2Kor 6:17,18 a. Amaute lak pan paikhia unla, atuam in om un, asiangtho lo nate na lawng kei un. Hih asiangtho lo nate lawn'pih loh nadinga, amau kiang pana paikhia a atuam a om akul thu pen. Tua ih paisan ding mite in asiangtho lo ahih lam thei kha lo a, nisial a alawn'den na te uh ahih zawk kul hi. Hih muna agen te pen, Zu, Voksa, Zanah, Tuibuk cihte hi zaw hi. Mite Pasian bia mah akibawl uh a, akineih-tawm na uh tawh um lopi um ing, amot cih te lak pana paikhiat nading sawlna ahi hi. Pasian in, Sianglo hi, ci napi, asian'loh nading thu om zenzen kei, ci teitei mawk uh a, voksa bangte, Hih salim penpen, ci zawzek napi uh lah, Pasian thu um ka hi, kici veve tazen uh hi.
Tuibuk kiman na khat bel, Pu Hau Cin Khup in sai benga, sai akap leh sipah lo a, asai in delh in amawl tawh man in akhuk asatna leh, akaam phatna tawh, tangtakin satkha lo-a akhuk kikal ah amah luta, aza-ip a, atuibuk umta kitam in bua a, tuibuk gimnam sia sa lua in, amah paai in sai pen taimang hi, kici hi Pu Khup nuntakna sai thah ding kimlai, atuibuk in huukhia hi. Zatep te zong, zusa meikhut nadingin hoih hi. Ahih hangin Khasiangtho meikhut nadingin hoih lo hi.
Mt 3:12 ah, A khut in lawhpi tawi dinga, buhphual azaap ding hi. Asii teng lengkhia in, atakteng cian dinga, salsungah koih ding hi, ci hi. Buhphual cih ciangin, gamlak hi lo-a, Pasian ka um hi, aci tenglom om na, pawlpi sung hi. Hong zaap ciangin,'Zu' ci-in zaap leh, 'Voksa' ci-in zaap leh, 'Zatep' ci-in zaap leh, 'Tuibuk' ci-in zaap leh! Prov 28:9 ah, Pasian thu om bang zui nuam ngap lopi te thungetna pen Pasian in kihhuai sa mahamh hi, ci hi. Prov 23:29 ah, Hai sung a, asan kiukeu laitakin ameel hoih in pakta dah zaw in. Hong kihei in, gul bangin hong tuding hi, ci hi. 1Kor 3:16,17 ah, Note pumpi in, Khasiangtho teen'na biakinn ahih lam thei lo na hi uh hiam?ci hi. Na pumpi sung ah Khasiangtho tu ken. Tua bungpi sungah nai khat sung va tu lecin, Ui-pul peuh hong kipaai in, na deekzang ah kibaang in, numei nausuak lam peuh hong kipaai in, na bil ah kivial in, na samlak teng uih khin leh, bang tanvei thuak kenkon in na tu zo ding hiam? Amanlang theithei in paikhia nuam in kong um hi. Tua bang lian mah in, na ut na duh teng na neek a, Pasian in Siang lo hi, acih pipi te na pumpi sungah na guan' niloh leh, na sunga teeng ding Khasiangtho pen in, bang tanvei hong thuak zo in, tu tentan veve in na um hiam? Hong taisan lel zaw ding uphuai mahmah hi.
Heb 13:8,9. Jesu Khrist pen, Zan ni, tu ni, zingciang, kikhel themthum ngei lo hi. Tua ahih leh, tu ni in, hihleitung ah mihing bangin hong peem henla, hong teng leh, na inn kiangah teng leh, bang ante ne in na um hiam? Bang tui te dawn in na um hiam? Bang puante silh in na um hiam? Bang nipi tang in na um hiam? Amah kikhel khel lo hi, ci hi. Leitunga hong pai kik ni ciangin zong, Amah tawh ana kibangte bek hong lading hi, ci hi. 1Jn 3:2. Amah in Sabbath tangin nang Sunday tang mawk leteh kibang thei ding na hi uh hiam? Amah'n, Voksa kihhuai hi, ci-in nang na ngol sung voksa adim in Amah dawn na sawm lai deep lecin, Jesu pawl dingte pen, Deut 7:6,7. ah, Note in, mi tuam vilvel, asiangtho lo nate alawng lo te na hi ding uh hi, ci hi.
Hih thute thei napi a, Ama deihna na zuih nop tuan kei leh, Pasian in a Siangtho mahmah hi a, asiangtho lo nuam vantung mite zong thuak zo lo-in, van panin nawhkhia a, pammaih sa zolo in, Dawite suak sak zaw mai hi. 2Pet 2:4,5. Nang zong, Pasian um in na kineih bek mawka, na up takpi kei leh, Pasian bel kikhemzo lodinga, asiangtho lua a vantung gam nuam ah hong lut sak zo lo ding hi, cih na thei khol ta in.
Mi pawlkhat in, Sawl 10: leh 11: sunga, Peter mangmuhna, puanpak kiu li nei sung a, ganhing namkim alah nungsangin sasiang lo teng siang khin hi, ci in siksan in nei uh hi. Na telsim leteh, 10:10-16 na sim phot inla, aneu 17 ah, tua mangmuhna akhiatna bang hi ding hiam? Piter lung himawh hi. aneu 28,29 ah, Mi namdangte "Nin hi," acih loh na ding Khasiangtho hilhna ahih lam thei hi. aneu 35 ah, Pasian in thu um a, azuih leh Zentail te zong sang theita, ahih na gen hi. 11:1-12 ah, ama lawmte teekteek in, vun-at lo te tawh ava kithuahna mawh sak lai uh hi. Aneu 17 ah, Kuamah "Nin hi," ci nawn lo a, mihing khempeuh tawh BUAH akitan nawn loh nading uh Khasiangtho hilhna in tua ganhing nin te bel nin lai mah a, tua te bangin akih loh nading uh hilhna ahih lam gen hi. Sawltak te in tua banga mangmuhna tuam vilvel kipia lo hi leh, Zentail mite pen, 'Mi nin hi' ci-in hong kih uh a, thuman hong hilh ngei lo ding uh hi. Tua manin sasiang lote tawh lim lak in, hih sate na kih bangin kih ken, aci nuam hi zaw hi. Sa sianglote pen sianglo lai ahih man zawk a, limlah na in akizang thei hi zaw hi. Pocket Bibel Hand Book .HH.Halley, 508.(Hih laibu pen, Baptist te in Sia asin na uh ah Text book a, azat khat uh hi.) Peter mang muhna sunga sa namkimte pen, Topa in siangsak ta hi, ci-a agen pen, asa takpite siangsak ta hi zaw lo-in, leitung minam khempeuh in Gupna thu za a, hong belh uh leh, minam khempeuh gupna ngah thei dingin SIANG hi, cihna hi zaw hi, ci hi.
1Tim 4:1-4 a, An pawlpawl te tan' nading gen ding acih pen, Gnostic te hi a, amau baan zom a upna nei pen RCM te hi. Mk 7:14-23 sunga, a lutsuk nate in mi nin sak zo lo a, ek in kitha khia lel hi, Tua ahih ciangin sa khempeuh asiang hi, acih na tawh zong mi te leihang thei hi. Tua sa acih na mun pen, KJV in, meat ci a, khanglut mangpau hi. Meal cih tawh akibang hi. RSV in, Food ci hi. Grik pau in bel, Bromata ci hi. Gen 1:29 a, mihing te neek ding in, gahte vui te, ka pia hi acih na ah, na Bromata dingin ci hi. Singkung te ah amaute Bromata ding gah ding hi. Singkung ah Sa(sakhi sa peuh, voksa peuh) agah na mu ngei uh hiam? Hih Mk 7:14-23 sunga kigen sa cih pen, sa hi het lo a, An cih na lel hi zaw hi. A peuhmah in, tua thu hong kipau khiat khak theih napen, Mt 15 sung thu tawh akibang hi a, sasiang leh sianglo vai kigen hi het lo in, khutsil lo-a annek vai kigen na hi bek zaw hi.(Pasian thumaan na theih nop taktak leh thungen in la, sim lecin)
Laisim mimal khempeuh Topa kilam thak na hong suak sak ta hen.
No comments:
Post a Comment