Dotna te leh dawnkikna te tampi ka etkikciangin, ei mimal tampi in thuman taktak ki lungulh ciat a hihna ka mu thei a, tua pen Khasiangtho hong lamlakna ahi hi. Pasian in,  ki lawmsakna tawh amin in biak lellel pen deih ngiatlo hi. Pasian in thuman thutak tawh ibiakding deih hi. John 4:24. Mihing lel te bawl tawm ngeina thukham "Sunday" khawng tawh biakding deihlo hi. Matt 15:8, Mark 7:8,9 I biakna, i pawlpi ciat in, Pasian thupiak thuman thutak ahi a thukham te, LST khuavak taktak te inei hiam? Ahih kei leh i pawlpi in, Pasian thukham i hepkhiatsak aa, mihing phuah tawm Sunday leh A dangdang te tawh Pasian lungkimsak zo ding in, i kituat lailai hiam?
 
1. LST Thumaan awlmawhlo na hang:
 
Christians scholars leh Pastor mipil tampitak te'n, LST thuman awlmawh nawnlo aa, man hetlo cih thei gegu napi, a tamzaw cih zui le uh, nuam sazaw uh hi.  (Hebrew 10:26) Thu manlo cih thei gegu napi,  tua a manlo pen mah i zui teitei te leh, mawhphelna om nawnlo hi. A tamzaw zuih pen, thuman hiding hi acih om hi. OT sung enleng, thukan ding apai 12 lakah Joshua leh Caleb bek Pasian deihna bang mu in zui uh hi. A dang 10 i muhna a zuih uh man bek in, gam lah ah sigai uh hi. Noah hunlai zong, mi 8 bek ki gumkhia hi. Thuman aza mi tam ding aa, a zui mi tawm ding hi. Pasian i agupkhiat dingte pen, thuman khuavak a zui mite bek hi.
 
Laisiangtho in, "the truth shall set you free"  John 8:32 ci napi tu hun christians tampitak te'n, LST thuman awlmawh nawnlo hi. Mihing bawltawm ahi, Sunday biakpiakna ngeina te, Christmas te, easter sunday cihte peu thupi sak mahmah aa, Pasian thukham sung a om ni 7 sabbath ni Pasian leh a tate kiciaptehna ni pen, hepkhiatsak zaw mawk uh hi.
 
2. Mipil te a maizumsak dingin, mihai te katel hi:
Leitung pilna a nei philosopher, theologians, pastor, scholars te un amau pilna suang ahihman un, LST sung aa simple tak in, thuman a kigelh khat zong, thuman in mu nawnlo mawk hi. LST sung a om hetlo, zuau thuteng, thuman thutang in sang zaw ta uh hi. Zeisu suah lai in, tuucing te pen, leitung pilna neilo te hi. Sun tawh zaan tawh Zeisu hong paiding thu ki kum in, nungta uh hi. Vantungmi te un, amau lungsim siangthon, ki niamkhiatna mu ahihman in, Zeisu hongpai na ding lamlak aaksi te musak hi. Bethlehem khua ah Zeisu asuahding thu zong hilh pah hi. Tua aaksi te pen, vantungmi te ahi hi. Eizong lungsim siangtho leh ki niamkhiat tak in, Zeisu nung izuihnop aa leh a thuman hong ki musak, telsak ding hi pan hi. Zeisu hong pai lai, pharisees, saducees laithei mipil te un, a  pilna suang ahihman un, Isaish laibu sung, Zeisu hong paina ding tampi simsim mah ta le uh Mesiah suak khin napi, mesiah hong pai lai ding cici lai uh hi. Zeisu pen mesiah ahih lam phawk peuhmah lo uh hi.
 
Tun zong, scholars, Laithei leitung christians tampi  te'n Zeisu pen Sabbath i Topa ahihlam, simsim uh napi, Sabbath ni pen, Zeisu i Nipi Siangtho ni a hihlam phawk kha peuhmah lo hi. A mit uh kihong thei peuhmah lo hi. Mitza kisam pha mahmah lai uh hi. (2 Thessalonians 2:11) thuman a muh theilo nading un, amit kaselsak ding, zuau thu ka umsak ding hi, Pasian in cilai hi.
 
3. Gam makai, Biakna makai te Dawi in zatpi in zangh:
Biakna makai Pope te, Gam makai Constantine te dan, leitungmi thunei tampitak Satan/Sapi in zangh in, LST thuman selcip sawm hi. RC makaipite te thahat penpen hun, Dark ages ci in a kiciamteh, kum 1260 sung tengin, AD 538 - 1798 kikal, R.C pawlpi pen Satan/Sapi khutzat in hong diang khia aa, LST thuman tawh a nungta misiangtho te million 6 bang hong that uh hi. LST simtheilo, let khia theilo ding, sabbath Pasian Nipi Ni tangtheilo ding, tui kiphum kik theilo ding etc. ci in, mite bawltawm thukham tampi tawh Christians te hong uk a, Pasian thukham hepkhiatsak uh hi. Christians te bawlsia in that ziahziah mai uh hi.  
 
Roman Catholic Christian te pen,  biakna makai pite ahi hi. Dawimangpa in zatpi in hong zangh hi. Mipil tampi RC sung ah om hi., tua ten LST  thuman amu a om uh hangin, thuman a selcip nuam Satan i zat tamzaw hi.
 
Dawi mangpa deihna tawh thuman selcip un, LST simte  kithat  phial ta leh khamzo nawnlo un, piangthei nawnlo ahihman in, Dawi in a tactict hong khel kik aa, LST sung, Sabbath thuman te hong selcipsak zel hi. Sunday ni LST sung ah Nipi Ni ci ngei hetlo pipi, Sunday ni p en, Pasian Nipi Ni khawngin, mi tampi in na musak zo mawk hi. Zolai  siangtho a teikhia pa, Sya Kam Khaw Thang na ngawn i lungsim pen, Satan in hong kawmsak pak khamawk lai ahihman in, Ni Masa Ni- the first day a kicina mun khempeuh te ah,  Matt 28:1 khawng, Ni Pi Ni - ci in hong letkhiat ta hi.
 
A hihang in, Pasian in, Zomi te lakah thuman ki selcipding deihnai samlo ahihman in, Pasian in, Dr. Chin Do Kham hong zang leuleu in, Zomite lak ah LST Hilhciana laibu tawh, ni Masa Ni pen, Ni masa Ni mah aa, mantak hong kigelh kik hi. Sabbath ni te zong Isaiah sung ah sabbath ni mah, Pasian Nipi Siangtho mah in hong gelh kik hi. LST kamal na behlap leh nang tung ah gimna hong ki behlap ding aa, LST kamal na lak khiat leh nuntakna laibu pan, namin hong kila khia ding hi acih pen, Sya Kam Khaw Thang in sim kha ngeilo ahi tam maw ci in, ka ngaih sunsun. Leitung aa a dam lai in, Zomi mipi te leh  Pasian tung ah thuumna  bawl kik leh lungnop huai khading hi.   
 
Noah hun khitciang , Satan in, oppotunity aneih masa pen hun - Leitung khempeuh a uk Nimrod hong zang pah hi. Leitung pen, Dawi khutsung koih gai sawm. Sunday Ni Pasian hong bia pah. Hong pai suk suk in, Roman Christians te hun leuleu teh, Constantine pagan biakna a thahaat penpen pa khat, Christian hong suak kheem in, Christian khempeuh in- Ni Pasian Pahtawi ni, Sunday ni hong biasak. Pasian i koihsa Sabbath pen phiatsak hi. Christians te lutang ahi Pope mahmah in zong, Sabbath pan Sunday ama ut thu in khel hi. Tua pen, Satan zat hi pah hi. Leitung aanaa a thunei penpen te Satan in hong zangh denden hi. Biakna lam makai te hi ta leh LST let te hi ta leh LST kamal bang pen, apeeng thei penpen ding, thuman a bei thei penpen ding in Dawimangpa in hei ziauziau hi.
 
Sia Kam Khaw Thang, lungsim bang Dawi Mangpa in hong kawm ziau aa, Tedim Laisiangtho sung ah, Ni Ma Sa Ni ci in, a gelh ding kimlai - Nipini cimawk hiau hi. LST in, ni masa ni, Sunday ni pen, cihmah hun in, nipi ni ci ngeilo hi. LST nipi ni pen, Sabbath ni bek hi. Ezekial 20:20 Pasian leh a mite kiciaptehna ni ahihman in, SATAN in zadah mahmah hi. Mihingte kuamah in zuikei leh deih hi. Pasian in, Dr. Chin Do Kham lungsim hong kawmsak leuleu aa, Tedim LST hilhciana tawh a kithuah hong bawl takciang in, Sabbath pen, Sabbath mah in hong gelh aa, ni masa ni pen, ni masa ni mah in hong gelh hi. Sia Kam Khaw Thang dan in, ni masa ni pen Nipini peuh hong ci ziau nuamlo aa, LST thuman pen, athuman bangin hong gelh kik hi.
 
Leitung Biakna lam aa, scholars tampi tak un, LST thuman lungulh loh ahihman un, Pasian in zong a mai humsak hi. Muzo lo sak lel hi. Thuman a lungulh te un bel amuh kul hi. Billy Graham bangin, Sabbath thuman amu zong om veve hi. Tua ten, thuman sang, thuman lo tawh mipi tampi in, a nungzui ziahziah leh ut zaw zel hi.
 
Abel in, Biakpiakna man tel hi. Cain in biakpiakna ama ut thu in bawl a, Pasian sawlna nawl khin hi. En ei mihingte ut thu ibawl Sunday tel ding maw, Pasian hong koihsaksa Sabbath telding. Joshua in bel, kei leh ka innkuan pihte un, Pasian mah katel ding ci hi ven, ei Christians te'n Pasian leh Pasian deihna mah itel sawm ding hiam? A hih kei leh, Satan/Sapi/Nimrod/Paganism/Baal Pasian biakni ---- Sunday ni mah iteel teel lai ding hiam?
 
Tu laitak in bel, mikhempeuh tung ah, guah tui leh nitang a kibang in, hong ngahsak lai hi. Sunday law hong pian ciang in, Pasian in Sabbathni siangthosak lo te khempeuh tung ah gimna nam 7, mangmuhna sung agen hong buaksuk ding a hi hi.
 
Gupkhiatna thu isaan gai hangin, Pasian in, a thukham 10 tawh mi khempeuh - hong sitel denden hi. Zeisu it maw, um maw, theimaw, zuimaw ... ahih kei leh kampi bek tawh maw.... Matt 15:8 cih pen, tu laitak inuntak lai tak mahmah in, thukham 10 tawh thu hong kikhen khen a hi hi. Tua pen, investigative judgment kici hi. Zeisu vantung biakbuk ah siampi zaa aseplai tak ahi  hi. Ni sim in, thukham 10 tawh sitelna ki thuak den hi. Ih mawhna te i kisiik kik sial in, Zeisu in a sisan tawh hong sawpsiangsak pahpah hi.
 
Mawhna pan, kisiik kikna ineihlo khak a om khempeuh hong sawpsiang sak thei lo. Thuman mu napi, izuih lo te zong, mawhmaisak na om thei lo. Sabbath thuman mu napi a zui nuamlo te aa ding, mawhmaisakna om thei lo. Zeisu sisan in sawm siangsak zo lo hi.
 
Pu Tong Seal