21. Patau Kona Kinolh.

                             21. Patau Kona Kinolh
(375)
               JESU ong kumkik baih nading tangkona ah William Miller leh a pawlte
in ngimna khat bek nei in thuhilh uh hi. Tua in thukhenna hun ading
kiginkholh ding bek bulphuh uh a hi hi. Biakna nei ka hi a ci mite in lam
etna maan ah a khanlawh nading uh, gamtat hoih zaw a neih nading uh,
Pasian kianga ki heei a a ki sik kik nading uh thu gen a hi bek uh hi.
“Amau in pawl tuam khat peuh phuan a biakna phel khap ding ngimna
nei lo uh hi. Pawl tuam tampite lak ah na asep uh hangin amaute pawlpi
ki ukna leh ki lom-na te uh sukhak sak nuam lo uh hi”.

             Miller genna ah, “Ka nasepna khempeuh ah a omsa pawlpi khat
peuhte kiang panin pawl kai khia in pawl tuam phuh ka sawm ngei kei
hi. Khat pen eu khia-in khat meet nading bawl ka sawm ngei kei hi.
Vekpi-a phat tuam nading ngaihsun in ka sem hi. Khrist hong pai nading
thu pen mi khempeuh in a lawp tek dingin ka seh lel hi. Tua thu kei tel
zah-a a tel lo mi, a lawpna neu zaw deuh lel ding hi-in ka ngaih sun a, a
tuam-a ki khopna zong a kul lo ding in ka seh zawk a hi hi. Ka ngimna
pi pen in mite Pasian kiang ah hei zo in leitung in hong tung ding
thukhenna phawk le uh a, ka mihingpih te in lungsim ki ging khol in
lung muang takin Pasian muthei dawnthei le uh ka deihna bek a hi hi.
Ka thu gen a um mite a tam pen in pawlpi tuam tuam pana hong paite
ngen a hi uh hi,” ci hi. –Bliss, “Memoirs of Wm. Miller,” p. 328.

              Pawlpi khempeuh puah kim ciat sawm ahih mah bangin tawl
khat sung ama nasep ki paakta mah mah hi. Ahih hangin biakna makai
siate in Jesu Lam-etna upna pen nial uh ahih (376) manin tua thu-a
buaina a beisak nuam uh hi. Pulpit pana a lang pan’ bek uh zong hi loin
nihveina hong pai ding a ki hilhna peuh mah ah a va ki khawm lo dingin
a pawlpi mite uh dal uh a, pawl sung ki khop khawm ding lawpna na
ngawn a gen ding uh a khaam uh hi. Thu um mite in amaute ki bawlsia
in ki buai sak hi cih a mu uh hi. Amau pawl ciat it uh a, tua pawlpi tawh
kikhen khiat ding ut lo uh hi. Ahih hangin Pasian Teci pan’na ki nial a,
hilhkholhna va dawp tel ding lah ki phal lo zel ahih manin, Pasian tunga
thumaan ding thupi zaw ci-in hong ki map bawl zel uh hi. Pasian thumaan
teci pan’na a khak tan nuam te pen Khrist’ pawlpi’ aphut, “thumaan
khuampi” bangin sang zo nawn lo uh hi. Tua ahih manin amaute in
apawlpi lui uh panin ki khen khiat ding hoih zaw hong sa ta mai uh hi.
1844 khuakhal hun ciangin mihing 59,000 bang a pawlpite ciat panun
hong leeng khia ta mawk uh hi.

                 Tua a ki pan in U.S.A. bup pawlpi omte in a et dan uh hong tuam
pian hi. Kum tampi sung leitungte omzia, ngeinate zuih pihna a khang
khang den hi a, leitung vai a khan’ zah mah zui in khaa lam vai pen a niam
suk suk na hi pah leu leu hi. Ahih hangin tua kum ngawngaw ciangin
pawlpi khempeuh niamkiat suk lua uh ahihna hong ki langkhia vat hi.
Bang lawh ding cih thei loin aki om bibiai laitakin bang hangin tua ci
hiam cih pen pulpit pan leh laikhetna te panin hong ki theh khia hi.
Philadelphia a siakhawk kikhopna khat ah akitaangzat
Laisiangtho khiatna bu bawlpa leh tua khua-a Pastor dawk mah mah
khat ahi Mr. Barnes genna khat ah, “kum 20 sung sia sem ta inga, a
neek khawm bawlpihna a nunung pen dongin pawlpi sung ah, lah ki
kiam lo, lah ki khang lo hi. Tu in zong khanlawh na lah om lo, ki
khelna lah om lo, na sem siapi te lah thupha ah khan’ na nei lo, khaa
gupna ngah nadingin thu a dawp lah om lo hi. Nasep tam a sum
bawlna leh van laakna leitung lam nasepna lungsim hong khang hi.
Tua pen pawlpi khempeuhte om zia a hi hi” ci hi. – Congregational
Journal, May 23, 1844.

             (377) Tua kum February kha in Oberlin College-a Professor
Finney in zong: “I gam-a Protestant te lak ah taang pi omzia pen ki
puahna lam tawh kisai in, lah lawp lo, lah sia lo, ki om di de lel hi. Ki
awng-hon’na pawl khat a om hangin a taangpi muhin ki lang khia tham
lo hi. Pawlpi khempueh ah ki puahphatna omlo hi. Khaa lam thu ah
lawpna pen bei khia khin phiala, a lauhuai mah mah ciang kitung suk
hi…. Pawlpi mite ki zepna khang mah mah a, Pasian um lo mite tawh
gual nopna, laam na, pawi bawl khawmna te ah I ki zom pha mah mah
hi. Tua bek mah ih khantoh na ahi ding hi. Hih a huai sia thu gen gen
nawn dah ni. Pawlpi omzia taangpi dah huai in niam kiat mah mah cih
teci tampii hong lahte kicing lua hi. Pasian kiang pan gamla pial khia
khin lua uh ahih ciangin amaute kiang panin Topa ki heemkhia khin ta
hi” ci hi.

               Religious Telescope lai a gelhpa khat teci pan’na ah: “Tu laitaka
biakna lam kiamsuk zia pen ni dangin ki mu ngei nai lo hi. Pawlpi in
mantakin a khanlawh ding kisam hi. Zion a it pepeuh in hih zaha kiamna
a piang sak thu pen muh khiat mateng zonkhiat ding kisam hi. Mite
lungsim omzia ih et ciangin kikheelna man ‘a tawm lua leh ki haal lua
cih ih mu hi. Tua hang in mawh bawlte tha hat uha, mot tatna uang lua
ahih manin, ‘Pasian in a thupha piak ding mangngilh ta hiam? ahih kei
leh, hehpihna kong hoh ki khak ta hiam?’ i ci kha phial mai ta hi.”

              A hang omlo in tua bang omzia pen pawlpi sung ah mawk pian’
ngei lo hi. Ih mi nam, pawlpi, leh mimal in khaa lam khuamialna hi zaha
ih thuak pen Pasian in a siangtho hong hehpihna tawh a huh nop nawn
loh man hi lo hi. Mite tung a hong piak A khuavak pen awl mawh lohin
aki nialmanin tua bang hong tung a hi hi. Khrist hun-a Jew te tangthu
ah zong hih thumaan nasepna ki lak tel hi. Amaute leitung vai-a a na ki
piak luatna uh tawh (378) Pasian leh a thu na mang ngilh uh hi. Tua
manin a lungsim uh mang in, leitung lam bek na ngaihsun uh hi. Messiah
hong pai masakna pen na thei khial uh a, amau ki saktheihna leh
uplohna hang un Honpa na nial kha uh hi. Tua bang hi napi un hotna
thupha a theih theih nading uh leh hotna a ngah ve ve theih nading uh
Pasian in dal tan sak tuan sam lo lai lai hi. Thumaan nial mite in bel
vantung’ letson deihna nei lo uh hi. Amaute in “khuavak mun ah
khuamial koih uh a, khua mial mun ah khuavak koih” leh bung uh hi.
Amau sung ah mialcipna tun’ dingin khuavak nial uh hi. Bang zah in
khuamial lian ta thong hiam!

              Pasian bia lim mah pua napi Kha Siangtho in akop pih loh cianga
om lel se pen Satan ngeina tawh ki lem mah mah hi. Lungdamnathu
anial khit uh teh Jewste in a tanglai ngeina te uh hanciam pha kaan a
teeltuam hihna zong a neih lai nop uh hangin Pasian ompihna ki lang
nawn lo ahih lam nial thei lo uh hi. Daniel hilhkholhna ah Messiah hong
pai ding hun leh a sih nading hunte theih khialh loh nadingin gen sit-set
napi, Rabbi te in hilhkholhna a hun seh pian khat om leh taai in samsia
mawk in, hilhkholhna kan hetlo uh hi. Israelte mittaw sa leh ki sik kikna
om het lo sa in kum 1800 sung bang om khin uh hi. Hotkhiatna pia
thupha zong tuan loin Lungdamna thupha peuh mah phawk-in zong nei
lo uh hi. Vantung pana kipia khuavak a nolhte adinga lau huaina leh
kihtaak huai ki hilhte zong thu don tuan peuh mah lo uh hi.

             Na khem peuh pen a haang a om man-a piang khia hi ham tang
hi. Ngaihsun sun-a maan a sak, sep ding hi ci-a a ngaihsun te ama deih
dan a hih loh man-a a thu neu seh manun a tawpna ah thumaan leh
thukhial khentel thei nawn loin hu-sam zel uh hi. Theih theihna te mial
a, sunglam upna te hik cip in, lungtangte khauh a, khaa te in Pasian
kiang pan pai khia uh hi. Pasian thumaan a na ki nuihsatna mun peuh
peuh ah pawlpi pen khuamial in tuam dinga, upna leh itna dai-in ki meel
maakna leh ki thutuah lohna a hong lut ding hi. Pawlpi mite in leitung
vai bek lawp-in a tha neih teng uh tua lam ah zangh ding uh a, mawhnei
te ki (379) sik kik nuam loin ngawngkhauh ding uh hi.

              Vantung mi khatna tangko Mangmuhna 14 sung thu in Pasian
thukhenna hun pukaak a, mite in Amah kihta in a biak nadingun a sawl
hi. Tua pen Pasian mi a kicite in leitung a thaang huaite lak pan ki khen
khia in leitung kih huai zia leh nung tolh zia te tel muh dingin sap khiatna
a hi hi. Pasian in pawlpite tunga hih thu puak zangin patau a na ko a hi
hi. Tua thu a na saan’ uh leh, Amah tawh a ki gamla sak siatna teng nil
khia ding uh ahi hi. Topa maii ah ki niam khiat na tawh Vantung thupuak
na saang in, Topa’ mai a dingg thei dingin na ki ging uh hi leh, Kha
Siangtho leh Pasian vangliatna amaute lak ah hong ki lang ding hi.
Pawlpi in ki pum khatna ban ah upna, leh itna thupha mun tung kik ding
uh hi. Sawltakte hun lai bang in thu um mite “lungsim leh ngaihsutna ki
khat in” luang khawm ding uh a, “Pasian thu hang tak in a gen” thei
ding uh hi. Tua hi leh “Gupna a ngah ding mite zong ni simin Pasian in
akibeh lapsak” ding hi. Sawltak 4:32,31: 2:47.

              Pasian mi a kicite in Ama thubu pana Laisiangtho khuavaak
hongtaang a om bangbang na saang le uh pum khat suah nadinga Khrist
thu ngetna ngah ding uh a, sawltakpa gen “Kha Siangtho pumkhatna,
lungmuan’na sunga lom khatna,’ ngah thei ding uh hi. Ama genna ah,
“Pumpi khat, Kha Siangtho khat, lungsim-khaa khat, lam etna khat,
Topa khat, upna khat, tuiphumna khat hi dingin hong sam hi” ci hi.
Efesa 4:3-5.

             Jesu ong pai baih ding thu a saang te in tua thupha te ngah takpi
uh hi. Amaute in pawlpi tuam tuam pan-a hong ki kaikhawmte hi napi
uh in, amau pawlpi van gikte lei ah paai uh hi. Pawlpi thukhamte balzaanin
kum tulkhat maan’ nading vai Laisiangtho hilhna tawh kituaklo upnate
nu sia uh hi. Nih vei pai nading lam etna maan lo te maan sak in,
kiphatsakna leh leitung vaite phiat siang uh hi. A khial te a maan in
bawl uh a, lungdam tak leh lungsim kituak in om uh ahih manin,
lungdamna leh ki itna in ki ukna pang pi a suak hi. Hih upna in tua thu
a saang mi tawmno te uk (380) ahih leh, mi khempeuh in na saang ciat
uh hi leh mi khempeuh tung ah tua bangin a tung pah ding a hi hi.

             Ahih hangin pawlpi a tam pen in tua patau kona na saang lo uh
hi. “Israelte galvilpa” bang a hi ding sia semte in Jesu hong pai nading
thumaan phawkna (token) a nei kin ken ding uh hi napi, thumaan lah
thei lo, kamsangte genkholhna lah thei lo, hun ciamtehnate lah thei lo
mawk uh hi. Leitung lam etnate khang a, ngim na lianpi pi tawh lungsim
buai zaw uh ahih manin Pasian itna leh muanna banah thumaan
lunggulhnate daai hiau hi. Tua lak ah hih tangkona a ki piak ciangin ma
nial nopna leh uplahna bek hong tho khia ta mai hi. A thu in zapi zeel
la, pawlpi mi nautang te in hilh uh hi.Langdo na bek tawh na ki nial ta
mai hi. Taang lai-ate mah bangin Pasian thu teci pan’na ah, “Kumpi te
leh Pharisee te in a um uh hiam?” cih dotna te mah hong pai kik lel zel
hi. Hilhkholhna hun sehna te a nial nop uh hangin ki nial thei lo ahih
manin mite in tua hilhkholhna pen sin beh nuam nawn vetlo zaw uh hi.
Hih hilhkholhna bute ki seel cip phot hi. Eite theih zawh ding hi lo hi ci
uh hi. Mihonpite in a Pastor te uh pum muan’ uh a, tua patau kona pen
ngai nuam lo uh hi. Dawk sak leu uh “pawlpi panin ki nawh khia ding ”
ahih manin, pawl khat te in maan sa na pi ki dawk sak ngam lo uh hi.
Pasian in pawlpi sit tel a a puah siang nadingin a thupuak pen leitung
deihna lel tawh om te bang zah-in tam zaw a, cih thu leh Khrist a ngai
tak tak te tawh a ki lamdan’na kilang sak a hi hi. Vantung lam a lawpna
uh sangin leitung tawh a kizopna uh khauh zaw hi. Amaute in, lungsim
teng a zong khia thumaan pen nusia in leitung pilna lam thu ngai dingin
a ki hei khiat san ta thong uh hi.

             Vantung mi khatna tangko a nial uh ciangin amaute ki puah phat
nading vantung thupuak a nial uh suak uh hi. Pasian kiang pana thupha
pen nuihsan in sim mawh uh hi. Pasian kiang pan amaute akhen khia
gitlohna pen a nial sang sik un leitung tawh kilem nading a zong zaw ta
uh hi. Tua manin pawlpite sunga lauhuai khaa lam sihna, nungtolhna
leh leitungte tawh ki batnate 1844 kum in hong piang hi.

              Mangmuhna 14 sungah vangtung mi masa pen vantung mi nihna
in zui in tangko leu leu hi. “Nu leh pa’ khialna tawh kipawl ama hehna
leenggahzu mi pawl khem peuh a dawnsak khuapi lian Babylon a cim
zo hi! a cim zo hi ” (Mang. 14:8) ci hi. (381) “Babylon” cih pen “Babel”
kammal pana hong pai hi a, Buaigawp, cih na ahi hi. Laisiangtho
sung ah tua min pen biakna lam pialna, khialhna a tuam tuam lahna-in
ki zangh hi. Mangmuhna 17 sung ah Babylon a cih pen numei paktat
tawh lak in, pawlpi a gennopna lim ahi hi. A siangtho numei a cih ciangin
pawlpi siangtho genna ahih mah bangin numei paktat ginalo a cih ciangin
a lampial pawlpi a cihna a hi hi.

              Laisiangtho sung ah Khirst leh Ama pawlpi kinaina zia a gen
ciangin nupa omkhopna tawh genteh zel hi. Topa in ki teen’na siangtho
tawh a mite hong pawl a, Amah pen A mite Pasian hi ding a, amaute
zong Ama aa bek hi ding in a deih hi. Ama genna ah, “A tawntunga ka
zi dingin nang ong kiciam pih in, thumaanna tawh nang kong kiciampih
dinga, thukhenna maan leh itna thuneem tawh migitna lak-in kong teen’
pih ding hi” ci hi. Hosea 2:19. Khatvei leu leu, “Nang tawh ka ki teeng
zo hi” Jer. 3:14 ci lai hi. Paul in Laisiangtho Thak sung ah, “Nungak
siangtho bangin Khris kiangah kong piak nadingin pasal khat tawh ka
hong kiteng sak zo,” (2 Kor. 11:2) ci hi.

            Pawlpi in Khrist tungacitakloin, amuan huaina teng leh a ngaih
baanna teng Ama kiang pan la khia in leitung lam ah ki hei hi. Leitung
nate lunggulhnain lungsim a uk ciangin nupa ki teen’na kamciam a palsat
bang a hi hi. Isreal te in Topa kiang pan tai khia a a mawh uh ciangin
alamdang mah mah Pasian itna sim-mawh in nusia uh hi. Tua thu Topa
Pasian in a genna ah, “tenpih dingin kong kamciam hi.” “Nangmah na
meel hoih lua a, kumpigam sung ah na hampha hi. Na meel hoihna
tawh lawkite lak pan na ki lang khia a, Keima thuneem-na hangin na
kicingtaak a, na tung ah tua kicin’na leh na ki dawkna hangin aang zuak
na suak hi.” “A zulhtat zi in a pasal kiang (382) pan ki khen khia
bangin nangmah in Kei tung ah zehphii nuam lungtang na nei hi Isreal
innkuan aw, Topa in ci hi,” “thuman lo zi in a pasal anusiat bangin…kei
tung ah nong thu man kei uh hi.” ci hi. Ezek. 16:8; 13-15, 32; Jer. 3:20.

                Laisiangtho Thak ah Khristiante in Pasian sangin leitung a deih
zawkna uh a genna ah tua bang pian khat mah agenna om hi. Sawltak
James in, “No numei leh pasal mawhna bawlte aw, leitung tawh kipawlna
in Pasian gal a hi theilo na hi uh hiam? Tua ahih ciangin leitung tawh
kipawl mi peuh mah in Pasian gaal ahi hi.”

              Mangmuhna 17 sunga numei (Babylon) pen, “Tua numei in asan
a eng puante silhin, kham tawh, suang manpha tawh , pala tawh kizeemin,
a khutah ama gitloh gamtat khihuaina a hi muhdahhuainte tawh adim
kham tawh adim kham hai atawi hi. A taltang tungah, thu thukpi,
‘Leitungah a om Numei Gilote leh leitung kihhuaiinate Nu Babylon
Khuapi’, ci-in a min kigelh hi.” Kamsangpa genna ah, “Tua numei in
zong misiangthote’ si ahi zongin, Jesu’ teci pangte’ si ahi zongin kham
in a om kamu hi” zong ci hi. Mang. 17:4-6, 18. Tua vangliatna pen
kum za tampi sung gilo taka Khristian gam a uk cip Rome a hi hi. A
sanciip leh ausan meelte, kham leh suangmanphate, kepte pen kumpite
nangawn tunga uk zawkna anei, a ki-pha-sak Rome thuneihna a kawkna
ahi hi. Tua sim loh “Misiangthote’ sisan akham” leh Khrist nungzuite
gilo taka abawlsia vangliatna dang omlo hi. Babylon a mawhsakna
dang khat zong, maan lo taka “leitung kumpite” tawh a ki zopna tawh
a mawhna ahi hi. Tua pen Topa kiang pan ki khen khia a lawki te tawh
a ki zopna pen Jew te banga aang zuak a suahna a hi hi. Tua lim mah zui
leu leu in Rome te in zong leitung thuneihna tawh na ki nin sak in
mawhsakna a thuak hi.

              Babylon pen “paktat nu” na kici hi. Ama tanute zong pawlpi
mah hi ve ve uh a, ama upna tawh a kizom, thuciin lel khawng a zui,
ama nung a zui, thumaan paai khia-a leitung tawh a kizom Pasian
mawhsak ahi uh hi. Mangmuhna 14 in Babylon (383) cipna pulaak
hi. Tua pen khat vei lai-a a siangtho-a ki saang biakna pen tu-in a nin
hong suak cihna a hi hi. Hih tangkona in thukhenna hun a gen khit-a ki
gen ahih mah bangin ni nu nung hun-a ki tangko ding a hi hi. Rome bek
ki ngawh thei nawn lo hi. Bang hang hiam cih leh, amah pen a puukna
kum za tampi sung hi khin zo hi. Tham loin Mangmuhna 18 sung ah
Pasian mite Babylonte lak pan hong pai khia ding in ki sam khia hi. Hih
Laisiangtho genna en leng, Babylonte lak ah Pasian mi tampi om lai
ahihna ki mu hi. Tua ahih leh, tu hun in bang cii pawlpite lak ah Khrist
nungzuite a tam pen om uh hiam? Hih pen uplah ding zong hi lo hi.
Upna ka nei hi a ci Protestant pawlpite lahna ahi hi. Amau te hong
thawh khiat tuung lai un Pasian saan’ theih hoihna nei, thumaan deih-a
Ama thupha ngahte a hi uh hi. Thu um lo leitungte nangawn Lungdamna
thupha saan’na hangin mai nawtna nei uh hi cih a mu tek uh ahi hi.
Kamsangpa in Israelte kianga a gen in ah, “A pau bang het lo dingin
nang hong bawl ka hih manin na meel hoihna gam khem peuh ah kithang
kawi kawi hi.” Ezek. 16:14,15. Ahih hangin amaute zong Israelte
puukna mah ah puuk leu leu uh a samsiat-in a om uh hi. Amaute in
Pasian um lote tawh ki pawl theih nading bek deih leh sep bel in nei
zaw ta uh hi. “Ahi zongin na tuah peuhpeuh luppih ding zolna-in na
meel hoihna leh na minthan’na a sia lamin na zang hi.” Ezek. 16:14,15.

              “Leitung kumpite” tawh kipawl in kih huaina khaap mah azui
Protestant tampi takte cihna ahi hi. Gamuk Pawlpi leh leitung kumpi
hihna tawh kip a sawm, leh leitung deihsakna a zongpawlpi dangte
agenna zong ahi hi. “Babylon” cih ciangin a buai huai pawlpi om zia
zua te cihna hi a, Laisiangtho sung upna te phiat khia in sim zawh loha
tam pawl tuam tuam a phuan phuan te, upna phuaktawm a ki tukalh
zia zuate a genna ahi hi.

               Rome pana hong leeng khia pawlpite leitung tawh mawh in
akipawlna baan ah mi dangte tung ah a lah khiat gamtat dang dang nei
lai uh hi.

             Roman Katolik te laigelhna khat ah, “Rome Pawlpi in
misiangthote a zahtakna hangin milim biakna ah mawh baang ahih leh,
Khrist ading biak inn khat a neih sial in Mary ading sawm a nei, Romete’
tanu ahi Church of England zong (384) tua mawhna pan peng thei lo
ding hi,” ci hi. – Dr. Challoner, “The Catholic Christian Instructed,”
Preface, pp. 21,22 (ed. 1897).

                 “Tulaitak a Rome pawlpi ih cih pen antichrist lung sim pua a
gam tang hi cih pen uplah na ding thu khat bek omlo hi. Protestant
pawlpi te-in zong siatna leh gitlohna pan kipuahpha nawn lo uh ahih
man in antichrist lungsim mah a vom suak uh hi” ci in Dr. Hopkins in A
Treatise on the Millennium cih a lai bu sung ah pulaak hi. Samuel
Hopkins, Works, vol.2, p.328.

              Dr. Guthrie in Rome pana Presbyterian pawlpi a ki khenkhiatna
thu a gelhna ah: “Ih pawlpi in a Laan tung ah Laisiangtho ki leemsa, leh
a lai zial tung ah ‘Laisiagntho pan zong khia un’ cih kammal bulphuh
tawi kawm-in Rome kong vang pan I pusuah mah bangin, tua Babylon
panin gen banglo in ih siangthotakpi mah hiam?” ci in dotna khat a koih
hi.-Guthrie, John, “The Gospel in Ezekiel,” p. 237 (Edinburgh ed. 1857).

              Spurgeon genna ah, “Church of Englandte in biakna zehte a thupi
bawl ciangin a a siantho-na uh baanbaan in bei bei a, Pasian um lote
thukhun sung ah a lut lut tawh kibang hi. Hoih dinga I up mite nangawn
thu upna bulpi panin ki hei khia khia mawk hi. Cial khat khit cial khat,
Englandte in a mawh siat huai Pasian uplohnate khuaibaal bangin limsa
in zui zui uh hi. A tawpna ah haang san takin pulpit dong nangawn ah
lut pih uh hi. A min-in Khristian mah lah a kicih ve ve ding hun a hong
tung hi ci in ka um hi,” ci hi.

                Lampial kipatcilna bang hiam? Bang ci bangin pawlpi in a gen
nop mah mah Lungdamna Thu panin pial khia masa phot kha uh hiam?
Lawki thu pomin a gamtat bang a zuih uh man-in, Khristian mah kici
napi lawki thu na saang uh hi. Paul in ama hun lai phet in, “a ki seel
gitlohna in tu nangawn in na asem lai tak hi” na ci hi. 2 Thess. 2:7.
Sawltakte hin’ lai teng pawlpi in siangtho takin kip lai hi. Ahih hangin
kum zakhawk nihna bei kuan ciangin pawlpi a tam pen te in biakna zia
thak khat hong nei uh a, a maan-a a gen nopna a hoihna teng dawk
nawn loin, nungzuipi teng lah han sung tung khin uh a, a tate uh leh mi
thak ki ngah beh te in,…nasep dan hong khel uh hi.”-Robinson, Robert,
“Ecclesiastical Researches,” ch. 6, par. 17. (385) Mi thak angah
nop man un Khristian upna din mun niam khiat uh a, “lawki tuileet pen
pawlpi sung ah hong luang in, a lawki ngeinate, agamtat te uh leh a
milimte uh zong hong lut pih uh hi.” – Gavazzi’s Lectures, p. 278 (ed.
1854). Khristian pawlpi in leitung a uk kumpi te maipha leh huhna a
saan’ uh ciangin mipi in zong zuih kul pah a, Khristiante hi sam napi in
a tatak in “lawki” lungsim anei mitampi pawl sung ah ong om hi. Tua
bang in pawlpi sung uh ah milim biakna a hong lut pah hi.” – Ibid.

             Tua bang pian vi ve mah pawlpi khempeuh phial ah pianga, amau
lah Protestant te mah kici ve ve ciat mawk uh hi lo a hi hiam? Apawlpi
phuankhiate ciat in aneih uh ki puahphatna ding lunggulhna lungsim
pen pai khia ciat mawk uh hi. A suan akhakte in “meel tuam pua in” na
hong sem tek mawk uh hi. Mitsi tentansa in a ki zui ngeisa bang ci in
zomzom mawk uh hi. A mai nawt nading uh thumaante nial in, puahphat
te tate in ki niam khiatna, pumpi nialna, leh leitung nusiatnate tawh
gamlapi ki kaak ta uh hi. “A masa a hoihna, gennopnate” ki dawk
nawnlo hi. Leitung thute in pawlpi sung ah tuileet bangin luang lut a,
“lawki ngeina le a gamtat ziate ban ah milim te phut kip ta hi.”

                Ala! Tua leitung tawh kipawlna khang han han ven, “Pasian
gal” suahna pen lau huai zen mah si! Tua pen mah lah Khrist nungzui
akineihte in nop a sak pen uh hi ta thong veh! Bang zah takin Khristian
a kici minthang pente in Laisiangtho thumaan tawh ki gamla ta hiam!
ei leh ei kideeknate, gennop-a lungsim hoihnate, Pasian zahtaakna
cihte gamla mah se! John Wesley in sumzatna maan a genna ah, “Talen
manpha khat pen a neng khat na ngawn mit’ deih thu mawk mawk
khat peuh, a uang lua leh a manpha lua puan leina peuh, a kullo kizepna
peuh leina-in zangh kei un. A khel avet in ki zeem loin na inn sung
van zatte uh zong a uang lua a manpha lua hi loin a tam man lua milim
khawng, a tam bei lua inn zut khawng leh khamtui zut khawng ah na
sum uh mawk bei sak kei un. Hih leitung nuntakna nop zat kiphatsakna
peuh, mite’ pi muh ding lel peuhte in na sum uh zangh kei un. ‘Na sep
ding bang maan takin sem peuh le cin mite in nang’ thu a gen teh thu
hoih hi lel nading hi’. Na pumpi puan au-san tawh paun-neel tawh
zeem-a ni sim-a an lim na neek” lai teng bel mite in hong pi et mah
dinga, na thupina, na citna leh, na zin le leeng do siamnate hong kiphat
mah ding hi. Ahih hangin tua pibawlna pen enlah lua dah in. Pasian
kiang pana zahtakna pen (386) deih pha zaw in.” – Wesley’s Works,
Sermon 50, “The Use of Money.” Tu hun-a pawlpi tampi te in tua
bang hilhna awlmawh het lo uh hi.

               Biakna nei hih lel pen leitung ah ki angtan na khat ong suah uh
hi. Ukpite, gamvaante, Upadi siamte, Zato nasemte, leh Sumbuktein
mite lakah zahtaakna leh muan’na a ngah nadingun pawlpi mi suak uh
a, tua tawh amau leitung vaite azom uh hi. Tua bangin Khristian hihna
tawh amau gamtat hoih lote khuh in a tuam uh hi. Biakna pawl tuam
tuamte in hih leitung lungsim bek anei a ki tuiphumte’ hauhna leh huzaap
tawh mi lak a dawk ding a hanciam to to uh hi. A kidawk pawlpi thupi
mah mahte bang in a nasia thei pen pen-a ki dawk dingin kongzing
thupi pen pen munte ah a biak inn uh lam uh hi. Biakna pia mite zong
a tamman pen pente tawh ki zeemin tee lialua uh hi. A siapa dingte uh
zong mi huup thei ding, leengla do asiam mite khasum tampipi tawh
acial uh hi. A mite sermonte in zong mawhnate kawk khia loin kuamah
a naa sak lo, ki zep siamte bil in a ngaih nop, a lungdam sak te hi ding
hi. Ki seelsim asiam mawhneite pawlpi laibu ah ki gelh a, mawhna teng
zeem hoih in Pasian min pua khem in kisel khin khian hi.

               Tu hun leitunga Khristian te om zia leitung thuthang zaksakna
laihawmkhiat khat ah, “Pawlpi in a khang hun-a mi lungsim zui in a
hun-a mite deihzia zui zel uh hi.” “A khang deih bangin biakna leh
paaina nei uh hi.””Mi’ lung sim azol zawhna ding un ahih theih khem
peuh tawh ahan ciam hi” ci hi. New York Independent sunga a gelhpa
in Methodist pai zia a gelhna ah: “Pasian mite leh biakna nei lo mite
kikaal kibat lohna pen awk-in-valh a, ki liah sem sem in, mi tha nuamte
in tua ki lamdan’na te a bei siang theih nadingin sem khawm, ne khawm,
gualnuam khawm a om theih nading un hanciam in sem uh hi.” “Biakna
lian mah mah te in a pawlpi mi uh a pun’ nading leh a pawlpi’ meet
nading a pia mite a ngah theih nading uh hamciam bel in aneih uh
manin, a pawl mite uh thu man ah a makaih nawn kei uh hi” ci hi.

             Howard Crosby in: “Topa ngimna bang in Pawlpi a pian nading
ih makaihna neu lua hi. Tanglai Jewste mah bangin milim biakna lam
hoi in Pasian (387) kiang pan ih lung sim ih heei mang khin zo hi….Tu
in zong Jesu pawlpi in thu um lo leitung te tawh ih ki pawlmat hi.
Pasian deih nuntak maan panin Khrist nei lote nuntaksia ah ki pawl
in, pahtaak zongsatna leh Pasian deihlam zuilo pi in vai ki hawm hi.
Tua manin thupha sunga khan’ tohna khempeuh ih lang do kha khin ta
hi” ci hi.—The Healthy Christian: An Appeal to the Church,” pp.
141,142 (ed. 1871).

             Leitung nopsakna zuihna hangin angsung leh pumpi deih nial in
Khrist-ading ki pum piakna cih om nawnlo phial hi. “Tu-a a pangpi pen
nasem nupi papi te aneu lai un Khrist ading sep siam nading in a ki
hilhte a hi uh hi.” “Tu-in sum leh paai a ki sap hangin, a pia dingin
kuamah kiko nawn lo hi. Pawi bawl, pawi lak, thu sit ki neih, an lim ki
kup teengta ki neih khawng, gual nop theih nading khat peuh peuh
bawl sak un.”

                  1873 kum January 9 ni in Wisconsin-a Governor Washburn in a
kumcin thupulaakna ah hi bang a ci hi: “thai kaap na bek a ki zangh
saang pawl khat te phiat nading thukhun koih a kul ding bang hong hi
ta hi. Mun ci teng ah tua bang om hi. Geel tek tek ahih loh hangin biak
inn te na ngawn khat vei vei dawi nasepna in kizangh zel hi. Letsong
zonna, pawi lahna peuh letsong ding van zuakna peuh, khat vei vei
biakna lam huhna hawm khiatna peuh in ki zangh hi. A tam zaw in vai
thu pi het lo Ongbali (lotteries) hawmna peuh, letsong kituhna mun
peuh in ki zangh hi. Tuate khempeuh sum ngah nopna vai vive ahi hi.
Lungsim sia in a hong zongsangh sak theite vi ve a hi hi. A diak diak in
nasep gim khol lo khat-a ngah theihna, leh sum iiplahna ih khangnote
hansuahna a suak hi. Mi thupi zahtaak huai ulianpipi a kicite na ngawn
tua bang a ut uh ciangin ih gam ah khangno te kimawlna hoihlo,
zongsatna tuam tuamte ah puuk ding cih pen a lau huai na a ki tel sin
sen in ki mu hi,” ci hi.

              Leitung lungsim paaina in Khristian pawlpi khempeuh a hong
sim hi. Robert Atkins in London-a a thuhilhna ah, England gam pen
khaa lamah neng cipin khuamial sung atunna na thu gen ah: (388)
“Dikna thumaan pen leitung pan kiam khin hi. Kuamah in awlmawhin
zong nei nawn vet lo hi. Tu hun-a biakna nei-a kinei khempeuh leh
pawlpi kimah, leitung iiplahte, leitung vai tawh a ki diahte, noptatna a
iiplahte, zahtaakna ngah ding a ut te ngen ahi uh hi. Amaute Khrist
tawh a thuak khawm dinga kisam te hi napi uh in neh thawhna leh sim
mawhna a thuak thei lote ngen a hi uh hi….Lampialna, lampialna,
lampialna vi ve biak inn kongkhakpi tung khempeuh ah ki gelh hi. Tua
din munah a om lam uh ki phawk uh hi leh lamet a omlai ahi uh hi.
Ahih hangin tua bang sang sik-in ‘Eite I hau hi, na I nei hi, bang mah
I ki sam kei hi’ ci in ki ko zaw lai uh hi” ci hi.- Second Advent Library,
Tract No. 39.

             “Nu leh pa’ khialhna tawh kipawl ama hehna leenggahzu mi
pawl khempeuh a dawn sak”na hang in Babylon in mawhsakna a thuak
ahi hi. Khamtheih leenggahzu leitung mite dawn sak hi a cih pen leitung
liatna tawh aki zop man-a a ngah upna maanlo a hilhna thu a genna a hi
hi. Leitung tawh ki pawlna in upna sia sak a, amah in zong leitungte
upna maan lo huzaap kih huai hilhsawn ahih manin a kitel leh a baihlam
Laisiangtho thute a langdo suak ahi hi.

             Rometein mite kiang panin Laisiangtho hum cip in, amau hilh
bang bang azui lel dingin mite azawhthawh sawl uh hi. Biakna
Puahphatna huhau in Pasian Laisiangtho thu tawk kizui in mite hong ki
puahpha kik sak hi napi tu ciang leu leu in puahphatna tawlnga sak in
Laisiangtho thu sangin amau pawlte thu mang zaw dingin ki hilh mawk
leu leu ta uh hi mah lo hiam? Charles Beecher in Protestantte omzia a
genna ah: “Amau in a pawlpi upna luan’ dan uh a gensia zek khat om
leh, siangtho pa a kici te in a misiangthote uh leh thahna thuakte a
kigen siat ciangin a zak dah uh mah bangin za dah uh hi. Tua Protestantte
lak a Evangelical pawlpi a kici te peuh mah bang hoh kipumkhat lua in
amau sung leh Laisiangtho baan ah a bawltawm uh laibu pawl khat
tawh ki tuaka a pomte lo buang thuhilh sia suak sak thei lo uh hi….Tua
thuguikhun in Laisiangtho thuman dalna a suak hi. Romete khaam (389)
cip mah bangin Laisiangtho khaam cip ding ngimna kawi lo ngal a dang
ki ngawh thei lo hi.” –Sermon on “The Bible a Sufficient Creed,” delivered
at Fort Wayne, Ind., Feb. 22, 1846.

                 Siate in Pasian thubu kammalte pholhkhia in Laisiangtho sung
thumaante theih kul hi a ci-in ahilh uh hi. Tua ciangin, mipil misiam,
Laisiangtho thei-a kinei siate hong ding khia in, thumaan pen upnapial
ci zaw sop uh hi. Thumaan a kante a tuam khat-in a heii khia zel uh hi.
Leitung in Babylon leenggahzu kham lo hi leh mipite in Pasian kam
mal thumaan thu gunte hangin ki kheel ding uh hi. Biakna upnate
zong buai huai in a ki tukalh lia lua bangin ki mu ta a, mite in a koi
pen zui ding ih hi hiam cih nangawn theizo nawnlo zah in a om uh hi.
Leitung mawhnate leh ki sik kik lohnate in pawlpi Biak inn kong mai
ah bok in mite ngak uh hi.

              Mangmuhna 14 sunga vantung mi nihna tangkona pen 1844 kum
khuakhal laitak in kihilh hi. America gam sung pawlpite tung mah ah
thukhenna hun hong tung zo hi, cih tangkona ki tam gen pen hi. Zong
na ki nak nial pen a hih mah bangin, ki tang kawk pha pen pah a, pawlpite
nung tolhna zong tua lai ah a na sia pen hi pah hi. Ahih hangin 1844
kum in vantung mi nihna tangkona pen tung kim nai lo hi. Pawlpite in
Jesu ong kumkikna ding tangkona khuavak a nial man un a lungsim uh
puuk khin hi. Ahih hangin tua puukna pen a mong tung nai lo sam hi.
Hih thumaan tuam vil vel pen nial nial lai uh ahih manin amaute din
mun niam sem sem hi. “Nu leh pa khialhna tawh kisai ama hehna
leenggah zu mi khempeuh dawn sak” ahih manin Babylon puuk zo hi,
cih pen tu in kici lian thei nai lo zek hi. Leitung tawh kipawl lungsimte
tel khen nadinga hong kipia tuhun thumaan pen in Khristian gam
khempeuh a a upna uh ki phutsa te kawk khiat nading hi a, mulkim huai
leh a lau huai mawhsakna zong hih vantung mi nihna tangkona sung
mah ah ki hel lai hi. Lampial nasepna zong among tung tatak nailo zek
sam hi.

               Topa hong paikik madeuh in Satan in “zuauna tawh kipawl
vangliatna, nalamdang leh dipkuathuai apawlpawlte tawh” nasem ding
a, “gupna ngah nading ki-itna tawh kipawl thuman a sang “ lo khem
peuh in tua “khemna apawl pawlte” sang ding uh hi, Laisiangtho in ci
hi. 2 Thess. 2:9-11. Khristian gamte khempeuh ah hih pawlpi leh leitung
kikop omzia a mong a tun’ ma teng, Babylon puukna a dim nai lo ahi
hi. Hunte ki khel han han a, Mang. 14:8 a genkholhnathute a tunkim
nading pen mai lamah om lai hi.

              Khaa lam khuamialpi leh Pasian tawh ki khen khiatna pen pawlpi
sung ah a om hi. Tua manin Babylon a hong piang khia a hi ta zongin
Khrist’ nungzui maante tampi Babylon sung ah omlai hi. Tua dinmun
ah a lungkim zolo mite zong tampi a omlai uh hi. Tu hun adinga kipia
thumaan tuam vilvelte a mu kha ngei nai lo zong tampi omlai uha,
khuavaak taang zawkhat lunggulh in a om uh hi. A kizoppihsa uh
pawlpite sungah Khrist nunzia lim en en in mu zolo uh hi. Tua pawlpite
in thumaan tawh kigamla sem sem in leitung tawh hong ki pawl hel uh
ciangin, a pawl nihte omzia ki lamdan’ na hong ki lang khia ding hi.
Tua ciangin thumaan deih tak takte tawh ki khen khiatna hong piang
ding hi. Na khempeuh sangin Pasian a it zawte in Pasian sangin
gualnopna a it zaw mite lak ah thaam thaam thei nawnlo ding uh hi.
“Pasian biakna puatham teng zui uh a, ahih hangin avangliatna anial
mite” lak ah om theih nawnloh hun hong tung ding hi.

             Mangmuhna 18 in Mang. 14:6-12 sunga vantungmi thum
tangkona a kinial tak tak din mun atunna thu, vantung mi nihna
hilhkholhna thu nialte thaman picing takin tung ta ahihna, leh Babylon
sung a thaam lai Pasian mite sapkhiat nading thu te alak ahi hi. Hih
tangkona pen leitunga ki puak ngei thu khempeuh lak ah a nu nung pen
hi a, tua in nasep mahialna ding hi ta hi. Tua hun donga “thumaan
thutak umlo in, gitlohna ah nuamsa “ lai laite ki nusia in, zuauthu um lel
dingin ki pai san ta ding hi. 2 Thess. 2:12. A um nuam mite lungsim
avaaksak dingin khuavaak amau tungah ki pia ding hi. Babylon sunga
thaamlai kha Pasian mite in “Ka mite pawlte aw, tua khua gitlohna tawh
na ki pawl loh nading uh ahi zongin, ama pulte na thuak loh nading uh
ahi zongin, pusauk in hong pai un” a cihna aw hong mang ta ding uh hi.
Mang. 18:4.