Dear Laisim mimal,
Adam le Eve te mawh nei hong hi mawk hi. Pasian in mawhnei lo Tuu no go in asisan luang en sak a, avun hawk in amaute zahmawh sel sak hi. Tua gan no in, Gumkhiapa Topa Jesu lim ding akawk khol hi pah hi. Tua mawhnei lo ganno sisan luang amuh ciangin Adam in na sa mahmah pah hi. Ama mawhna hangin nahpateh te na ngawn pulhkhia thei pah a, kisungsia mah mah hi. Tua mawhna pana gupkhiat kiknading limcin' na ganhing tawh biakna pen atapate Cain le Abel tungah kisawl pah ta hi. Cain pen lokho nasem hi in, Abel pen gankhawi nasem ahi hi. Biakpiakna ah Abel in aganno hoih pen pen la in, biakna tau tungah asisan luangsak in bia a, kisaanghi. Cain in, ganno nei lo ahih ciangin, ama neih lakah alimci pen pen khaici te hong la a, biakna tau tungah apiak ciangin, kisaang lo hi. Bang hang hiam cih leh, sisan luanga biak ding hi a, khaici in sisan nei lo hi. Ama biakpiakna aki saan'loh ciangin ahehsuaka, anaupa haza in that hi.
Adam in a innkuan sunga sisan luan'na tatsiatna mu in na sa mah mah hi. Hih unaute omzia pen, leitung bei nidonga, Pasian kibiakna zia etteh dinga kikoih hi. Pasian akibiak tek hangin, lungsim tak tawh, Pasian deihna bangbang mang in abia nuam mite om dinga, lungsim tak tawh hi lo, Pasian abia min hi peuh leh aki sawl bangbang zuih ding cih khawng nawngkai asa lel tawh abia mi pawl nih om ding ahihna lak pah hi. Tu-in zong, Pasian bia a kinei, Gumpa Jeisu min mah lo-a, biakna nei mi kitam mah mah hi. Ahih hangin Pasian sawl bangbang mang in zui nuam tawh Pasian bia pawl om a, amin bek tawh, Um peuh leng, ci-a Pasian bia pawl om hi. Umpeuh leng, aci a Pasian deihna zong se lote pen, James in,"Dawi gilote bang lel hi", na ci hi. Jms 2:10-20,Gen 4 , pp 63-79 sung sim in.
Pasian kibiakna teng, dawi in tuh zel.
Tua ganhing tawh biakna pen, na kibawl suksuk a, Izipt sal pana suahtak ding lai bang Topa Jesu gupkhiatna dingzia, athuakna ding ziate, amalmal in ciing in, paisan tuu no go uh hi. Tua ganno abawlna daan teng uh pen, Topa Jesu hong thuak nading zia limla hi a, Abib kha ni 14 ni ta in, na go suksuk uh, kum tul val na go uh hi. Tua ganno agawh sialsial un, Hong si ding, hong si ding, ci-a tang ko niloh uh ahi hi. Tua gan gawhna a kikhawl sak khit nangawn in, ei Lawki thu thei lote lakah Dawi in, amah biakna in hong zangh sak suk leuleu hi.
Ka neu lai in ka khua uah dawi kamsang numei khat om hi. Mi cina a om ciangin, dawi te mat hi a, vantung tote dong leng, sial peuh in ki thoih in tanh leng dam thei hi, ci-a upna mipi in nei hi. Tua kamsang nu pen, dawisa te in beltung sungah phuisam leh, amah lup na a lum lel pen, mangmu in, vantung ah va kah thei hi. Ka lawm te khat hong ci na a, kamsang nu kam kidongh hi. Dawisa pa in, beltung sungah phui asam ciangin, kamsang nu pen vantung ah va zin a, vantung a tun' ciangin, "Leitung sanmonggah, phaza tungmudi-mianmian lakhukhu" hong ci hi. Dawisa pa in, beltung sung mah mah ah," Tu in, ih cinapa kuate mat hi-a bang cih leng, dam ding hiam? tote hong dongh dih oh" acih leh, "Tote in, gam gamlate mat hi in, sikkhau khih khin sam uh in, ahi zongin, sial 30 in lut le-u-cin hong khah un cin, dam lel in teh, aci ve" hong cihi. Tua ciangin Dawisapa in, beltung sungah phui sam a, amah hong ciah kik nadingin ngen a, hong khangh-lo kik hi.
Kei nau pang in, tua cinapa lei nadinga sial 30 cih ia-ua mawk, zinei te in nungak melhoih thahat lai zongh, sialpi nuta peuh kipia ahih teh, sisuk mai leh zong hoih zaw mai lo ding hiam? Tham lo in ih beh taang in ih sial neih teng zongh 30 pha mawk ding hiam? ci-in ka ngaih sun hi. Ahih hangin tua bang hi lo vet a, Tuanvai akici sawltak ding khat sawl in, tungman la in,sailungtang hong hual a, tang khat sial khat hong ci hi. Keizongh, akiangah tu gige in na en niloh in, Tun, hih sailungtang te dawite in sial na sa ding maw? ka cih leh, "Ahi ve" hong ci lai hi. Kei zong, amasa a ka lungkham bang hi lo in, baihlam sa lua peuhmah ka hih ciangin,"Alasai, tuabang lel ahih leh, dawite in sial tul hong ngen zongin, ka lawm cidam nading keimah'n asial khempeuh si ning e' ka va cih khak leh,"Heih, tua bang kici thei lo" hong ci gaih pian a, kei zong, azehpih ka hih leh ci in dah in ka khawl hi. Sailungtang 30 azang meekpek in, akam ding akhutcin amailam ding sik-ka a, mai ki kim in agualh khit teh, ahawl ding, mihing lim, angawngkhawng lah geek selo, ningli nei in, nih anung uh ah suangthu bang vevat koih uh a, angawng ding takah khi ok ahi, ci-in khausan vialin, sawnkaai tot ahi ci leuleu in, akmul nel khat adeek tak ah siat uh hi. Tua pen, phikphek tung khat ah koih in, tawi uh a, gamlak mual kidawkna khat panin phuisam in, gam gamla te va puak uh hi. Sawnkaai tot sa in sial hawl pen kilawm ka sa mah mah hi. Ka lungmawl aw, mantung sawmsial a ka bawl sial na sa in. Mantung sawm sial in bawl ing e, zintual va tuan aw ciing"..na ci hi.
NGAIHSUN DIH IN. Dawite pen, mihing sanga pilzaw,zalian zaw, vantung mi kim lai, Pasian alangdo khak uh cianga kinawhkhia-a amin uh dawite akici hi mawk a, vantung mite hi hiau mawk uh hi. Amit uh eite mit sangin cimzaw ding hi. Dawi mit limlang bulh kigen ngei lo hi. Bang hangin sailungtang kimlai sial in mu thei mawk peuhmah ding uh hiam? Ataktak in ci leng, tua sailungtang te dawi in sial sa takpi hi lo-a, sial asa lopi mah, eite hong khem zo lua a, e'nh dawi in sial sa hi, ci-a um mawk ih hih man zawk in tua ei upna zui in, ih biak ding Pasian bia lo-in amau ih biak nak leh dawite alungkim khin hi lel zaw hi.
Zukham sa in, pasalte bangin,angawng khawng uh tuibuk gimlehzu gim cil nam velval sa in, ki kawiin,tuangdung zui khawng in lam uh a, nitum kuan khua-ul tawh, Zin aw e,zin lungmawl aw, mantung sawmsial aka bawl sial na sa in, acih tuaituai uh teh, dawite pen e'nh mu thei lo, amau ei hong mu thei, ci leng, lawm en in huansak gawl vang khawng, phungbeem khawng panin hong en gige zen ve un cin,"Kei bel lungmawl keng in,nang na hi ve maw alungmawl taktak, ciaiciai bek" hong ci in na nuinui mai lo ding uh hia? La eu pa bang gawlgui dawk liang in sa vangvang nong zen, ki sal in san teta zawzen, nuihzak huai ngel kha zaw mah ding hi. Hih sailungtang tawh baikna te pawl pen dawi hong khem zawhna anasia pen, acial masa pen ahi hi.
Topa'n zomi te kilam thak na hongsuaksak ta hen.
No comments:
Post a Comment