Birthday Nam4 Abawl Masa Penpa:

Dear Laisim miaml,

 

Ka theihkhialh ahih keileh, amah pen mitom penpen hiding hi ci-in ka tuat hi. Zacchaeus sang tomtuak zawlai hi. Banghanghiam cihleh Laisiangtho in he was a 'ruler' cimawk hiven. A Ruler cih pen letmat 12 kan phalo/sanglo hi. Na upkei uh leh na manglai siamah te leh na math siate na dong mah un. Pii khat teh letmah bangzah hiam?  Kei theih na zong ka manglai siamah te leh ka ganan siate tungpan mah hi. hmm...

 

Hih mitompa kua hi-a, bangci bangin birthday nam 4 abawl masa penpa ong suak zenzen hiam.  Lungdamna thu gospel lai at Zeisu' it phatdiak nungzui Zawhang lai-atna sung sim suksuk dih ni.

 

Banghanghiam cihleh Matthew, Mark, Luke te ii at dan a tuam tekin ong pan uh hi. Matthew in khang tangthu ong suut-in, Mark in Zeisu' ministry nasep tawh ong panin, Luke in Zeisu' suah lungdamna tawh ong pan hi. John a' leuleu ciangin leitung piancil a kipan Apiangsakpa Abawlpa mahmah A bawlsa nate mite lakah ong sunglut in ong nungta a, nalamdang ong bawlin, biakinnpite Ama a' ahihna, Pharisees ulian, Nicodemus ong convert in 'born again' sakna,........  

                           Ka gelhnop ka thulu: 'birthday thak bangzah vei' cih hi zen ei!   

Ih pu Adam leh ih pi Eve, Pasian' khaam singgah ong nek veve manun asuan akhak mi khempeuh in tuahloh dingteng ih tuakkha nangnang hi. Tangval melhoih anu sun, Joseph bang AAS lawibual, Anderson kawltuikhuk sungah ong kia hi. Tua tuikhuk dumtaw sungah nopsa hetlo, kitomtom, kipekpek, kisansan taleh, ama thu-in ong suakta zolo hi. A u pa' hehpihna hangin suahtakna ong ngah hi. Cidihdih, vantunggam tunteh Jacob' zi, Joseph' nu, Rachael a munuam na om uh na? Kei bangbel zon masak ding pawla ka tuat hi. Kum 14 bang thalawhtak numei munuam phadiak ingh.

Ahi zongin mi pawlkhat (adiak diakin) Pharisees te in amau hoihna theihna hanciamna tawh tua tui khuk dumsung panin suahtakna ngahzo ding kilamen uh hi. Semkeei, bawlkeei, kankeei, hanciamkeei

sam uh hi. Paunak Laisiangtho sungah: Hoih hi ci-in i ngaihsut thu khat pen sih theihna ding thu na hi zawsop theih hi. Laisiangtho simden kanden biakna mi mahmah khat in dum thukpi sunga a omlam ong kithei hi. Dum sungpan suahtak theihna ding lampi ong kan hi. Hih piiciang tan apha Pharisees Ulian, Nicodemus thu/lampi kandan gen kikkik, sasa ding, sakikkik ding, mawhneite Zeisu in ngai hi. Zawhang alian 3: aneu 1. Jewish Ulian sungah Nicodemus, a kici Pharisees mi Ulian khat a om hi. 

 

John 3:1 ih sim ciangin i lungsim sungah bang ngaihsut ding ong suak ale? Kawlgam ulian lakah

Christian ulian khat kihel, cih tawh kibang phialding abang! Hih santakah zong Jewish ulian (ruler) sungah Pharisees mi khat kihel/om hi. Tua ahih leh Pharisees mite misia hiam? Misia hidek suailo, phalua kisa a, ri-si-se hilai hi. Moses thukham abul abal a zuilua kisa a, kawlphungzite banga kangpai kiangkiangte hilai uh hi. Kawlgam ah kawlphungzi bangzah apha tam?  Pharisees mi 6000 sang lah tawm zawlo, lah tam zawlo, tul 6 linlian phaden uh hi. Biakna piakna zuihna ahihnak leh phincil tak a agamtang tintente ahi uh hi. Mimawkmawk mimaimai lote ahi uh hi. Gensiatna cih pongpong neihloh ding a hanciam cintente ahi uh hi. Azen zenin Christian suaklo pi-a gupkhiatna ngahna ding om hi leh Pharisees mi, ulian Nicodemus bel peng hetlo a, a kihel pelmawh kingkeng dingpa himawk hi. Bangzah ta-in biakna hahkatin, gamtathoih, gamtatpha ih gamta zongin Zeisu ih neih keileh, koi ah i tungtam? I lam et bang ahi tam? Zeisu lo-in Nicodemus in a upna, a zuihzawhna tawh vanlaizang ah a leng dialdial zo diam? Zeisu in kong la ding hi, ci heven, Zeisu laklohpi-in vamawkpai pongmawk cih bang omtheih tuaklo hi. 

 

Nicodemus pen aki zahtak mahmah Jerusalem khua thukhen zum ah thuken mang khat ahi hi. Amah pen mi hoih mipha biakna kin mahmah phekzial banga aki zial laisiangtho a simden a kanden ulian khat zong ahi hi. Zeisu simloh laisiangtho amah sanga theizaw omlo ding hi. Mi siangtho khat ahi hi.

Ahih hang aki zongzong tuuno mangthang khat ahi hi. Topa Zeisu in bangci hiam cih leh  John 5:24. 'aman takpi kong cihin ah: Ka thugennate za-in kei hong sawlpa a um khempeuh mawhsak thukhenna ngahlo-in, nuntak tawntungna ngahding ahita uh hi. Supreme Court Justice pa in thukhendan a thak khat ong zakbeh aidia.  Eh! thei a, zuihzawh hang hizawlo maw!!  Alungsim ong kitoknawi pianta hi.  

Sunthapaii muikhuaziin dong Zum na asep kawmkawmin a laisiangtho theihna khuak ong rewind in   ong play kikzel hi. Tua leh khua ong mui ta. Khua mialta ahih manin Khuavaak ong zongta hi.

 

John 3:2,3. Zan khuamial laitakin Zeisu kiangah ong pai a (Nicodemus), Sia aw, mi khat peuhpeuh Pasian in ompihlo hi leh hih nalamdangte kuamah in bawl theilo ding ahih manin nang pen Pasian' hong sawl siapa na hihna ka hong thei uh hi, a ci hi. Tua leh :3 Zeisu in aman takpi kong cihin ah, mi khatpeuh a suahkik (born again) kei leh Pasian' gam sungah lut theilo ding hi, a ci hi.  

 

Thukhenmang te kihona telbaih na sa uh hiam, bualbual zen. Keibang in bel telhak samawk ingh. gtn: Khatvei I Pastor te khat khualzin zintung hihtuak. Gilkial piankeei hihtuak aive. Zinten lah ann minnai pakkei vencin, amah zong tuzo nawnlo lupna tung kiphah dikdek kawmin innteekte zak hiauhiaupian dingin huih nungkeeiveh aw, ci mualmual hih tuak. Innteeknu in tua banga huihnung salua aihleh ci-in kongkhakteng tawletteng khaksamsam hih tuak. Lawmpa in huihnungkeei veh aw, ci teitei hihtuak. A sawtna teh a cihnopna nung pauhsansanpan. Gilsungah bangmah omlo, huih bek om cinuam nahi hi

Meh al salua, allua cilo in kiikawng veh ee, ci. Tulai khangnoten 'kiikawng' cihnopna a theilo tampi omta ding hi. 'Kiikawng' cih ciangin sialno kiinei nailo ten ci duhlo uh hi. A  kiipo khin a kawng vem vamte bek in ci liakliak nuam uh hi.  

 

Topa Zeisu in zong Nicodemus kam pana gingkhia pau tawh na dawngkik lo hi. Akihona uh khat vei a tomin cikik dih ni. Nalamdang na bawlna hangin Pasian' hong sawl siapa nahihlam kong thei uh hi. Ken' aman takpi kong cih in ah, na born again kei uh leh Pasian' gam na mukhakei ding uh hi. Bang kisai peuhmah aihia leh! Lawgiver leh Lawyer kiho hisam uh hi. Ahi zongin Topa Zeisu in Nicodemus ii lungtang sunga om dotna tawh ana dawngkiau na hi hi. Cihnopna ah kuakua in a kikhelkei leh mithak a suahkei ngawngaw leh hotkhiatna a ngahkei ding uh hi. Tua ahihleh, dotna om hi. Piangthak, mithak, milui hinawnlo nahih manin na sanggamnu or na pianna na tunnu tawh na kiteng thei diam? Na kikhel kei a, na suahkikkei leh hotkhiatna na ngah peuhmah kei ding hi. Born again piangthak cih ciangin adang mahmah cihnopna hilo hi. Zeisu Khazih Honpa Gumpa in sang ding cihna hi. Nicodemus bangzahvei suakkik hiam? Birthday bangzah nei hiam? Nicodemus kikhel ding ong kisam hi. Ong kisap bang hipipen hiam?

 

John 1:12. Amah sang received a, Ama' Min his name mahmah a um mi khempeuh tungah Pasian' tate suahtheihna ding power tha a pia hi.

Zeisu san ding leh Zeisu' min up ding Nicodemus ii kisappi pen ong hi hi.

John 3:4. Mi khat a teekkhit ciangin bangci suahkik theih ding ahi hiam? A nu' sungah lukkikin suakkik theiding ahi hiam?

Zeisu umin sang photphot leng, dotdot kullo a, Mary' sungah lutin aki suakkik theilua nahi hi. Nicodemus in zong nu sungah lutkik a suahkik ding ahih theihlohlam a dong zong hilo kha maithei. Amah mah koici kikhelkik  theihding haksa a sakna a gennuam zong himai thei hi. Kagamtat hoihlohna khelzo ding kaimaw? Koici khel theihding ka hi hiam? Piangthei-in umvet keng nacih khakleh, John 1:12 sim phapha a, tha laklak ding himai ding hi.

John 3:5. Zeisu in: 'A mantakpi kong cih in ah, mi khatpeuh tui leh Khasiangtho tawh a suahkik kei leh Pasian' gam sungah a lut theikei ding hi, ci-in a dawng hi.

Nicodemus in ama hoihna tawh khamkhuapi ah lamsiau hiauhiau ding kisa hi. Zeisu in tui leh Kha siangtho tawh na suahkik kei leh lutkha buanglo e, na ci hi.

John 3:7. Hih bang kong cih ciangin lamdangsa kei in, bangbang hitaleh, na suakkik pelmawh in. Na piangthak in. Nidangin zu khamkham (awtom ahi, awsau hilo ahi maw), za khamkham, nulepa mawh na a bawlbawl khatin ong kiciamteh paisuakkha mah ding hi, mi bangin pilna theihna lah neilo ing a, doctrines khawng, theology cih bualbual khawnglah ka khuak in banlo a na cih hun omkha ding hi,  awlmawh vet ken. Zeisu in lawm banga ong neihding, Pasian in ta banga ong sanding a thupi penpen ahi hi. Pasian in kheltheihloh khat zong neilo hi. Mithak ong suah theilua hi. Tua man mahin tui a kiphum hi hang. Spiritual Birthday a ngah hi hang. Mithak liklek ih hita hi. Khuang nawnlo ding.

 

Nicodemus in Kha tawh suahna bang ahiam ci-in ong dotbeh lai hi. Tua leh Topa Zeisu in John 3:8. Huih zong a utna peuhpeuhah nung a, a huging na zaktheih hangin koi lampan hong nung a, koi lamah nung ahi hiam, cih na muthei kei hi.  Kha tawh a suak mite zong tua mah bang ahi hi, ci-in a dawng hi.

:9. Nicodemus in hih thu bangci piantheihmawk ding ahi hiam? ci-in a dongkik hi.

Zankhua sawtlua pianta hiding hiven,

:10. Topa Zeisu in, Israel mite' sia hinapi cin hih thu thei theilo na hi hiam? kici kik giapgiap uh hi.

Khat veivei Kha thu tawh kisai dot ding leh dotloh ding omtuak hi. Gtn: Billgate kiangah computer or microsoftware bawldan vadong dihdih lecin, bangin ong dawngtam? Zangsuklel un, ong cikha ngel ding hi. Zong, cikhin ngei hi. Tua mah bangin Kha thu tawh kisai dotdot tiltel sangin, ong kigen khat accept sang ziaulel leng ki lungduaizaw kha ding hi. Lawyer ten laws thei vencin, Meteorologist ten huih thu tel mahmah vem.  

Nicodemus in thei theimahmahlo, telthei mahmahlo hi. Banghang? Amah Pharisees mi himawk hiven. Thukham cilesa tawh zehtan banga tanga, zuihzawhna tawh gupkhiatna thalawhsawm ahih manin Kha thu telthei mahmahlo nahi hi. John 3:16 tung dek tak ta hang ei!! na ki dawm pha mah mah vuau!!! Eh! tungsak ta lelni. Ka gelh dingkaal ngaklahlua mahmah ingh. Alian 3:11-15 dong noman nasim lel un. Ih Topa in Nicodemus lungtang sungah khaici a vawhvawh laitak ahi hi.  

Pasian in leitung mite hong itlua ahih manin Ama' deihna bang a zuizo misiangthote' tung bek...cih bangin Laisiangtho na ki at, hileh, Pharisees alian.?.: aneu.?. hiding hi. Ahi zongin....

John 3:16. Pasian in leitung mite hong itlua mahmah ahih manin, Ama Tapa a um mi khempeuhte in kisialo-a, nuntak tawntungna a ngahtheihna dingun a Tapa khat bek a neihsun hong piak dongin leitung mite ong it hi.

Hih Laisiangtho mun kam tawh phatzawhding hilo Laisiangtho bup ah ahoih penpen, akhum penpen

John 3:16. Topa Zeisu in kua tungah a gen hiam? A za masapen zong Pharisees mi Nicodemus ahih loh phamawh hi. A masa lamin Topa Zeisu nalamdang bawlna hang tawh Pasian' kiang pan ong pai ahihlam Nicodemus in ong thei hi. Tun ITNA leh HEHPIHNA thu ong kigen ong za hi. Nicodemus ong bangci om hiam? Bang hih hiding hiam kum thum sung ong mangdildel hi. Khaici kivawh ong potota cih ih thei hi. Topa Zeisu that dingin ong kiman hi. John 7:50. Nicodemus in Topa Zeisu ong dal defense keei sam hi. Ong piangzo tuanlo hi. Tua kawmkal ah Topa Zeisu Singlamteh tungah ong kikhai-in ong si hi. Aluanghawm a nungzuiteng in vuibawl ngeingai uh hi. Cilo hi. Kuan vui hiam? 

 

John 19:38,39. Tua ciangin Arimathea khuami Joseph in Zeisu' luang a lakkhiat theihna dingin Pilate kiangah vapai-in a ngen hi. Joseph i cih pen Zeisu nungzui khat hi a, ahi zongin Jerusalem khua Jews mite a kihtakna hangin a simzuih khat ahi hi. Pilate ii thupiakna tawh Joseph in Zeisu luang lakkhiat theihna ding thu ngah ahih manin Zeisu luang a lakhia hi. Zeisu kiangh a zanhawh ngei Nicodemus zong hong pai-a, Zeisu' luang a siatlohna dingin a bawlna ding myrrh leh aloes (lotion) pound 75 bang a gik a hong pua hi.

 

Pound 75, nak gihding hiven. Sushi antang ip khat Pound 50 hiven, ipkhat leh alang tawh kikim bel gik mahmah ding theihsa hi. Mary Magdalene in puazo hetlo ding hi. Lawmnu puak thawl khat man tawh kum khat kinungta zo ding ci hi. Tua tawh tehna dingin Nicodemus ii puak tawh kum bangzah aki nungtazo diam? Ka ngaihsun zovet kei hi. Pharisees, pharisees..pharisees te tawh kibanglel uh teh ong ki cih hangin hih Pharisees' mipa ii Zeisu updan leh a it dan lamdang kasa mahmah hi. Pharisees te ih batzawh keileh vantunggam bel galmuh khakei mawk mah ni, cih tel sansan ingh.

 

Nicodemus in Zeisu Khazih aa dingin a nuntakna kalsuan ding ong khensatta hi. A simtham zankim laitak ong zangnawnlo hi. A manpha mahmah mihau khengvalte neihzawh bek paknamtui tampitak tawh uliante mai palikte leh mihonpi muhna ah nitumma in Zeisu luang la dingin ong paita hi. Zeisu' luang avui kuate hiam? Pharisees mi nih ahi hi. Nungzuite zong hilo uh hi. Bang hangin amau tegel keekkeek in ong vui uh hiam? Zeisu Khazih honpa gumpa in sang uh a, Pasian' itna hehpihna Grace a ngah khak manuh ahi hi. Tua hi amau born again dan uh. Tua hun a kipan Zeisu nungzuite biakna ahi Christianity sungah member khatin ong kiciamteh hi.  Catholics laisiangtho tangthubu sungah zaknop thei mahmah hi.

Nicodemus anu' sungpan ong suak hi. Tui leh Kha tawh ong suakkik hi. John 3:5. A sithei nu le pa ahilo, a sitheilo nu le pa ahi Pasian' Thu tawh naungek bangin ong suakkik leuleu hi, 1 Peter 1:23.

Suahni bangzah vei nei ahia le? 4 vei. Pasian in a thupha ong buaksuk henla, ei a khuangkhuang aklui teng, pharisees teng zong mithak in ong bawl henla, birthday 4 vei a neizo dingin Pasian' itna hehpih na ong luangta hen, Nicodemus thu theihbeh noplai leh DA p. 177. 

 

nang khine <tunpi95@yahoo.com>