Azom te(4). Sia te pha thei na thukham(Moral Law),Thukhampi-Sia le Pha theih na thukham. Hih sia le pah theihna thukham pen,Eden huanpan phet a ih nu masa Eve in sia le pha theihna singgah ana nek akipan akipalsat ahi hi.Tua thukham pen LST sung Ex 20:3-17ah,akim in kigelh hi.Pasian in, sinai mual pan in suangpeek nih tungah Ama khutme tawh gelh sa in hong pia hi.Ex 30:18.Tua suangpeek 2 te tunga thu sawm suaha kigelhte pen ki-itna bek bulphuha Pasian in Khuavannuai bup a ukna Upadi hi a,Pasian gam ukna pen ki-itna bek kibulphuh ahihna, lakkhia hi.Asuangpeek masa tungah thu lite om a, tua te in ih Pasian pen ihpum ihtanh in it nading thu gen hi.Deut 6:5;Mt 22:36-38.Suangpeknihna tungah thu guk om a,tuate in ei mihing ki-it nading thu ahi hi.Lev 19:18;Mt 22:39-40 Khristian akici napi a,Pasian deihna bangbang azuinuam se lo a,pawlpi tampite in,Topa Jesu in thukham nih bek hong pia a,Topa Pasian it nading le ih lawmte it nading bek hi.Thukham 10 suang tunga kigelh te kul nawnlo hi,beita hi,ci ngiau mawk uh hi.Ataktak in telkan leng, Pasian in mihing hong bawlphet in,pasal abawl lai in Amah lungdam sak dinga abawl hi a, tua suangpek masa tunga kigelh thu 4 teng pen-ii deihna te hi pah hi.Numei abawlciang leuleu in,pasal pen amah kia a om ding hoih sa lo a,ahuh dingin numei abawlsak ahi hi.Numei abawl na ah,khat le khat kihuh ding deihna hi leuleu a,thukhampi 10 te laka anunung 6 te teng tawh ih kihuh nading dan telgen ahi hi.Jesu hong piakthak thukham 2 ih cihte pen Pasian ih it nading leh ih mihingpihte ih it nading thu hi a,tua mihing hong bawl limphet angim na pen mah hi kik in,tua ngimna te atelzaw a hong malgen ciangin thu 10 in hong koihsak ahi pan zaw hi.Mihing in Pasian deihna bang akawi amam in zuih nopna lungsim nei lo ahih manin,abaihlamlam,agen nopnop,a ut banga omh theihna dingin suisui,bawl behbeh zenzen uh hi.
Hih thukham 10 tepen akiphiat cih thadah in mihingte in gupna ngah tham cing maw cing lo? cih thukhen na in kizangh hi, ci zaw hi. Eccl 12:13-14.Tua thukham 10 te azui mite in ahampha hi. Banghang hiam cih leh vantung khuapi kongvang ah lut thei ding uh hi,na ci zaw hi.Mg 22:14.Tua kongvanga lutkhuan ngah lo tepen Pasian bia lote bek ci lo-in,"Topa,Topa,Nangma min tawh dawie hawlkhi/ Nangma min tawh Pasian thu hilh hi lo ka hi uh hiam?" aci, aki-Pasian bia sak lua mahmah te mah zong hi ding,ci mawk hi.Mt 7:21-23.Hih mun a kinawhkhia a cih te pen,Pasian bia napi a, a Upadi aphiatsak te,azui nuam lote agen na ahi hi.
Jesu leitunga hong pai na pen,tua bang mite in,"Thukhampi 10 te beisak dinga hongpai hi,"ci-in ngawh mikmek uh hi.Topa mahmah in,"Tua thukhampete abeisak dinga hong pai ka hi kei hi.Akicing sak dinga hong pai ka hi hi,"ci zaw hi.Mihing hih na tawh tua thukhamte kizui zo lo hi,ci mikmek uh a,Amah mah mihing hihna tawh hong pianga,"mihing in kizui zo tham lel hi,"cih khekhap lak dinga hong pai hi zawzek hi. Mt 5:17-19.1Pet 2:21.Thamlo in,Ama hong pai ma limphet in Kamsangpa Isaiah in 42:21 ah Topa in,a thukhamte meekneu zaw lo-in,zaii sak zaw ding hi,ci in na hilhkhol zo hi.Tua agen na mah bangin,Jesu in, Na U na nau na muhdah leh,athat na hi hi.Numei khat mawhpih nopna lungsim tawh na et leh,na lungsim in tua numei tungah amawh zo hi,ci hi.Mt 5:27.Tua thu ih et ciangin,Thukham sungah,mi na that kei in,mi zi tawh na mawh kei in, acihbek pen,bangzah in laigil zaw in,thukzaw hiam cih kimu thei pah mai hi.Jn 15:10,"Keimah in ka pa thukhamte ka zui a, hong itna sungah na om ding uh hi.,"ci hel zaw lai hi,Ih zuih nop kei leh,hong itna sungah kitum kha zolo ding ahihna kimu hi.
Mipawlkhat te in,Khrist in hong gum zo hi,ci-in um in saang peuh leng,zuihna sepna kul lo hi,ci ngiau uh hi.Tua bang mi te in Rom 3:31 sim leh hoih hi. Eite in Topa um in ih saan'ciangin thukham paaikhia lo-in ih kipsak zaw hi,ci leuleu hi.James in,"Pasian ka um hi na ci hiam? Dawi gilote in zongh um in, lau in aliing uh hi.Gamtatpha in zui lo upna pen asi hi,cih thei lo na hi hiam? na ci hi.Jm 2:19-20.Thumaan zuih sawm lo-a,'Jesu ka um hi,'aci mite pen Dawi gilote tawh ki bang lian hi,ci hi.
Tu lai hun a,dawi gilote khaa nasepna tawh hong luangkhia Piangthak akici pawlkhat te in,'Thukham kul lo hi,Upna bek thupi hi,' ci phadeuh se uh hi.Upna zong thupi mah a,Upna pen apaipi cih ding hi zaw mah a,ahih hangin tua Upna pen,'gamtatpha in a zuih kei leh,asi hi a,'dawi gilote deihna ahi hi.Upna in gamtatna puah ding hi.Zuihna piang sak ding hi.Rom 5:15.Thukham om kei leh,mawhna omlo hi.Thukham kul kei aci pawlte in lah,mawhna pen om sakthei veve zel uh hi.Rom 6:14.Tua mawhna akicite pen,thukhampalsatna hi mawk a,1Jn 3:4.Tua ahih ciangin Upna ih neih ciangin thukham beisak ding hi zaw lo-in,va sukha het lo ding, laigil sak zaw,kipsak zaw ding cihna ahi hi.
Lucifer leh apawlte in vantung a om lai un,Pasian kiangah hih Thukham 10 te phiat dingin va ngen uh angah lo uh hi,ci-in ih gen zo hi.Hi lai ah, tua Thukham 10 pen bangzah in kip hiam ih telgen zaw lai dinghi.Vantungah Lucifer le apawlte tengin tua thukham 10 akiphiat nop manin tualgal hong phuangkhia uh hi. Pasian na langdo uh hi. Tua Upadi 10 te na phiat lel nuam hi leh,langdo lo ding uh hi.Tua galdo na akipat tuungin teel ding thu nih hong om hi. Tua Thukham 10 kisap zaw ding maw Lucifer le apawlte kipsak zaw ding maw? ci-a teel na hong kul hi.Bang bang hi leh,Lucifer le apawlte tengin tua thukham deih lo-a, tua Upadi tawh mun khat ah om khawm thei lo uh hi.Khat zaw sangh-sangh paihkhiat kul ding honghi ta hi. Tua muna adin' laitakin, Pasian in,Upadi kipsak ding deih zaw a, tua Upadi deih lo Lucifer le apawlte teng nawhkhia zaw hi.Leitungah hong kikhia suk uh hi. Eve na zol uh a,zolngah in mawhnei te suak hi.A zenzen in Pasian,"Khai tate, ih Thukham deih lo lua na hih uh leh,phiat mai ni in, Adam te Eve zongh amawh lo hi kik mai unla, Lucifer te zongh hongciah kiklel mai uau" ci leh, aheh ding kuamah mo lo hi.Thukham pen kip ding, Leitung mite pen amawhnabang thaman thuak lel ding,cih na hi khin zo hi.
Jesu in hong lainat lua ahih manin gupkhiat kik ding hong sawm hi. Hong gupkhiat nading pen,Ama nuntakna pia in sihna thuak ding hi sawnsawn hi.Abawl sa te'n ATapa pangbet in,khelbawl in athahna thuak amuh ciangin muhnop sa lua dingin na um hiam?
"Mihingte lainat lua-a gum nuam na hih leh,Upadi om bangin amau thuak ding liausum,sihna dan mah na va thuak sak kul ve!"ci zaw lailai mawk hi.Tua ngaih sun leng,Pasian Thukham 10 te bangzah in kip hiam cih kimu pah lel hi.Mihingin zui nuam loh manin ih phiat sak pongmawk hangin,vantungah kiphiat het lo hi.Topa Jesu in,eite mawhna maisak nadinga siansuahna abawl na ah,tua Thukham singkuang tungah Ama sisan theh in akisik kik mawhneite min sazian va bawl lai hi. Heb 9:11.Tua siampi lian sepna panin hong pusuak kik ciangin leitung ah hong kumsuk kik dinga, tua siansuah na ngah mi te hong la ding hi.Mg 11:19.Tua siansuahna pan hong pusuahna kong kihong panin Thukham10 singkuang kimu lai hi.John in ci hi.
Eccl 12:13-14,Mg 22:14.saikaak leng,tua kong vanga lut dingte pen,thukhampi 10 te tawh kisit ding hi, ci hi.(1).Mawhna ih cih pen, Ci nin tawh genteh leng,(2).Jesu sisan pen,satpiang tawh genteh leng,(3).Ei zuihna pen, tui kibuak tawh genteh leng,(4).Thukham pen bel, koilai nin hiam etna limlang bang hi. Tua teng pen,ama kizatna mun tek a om hi a,akimma akizat ciangbek in mite Ci nin siang thei hi.1Jn 2:3,4.Thumaan atheih khit ciangin zui tuan lo-in a omna sa ninlak mah ah akibual kik te bang na hi kei in,1Jn 2:7.Thukham thak Jesu in hong pia lo hi. A cil pan phet a kinei Thukhampi mah akipden lai hi. 1Jn5:3.Pasian ka it hi,cih pen baih hi.Ih it leh,Ama thukham te zui ding,ci hi.Tua zui ngap lopi, ka it hi,cih pen zuauphuak pa hi, ci hi.Jm 2:10, Pasian thu ka zui hi,ih cih hangin,thu peuh ih nial (offend) leh avekpi a palsat mah bang veve hi,ci hi.Nial hi lo,khiat khazel pen mihing omzia (nature) hihna hi a, ni 1 in, 7x70 vei maisak theih hi,ci hi.Ahih hangin Nial hihna pen,khatvei bek anial Lucifer pen mai sak lo mawk hi.Tua thu na telsit dih in.
Jm 2:19. Thu ka um hi, cih lel pen zuihna a om kei leh Dawi gilote in zong um in kihta in liing liang uh hi,ci hi.Tua dawi gilote tawh kizakim na hih na lak hi bek hi.Mg 14:12.Misiangtho ahi te pen, Thukhamte zui a,Jesu asangte hi,ci hi.Athu nih in kop ding hi.Tanglai Judah te in,Thukhamte zui a,Jesu sang lo uh hi.Alang baai hi.Tu lai Khristian te ta leuleu in, Jesu sanga,thukham nial ta leuleu hi.A khelang mah baai veve hi.Misiangtho akici te pen hih thu nih akop in aneite hi ding hi. Tu a na omna pawl pi upna ah, tua thunih alenkop hiam? na kisit tel in.Thukham pen,Ei zuih zaw vei ding hi kei,ci-a,athal nial mawkte pen,Angkhilh kikilhkhial khelnuam lo-a,limlangpi adenzan sawnsawn pa bang hi.Ama liau sum ding pen,Hell meikuang ahi ding hi.Tu in ahun om lai hi.Kisit tel in.
5.Natepian pih ngeina (Upadi or thukham)Natural Law. Hih pen,zingciangin ni hong suak dinga,mual dawn a vuk khal te nilum ciang in tui mang ding hi,cih te pawl,phal bi ciang ni tom in khua vot,khua khal ciang ni sa in,singteh lopa te keu hi,cih te pawl,pianpih thukham kici hi.Tua nate pen amau ut bangin piang khia mawk hi lo a,Pasian in, asawl bangbang apiang ciat uh hi zaw hi.Tua na te hong pian ciangin Pasian in puahpha thei het lo a,nate pian zia zui in Pasian a gam ta lel,a leh zuih lel ding bang pian in mi kim khat in seh kha zel thei uh hi.Tua Pasian khuanpiak banga om nate pen Dawi in bawl beh thei vial lai hi.Hih thu ah,Job thuak nate pan in ih mu thei hi.Tu khawnga huihpi gilo guahpi gilo te zong, anei Pasian deih na bang lopi in Dawi in hong zang sak zel ahi zaw hi.Dawi in mihingte hong khelbawl na in zangh ahi hi.Laisim te Topa'n thupha hong buak suk hen..
Kimnu/nunu
No comments:
Post a Comment