Thukham (or) Upadi akici peuhmah te aneite in aphiat mateng hiam,aneipa asih mateng hiam kip ding hi. LST sunga Thukham akici te zongh,aneipa Pasian in aphiat ciangin bei bek ding hi. Tua ahih ciangin Ama gam ukna Upadi Thukham pen bel amah Pasian ahih laiteng bei thei ngei lo ding hi. Thukham mah kici veve napi a, akibei sak sa pawl khat bel om mah hi. Tua abei kik te, bangte hi a, akipden ding thukham pen bangte hi hiam? cih ih telsit kul ding hi.
LST sungah mang pau in LAWS akici thukham pen, nam 5 pah hi. Tua te pen, bangthukham hi a, bang deihna a kham hi a, bang hun ciang kimang dinga akhaam hi hiam ih tel sit ding hi. (1) Jew te leitung ki-ukna thukham ( Civil-Law). (2). Cidam nading thukham. (Health-Law). (3).Limciing thukham ( Ceremonial-Law). (4). Sia le pha theih na thukhampi (Moral-Law).(5).Nate pianpih ngeina (Natural-Law) te ahi uh hi.
Hih atunga thukhamte pen,LST sungah LAW vive mah na kici hi. Ahih hangin tua thukhamte kibang kim lo hi. Akhaam na ahang telkan lehang, adeihna telmuh lehang, abeikik pawl leh abei kik nawn lo pawl om a, abei kikte in zong, bang hanga bei kik, bang hun ciang abei kik,bang acih leh bei kik cihte athu in na om dimdiam zel hi.Abei kik thei ngei lo dingte zong, bang hang hi sese cih athu tawh kimu thei pah mai hi. Mite in LST sung thu atheih na laklawh ahih manin hi thute ah kiselna peuh om sak thei zel uh hi. Tu in hih lai na simsuak lecin,kisel akulnawn het lo-in,abei te bang hanga bei,abei lo te zong bang hang bei lo,cih pen nang leh nang in na mutel pah mai ding hi.
Eze 22:26, Amau' siampite in, Ka thu siangtho le siangtho lote helzau in, anin le asiang tokkhawm in, Ka Sabbath siangtho pen bangte atelmuh khak theih loh nadingun, amit uh hum uh hi. Kei zong amaute ka nusia-thop hi, ci hi. Helzau kha pah pah ih hih manin, kiselna peuh apiang khazel hi zaw hi. Tel nopna tawh na sim leh,akitel thei tham cing dinga ka gelh hi.
(1).Jews te Civil Law, Leitung ki-uk na Upadi pen hi. Tua hun lai in, Pasian in Ama teeltuam minamte direct in na uk suk pah a, leitung ki-ukna-a kizangh hi napi in LST sungah na kigelh hi. Ki-ukna dan pen, Democracy pen tangpi deihna tawh ki-ukna hi a, Authocracy pen lutang khat deihna tawh ki-uk na hi, Theocracy pen Pasian in direct-a hong ukna hi. Gentehna in,Na ha tangkhat hong tupkhiat sak leh,nangzong aha tangkhat tumkhia kik ding,Na sanggam nu mi in hong buan sak leh tua zah gam ding, cih te pawl hi. Leitung ki-uk nate LST sungah om ta zong in, Mikhempeuh/ Kumpi gam kikhen a, amau gam Upadi ciat na om zel ahih ciangin, ih gam ciat kumpite Upadi bang ih zuih kul hi.
(2).Cidam nadingthukham. Hih pen, Pasian in mihing hong bawl lai-in pumpi,ci le sa, thagui, satak, khuak te guhngeek te, bang na teng agawm hi a, bang ci leh cidam ding cih pen Amahmah in thei tel pen hi.Abawlsa mite hoih nading ahong piak zuih ding thute pen, ahong gawtbawl na hi lo-in hong it na hi a,cidam in, hat in,pil lehang hong deih nahi, ci-in ih up phot kul hi. Pawl khat tein, Pasian ka um hi,ci nuam napi in, Voksa siang lo hi, acih cianga, "Voksa alim penpen, bang sian' loh nading hiam? siangtho takin ih sawp kei diam?" ci uh hi. Pasian gen bang a um mite khawng ciamnuihna in nei zaw uh hi. Tua bang mi te, Pasian ka um hi,acih hangin, Pasian thu a um nai lo, ahi zaw uh hi. Sia le Pha theihna singgah pen, Pasian in, 'Na neek uh leh, si ding,' acih pen umzo lo in, Gulpi gen umzaw in na ne hi. Pasian in amah a it mana asiat theih na mun ahilh a hi hi. Pasian in, sianglo hi, acih pen, siangtaka eite sawp theih hi lo zaw ding hi. Eve sangin ih upzawkna om lo hi pah lel hi. Leitung abawl tuunga pagul te, tua lai-a mite in ne leh gui ding hi. Noah hun, Jesu hun, Tuhun ciang zong,ei khang laitakin tua pagul pen eite in ne leng gui lai veve ding hi. Pasian in tua pagul te bang daat teng gawma apian sak hi hiam ih theihpih zo kei hi. Mihing ce le sa tawh kilem lo hi mai hi. Sasiang lote bang zongh, abawl tung in bang daat teng gawma, tua ganhing piangsak hiam kuamahin ih theihpih kei hi. Asianglo abawl pen, tui tawh sawpa siantho sak kik zawh ingin um dah zaw hoh ni. Pasian in, a it a tate hong khem ngei lo hi, ci-in um zaw ni.
Laisim mimal te Topa'n thu pha hong buak suk ta hen.Aban te zom lai ding.Kimnu/nunu
No comments:
Post a Comment