"Nu te'n Ta-te bangci makaih ding"

Ta ineih ciangin ki-it mahmah a, kinono nuamlua mai in, mi' mit ah ahoihloh hang'n ei mit ah bel anap uh atawlh phial zongin ithuai kisa veve hi. I tate alup sial, athawh sial in thu ngetpihzo den le'ng thunget hong zongsang pah ding uhi. Ann nek hun mansak den le'ng aci-alu uh hongdam ding, sun in khat veita ihmusak hamtang ding, zingsang asawt pen 8:00am bangin thawhpih hamtang ding. Malaysia bangah nupite nasemlo kitamzaw ahih manin, zingthawh pen sun nai 1:00pm bangin tho in zing-ann pen sun nai 2:30pm bangah nepan uhi. Tua bangin sepding omlo lua, innlam bangin "huan beek kho dih ni, vok ann beek zong dihni", cih zong omlo ahih manin, zan bang nai 2:30 bangin lum pan ahihman un atate uh zong ann nek dan manlo ihmuthun manlo ahih manin kidamlo thei hi. Nute' thadah manin tate adamlo, lai apilzolo zong tampi ki om hi. Nute' mawhna tate'n akithuak kha ahihi.

I tate kum 5 bang hong phak uh ciang'n, na khempeuh theita uh ahih manin tate mai ah kampau gamtat kidop huai a, I tate zakna ah napi mahmah hailua, nani mahmah thadah lua, na paneu ten hawhken, cih kampaute-a kipan kammal hoihlote zatloh ding thupi hi. Tuabang kam ih paupau ciangin, i tate'n khan nelh in tua ih gengente itloh lawh uhi. "Natap pa sun aa heihaive cin", ci-in tate khawng atuamtuam in kobawllo ding cin a, ka siavuan pa, ka Syama nu, ka menta-pa ding, ka Pastor ding hilo maw ci-in, ih tate phatphat ding hihang, ahizong milak ah mawkphatlo ding, mi tawh akitot teh ih tate gum selo ding. Tawm hong lianpian leh deih hong hau mahmah ding uh ahi, ih hau mahmah phial zongin ih tate ading, adeih uh leisak lo in akisap uh bek leisak ding hihang. Mi lakah ih tate maizum ding in tawnglo ding, Innsung ah "sikan" tawh makaih peuhle'ng milakah zong hilh hilh kul nawnlo ding hi. Nupi pawl khat in asung pan piang tektek atate deidan thei zen uhi. 

Tua bangin atate aneutung pan adeidan uh ciangin alungsim uh neu in teilohlawh uhi. Tuabang in tate ih deidan bawl ciangin, Nu te hong itloh lawh uh a, hong galbawl uhi. Tate hong nungak hong tangval pian ta, tan 9/10 hong tun uh teh vak nang hong hau pianta uh ahih manin, tate laisim hunsung teng Nute in lai ihilhtheikei zongin nitak alaisim hunsung teng uh agei ah tutpihzo denle'ng tate'n tha ngah in laisim thalawp uhi. Nupi pawl khat tate donlo liangin, kikhopsan vaksan in iomtak ciangin tate in hun ngah kisa in alaisim hunsung ding teng lamdung ah zangkha uh a, lai hong onglo in pilna hong neilo suak uhi, tate pen Pa-te sang'n Nu-te tawh ki tam thuahzaw uh ahih manin Nute in tate hoihtak maikaih siam ding kisam hi. 

Pate'n zong tate, thu hilh dending kisam hi. Kapa in ka neulai in hong thuhilh na ah, "Tan 10 tung nailo te in khutbulh nai"watch" zangtheilo ding, Collge kah ciang suibilbah bulh theipan ding, buaih ngah khit ciang suikhi okthei pan ding", ci-in thu hong hilh a, hite pen sangkah hunin zang lehang milak ah kiphatsakna in kineikha thei a, lai sang in kihoihsakna in ilungsim hongla zawthei ahihman nahigige hi. Tate amaikaih siam dingin Topa'n thupha hong piakim ciat tahen! Tate ading hanciamin thu ngetsak den ni. 

Vantung ah nasum-napai, na inn-nalo, nago-nagam nahauhnate nakengthei kei dinga, nagei-a atu tiltel natate nakengthei ding hi. (By-E.G.White).

Posted by Dal Sian Hung

Zomi Foundation Home Mission

Kuala Lumpur, Malaysia.