A zom te
(3). Zehtan' thukham. ( Ceremonial Law).Hih zehtan' thukham ahi te pen, Pasian biakna mah a kizangh thukham hi veve ahih manin Khristian sungah upna ahong buaisak thei penpen thukham ahi hi. Pawlpi tuamtuam te in LST sinna sang golpipi koih tek uha, Degree golpipi pia ciat uh a, B.D,/ D.D,/B.Th,/ M.Th,/D.Th peuh pia luapluap uh hi. Ahih zongin tua digree lak nading sinna te ah, amaan in asin kei pah phot uh leh, bangzah in a degree agol hangin thei tuan lo ding uh hi. Khat le khat asinna uh kibang lo-in kitukalh in buai pha san toto uh hi. Theology siam mahmah akici te. deihkaih siam mahmah te hi a, mikhem asiam mahmah te asuak uh hi.Zehtan'thukhamte pen, Topa Jesu Gumpa hong pai ding, hong thuaksia ding, hong si ding, lemciin' kholhna teng leh tua Gumpa um-a ana saang teng kiciamtehna te hi a, Topa hong pai ciangin tua zeh pen khawl hi. Gentehna in, Kumpipa hong zin ding ahih manin ni 10 sung Motor paikawi kikhak a, Kumpipa hong zin khit ciangin Motor paikawi te paikawi thei kik a,ahih hangin asanit pen kikhel in, veilam ah ki-awn nawn lo-in, ziat lam ah ki-awn hi cih bang hipah nai lo hi. A khawl ih cih te zongh, tua bang ciang hi bek a,akiphiatsiang hi nai lo lai zaw hi. Hi pen den ciangin a tel mahmah in ih gen lai dinghi.
Amasa in, Topa Jesu Gumpa hong sih nading limciin' na gangawh biakna pen, Adam ta masate Cain leh Abel tungah na kisawl pah hi.Tua biakpiak na pen gan sisan luang teekteek ding ahi hi. Tua sisan luang in, Gumpa sisan luang ding kawk khol hi. Gen 4:3. Tua sisan luang tawh biakna hong pia mite in, Gumpa in asisan luangin kei hong gum ding hi, cih thu um a, tua lim hong ciingkhol uh ahi hi. Abel in Gumpa sisan luang ding um a,akisawl na bangin sisan luang ahih man in Tua biakna kisaang hi. Cain in bel, Pasian maan khat om mah hi. cih ciang pen um a,ahih hangin ka mawhna hangin Gumpa sisan luang ding hi, cih teekteek se pen um lo in,ama neih khaici limci mahmah te tawh biakna hong pia a,kisang lo hi.Tua te unau biakna in, tu lai hun a,Pasian bia akinei veve,upna kibang lo pawlpi tuamtuam tampi om zelzul te om zia ding limlak khol hi, ci hi. Ahong kisawl bangbang ci cinten se lo-a eima hoih sak bang ciata biak lel ngiau mawk na in, Cain baikpiakna bang hi lel dinga, ih biakpa in na sang kei leh amawkna veve suak ding hi. Ahang in,Gumpa sisan luangding limciin'na in,ganno sisan luang teekteek akul hi a, Cain in,ganno sisan luan'sak teek se ding pen, ama ut thu in kul sa lo dih mawk hi.Tua manin kisang lo hi.Gen4:3 sunga sawlna ganno pen in 1Kor 5:7 sunga Khrist sihna limla ahih na telhilh kul lai ahi hi.
Anihna. Vun at na. Gen 17:10, Abraham tungah,Pasian in, amah pen sapkhiat teeltuam ahihna teci dingin atapa khempeuh vun naat sak hi. Tua ciamteh tuam na pen, Khris hong pai ciangin tuiphum na tawh na laih sak hi. Kol 2:11. Bang hang hiam cih leh, vun atna sangin tuiphumna in a khiatna kicing zaw in hong lakta hun hong tung hi. (a). Tui sungah ih va kiphum suk na in, misi vui limla hi a, ih mawhna teng sisak in, tui sungah va vui, nuntakn thak tawh thokik ta, tua pen, Khrist in eite mawhna hangin sihna thuaka, kivui a, nuntakna thak tawh thokik zo,limciin'na mah hi leuleu zel hi. Rom 6:1-5. Hihte pen Khristian suakte in ih bawl ciangin, zeh tanghial hi lel a, apumpi adingin bangmah phattuam na om hi lo,TB vei khawngte gilsan vei khawngte hong dam hi tuan lo hi. Ahih hangin Topa ama adingin hongsi a,amah in gupna thu na sang hi, cih lim lahna ZEH ahi hi.
Athumna. Pasian Tuuno gawh dan, le siampite Zeh te. Ex 12:1-19,mawhsut na, gangawh baikpiaknate ah Zeh tampi om hi. Tua zeh te in Khrist singlamteha hong sih ding zia, ei mawhnei te hong gupkhiat nadingin gimna hong tuakziate limciin'kholhnate vive ahi hi.Limciin'na vive ahih ciat tei hangin paisan pawi Zeh te ah Gumpa thuakzia kim pen leh kitel pen ahih ciangin tua pawi Zehte telgen dih ni. Izipt gam sungah Israel te sila in kum 430 sung ava omh khit uh ciangin Pasian in amaute honkhia in, Mosi in Khanan gam zuatpih hi. Pharoah kumpipa in na phallo a, gimna nam 10 te athuak ngiat khit uh ciangin khakkhia pan hi. Tua gimnate anunungpen 1491 BC kum Abib kha 14 ni zan in tung hi. Mosi le Aron in Israel mite kiangah, Abib kha ni 10 ni in, poina nei lo Tuu no khat ciat nei khol dingin sawl hi. 14 nitakin go dinga, asisan kongbiang kiim ah tat ding in thupia hi. Tua pen, Mawhbaang lo, Jesu Gumpa limcing hi pah hi.Tuu sisan kongbiang kiim-a atat na uh in, Gumpa sisan singlamteha luang ding lim hi. Azan ciangin gimpia vantung mite khuasungah hong vak uh a,sisan kitaat innte peel in, paisan uh a,gimngah lo-in suakta uh hi. Tua paisan na hangin paisan pawi kici hi.Sisan kitaat lo innte ah lutin,agan golpen leh ata upa ciat thah sak uh hi. Tua tuuno aguh kitan sakkha lo uh hi. Gumpa singlamteh ah akikhai ni in, Friday nitum ma in si a, Sabbath kipat ma in asi lo misuam 2 te lakhia a akheguh akuaihtan sak uh hangin Gumpa akheguh kuaihtan kul lo ding, limciing khol ahi leuleu hi. Guta te akhe akuaihtan khit uh ciangin singlamteh phungah vil kul lo-in kinusia a, Topa bel kivui lel hi. Jn 19:31-37. Tuuno sa, tui tawh huan lo-in, mei ah hangkeu uh a minsak uh hi. Tua in Topa luang muat lo-in thokik ding limcing ahi leuleu hi. Act 2:31-31.Tua tuuno sa pen amau innkuan longal midang tawh ne lo uh hi. Tua Zeh pen, Khrist um-a tui kiphumsa longal in neekkhawm ( Communion Service) kine sak lo lim hi leuleu hi. Abib kha 14 ni zan, Israel te in tua Zeh teng bawlin, sapkhiat ding,hotkhiat ding ngak in om uh hi.Kongbiang kiim a sisan kitaat lo peuhmah misi nei in hong kiko zelzul uh ciangin, Pharoah kumpipa in, Mosi te Aron kiangah amanlang thei zahzah in a mite apaikhait pih nadingin thu pia hi. Amau te in Tuuno sa ne-a gilvah tha hat in, paikhia uh hi. Tuuno sisan in asuahtak nadingun lim na laka, Tuuno satak in a maute thahat nadingin gilvah sak hi. Hite in, Khrist sisan in hong suahtak sak khit ciang in,Khrist Khaa in, thahat nading Ama deihna zuihzawh nadingin tha hong guan' ahih na limciing ahi leuleu hi.Hih pawi Zeh te pen, Izipt gam pan hong paikhiat nitak pan in,kimanna nei a,ahih zongin 1491 kum panin kumsial sial in Abib 14 ni ta in bawl denh uh a, lamdungah kum 40 leh Khanan gam lut khit ciangin kum 1400 val bawl lai uh hi. Paikhatna ding lah om nawn lo hi napi in, gumpa sihna limciing Zeh ahih manin kumsial mah in bawl denden hi.Gumpa hong pai ding thu um uh ahihna limlahna hi.
Tua hi a, tua hun lai-a kithoihna tawh mawhmai sakna a ngah mite in zongh, gumpa a Upna hang uh a, gupna ngah ahi veve uh hi. Tu hun a Upna hanga gupna ngah ih hih mah bangin tua lai ate zongh upna hang maha gupna ngahte hi a, tanglai hi ta leh,tu lai hi ta leh, gupna ngahte pen, Upna hanga gupna ngah vive hi in, sep zawhna hanga gupna ngah khatbeek om lo hi.
Tua pawi kipat ni leh abei ni, Abib kha 14 ni leh 21 ni, tua pawi adingin Sabbath tuam vilvel khat nei lai uh hi. Tua Sabbath pen, Pasian thukham 10 te sunga nambat 4 na sabbath pen hi lo hi. Tua pawi-ii sabbath pen kum sial ki bang lo hi. Sunday pan Saturday sung kilaih laih lel hi.Jesu kigawh kum AD 31 bangte in,Friday tawh kituak hi.Tua kum-a Pasian Tuuno kigo ding pen zong Topa asih ciangin khimzinga,zinlinga nalamdang hong om natawh laulua in kitom in akhau peeksat in taimang in kigo lo hi,ci hi.Tua kum-a kipan paisan Tuuno gawh akul nawn lo ding limlah na hi.Alimciin'den-atatak pen ahi Jesu kigo ta hi.1Kor 5:7.Tua pawite leh aZehte khempeuh abei ta ding ahi hi.Hosea 2:11.Tua pawi abei ciangin,tua pawi-ii Zeh te laka khat ahi asabbath (Her sabbath) ahi pen zong a beikhawm hi.Lev 23:38-39a,Topa sabbath ahi lo,adang sabbath,acih pen tua pen ahi hi.Zeh tuamtuam tua zah a,tam te tawh kumsial in nabawl suk den uh a,kum tul val bang ahih ciangin na ngei na ngei na neih mai ta uh a,amulkim huai nate zongphawk in nei nawn lo mai in,naukap khemna peuh in na nei ta mai uh hi.Tua man mah in lah,thei khial uh a,na that kha hel sam uh hi.Tua a Zeh te uh,athugil na sittel phapah uh hi leh Tuuno agawh uh ciangin," Hongsi ding,Hongsi ding,"aci denkeei uh ahihnate na mu dinguh hi.Asih ciangin zongh,"Hei leh,sitakpi e,"cih pah ding hi a, tu in si khin zo a,eite in lenggahtui leh khomun tawh,"Hongsi zo,Hongsi zo,"ci-a alim aciing kik ta leuleu ih hi hi.Kol 2:16-17.
Gal 3 sungsim lehang,Diktanh-sakna akingah zawh het lohna thukham agen denkeei pen,hih zeh thukham te ahi hi.Tua Galati lai akigelh hun lai in Jews te in tua Zehte na bawl lailai uh a,"Sikhin zo"ci-a lah ta ding pen,"Hong si ding"cihna Zehte mah tawh na lak lailai uh ahih manin, Paul in ahilhtel na ahi hi.Gal 2:21.Thukham in Pasian thukham te langkhat ah om ahi hiam?ci pha san hi. Pasian thukham 10 te ahi lo thukham dang om a,tua te agen na ahih lam kitel mahmah hi.Gal 4:10ah,"Note in,nite,khate,na tang tazen uh hi," acihna en leuleu leng,Abib kha 14 le 21 ni sabbath cihte atan'lai na uh kimu hi.Amau in Jesu Gumpa na saang lo uh a, Ama hong sih nading limciing Zehte na limtan' mahmah lai uh hi.Zentail mi Khristian sunga hong lut nuamte khawng bang,"Na vun uh at phot ding,pawi Zeh te tang phot ding,"ci in na hilh zaw lai uh hi.Rom 14 sunga,Ni khat sangin ni khat lian zaw,neu zaw, kibang,cih thu te leh nekna dawn na agente bang zong hih pawi Zehte ahi hi.Kol 2:15-17.,sunga khade ni,nipi ni,neek leh dawnte, acih pen mah tawh akibang hi a,tua pawi Zeh te ahi hi.Ataktak pen Jesu hi a, hong pai khina,limciin'kul nawn lo hi,cihna hi.Khade ni 10 ni, Tuuno neikhol ding, 14 ni go ding,tui tawh huan lo ding,a guh kitan sak lo ding,mi dang tawh ne lo ding,cih bang Zeh te khempeuh huam hi.Pasian thukham 10 gen na hilo hi.
Mi pawlkhat in Sunday tan'na pen, Topa Jesu sihna pana gual zo-a hong thawhkikna pahtawi na le ciamtehna hi,ci uh hi.Kum khat in sunday 52 vei om ahih teh,Jesu pen kumkhat in 52 vei thokik lo hi.Khang tawntung adingin khatvei bek thokik zaw hi.Tua mah zui in,mihing khat nuntak sung buppi adingin Topa thawhkikna ciing dingin khatvei bek bawl dingin hong sawla, tua pen,TUIPHUMNA hi.Tuisung pan thawhtoh kik cianginTopa thawhkik na lim nuntakna thak tawh thawhkikna ahi hi.Rom 6:1-5.Sunday tanh nabel,LST upna maan pan lampial RCM upna puuk sungah Lawki ni biate in aguan'phuahtawm upna nei ahi uh hi.Nibia Lawki kumpi te in,AD 167 kum pawl,pawlpi makai Justin Martyr te kiangah "Na Topa uh tawhkikna ni zong hi ngawn lo hiam? thawhkikna pawi bawl un,ci-asawlna huzaap ahi hi.Tua bang mite tungah Jesu in,"Amaute in akam uh tawh kei hong biak uh hangin,alung sim uh kei tawh kigam la hi.Mite thukham zui uh a,Pasian thukham apaaikhia uh hi.Amawkna in kei hong bia uh hi"cih Mk 7:6-9sunga thu amau te om zia gen na ahi hi.
Topa sihna limciing khol aZehtan thukham te pen Topa hong sih ciangin khawla,adang khat in kilaih a, neekkhawm bawlna hong hi pah hi.A bei thukham akici te zongh,mot bei hi sam lo-in,akhiatna kitel thei zaw Zeh thukhamte khat mah tawh akilaih na hi zelhi.Jesu hong sih cianga khawl thukhamte pen Ama hong sih ding limciing khol teng bek mah hi a,"Hongsi ding,"ci-a teci limlak khol teng pen,"Hog si ta,"cihna tawh kilaih bek mah hi a,CIDAM NADING LAW leh THUKHAM 10 te asukkhak na bangmah om zenzen lo hi.Tua thukhampi kizatna pen Pasian in agam bup a ukna Upadi hi a,Pasian pen Pasian ahih laiteng bei thei lo hi.
Laisim mimal Topa'n thupha hong buak hen..
Aban zoplai ding,
Kimnu/nunu
Hoih mahmah ei
ReplyDelete