Immanuel/Emmanuel

Laisiangtho sungah "Nang tawh kong om khawm ding" cih laisiangtho mun 5 om aa "lau kei in" cih 365 vei bang om hi. Immanuel or Emmanuel akhiatna pen Laisiangtho mah in hong genpah aa “EI TE TAWH PASIAN OMKHAWM" cihna hi. “Leitung beidong note tawh kong omkhawm ding hi.” Matt 28:20

 

Banghang in (I) leh (E) tawh kiat kawikawi ahitam cih na ngaihsun ngei hia? Laisiam te’n, “Immanuel pen Hebrewlai pan kila hi aa, Emmanuel pen Greeklai pan kila hi. Hebrewlai ah vowels (e) or (i) neilo uh hi. Hebrew pan Greek ah kam kilet ciang in pau kinai theipen ding in E kizang”, hi ci uh hi. Bangbang ahizong  mikhatbek, “ZEISU” bek mah genna hi aa mituam dang huam khalo hi. Tua ahihman in laimal kibatlohna hang in buaina omlo hi.

 

Emmanuel cih kammal in nanglehkei, leitung buppi ading in bang khamuanna hongpia hiam? Pasian in hih min aphuak sese, bangteng hong gennuam a hitam? Banghang in tatkhiatna ding in "ZEISU" cih min bektawh kicingsak lo in "Emmanuel" cih min phuakbeh lailai se hiam?

 

Hih dotna te tom dawn leng:

• Topa Zeisu eite lakah hong omna pen ihmuh theihloh piangsak pa Pasian, Pasian nunzia leh lungsim ngaihsutna te honglak ding in hongpai hi. (Revelation)
• Satan khutsung pa’n hong honkhia ding in hongpai hi. (Redemption)
• Hongtatkhiat khitciang  pianngei nunzia hong dimkik ding in hong pai hi. (Restoration)

 

Topa Zeisu hongpaina ahang in, mimawh te tankhia ding “ Zeisu” bek tawh  hilo in mihing piankhiatna mun ahi Pasian angsung leh mihing hong kibawl lai aa i neihsa melhoihna, tatsa cidamna, mawhbanglo asiangtho lungsim leh sitheilo pumpi i ngahkik theihna ding tatkhiatna hongpia ding  ahihman in “ Emamanuel” cih minnih pua in mihing in hongsuak a hihi. Tua ahihman in "Emamanuel" cihna in hihleitung aa ei te lakah hongomsuk cihciang bek gennuam hilo in vantung innnuam leh vankhakleh leithak dong hongnusia ngeilo hong ompih den Pasian ahihna hong telsak hi.

 

Tua ahihman in hihleitung pen alamdang mahmah hehpihna leh aa ngimna, tumdangdiak hotkhiatnopna' itna te kilakkhiat na ding phualpi hong suakta hi. Vantung mi te’n lunglut tak in Pasian nasepzia en gige uh hi. Singlamteh tungpan gualzawhna bangci lading  aa mimawh te honkhia ding cih lunghimawh mahmah in munuam mahmah, ngaklah mahmah uh hi. Satan in Pasian thukham pen, "Pasian angsungkhual na" hi ci aa amawhmat pen ki- itna thukham hi ci’a mi khempeuh in ateltheih ding hunkal ngaklah mahmah uh hi. Ahihhang in Satan bel na lau khinkhian hi.

 

Pasian leh Satan kido na'ah thukham 10 siksan in kido uh hi. Satan in Pasian thkham langpan na tawh Pasian do hi. Hih thu thei le' cin Christian nunzia sung ah  khamuanna tampi hongguan ding hi. Satan do na ahi lunghimawhna leh gentheihna mawhzol na te natuak ciang midang te bang in thumthum nawnlo ding hi teh. Job in Satan dona ahihlam thei hi leh thuaknuam tuam mahmah kha ding hi.

 

Pasian thukham pen singlamteh khitciang aa Satan in a do kipan hilo vantung peekpan kipan khinsa hi. Lampi tuamtuam tawh  ih muhkhialh ding hanciam hi. Vantung ah Pasian ki ukna, “ thukham 10 pen zuihhamsa lua, Pasian kiphatsakna leh angsung khualna thukhun hi”, ci hi. Leitung ah mawhna honglut khit leuleu ciang in thukham 10 aneipa Pasian mangnilh zahdong ding in thukham 10 thupi sakmahmah  natawh khem leuleu hi. Tua ahihman in thukhamzuihna pen ki -itna sung ah nuntakna ahihlam mihing te’n muzonawnlo ding zah in hongkhim hi. Tuhun leuleu tak ciang in Zeisu Khazih hehpihna hang tawh thukham 10 beita, kisam nawnlo hi’ ci’n thukham 10 neipa Pasian pampaih leuleu ding in hong khemkhem hi. Pasian leh Pasian lungsim (deihna) khenkhem hi. Pasian min leh avangliatna bek la in Pasian deihna leh nunzia selcip, Pasian gam leh ama dikna, Pasian mahmah theihloh kalin hong nialsak hi. Hih thupen khasiangtho in hong pholak hi. Khasiangtho lo tawh hih thu kitelmuh theilo hi. Immaneul Pasian in hihthusim pholak ding in eite lakah (mihing)  mah bang in hong nungta Vantung biakbuuk pi sung ah hotkhiatna nasem ding in van a kahtoh khit ciang in Khasiangtho Pasian mahmah in eite tawh hongomkhawm hi.  

 

Pasian in ki-itna hi. Mihing sungpan hong  luangkhia ding ki -itna pen Pasian in ki- itna mah tawh ngahnuam bek aa zawhthawh thu tawh laksawm lo hi. Zong la ngeilo ding hi. Mihing bawlpa Pasian in; "ki-itna in ki itna bek mah ngen aa, ki-itna pen ki-it na bek in nungtak sak" ahihna theitel mahmah ahihman in ki -it na leh kiniamkhiatna bek tawh nasem hi. Ki itna bek tawh Nungta hi. Pasian in Moses tungah hong kilat lai in bangmah tham hilo sawlbawk khat lakpa’n kilang hi. Sangpen Pasian kiniamkhiatna leh hongitna Moses in amuh theihna ding a hi hi. Tua bangmah in Topa Zeisu bawngkuang sung lawmlawm ah hongsuak zawzen pen nang leh kei in Pasian itna  ih dinmun niam mahmah ta leh teltak aa ih muhtheih na ding hizen hi. Tua thamlo in mihing nunzia sungah ze-etna namkim thuak hi. Ahizong in mawhna bawllo hi. Tua hihman in Pasian thukham pen mihing te ading in kimangzolo hi cih SATAN mawhmat na "khialhi" ci’n pholak tangko hi. Mihing te’n  Khasiangtho huhna leh panpihna tawh Pasian thukham bang in nungta zolua hi cih “Emmanuel Pasian” ahihna tawh honglak hi.

 

Pasian maiah Topa Zeisu hehpihna leh itna sisan hang in mawhmai na kingah hi ci’a na upna tawh dikna hongpia pa in mawhna leh Pasian deihloh thu te tungah gualzawhna ding Khasiangtho tha hong pialo in om ding a hiam? Pasian thukham te in ki-itna gamtat zia hi cih theia Pasian deihbang nuntak nopna lungsim nei te a ding Emmanuel Pasian in gualzawhna hong koihsak khinzo hi. Tua ki -itna sungah nanuntak mateng Topa Zeisu pen nang ading in Emmanuel hi zo nailo hi. Leitung nuntak hamsa in dawimang pa thaltang in hong kapliam aa sidek, pukdek in na om zong in Pasian  ki-itna sung ah na nuntak nak leh mawhna nazo veve ding hi.

 

Laisiangtho in “Pasian in eite tungah a hong piak khasiangtho hang in Pasian leh ei te a omkhawm ihihna leh Pasian in ei te hong ompih ahihna thu ii thei hi.” 1 John 4:13 “ Pasian pen ki –itna ahihman in itna neilo te in Pasian theilo uh hi” 1John 4:8 Tua ban ah “ Tua ahihman in Khrish  tawh kipawl mi te’ n mawhna bawlnawnlo uh aa, mawhna a bawl lai teitei te pen Pasian a mu ngeilo, a thei ngeilo ahi uh hi. Pasian tate hi a, Pasian lungsim paai uh ahihman in mawhna zong bawlnuam lo uh hi” 1John 3: 6, 9 

 

Isaiah 7: 14 “ … En un nungak khat gai in tapa khat nei ding aa, ama min Immanuel ki ci ding hi.”

 

Emmanuel cih min in ei a ding bangzah manpha na sa hiam? Zeisu cih min bek hilo Emmanuel in Pasian hong itna beitheilo aa na omna peuhah Pasian in hong ompih cih hong thei sak ciat ta hen! Immanuel/ Emamanuel cih min na zak sim in Pasian tawh ki itna "LOVE" sungkhat ah ih nungta takpi hiam?  

 

Khazih sungah na sanggam uh,

Mangpi (Thang Khan Mang)

Miami, USA