Khristian khat Din'mun, Khen 1.

                              Khatvei, khua sungah tangvalno khat zukham in, ngawng kikhep sa in khuasung nintui luan na hawkguam sungah tuuk hi. Palik te in lakhia a, azukham a daih mateng thong sungah khum uh hi. A zukham adaih ciangin ateldot uh leh, Kumpipa tapa na hi mawk hi. Tua pa in a pa min thang sak hiam dai sak hiam? Ama hangin a pa Angtang in a lungdam ding hiam?
                            Gen 1:27;2:7. Eite Pasian in Ama meelsuun a hong bawl ih hi hi. Ama tate hong ci hi. Tu in Ama mel ih suun lai hiam? Bengngawng aw, mittaw aw, mukka aw, nungkul aw, ih poi khin zo hi. Ih pa Pasian amukka in na um hiam? Abengngong in na um hiam? Pasian in Amah suun in eite hong bawl kimlai bang hangin Amah suun nawn lo ih hi hiam? Rom 3:23 ah Mawhna bawl ih hih manin Pasian maipha saan' ding kitaan hi, ci hi.

                              Gen 1:29. Pasian in mihing hong bawl tuung in, ih pumpi ah bangteng kisam ding hiam thei a, ih an nek ding gah le teh,vui nei pi nei te hong pia hi. Pasian hong sehsak het lohpi in ih pumpi susia thei an hoih lo, sa sianglo anam nam te peuh ne in ih kibawl sia tawm hi. Sa sianglo te bang ih duh phasan zaw se hi. Zu bang zong zu migi te sangin zuhang ih duh zaw se pah hi. Tuate in ih si ih sa nakpi in susia hi, cih athei gige sa mah in akizang hi a, athaman ih thuak lel mah ding akul ahi hi. Motor datsi bung ah zinan thun leng,tui thun nading mun ah leivui thun leng, bang suak ding hiam? Tua bang thawthop a gamta ih hi tazen hi.

Sa akici peuhmah anelo Khang 10                Sasiang akici te a ne khang 10.
1. Adam ..........Kum 930 nungta hi.............      Shem................ kum 650 nungta hi.
2. atapa Seth....Kum912 nungta hi..............      atapa Arphaxad.. kum 438 nungta hi.
3. " Enos..........Kum 905 nungta hi..............   " Selah................ kum 433 nungta hi.
4. " Cainan.....  Kum 910 nungta hi..............   " Eber.................. kum 464 nungta hi.
5. " Mahalalel.. Kum 895 nungta hi..............   " Peleg................  kum 239 nungta hi.
6. " Jared........Kum 962 nungta hi..............     " Reu................   kum 239 nungta hi.
7. " Enoch.......Kum 365 in vankah hi..........     "Serug.............    kum 230 nungta hi.
8. " Mathuselah..Kum 969 nungta hi...........      " Nohor............    kum 148 nungta hi.
9. " Lamech.....Kum 777 nungta hi.............       " Terah............   kum 205 nungta hi.
1o. " Noah.........Kum 950 nungta hi..............     " Abraham ........  kum 175 nungta hi.

                                Ih pumpi leh ih lungsim in ih annek ih tuidawn te pana kilamto hi a, hong bawlpa Pasian in eite ci le sate bang kisam a, bang kisam lo hiam cih tel theih penpen hi. Pasian in nek dinga ahong piak ahi lopite ih neek teitei manin ih cidamna susia a, ih pumpi agol ding cia phazo lo-a, ih pilna ahi dingzah kinei zolo in, ih meel ahoih nacia dingin hoih zo lo a, ih vun amaam na cia ding bangin maamlo in, ih khan' asawt na zah ding pen sawt lo-in kisi baih hi. Mi pawlkhat te in sasiang lo cih pen, Jews te tung bek hi, ci uh hi. Tua bel, ih pawlpi sia zuauthei te hong khem hi a, Noah khang tuiciin tun lai in sasiang leh sianglo na gen zo ahih teh, Noah neek dingin sianglo asak pen, eite neek dingin zong siang lo ngel ding hi. Tua hun in Jews minam cih bang om nai lo a, teeltuam minam om tuan nai lo-in, Noah leh atate ateeltuam a, midang teng sih khit ciangin khaici paisuak te ana hi uh hi. Noah pan khang 10 na, Abraham hi a, Abraham tapa Izek, Izek tapa Jakob, Jakob tate 12 pha uh a, Jews minam te akici hi pan mawk a, Noah khang panin khang 13 na te hi phing uh hi.
                                  Sa sianglo neek ding cih thadah, asiangte nangawn pen, Tuiciin Tembaw pana hong pusuah uh ciangin gah le teh neek ding om pah lo ahih manbek a, sasiang te neek ding akhuan kipia pak bek hi zaw lai hi. Tua nangawn ah, "Asisan te leilak ah tui bangin buakhia sak lel un. A sa na neek uh ciangin anuntakna ahi asisan tawh nekhawm kei un," ci lai hi. Gen 9:4,5; Deut 12:22,23.

                                  Pasian in hong it mahmah ahih manin eite siat nading gen lo ding hi. Note adingin sianglo hi, ne kei un, acihte khawng zong, bang hangin siang lo hiam?ci-a va dot kik se akul lo zaw hi. A siatna khatpeuh om ahih mana ne kei un, ahongci ahih kul hi, ci-in um pah maileng, hong it Pasian adingin lungkim huai zaw ding hi. "Hih salim penpen," peuh ci teitei se ding sangin "Sianglo mah hi ding hi,"ci-a um pah lel a, zuih pah lel ding pen, Pasian muhna ah muhnop zaw taktak ding hi. Tua sasiang lo acihte, Lev 11:3,4,;7,8,ah, Khecin ka a, eknel haite siang hi,ci hi. Khe cin ka napi eknel hai lote siang lo hi, eknel hai napi lah akhecin ka lo, khebom te pen Bilpi, Kala-oh cih bangte sianglo leuleu hi, ci hi. Vasa nam panin Tangkhai (Gongkhol) aneite siang a, tua nei lote siang lo hi, ci hi. Tui sung ganhing nam panin, Phe le Lip aneikopte siang a, tua nei lote siang lo hi,ci hi. Awmtaal ganhingte leh Guh tungnung te peuhmah zong siang lo hi, ci hi.

                                2Kor 6:17,18 ah, Ka mite aw, amaute lak pan hong paikhia unla, atuam in om un. Tua asiangtho lo nate va lawn'pih kei un. Tua hi leh, note Pasian ka hi dinga, note ka tate na hi ding uh hi, ci hi. Mihing khempeuh pen Pasian piansak te vive mah hi a, ih vekpi in Pasian tate akihi ding hi napi in, Ama sawl mang lo mite Dawi sawl mangzaw te Dawi mi suak a, Pasian kiang pan taikhia uh hi. Pasian sawl mangte bek mah Pasian tate suak thei ahih na kimu hi. Tua hi a, Pasian bia mah a ih kineih tantan vial hangin Ama sawlna mang het kei zel mawk leng, Ama tate kisuak thei lo ding hi."Voksa Siang lo hi, ne kei un," peuh acih teh,"Voksa alim penpen hi lo maw?" peuh va ci se teitei te pen, Pasian maipha bangci ngah in Pasian in bang ci hong paakta thei mawk ding hiam? Noah khang lai-a Noah in aguih theih pagul nam te khat tu in zong eite in ne leng gui thei lai ding ih hi hi. Tua mah bangin, Noah tunga sianglo sate eite tungah zong siang lo lai ding hi. A piangsakpa Pasian in, bang hangin siang lo hiam thei hi. A thei pa in Sianglo hi, acih pen Amah um a, abia akinei te in athu um lo a, ih neek teitei mawk teh, Amah ih upna bang hi peuh mah mawk hiam? Um het lo napi a, a um akibawl ih hi a, Ama adingin heh huai zawkan mai ding hi. Tua banga hong khaamthute zui lehang eimau hoih nading hi zaw hi, Deut 10:13 ah ci hi. Ih pumpi ih lungsim puahtoh nadingin bangteng hoih a, bang teng hoih lo hiam cihpen Pasian in thei a, eimau hoih nading a hong sawl nate amang nuam peuh in mang ding hoih a, tanglai in Jews te bek in na bia uh a, amau bek mah kithu hilh thei hi. Tu in eite in zong amah bia a kinei ih hih ciangin ih man' dingkul hi. Hih siang lo hi, acihte pen, Jesu sih nading lim ciingkhol a, singlamteh ciangbek akipte pawl zong hi lo hi. Singlamteh ciang bek akip Zeh thukham te bangteng hi a, bang hang hiam sittel ni, ci leng lah ut hiau lo zeel mawk, Pasian bia akinei, Pasian gente a um het lo Khristian pen tam mahmah ta hi.

                                  Laisim mimal khempeuh Topa thupha hong pia ta hen.
Zoplai ding,