Dear Laisim mimal,
Isa 45:18. Pasian in khuavan-nuai bawl hi. Hih ih omna leitung bek hi lo-in, leitung dang tampite leh ni tampi leh kha dang tampite zong bawl hi. Tua te pen mite teen nading a abawl hi, ci hi. Tua Pasian bawlsa vantung nate lianlua a, mihing in kitheihpih zolo hi. Leitung mite hong pil semsem uh ciangin Telescope kici, aliana kimuh theihna tawh a et uh ciangin vantung ah Pasian bawlsa na lamdang lianpipi te , tawmtawm hong muhpih thei uh hi. America gama Mt Palamour mualtunga kiphut, Hale Telescope akici, alimlang mai letmat 200 azai pen tawh a et uh ciangin, mit-a ih muhna cia 40,000 in alianzaw in kimu a, tua nasepna-a Director sem Dr.Phillip Knox in, "Wonder Words" akici laibu no khat agelh khiat na sunga agente pawl khat kong gen sawn nuam hi.
Paul in, van thuapthum, acih pen, 2Kor 12:2 ah, athuap masa pen vasate vanleeng khawngte leen' theihna ciangte hi in, a thuap nihna pen, aksite nite khate omna ciang pen hi in, a thuap thumna pen, Pasian omna Paradise khuavan-nuai khempeuh phualpi, Vantung Kumpipa teen'na mun pen agen nopna ahi hi.
Ei' ni innkuan thu tawm. (Our Solar System).
Vantunga zingsang siala hong suaka atang vemvam ih ni pen, ih leitung cia 1,300,000 bang agol hi a, ih leitung pan in tai 93,000,000 bang gamla hi. Tua ni kimkot-a leeng leitung(Planet) 9 om a, tua te laka gol pen Jupiter kici hi. Ih leitung cia 1312 vei gol hi. Kha 12 nei a, ih ni kiang panin amah pen tai 484,000,000 bang gamla hi. Tua zoma gol kik leuleu pen Saturn kici a, kiimvial in lengpei zapi khat nei a, apeek deldal in kualvial hi. A laizanga apum pen ih leitung cia 734 vei gol a, kha 10 nei hi. Akha te lakah 9 in manawhna kibangin vial a, khat pen in lehvialh sezen hi. A lengpeidal zatna tai 170,000 bang zaa-a, asahna pen tai 10 bang hi bek hi. Ih ni kiang panin tai 887,000,000 bang gamla hi. Ei leitung tawh akinai pen Mars kici a, ni kiang panin tai 141,000,000 bang gamla hi. Ama leitu lamah lukhu khat khu sezen hi ci hi. Ni dangin mihing teeng dingin ki-um mawh a, ahih hangin aksi lengte khah in man azaih sak uh ciangin, mihing teng thei tuak lo hi ci kik uh hi. Ni tawh akinai pen leitung Mercury kici hi. Ni kiang panin tai 38,000,000 bang gamla a, ni sa lua mahmah ahih manin a leitang pen cisuang bang hi ci hi. Tua zom in Venus pen ni kiang panin anai pen kik nihna hi a, tai 67,000,000 bang kigam lai hi. Ei leitung pen, ni pana gamla athumna ahi hi. Aneu pen pana simtoh in zong athumna mah ahi hi. Ei sangin, Neptune, Uranus, Saturn leh Jupiter cihte azah tampipi in gol zaw uh hi. Ni pana gamla penpen Pluto kici a, ni kiang panin tai 3,670,000,000 bang gamla hi. Uranus zong ei leitung cia 64 vei bang in gol a, kha 4 nei hi. Neptune zong ih leitung cia 60 bangin gol a, kha 1 nei hi.
Hi leitung 9 teng leh ih ni pen, Ni innkuan khat (One Solar System) kici hi. Tua leitungte in kha nei ciat uh a, amau pumpi ciat kipei kawmkawm in a khate uh'n kiim um in, amau ciat in zong ni na kiim um in, ki delh kawikawi uh hi. Nite, khate, leitungte pen munkhat-a dingcip hilo-in, amau pumpi ciat akipei baan ah akikiim um sa-in aleng ciat uh hi a, ih ni zong a leng veve hi. Ih leitung kipei pen setkan khat in tai 18 1/2 hat hi. Tua manin sun leh zan piang thei hi. Ni kiimkot ah vial khat apai na dingin ni 365.6 sawt hi. Tua vial khat apai ciangin kumkhat kici hi. Ih ni zong, ama pumpi kipei bek hi lo in, ataitai mah hi a, setkan 1 in, tai 12 1/2 bang tai a, minit khat in tai 720 bang atai hi. Acturus akici ni khat bang setkan 1 in, tai 257 tai a, minit khat in tai 15420 tai a, nai khat in, 925,200 bang atai den hi. Khamtung gam ah Motor te nai 1 in tai 20 hawl leng, hat lua kisa pian ta hi. Tua tawh teh leng, lamdang mahmah hi. Tua te taitai in koi lai tung ding hiam? ih zom kik ding hi.
Seguk: Ih mit tawh ih et ciangin tang guk bangmah mu ih hih manin Seguk na kici hi. Ahih hangin, telescope tawh aki et ciangin tang 2,500 bang pah hi ci hi. A hatna kikim a leng aksi lompi khat hi.
Zawlzawng: Zawlzawng pen ih et ciangin tang 3 golzaw kitang khat leh, tang 3 neuzaw kitang khat om a, amau zia genna a theih nop dingin, tua agolzaw kitang pen kawnggak ci-in na bulh inla, aneuzaw tempaai, ci-in na bulh lecin, aliangko tuak ding leh akawng tuak ding hong om pah hi. A kawngkiguh tuaka pen aveilam Sirius ki ci a, tang 2 kigawm hi, ci hi. A tak lam apen Rigels kici hi. A liangko taklam a pen Aldebalan kici a, aveilam apen Beltegus kici hi. Beltegus pen ameel san zawdeuh hi. Lengmaw pum phel khap bangin phelkhap leng, ih at tap na ma(Diamater) maitang zui in Rifle tang khat kilawn leh, anawhpaina thakiam het lo in lengleng leh, kum 56 in amaitang khin zo nai lo ding hi, ci hi, pumgol sam hi. Tua te ni vive hi sisek uh hi, ci hi.
Nabula: Tua ak si 3 kitang agolzaw leh aneuzaw te kituahna ah, mitkia tawh kimu zophalo,ak si 1 om a, amin NABULA kici hi. Tua aksi pen tam mah mah ki gawm hi a, gol mah mah in, alai zang vanghi. Tua vang pen thuk mah mah, zai mah mah hi. A thukna tai Trilion 51 bang thuka azaina tai trilion 19 bang zai hi, ci hi. A telnop ding in ci leng, ih ni tawh a innkuan pih leitung teng ki kim vial sa in,gawm cih tuan lo in tua kuavang sungah lut le uh, nuamtakin thawl lai ding uh hi. Tua cia in aksi khatbek pen gol thei hi.
Tua banga ni innkuan makza-tampi akigawm ciangin ( Milky way system) vuklam inn kuan 1 piang hi, ci pan leu leu hi. p.48. Ih pu ih pate in van a et uh ciangin, phalbi lam van asian ciangin vuk kia banga pak zitzet kikhung mu uh a, vuklam na ci uh hi. Mangte zong a hailai te uh na om ve sam a, bawngnawi bua bang ahih manin bawngnawi lampi ci uh hi. Den a ih gen ni golpipi te tampi kithuapa ih et ciangin gamla lua uh a, amal in kimu zo nawn lo-in, akithuapna dungdungte pak hiuhiau in kimu a, tua hi zaw hi. Bawngnawi lampi peuh vuk lampi peuh hi lo hi. ci hi. Ih et toh cianga ih muhte khempeuh ei vuklam innkuan sung a, kihel lai vive hi a, ei omna vuklam system kheng in kimu zo lo hi, ci hi. Tua minit khat sunga tai tampipi aleng nite pen mawk leen' hilo-in,tua vuklam system kim um a leng mah na hi zel lailai hi, cihi. Tua bang vuklam innkuan makza-sawmthum bang kigawm khuavan-nuai (Universe) khatpian hi,ci uh hi. Tua khuavan-nuai (Universe)buppi laizang ah Topa Pasian omna Paradise pen om a, tua vuklam innkuan te in zong, a taitai mah hi lai in vantung kumpipa Tokhom zahtakna tawh kim um in abia niloh uh ahi hi, ci hi. Topa Pasian liatna pen, kam tawh kigen thei lo, ki gen zolo, ci-a kamsangte gen na maan hi.
Khate in leitungte kim um in delhdelh a, leitungte in nite kim um in delhdelh a, nite in vuklam innkuante kim um in delhdelh a, vuklam innkuan te in Topa Pasian Tokhom kim um in biabia ahi gige hi. P.58. Hih thute ih ngaihsut ciangin, Topa Pasian pen lianlua a, ngaihsut phak loh, kam agen zawh loh mah ahi takpi hi. Mipil te muhpih theih na ciang pen neu lai mahmah ahih ta zongin, amuhpih na ciang uh zong zuau lo-in, maan zel a, July21,1969 nibangin Armstrongte lawmta teng in kha tung akhe uh tawh va sik takpi hi. Hi thu ngaihsut leng, sa nin an nin ih nekna, thusia lasia ih pau na, ih haninbal uih tawh "Pasian," ci-a ih lawh ekhekh ding zong, Topa min lawh nadingin ih kamvang pen zumhuai hi. Mikimkhatte bangin thu anget uh ciangin, Topa cih tawh zong gawmlo-in, Pasian aw, Jesu aw, ci ekhekh nong zen sam uh hi.
Hi laibu laimai 64 na ah, tu-a sangin agolzaw Telescope ih bawl theih ciangin vantung Topa khamgam kongkhakpi ih galmuh zo thei kha ding hi. ci-in ka lam en mah mah uh hi, ci lai mawk hi. Hih Pasian liatnate, akhut nasep te ih ngaihsut ciangin, David mah bangin,"Topa aw, mihingte lellel, bang hi a, hong phawk kha tham zenzen na hiam! ci-in lehdot huai mahmah hi. Ps8:3,4.
Hilai asimkha mikhempeuh Topa kilam thakna hong suaksak ta hen.
No comments:
Post a Comment