Dear Laisim khempeuh,
Hun khat lai in, Pau Cin Hau pawlte ahi kici in,
zaangzawl khuate Vun Khai ka khua uah hong zin hi. Khuksia, munsia te hawlkhia thei hi, kici hi. Tua banga ahawlkhiat sakte, a inn neite in dangka peek 3 ta pia hi. Dawite man dingin dawi palik ci-in mipawl khat Ordain hi. Tua pasal dawi palikte gal hiam pen, a telephone ding uh Theikhuang,anamsau ding uh guatem, ateipi ding uh gawpi tuul zum, nei ciat uh hi. A puansilh pen uh, Pianciktum te ( Great Coat) blankawtpi te, a angkhih pen leipum lim tunga sahang nih kimaingat-a ki bawh lim, nidang galkap lukhu (Gualkha tawpi) alanglam kikilh deudau sa in kibang in kizem vevat keei le-uh hong kilawm mah mah sam hi. Ko khuaah dawi palik pen 12 om hi.
Ka khuapihte uh galkap bu khat huan sung ah kuavang khat om a, phalbi lam ciangin meikhu pusuak thei hi. Tua kuavang sung pen lum den hi. 'dawite teng hi', ci-in ki um hi. Tua te khuksia ahawlkhia sak ni in kei ka va om kha zenzen hi. Mi tampi om a, zu khawng kine ziazua hi. Ahun a tun'ciangin dawi-palikte akizem linlen sa in, agalhiam ciat uh tawh suangphah ah hong kigual uh a, Vum Khai pen, bikhalap nuai ah, zu khaihsa thawl khat tawi in, inn sung lam nga in ding hi. Dawi-palikte pen (ambush) galpang dingin apan' mun ding uh hawmkhol a, khat pen kong khang munphiahphung, khatpen, huankhang phaza buk kiang, khatpen phaitam luilam gua phung, tua loteng pen akuavang kiim ah, zothau tawi nih zongh om a, thautang thun lo-in thauvui bek thun in, akuavang uh akigingsa a a om khit uh ciangin VumKhai in, a zuthawl tawi kawm in, akhut lamto a, vasa leeng ding bangin, zam a, phuisam hi. A zu kam khat muam in, innlim tung teng phihphei a, sakhituihhup kual dandan keei hi."Pasian tapa Pau Cin Hau mai ah kei hong suak ingh, Vum Khai hong suak ingh, Tung muvanlai bang hong lam dildial ingh. ( Akhut zaak tawh kilawm mah mah hi) Piangsak pangkhang gulpi kual na kual thei nawn lo ding hi. Thampi kualna kual thei nawnlo ding hi. Mun sia deih lo,dawisia deih lo, kau sia deih lo, na mun na mual peel in, tai in."Pathain fapa kalvary ah ka lokal e,tlan rawh tlan rawh"acih khit teh,"Kap uau," ci aukeei zen hi ven,zothau tawite in akuavang hong kap uh leh, leivui kitung-ngengngang keei zen sam hi. Vun Khai pen amitsi diudiau lel hi napi in,adawite kihei na ciangciang amu den thei in ki nei hi. Tuangdung leh inn lim a ko om a,avek in ki mu thei hi.Zo thau tawite hong kap khit ciangin, aleivui khupi lak mah ah, VumKhai in, "Eii' a pa uh hong taikhia ei, hong tai khia ei, na sat ve, na sat ve' ci-in a sawl leh, munphiah phunga pangpa in a gawtem tawh lei na satngau ong mawk hi ven,"Heii, angawng bantan pah ciai" ci pong hiau zen hi. "Heiii, anu uh anu uh, hong taikhia leuleu ve leh, den-a a pa uh na namsau banga na manh ding a hia?" ci gega nong zen hi ven, den-a a pa uh ngawng abanpa mah in a gawtem ana lik leh,"suktai ei suk tai ei," ci leu leu, tuateh phazabuk kianga pangpa in, a gawzum tawh lei na sunh zau pong mawk hin ven,"Hei, adiip sunlet pah ciai" ci leu leu hi. Tua khit zek teh," Eii, ata upa ata upa, delh ve delh ve," ci leuleu a, phaitam lui guaphunga pangpa in a gawtem tawh lei a na satleh,"sat kik oo, sat kik oo," si zo dek ken ciai" ci a, asat kik hangin lap nawn lo dan in,"Nu tazen aw, dah lua si hang, lah a tai paisuak mawk a, suangpaal te va beel henla, hong kuan kik kha mawl leh maw, ci deng dang keei nong zen hi. A den zek teh, " Eii, ataneu, ataneu," cileu leu a, a kuavang kianga omte khat in agawngtem tawh kuavang gei asat leh," si pah lel sam e" ci leu leu hi.
Mite muhdan in, dawite innkuan bel, patau peuhmah uh hih tuak sam hi. Atate zong don'man nawn lo a, akikap teh, atha hathat hong lengkhia uh hih tuak hi. Apa,anu, ata upa leh ataneu bang kong biang gei ah kisat lum liuleu zen hih tuak hi. Ka nu te khat nau pua a om sam suk in," No na mu hiam? ci-a ka dot leh,"bangh, e'nh, mu zenzen ding, dawisa pa in mu peuh leh aphazo veleh" hong ci hi.
Ngaih sun ni, dawite pen ei sanga zalian zaw hi a, bangci guate peuh sik in mu se ding hiam? Guate sik in mu leh, asik te bang in mu zel ding hiam? Eite in dawite akhem zaw in ih ki nei a, ahih hangin dawite in gua pen sik in amu hi lo a, ih biak ding Pasian bialo in amau khemna bek buai pih niloh leng, Pasian bia lo-a ih nitum ciang pen alungkim khin uh hi zaw hi. A neu alian in, tengta kineih lah hi lo-a tua bang bebeka ih buai hethat teh, dawite nuihza mah mah ding hi.
Laisim mikhempeuh Topa kilam thakna hong suaksak ta hen.
No comments:
Post a Comment