in hih nate Sabbath ni-a sem ahi manin Jew-te in amah a bawlsia uh hi.17 Jesu in amaute kiangah, “Ka pa in tuni mahmah dongin na sem tawntunga, kei zong ka sem hi,” a ci hi.18 Jesu in Sabbath ni a tan loh man bek hi loin Pasian nangawn ama Pa a cihna hang le Pasian tawh a kikim-a a kikoihna thute hangin Jew-te in amah thah ding a hanciam semsem uh hi.

John 9:13-16

13 Amaute in Pharisee-te kiangah mittaw ngei pa a paipih uh hi.14 Jesu in buan bawla mipa mit a vaksak ni, Sabbath ni khat ahi hi.15 Tua ahi ciangin Pharisee-te in zong khua bangci muh kik hiam, cih amah a dong uh hi. Mipa in, “Ka mit ah buan hong nuhsaka ka sil leh tu-in khua ka mu thei hi,” ci-in a dawng hi.

Sawltak Tangthu13:14

14.Ahi zongin Perga khua panin amaute paisuak uh a, Pisidia gam Antiok khua a tung uh hi. Sabbath ni-in kikhopna inn-ah pai-in a tu uh hi.

Sawltak Tangthu 17:2

2.A pai ngei zel mah bangin Paul zong kikhopna inn-ah pai a, Sabbath ni thum sung Lai Siangtho siksanin mite tawh thu kikum a,

Sawltak Tangthu 18:4

4.Sabbath ni simin kikhopna inn-ah limtakin thu gen a, Jew mi leh Grik mite in thu a upna dingun a hanciam hi.

Hebru 4:3-6

3.Ahi zongin eite ihih leh amah in, "Ka heh manin ka kiciam a, 'Hih leitangah hong lutlo ding uh a, ka tawlngakna munah hong pai-in kei tawh hong tawlnga khawm ngeilo ding uh hi,'" a cihte bang hiloin ei thu umte pen Pasian tawh a tawlnga khawm ihi hi. Leitung a pian'sak cil peka kipanin a nasep a mankhin hinapi-in tu-a bangin thu gen veve lai hi.

4.Lai Siangtho mun khatah, "A ni sagih ni-in a nasepna khempeuh panin Pasian tawlnga hi," ci-in ni sagihna thu tawh kisai na gen hi.

5.Hih thu mah na kigenkik a, "Ka tawlngakna munah hong pai-in kei tawh hong tawlnga ngeilo ding uh hi," na ci kik hi.

6.Lungdamna Thu a za masate in umlo uh ahih manin Pasian tawh va tawlnga khawm theilo uh hi. Tua ahih manin va pai-in Pasian tawh a tawlnga khawm ding mi pawlkhat omlai hi.

7."Tuni," cihna kammal na omlai ahih manin Pasian in nidang khat seh lai ahihna thu hong kilang hi. Lai Siangtho sungah, "Tuni-in Pasian' aw na zak uh leh na lungsim uh khauhsak nawn kei un," a cihna mun i mat khitsa mah bangin tuazawh kum tampi khit ciangin David tung tawnin thu hong genkik hi.

8.Joshua in Pasian' tawlngakna munah mite tun'pih khin hi leh Pasian in a nidang khat thu nunggen nawnlo ding hi.

9.Tua ahih manin tu-a thu om zia-ah ci lehang ni sagih ni-in Pasian a tawlngak mah bangin Pasian' mite a tawlngakna ding omlai hi.

10.Bang hang hiam cih leh a nasepna panin Pasian a tawlngak mah bangin va pai-in Pasian tawh a tawlngate khempeuh zong a nasepna panun khawl ding uh hi.

11.Tua ahih manin amaute in a uploh manun Pasian' tawlngakna munah a lutzawhloh uh bang hiloin va pai-in Pasian tawh i tawlngak khawm theihna dingin hanciam ciat ni.

Johan 14:15

15.Tua ciangin Jesuh in, "Kei na hong it uh leh ka thupiakte zong na zui ding uh hi.

James 2:2626.
Tua ahih manin hu a diiklo, hu a sanglo pumpi pen a si ahih mah bangin sepna tawh a kizomlo upna zong a si ahi hi.

Matthai 5:17-18

17."Moses Thukham leh kamsangte' thuhilhnate a phiat dingin hong pai hi, ci-in hong ngaihsun kei un. Tuate a phiat dingin a hong pai hiloin, amaute' hilhna a kicingsak dingin a hong pai ka hizaw hi.

18.Hoihtakin na phawk ding uh thu panin: Van leh lei a bei mateng, hih thukhamte a neupen khat nangawn' deihna tangtung lopi-in mawkmailo ding hi.

Zeisu Thoh Kik Ni

Sawltak Tangthu 20:7

7 Nipikal ni masa pen ni-in anlum balkham dingin ka kikhawm uh hi. Paul in mite kiangah thu gena, a zing ciangin paisan sawm ahi manin zankim dong thu a gen niloh hi.

Luke 24 1:7

1 Nipikal ni masa pen ni, zingsang phalvak tungin tua numeite amau bawlkholhsa gimnamtuite kengin hanah a hawh uh hi.2 Amaute in tua han pana suangtum kilikkhiasa a mu uh hi.3 Ahi hangin a sungah a lut uh leh Topa Jesu luang a mu kei uh hi.4 Hih thu ah amaute lungmangin a om laitakun, a puante uh khuaphialep banga tee zalzal pasal nih a gei uah thakhatin a ding hi.5 Tua numeite lau lua mahmah uh ahi manin kunsukin amai uh lei-ah a phum uh hi. Ahi hangin tua mite in amaute kiangah, “Note in bang hangin misite lakah mihing zong na hi uh hiam?6 Amah hih lai-ah om lo hi; amah tho kik zo hi! Amah note tawh Galilee gama a om lai-in note kiangah,7 ‘Mihing Tapa mawhnei mite khut sungah kipia dinga, kikilhlumin a ni thumna ni-in kithokiksak ding hi,’ ci-a hong gen phawk gige un,” a ci uh hi.

John 20 :1

1 Nipi kal a ni masa ni, zingsang tung khuamial laipi-in Mary Magdalene, hanah pai-a, han kongvang panin suang kilikkhiasa-a om a mu hi.

John 20 :19

19 Tua nipikal, ni masa ni nitak in, Jew-te kihta-in kong kikalhkhum uh a, a kikhop laitakun, Jesu pai-in amaute lakah va dinga, “Lungmuanna, note tawh om ta hen!” a ci hi.

1 Corinth-te 16 :2

2 Kong pai cianga kaihkhop a kul nawn lo dingin nipi kalkhat a ni masapen simin na sum ngahzah uh tawh kizui-in sehkhia ciat unla, na koih un.
Nipi kal khat aa ni masa ni leh Nipi kal khat aa ni 7 ni pen bang ni in Tawlngak ni hi zaw cih Laisiangtho sung ah a ki gelh bang a hi hi.

Isaiah 66:15-17
15 En un, mei tawisa-in TOPA hong pai a, ama sakollengte pingpei tawh kibang hi. A hehna in a thangpaihna hong puaksuk dinga, amah in meikuangin a taai ding hi.16 Ahang in, TOPA in mi khempeuh tungah mei le namsau-a thahna tawh thu khen dinga, TOPA thahsa mi tampi ahi ding hi.
17 “Huante sunga pai dingin amaute kisiansuah a, amau le amau a kisiangsakte, voksa, zusa le a kihhuai nate ne a, a laizang pena a zuite – amaute a beimang khawm ding uh hi,” TOPA in cikhia hi.

Esther Dimkying Suantak


http://www.dimkying.blogspot.com/

Thukham nuai ah ih om nawn loh Thukham suang te Thukham tawh Thuki khen ding

1. min, mihingte thuahlah ding ze-etna phalo hi. Ze-etna a thuaksak hangin, a suahtakna ding lampi zong sialsak hi. 1 Corinthian 10:13 [Ih zuihlah ding ze-etna kiphal lo- Ih zuihlah ding thukham, Pasian in hong pia lo.] Ze-etna icih pen, Pasian thukham palsatna ding, Dawimang pa in, deih lua ahihman in, hong ze-et ahi zaw hi. Thukham zuihlo ding, paih ding Satan in deihlua zaw hi. Thukham beikhin ci in awlmawk kei leng aa, mite bawltawm ngeina leh thukham te zuileng Satan in a deilua zaw ahi hi. Matt 15:8"Note un, na muuk, na kambek tawh kei nong bia uh hi, na lungsim taktak uh kei tawh ki gamla hi" ci hiau mawk hi. Mark 7:8 "Mite bawltawm ngeina, thukham te na thupi sak zaw uh aa, Pasian thukham na hemkhia uh hi" ci leuleu hi.

Gentehna: Sabbath ni, nisagih ni siangthosak ding, tanh ding Thukham numbat 4 na a hi hi. Tua taangin, nikhat ni, ni masa ni- Sunday ni tawh, mihingte'n i khelsak aa, mihing bawltawm ngeina leh thukham tawh Pasian thukham ih kheeksak mawk hi. Tua bang ding mah hiam? John 4:24 Pasian pen thuman thutak tawh biak ding ci in, kisim tangh tangh bilbel hi. 1 Sam. 15:22 "Pasian in, biakpiakna sang thumanhna dei zaw hi" Pasian sawl bang zuih sawmlo in, mite deih kaih tawh Ni Masa Ni, Thawhkikni pahtawina tawh ibiak pen, Pasian deihna hi mawk ding hiam? ----- Pasian thukham heemkhia in, mite bawltawm ngeina leh thukham tawh a bia kihimawk ven. 

2. Vantung leh Eden huan sung ah, Pasian thukham a langdo masa pen, Dawimangpa hi. Tun zong, Pasian thukham zui te leh Zeisu tetci pan na a keem, a nei te tung ah, Satan - in  galdo ding kuan hi. Heh lua mahmah hi. --- a taanglai Pasian thukham pawlpi te pen, Thukham 10 neite leh Zeisu tetci pana neite hi. Mangmuhna 12:17- in ci hi. Zeisu tetci pana icih pen zong Spirit of prophecy hi. Mangmuhna 19:10 ri Hun nung, Zeisu hong kuma deuh in, apiang ding thute- LST sung, a kigencian nailo- thutampi  kamsangte hong hilhna Spirit of Prophecy - a neite hi ding hi. Joel 2:28

3. Ezekial 20:12,20 Sabbath pen, Pasian leh a mite kiciaptehna "Seal" tazeih hi ci mawk hi. Satan leh a mite kiciaptehna "Seal" pen a dang hi lo in, Sabbath - ai. taang aa, izat, Nimasa Ni hi pah hi. Mark 7:8 Pasian thukham na heemkhia uh aa, mite bawltawm ngeina, thukham na zangh uh hi. Zeisu umte Khasiangtho in "Seal" pia beh lai hi. Ephet 1:13 - Zeisu  athei taktak, a nei taktak, a it taktak, a um taktak te tung bek ah, Khasiangtho ciaptehna kipia beh thei hi.

(a) Zeisu a it taktak mi a thukham zui hi. John 14:15

(b) Zeisu a thei taktak mi a thukham zui hi. 1 John 2:3,4 a zuilo te mi zuau hi a, thuman thutak a sung ah om lo hi.

(c) Zeisu upnan tawh Zeisu thukham ki kipsak hi. Zawmah 3:31

(d) Pasian thukham zuihaklo, vangih hi lo hi. 1 John 5:3 Pasian thukham kuama zuihzawh ding hi lo aci pen, Satan  .... na bil sung aa, a hong gengen a hi zaw hi. 

(e) Zeisu i lungtang sung aa ineih leh, thukham zongh i lungtang sung aa Pasian in hong koih sak ding a hi hi. Heb. 8:10 Zeisu nei leng, na khempeuh piang thei hi. Zeisu thukham zong kizui zo ding a, a siangtho in kinungta thei ding a hi hi. 

(f) Zeisu aw, nang hong um ing, hong it ing ci ngau ngau napi, a thukham i paihsak, i hepkhiatsak sawm den aa le pen, ei sung ah Zeisu itna taktak a om nailo hi zaw hi. Nasepna om lo upna in, upna si hi. James 2:17-19

Upna le Zuihna ton khawm a, itna leh nasepna zong ton khawm hi.

Thukhaim pen- limlang bang aa zatding hi in, ih kha nuntaakna a nit lam hong lak hi bek hi. Thukham in, isiantholo na hong sawpsak theilo hi. Zeisu sisan bek in hong sawpsak thei hi. Tua zong, imawhna i kisikik taktak le i kikhel le beh Zeisu sisan eite aa ding man nei bek hi. Ih mawhna sung inuntak laiteng Zeisu sisan in hong sawpsak tuanlo ding hi.

Paul in, LST sung ah laibu 13 or 14 bang gelh hi. Ama laigelhna sung ah Thukham beikhinta a cihna khempeuh pen, Moses thukham a hi, Zehtan thukham te  vive a gen a hi hi. Manglai in, LS. T sung King James version ah - Ceremornial law, ahih kei leh law of Ordinances kici hi. Zeisu hong sihding a limla, tuno tawh biakpiakna aa zatding thukham te ahi hi. Zeisu sikhin napi, Judah mite un, Zeisu mesiah in sanglo hi. Mesiah hong pailai ding ci uh hi. Tua Zehtan  thukham te zuizui  lai hi. Paul in, tua te a beisak hi ci in, a tai giap giap a hi hi. Paul in, thukham 10 a gen hi peuhmah lo hi.

Leitung mipil tampi, pastor scholar tampi, theologian tampi te'n .... tua mu zolo, tel zolo uh hi. Moses thukham leh Pasian thukham 10 a kibat lo na te zong, khentel theilo uh hi. Mitza kisam lai. Sim sim napi tel theilo, mu thei lo. Khasiangtho mitza a kisam lai lai a hi zaw hi. Thukham tawh kisai LST muntampi etkak kei leng, ki tukalh gawp tawh ki bang hi. Ai hang, tel taktak leng, ki tukalh het lo.

Mite buaina pen, Paul i Laigelh Zawma, Ephet ... Galati-- cih te  tawh a buai  lua uh hi. Paul amah le a mah zong, a ki tukalh gawp tawh kibang hi.

Pu Tong Seal

Mimawkmawk pan Mimawkmawklo Ah

• nang khine   
•  

Mi mawkmawkpa tangthu i suut ding hi. Jael nupinu in khetbuk leh khetphim tawh Israel mite ong gup khiat khit ciangin Israel in kum 40 sung nuamsa-in tawlngakna hun ong nei uh hi. Ong nuamsa lua leuleu uh a, a utut un ong gamta leuleu zel uh hi. Milim mai ah kun a biak ngaungau ding mah ong lunggulh tentan zenzen uh hi. Hih zah taka milim biak nop a sak zenzen uh bang hang ai tam? Pasian' deihna bang a Amah biak ding sangin amau ut bang, amau lungkim banga a pasian uh biak ding nopsa zaw, tha ngah zaw, ahih man uh ahi tam? Milim ong bia kik leuleu uh hi.

 

Milim ong biak uh teh bang hong piang hiam? A galte gilkial a ann zong kauphe hon bangin ong chitet ong kuan maimai uh hi. A tawpna ah Israelte huhna ngenin Pasian' kiangah ong kiko leuleu uh hi. Pasian in amau te honkhia ding veikhoi, takkhoi lah zangkhin, tu-in kua zangzen ding cih lungngai-in church board meeting vantung ah ong nei uh hi. Midian te' khutsung pan Israelte honkhia dingin talent nei makai khat teelkhia ding ong hi hi. Kua teel ding, kua pil pen, kua siam pen, kua hat pen? Israel gambup ah Pasian' deih makai ding talent nei, a qualify khat zong omlo zen hi.  Pasian' deih hizenzen kei henla, mihing' teel ding hi leh kum 40 sung Pasian mangngilh liang a nopsak hunlai takin mihau milian mipil mithahat bel tawm sanlo ding hi. Pasian' adingin tuate mi mawkmawkmi ahi hi. Pasian in tuate lakah teeltaakcing ding mi khat zong mulo hi. Ahi zongin Pasian in mi khat teitei ong teel veve ding kulmawk hi. Kua ong teel hiam? Lokho mi pasalno khat ong teel hi. Agriculture degree leltak aci ki omkha vem.

 

Pasian in Gideon ong mukhia hi. Lamdang nasa uh hiam thei khang, ken bel lamdang ka sak khat ah Israel hero a kiciamteh lakah Gideon pen top 7 ah a kikoih mah lamdang sa ingh. Hebrews 11:32 And what more shall I say? I do not have time to tell about Gideon, Barak, Samson, Jephthah, David, Samuel and the Prophets who through faith conquered kingdoms. Hebrews mualsuang phutpa in lah gelhkhial hetlo ding ci leng Gideon amasa penpen ah na gual mawk hi.

 

Gideon thu at nuamlua kisa-in Hebrews pan pankha zawzen hang e. Gideon a bangci mi hiam? Gideon pen lokho mi, buh atat, buh cilcil khat ahi hi. America ah khualzin a hotel, motel tungngeiten thei ding hi. Sabuai ansuai sungah Gideon Bible kikoih hamtang hi. Hih ih gen Gideon bel tua bang a Bible bu at ding a min thang vangvang laigelh siam zong hilo hi. A meidawi, a lauthei, mi kihtathei mahmah khat   ahi hi. Mite' muhna ah mimawkmawk lokho mi khat hilel hi.

Thukhente 6:11 Ophrah khua ah Topa' vantung mi hong pai a, Abiezer mi Joash neihsa tawsaw nuai ah hong tu hi. Tua lai takin Joash' tapa Gideon in Midian mite' muhloh dingin leenggah suukna ah mangbuh cil simin na om hi.   

     

Bang dingin lolai ah mangbuh cil lello a, leenggah suukna ah mangbuh cil hiam? Lau, Midian mite kihta, meidawi cihna hipah hi. Tua hunlai takin Israel mite leihawm suanghawm belin bu kawikawi uh hi. Gimna ong tun ciangin ei zong a tuaci dingte i hi hi. Gideon in eite' adingin time of trouble na malep khol khin hi. Midian mite kuate hi a, bang dingin Israel miten kihta mawk uh hiam? Israel mite leh Midian mite midang hipeuhmah lo uh hi. Tawankwai linliante ahi uh hi. Gen 25:1,2 Pu Abraham ii zi dang Keturah' tuleta te vive ahi uh hi. Pa kibang Nu kibanglo cih hibek uh hi.

 

Hih Midian mite in Israel mite kum 7 sung zothawh-in, a neihsa a lamsateng uh siit neilo-in buluh, sut den, laksak denin Midian gam ah ciahpih den uh hi. Israel mite lungkhamin giautau mahmah uh hi. Midian mite thahatin hau thei mahmah uh hi. Bangci hauh hiam cih leh, a camel kalaoh te (tulai tak bang hileh US ten galsimna dinga a zat uh Tanks, Humvee mawtaw hoih) Camel gol pipite a ngawng ah suaikhi ok sakin zem zihziah lai zen uh hi. Thukhente 8:21. Israelten hih galkap mawtaw te kihta thei mahmah uh hi.

 

Israelte ahih leh cik ciangin Midiante ong paikik leuleu zen tam uh? Cik ciangin ih neihsa ann le tui mehteh mehgah, ih khawi gan te cik ciang ong sutkik leuleu zentam uh? cih bebek khalau-in kiging kholden uh hi. Midian te pai-in sut vanglak le uh siit khat zong neilo ban ah a inn a lo te dongin haaltum sakin nusiatsan lai uh hi. Hih zah taka tatsiatna pen Israel ten thuak haksa mahmah uh hi. Thuakzo hetlo uh hi.  Gideon zong leenggah suukna suangkuahawm sungah bukawm kawmin buh cilcil, na semsem nahi hi. Kuama theih ding, zak ding, muh khak ding utlo, khui zong khuisa ngamlo a, kangtat kiangkiang lai takin awging khat in a tung pan ong phawnggaih hi. Nu vei' pa vei' aman' tatakta kaive maw! cimul tho-in dip van a khai' ong bang hi. 

 

Phadawm lai, Mediante a sak leh Vantung mi nahi vanglak hi. Koikoi ah ih om a, bangbang ih ngaihsun sem zongin Pasian in ih omna ong thei veve cih ong phawksak hi.

 

Pasian' vantung mi in Gideon kiang ah cikmah a kiho ngeilo pipi bang ong civat mawk hiam? Tkt 6:12 Topa in nang hong ompih hi, a thahat a vanglian mipa aw, ong ci hi.

Gideon in lah kei' ka tha hatin ka vang' lian zenzenkei veh aw! Manasseh minam sungah keima behte a hat lo pen hi. Ka innkuan sung panin zong kei a neu pen hiveng aw, ong ci hi.

Mihingten ih geelkholh ih genkholh theih hangin bangmah kimukhol theilo hi. Pasian in amuh kholhte ong genkhia hi. Galte kihta, lau a, abubu khat galhangpa, thahatpa, vanglian mipa aw, cih pen thupha kipiakna lianpi khat ahi hi. Nute pate aw, natu nata lo kuankuan khat siapipa aw, galkapbupa aw, lambupa aw, doctor pa aw na ci ngei, na phatbawl ngei uh hiam? Na tate khat in laivuanna ah a khatna ngah ingh ong ci leh bang naci kik diam? Na lawmte hai zensi in teh na ci diam? Sport taipawi ah e! a khatna ngah ingh ong ci leh, na lawmte hatkeizensi inteh ci-in na dawng diam? Mihai, mithadah, gualtung tuangzolo, hakai pahtak lungvei cih te na deih kei uh leh Pasian leh Gideon kikal a thupha kammalte tate' tungah zat ding hoih hi. Tua hilo a, na suaknuam khua suak un, na piannop bangbang piang un na cih leh thukhat, tua bel atuam. Tua hilo a, tate thupha piakpiakna in tate pattahna hoih penpen khat ahih lam hih Laisiangtho tungtawnin i muthei hi. Pasian in Gideon kiangah a thahat a vanglian pa aw, a cihlai takin Gideon pen a tha hatnai hetlo, a vang' lian naihet  lo hi. Atawpna ah Israel mi a thahat a vanglian khempeuh lakah min kiciamteh masa penin ong kiciamteh hi.

    

Bang dingin Gideon Israelte' hero ong suakthei hiam? Ama qualifications bang hiam? Pasian' vantung mi tawh a kiholai takin Gideon amah kia bek lokuan, lo a nasemsem hileh kilawm hi. Anautum pen ahi hi. A sanggam dangteng koiah omkhin hiding hiam? Mediante kihtat manin Israelte singhawm suanghawm sung ah bu kawikawi uh hi. Tua kawmkal ah Gideon in kei' a nautum pen hing cituanlo anu apa vaakna dingin na sim sepsep veve hi. A kiniamkhiatman, a kuhkalman, a thanuamman leh a thuman'man zong ahi hi. Mawk omnuam leh a nautum pen nulepa tawh inn ngak a u te sunsiah puak a kizang ding pasalno hilel hi. Amah na tua cilo hi. Tua hangin Pasian in a thahat a vanglian dingin mu a, Israelte gumkhia dingin na teel hi. Pasian' teel mite pen hih bangdan kiniamkhiat (kei bangmah hikeng a ci) te hi sese hi. Luke 1:52 ..mi kiniamkhiatte mi lian-in a bawl hi. Zomi SDA ten bel Gideon makai ulian dingin teel masakin neisap kiak hang maw. Bang hang? A innkuansung mahmah ah a pa pen Baal milim bialua (mawhna tawh kidimlua, genbaanglua) kisa a, Asherah Pole kici, singkhuam ki sui dawi milim a huangsung ah tung gengan geuh lai hi. Pasian in milian ding a teel ciangin milim bia lo, mawhna neilo mi teeltuanlo hi. Mawhna khialhna milimbiakna a langpan ngam mi (Gideon) mah teel hi.   

Samuel masa 16:7 Man looks at the outward appearance, but the Lord looks at the heart.

 

Gideon' buhcil buhsatdan ensukpak dih ni. Buhcil ciangin buhtangsa leh a si a hawm khenna dingin Lolai ah lawhpi tawh kizap duadua, ahih keileh huih nunlai tak (huihtha) zangin kihaih phadeuh hi. Gideon in leeng gah suukna suangkawhawm kawm ah huihnung vava huihtha zang hetlo ding hi. Ama siamtheihtawp ama thatang zanga buhkhiah buhcil hizen hi. John 3:8 Huih zong a utna peuhpeuh ah a nun hangin..(Kha Siang tho thu).....Gideon in huihtha na zanglo a, ama thatang na zang hi.

 

Tua banga ama tha leh ama siamtawpin buh ong cilcillai takin Topa' vantung mi in Gideon aw, Topa in nang hong ompih hi,...... a ci hi. Upmawhloh laitak thakhat thu a Vantung mi in Gideon ..pung..ci-a a phawnvat Gideon omdan ngaihsutdan ding ih mitkha ah geelsak kawmin...... Gideon in zong Topa in kote hong ompih ahih leh, bang hangin hih thu khempeuh ko tungah hong tung ahi hiam? Bang dingin Midian mite' khut sungah ong koih mawk hiam? Lungkiatna tawh hong kidim hi.  Tuhun bang hi leh, Topa in hong ompih hi leh, bang hangin hih bang lungkham sinkham, lungkiat cihmawh thuak ding kahi hiam? Topa in hong taisan hizaw hi, cih tawh kibang hi. Atak takin Pasian in ong taisan ngeilo hi. Ama vangliatna ding leh Ama gam ading kua zang ding ka hi hiam? ci-a ong zonzon lai tak nahi zaw hi. Israelte gumkhia nuamlua kisa a, Gideon ana hopihpih lai tak na hi khinkhian hi. Gideon in Pasian' ompih lam tel nailo hi.

 

Tua ciangin Gideon lamah Topa kihei-in, 'hih nangma thahatna tawh pai in la Midiante khut sung panin Israelte honkhia in. Nangmah hong sawl khinta hilo ka hi hiam? a ci hi. Pasian' sawlna ngahna dingin pil veva, hauh lialua, minthan vangvang, melhoih siausuau, thahat teltal cih zong a kisam masa na hilo hi. Gideon in ut keng, semnuam keng cilo hi. Pasian tawh kizom a, sepnop hiuhiau ding kisam hi. Gideon in a mah a hopih Pasian ahihlam ong theita hi. Nangma thahatna tawh sem in, gualzawhna kong pia ding hi. 

 

Gideon zong hih bang ciamna kip thupha ong zaktak ciang a buh cilsim danin a lungsim ong simnuam hiu hiau hi. Vantung mi khat annvaak nuam hipah hi. A annhuan et sak dih ni. Bang a huan peuhmah hiam?  Bangmah neihbeh venvan lua lawmlawmlo ding uh hi. Mediante' laksak khaklohteng bekmah cianlai ding hi. Neikeng, cilo-in keel khat ong go hi. A pongmoh bawlna ding mida vui zong sel khat cileng, pongmoh lum tampitak pha ding hi. Hih teng pen Vantung mi khat ii nek ding a ong huan ahi hi. Vantungmi khat in a gai mah diam? Ngasakeu nih leh moh lum 5 khawng hilel leh zong kham mahmah lel ding hi. Bang dia Keel gawh veva zawzen hiam? Lungdambawl cianga keel gawh bang hong phawksak zawzen.

Pasian in hih bang a micingh te mah ulian makai  dingin a na teel himai lo diam?

 

A sabak a satuiteng luui-in ong kihoho uh hi. Gideon in aki hopihpih Pa, Pasian ahihlam ong thei hi. Tua khit ciangin Gideon muhna panin Vantung mi mang hiau hi.  

 

 "Nangma thahatna tawh pai in la, Midiante' khut sung pan Israelte hon khia in', a ci Pa tawh lah maitang kimu-in ong kiho theinawnlo uh hi. Pasian in ong ompih taktaktam maw? Ong cih takpi mah ahi tam? tam? tam? Ong khalau, ong lungmuangzo taktak nai phalo hi. Kei leltak in Israelte honkhia zo taktak ding ka hi hiam? Pa Pasian aw, nong hehpihna tawh ka lungmuan taktakna dingin khat vei ong kilak lai in. Tua lo-in kalsuan ngam nailo hing...Tua zan-in Topa in Gideon ong hopih hi. Mang hiam? Mangmuhna hiam? 1 hi.

Pasian' cih bang bangin ong gamta pah ngekngek hi. A pa' bawngtal la-in, a pa' Baal biakna tau phel a, a pa' Singtum milim phuk sak hi. Hih Baal biakna a kizang khempeuh Pasian biakpiakna in ong khek hi. A khua pihte kihta pipi-in ong hih hangin Pasian' thu man ding kihta lo hi. Pasian Biakna dingin meihal biakna tau lam hi. Pasian in Amah muang a thumang dingte mah zat dingin mitsuan gige hi. Pasian' nasem ding a ih kipat leh zong ih innkuan sung nuntakzia mahmah Pasian' awi ding, Pasian' deihkaitheih ding thupi masa ding hi cih Gideon leh a pa' innsung thupiang in hong hilh hi.

Mite ih kawkkawk sangin ei' mit sunga tang singluang lakhia masaphot himhim ding. Inngua hah masa phot limlim ding, tua khit teh gamgua hah ding.

 

Topa aw, kei ong sam taktak mah na hi hiam? Nong sap takpi nong cih takpi ahih leh, ka upna a kiptheihna dingin nalamdang khat tawh ong bawllai in, Topa. Ut napi'ng, semnuam napi'ng, kimuang zo nai mahmah keng, nong ompih takpi ding ka lungmuanna dingin kong thuumna ong sanglai in.

 

Medianten tuumul tawh Gideon khemkhem aitam? Tuumul tung tawnin Pasian' ompih ding leh ompihloh ding ong teltheihnuam toto hi. Upna muanna cingtaak nei kisa nailo hi.  

 

Tua ciangin Gideon in Pasian kiangah ' nong ciamsa bangin keima tha tawh Israelte na hotkhiat ding leh, en in, anncilna sual tungah  tuumul lum khat ka koih hi. Tuumul tung bekah daitui omin lei lak dang khempeuh a keu leh, na gensa bangin keima tha tawh Israelte na honkhia ding hi, cih ka thei ding hi. Tua bangmahin a piang hi. A zingsang ciangin tho baihin a tuumultui a suk leh, tui hai khat dim sukkhia hi. Ah! mawk aw.

 

Tuumul in tui a hup thei mah hi. A leh lam ong sinnuam lai ingh, Topa. Tuumul tung bek keu sak in la, mun dang leitung khempeuh daitui om sak in. Tua bang mahin Pasian in tua zan-in hih hi. 

Gideon bangin launa linna  pan lungnopna ding ahih nak leh, Pasian in eite zong lungduai takin ong huh ding ahi hi. Tuhun teh Pasian' deihna ih theihnop leh, tuumul kul nawnlo hi. Pasian' kammal Laisiangtho kicing lua hi. Tua kammalte siksan a thu ih ngetnak leh Pasian in ong makaih dinga lam ong lak ding hi.

 

Gideon in Pasian ompih taktak lam a theih ciangin lungmuang takin galsim ding ong kuankhia hi. Ama tha tawh ong kuankhiat hangin Tkt 6:34 Topa' Khasiangtho Gideon tungah ong tung a, amah in pengkul ging sak a, Abiezrites mite (khuapihte) a zui dingin kisam khia hi. 

 

Huihnunna leh huihtha zangngamlo a ancillai tawh kikhai veve aidiam? Huih tawh kigenteh Khasiangtho tha tawh pengkul ong ginsaklian leh, galsimnuam mi tulsawmthum in khuaihon bangin huu..huu..ong bawm het hat pah uh hi. Gideon in a lungsim sungah a bangci ngaihsut zen tam? Mimawkmawk khat lel a, a kingaihsut hangin ama cihtakna, thumanna, citna, upna a neihna khempeuh Pasian' adingin manpha ahih manin Pasian in Israelte sungah thukhen (kumpi) in tawisang hi. Gideon pen a gualzo mahmah Israel thukhen a nga na ahi hi. Ahih hangin Khasiangtho humuapna tawh laiat Paul in Israel Hero khatna ah na koih hi. Mimawkmawk deklo hi.