From: nang khine <tunpi95@yahoo.com>
Jerusalem khuasung Tuu zuakna (sheep market) gei ah Bethesda a kici bual khat a om a, tua bual kim kot ah inntual kongbuuk nga (five) kilam litlet hi. Tua buuk te sungah mittaw, khelbai, khutzaw-khezaw a kipan natna nei tampi bualtui kilawh ding ngakin a omkhawm phengphang uh hi. Banghanghiam cih leh vantung mi khat in tua bualtui lok theizel a, tui kilawhkhit ciangin a tuakkha masa penpen in ama natna panin a dam hi. John 5:2-4 KJV.
Hih Laisiangtho tangthu ka zak cilin zaknop ka sa mahmah hi. Tua hunlai khawngin kikhopna inn sungah ko naupangte bang phektung kitukha bek hi-in, tutphahtung khawng a kitukha hideklo hi. Tutphah pen Uliante a' ding bek cih hun lai pawl hi. Picture roll khawng muhnop mahmah a kisak hun pawl ahi hi. Khat veivei ih gil peuh, ih ha peuh ong nat ciangin hia vantung mi' lok theihzel bualtui sungah dimenthuu nuamsiing kici thei zel hi. Thu khat leuleu ah ei sangin a thuu masa zaw khat na om leh, a nunungte in damna ngah cih thadah tui kilawh kikding ngak kulzel ding na hi hi. Nauhciah kha leng kidamlo zelding na hi hi. Damna ngahnop leh cina pipi hatkul, manlang kul tuak mawk hi. Hih bual tui loklok pen Pasian' vantung mi mah hiding hiam? Zo laisiangtho bu sungah "Pasian' vantung mi" cipong mawk hi. Manglai malkhat malnih sim neknek thei ka hih manin KJV kong bulphuh hi. KJV sungah "an angel" ci bek hi. Topa Zeisu leh a nungzuiten mangbuhvui zuut ci. A Mang laisiang tho ah corn field cizel hi. Corn field cih pen mangbuh lei cihna hiam cidektak ingh.
Pasian in Ama vantung mi tuaci sawlsam ding hiam? Pasian' ngeina, Pasian' zialetong tawh zong ki tuak hiam? Hilo ding hi ci-in ka ngaihsun hi. Cinapa ii lungkimloh zia en suk dih ni.
John 5:7 Cinapa in 'Sia aw, bualtui a kilawh ciangin kei hong pap ding kuamah omlo ahih manin, kei ka tunma-in midang khat bual sung na tungkhin pahpah hi.
Hih cina mi zawngkhalpa in tuisung tuah kidemna ah a khatna ngah nuamin kum 38 sung tui kilawh ding na ngakngak hi. Vantung mi in tui a lawh hun ding genkhollo mawk hi. Pasian' vantung mi ten tuacih ngei ahiam? Vantung mi bel holy angels leh evil angels namnih om mah hi. Ahih hang hih a tunga tuilok bel vantung mi khat ci bek hi. Paul in Satan nangawn Pasian' vantung mi bangin ong kibawltawm ding hi ong ci hi.
Satan nangawn khuavak vantungmi angel of light tawh a kibangin kibawltawm thei hi. 2 Corin 11:14
Laisiangtho in kamsang a cih khempeuh Pasian' kamsangte na hikhintuan khollo uh hi. Zeisu in,
Kamsang taktak a hilote a kineihkhemte na muh uh ciangin limtakin kikem un. Matt 7:15 ong ci hi.
Laisiangtho lui sungah kamsang Jeremiah bang, kamsang dangten thah ding sawmmawk uh hi. Tua kamsangte Pasian' kamsang hiam, kamsang zuau hiam gencianlo hi.
Mi khempeuh tungah Topa in gen dingin a sawlteng Jeremiah in a genkhit ciangin siampite, kamsang te, leh mi khempeuhte in amah man uha a, 'Nang nasih ding kilawm hi' ci -in a gen uh hi. Jeremiah 26:8.
Jeremiah a thahsawm kamsangte bel Pasian' kamsang hingei ngeilo ding uh hi. Banghanghiam cih leh Pasian' kamsangte ki thuhualin, pumkhat-sakhat suakin, kilangpan cih bang omlo hi.
Kamsang Jeremiah leh kamsang Hananiah ong ki zungkawk uh hi.
Tua ciangin Kamsang Jeremiah in kamsang Hananiah kiangah "na ngai in, Hananiah! Topa in nang hong sawllohpi, hih mite zuauthu na umsak hi. Jeremiah 28:15
Kamsang Hananiah a kicih hangin a thugente Pasian' sawl hilo hi. Pasian' kamsang zong hibeeklo hi.
Paul in Corinthian Pawlpite tungah kumtulkhat thukhen ding a genna ah:
Eite pen vantung mite' thu nangawn a khensak ding ihih lamtak theilo nahi uh hiam? 1 Corin 6:3
Neulai Pawlpi Upa ten pulpit tungpan thu a gen uh teh hih kammal zang mahmah thei uh hi. Tulai taka ei ong kem ong cing vantung misiangthote nangawn ii thu a khen ding hihang cih bang pianin genzaw uh hi. Bang nuammawh a, Pasian' vantung mite' thu khen laizang ding ihi hiam? Paul gennop vantung mite in fallen angels thukhen ngak vanpan a kikhawlkhia vantung mite a gennuam ahi hi. Paul gengen vantung mite' thu Jude in zong na gen hi.
Amau' aana neih huamsung bekah omloin a omna panun a paikhia vaantung mite zong leinuai khua mial sungah sikkol kibulhin amau' thu a kikhen ding Ni lianpi ngakin Pasian in a koihcip hi. Jude 1:6
Laisiangtho sungah vantung mite or kamsangte a kicinak leh Pasian' vantung mi or Pasian' kamsangte vasak pahpah ding hilo hi. Tua bualtui kuama theihlohkal a va lok kuaukuau zel dingin zong Pasian in Ama vantung mi va tuaci sawl hetlo ding hi. Pasian in Ki itna hi. Mi khempeuh hong it hi. A thahat penpen, a pil penpen zong ittuan hilo hi. Ittuam paihtuam neilo hi. A damnuam khempeuh damna pia kim hi. Tuisunglut siam a, tuilut masa pen bek in damna ngah ding zong cingeilo hi. Tua tui lok zel zel zong Pasian' vantung mi ahih lohlam kithei hi. Ahi zongin Pasian' sawllohpi vantung mi in nalamdang zangin mite' lung buaina dingin ong khembawl ong kimawlpih thopthop thei zel hi.
Tuhun teh zong Pasian' min paulamin nalamdang tampi, cina damsakna, a kitelvetlo kamtuampauna
a kipan. a lungmanhuai biakpiakna tampi ong piangpiang kawikawita hi. Hih te pen Pasian' piak kha letsong ahih leh, bangdingin Pasian in Amah a ummi khempeuh tungah pia lello hiam? Biakna pawlpi khat khawng bek in tuamngah cihbang omthei dinghiam? Ngaihsuthuai kidophuai pilvang huai mah mah hi. Kamsangpa Elijah leh Baal kamsangte Carmel mualtung ah na kido uh hi. Sawltak Paul leh Greek mipilte Mars Hill mualbo ah 'Thuman' thu na kinial uh hi. Kamsangte, sawltakte thuzui ei a cianlai thuzui mite zong Langpangpa' sawltak te, kamsangte in ong dodo hi. Carmel mual hiam, Mars hill mualbo hiam, Bethesda bualtui gei hiam, Internet pan hiam, Awzol kamkhum zang gospel thugen te' kiangpan hiam, nalamdang tuamtuam pan hiam? ong confucianism sakkeei hi. Upna leh Pasian' kammal Laisiangtho ong kiselsel sak hi. Vantung mi khat in bualtui loklok hi.
Topa Zeisu in warning ong pia kholkhol hi.
Banghanghiam cih leh Khazih a kineihkhemte leh kamsang a kineihkhemte hong piang ding a, ahih zawh leh a teelsa mite nangawn a khemna dingun lim leh nalamdang lianpipi hong bawl ding uh hi. A hun ma-in hong genkholkhin ka hih manin limtakin kidawm un. Matt 24:24,25
Mangmupa John in ong telgenbeh lai hi.
Tuate pen dawite' kha hi a, nalamdang a bawl uh hi. Rev 16:14.
Mi tampite in tua tuikilok saksak Pasian' vantung mi sa-in damna ngahnuamin va zuan uh hi. Ahi zongin Laisiangtho in vantung mi khat ii lawh hi, ci hi.
