Dear Laisim mimal,
Pasian in ih leitung abawltungin atawntung akimangding/kizang theidingin abawl hi napiin, ih theih satek bang mah in, mihing te thuman loh na hangin mawh na hong lut a, tua mawhna hangin hih ih tenna leitung in, Tettan a nei, anun tak tanding zah akizat ding zah pen aki ciangtan hong suak ta hi.
Tua ahih manin (1Peter 4:7 ahi, Na khempeuh a beina ding hun hong naita hi. Nomau pumpi ki-uktawm thei in pilvang un la, hoihtakin thu a ngen thei-in om ta un.) ci-in hong vai khak hi.
Hi LST mun leh leitung thu piang te ih ngaih sut ciangin, ih tenna leitungin ciangtan khat bek kimang ding a, tua akiciang tan ni/kha/kum leh hun hong cin tak ciangin, ih leitung e tettan abei hong suak ding hi.
Sanggam aw, nang hi thu na um/lo keizongin, hi thu aman ahi hi. Leitung a om mipil te bawl nate en leng atawntung a ki mang thei na khat bek om lo hi. Tettan nei ciat hi, leitung ah akisia thei lo na khat bek om lo hi.
July 29, 2005 ah, NASA pan in leitung bup thu zaksak na khat hong gen khia uh hi. Nidang a ih leitung inn kuan te 9 bek hi a, tu'n 10 hi ta hi cih hong mukhia uh hi. Ni inn kuan sungah Planet athak khat hong muh beh uh cih na hi. Ni dangin zong mukhin, theikhin tei napi in, tua masiah ciangciang pen kiciantakin muhna leh theina neitak nai lo a, ahi zong 2005 tak ciangin akitektakin hong mu uh a hi zongin, Amin ding phuak thei nai lo a, PV1, PVXX1, X2 cih bang dan in amin hong phuak nemnawm uh a, atawpna ah, PX ci in min hong vawh uh hi. P cihciang leitung (Planet), X cih ciang Zawmah ganan in 10 na, ganan (math) in en ni cileng, X pen akithei lo khat cihna, Planet minding taktak phuak thei nai lo a, PX ci-in koih phot hi.
Ei pau in leitung thak ciziau mai ni in, tua in ih NI vialkhat akim vel zawh nading in kum 3990 val sawt hi ci. Tua in NI akim vial ciang abem kim avial hi lo in, azawlpian atai hi a, vialkhat akim vial ciang hih ih leitung tawh akinai penpen na mun khatvei a om loh phamawh hi ci.
Kha pi bek zong (hupna tha) nei a, tuipi tuite, khatawh kinai/gam lak natawh ki zui in ki lam dang zo hi. PX pen (hupna tha) pen hat lua mahamah ahih manin, ih leitung tawh aki nai pen ah aom lai tak in leitung maitang a om tui te huihte pen angei bang lo in ama hupna tha hangin ki lam dang na om zo ding hi. 2013 kum ciangin, PX pen ih leitung tawh akinai penpen a om ding hi, ci-in Aksi lam siam te'n gen hi.
Aksi lam siamte gen bangin piang in teh zong cituan khang, piangthei ngeiken teh zong cituan khang, ih gen nop leh ih deihna in, ih leitung e tettan pen bei ding hi ta a, leitung pen sawt vei kimang nawn lo ding ahih man in, Mipilte muhna hi ta leh biakna lam te muhna tawh hita leh leitung ki-uk nalam tawh hitaleh, Pasian a um/lo te mi khempeuh na khempeuh in ah, ih leitung pen atawp na lam atungtung hi ta cih pen gen mawk uh ahih manin, Jesu nihvei na hong kum kik ding pen nai mahmah tak pi hi ding hi ci-in athak in kong phawk thak kik nuam pha pha hi.
Peter gen bangin nakhempeuh te abei nalam atungtung ta ahi hi. Pasian thu lam hanciam un, hah kat un, leitung thu bekbek tawh buai kei un hong cihna ahi hi. Jesu hong pai kik leh ih nusiat lel ding hih leitung nate, iplah lo in, buailo in Pasian tawh akinai penpen ah nuntak sawm un ci-in hong han thawn hi.
Jesu hong kum kik ding hi. Nang le kei ih nuntak sungin hong kum keiphial mah leh zong, nikhat nitak ciangin ihnuntakna hong bei ding hi. Ih dam sung ih hat sungin ih Topa hong kum kik ma in, nahoih na lianpi te sem lo ding ih hi hiam?
Leitungah kuamah khangnih anungta om lo ding a, tua man in tawm vei ihnuntak sungtengin nahoih bekbek mah sephuai a ih Topa ading bek in nuntak huai hi.
Nahoih ih sema/semkei zongin, Topa ading hinungta/ nungta kei zongin ahun acin tak ciang ihnun tak nate in mual hong liam san ding hi. Jesu in leitung a minthanna, hauhna, liatna te khempeuh nangah hangin, nanuntakna nakha sup lawh le cin bangphattuamna om ding hiam ci-in hong gen hi.
Kumtamkhin, aham khit tak ciangin Pasian sapna za in, Pasian adinga anungta pa pen Abraham hi.
Josef in acih theih anop sak ciangbek hi lo in, genthei haksakna, lungkham na leh dongtuakna tampi atuak hangin Pasian ading citakin, nungta zong tawntung hi.
Minam lungsim neilua kisa in, amipih te a it akhualman in agal te athat kha zawzen Moses atawpna ah pauthei keng, thungensiam keng, midangsawl in cih in Pasian sawlna nialnial ahih hangin Pasian in Isreal mite Egypt gam pan apai khiatpih dingin amahmah tel in na zang hi.
Mizawng dai pam khat pan akhang khia lo kuansing pua Pasian mi zat Gidon.
Numei gina lo, numei kizuak hi ci-in mite in amuh khat hinapi Pasian mite khanangam alut zawhnading in amapang pi ahi Rahet.
Nule pa mawhna lam ah zual zanga, nupa kikal ah acitak zo het lo, inn kuansung zi le ta te tawh a buai denden hi napi, Pasian mizat Pasian lungtang tawh akinai pen cihna angah kumpi David.
Alungkia baih mahmah atha nemthei baih mahmah hinapi'n Isreal gam bup mite khut nuai ah aom laitakin Pasian in kamsang ding in azat Jeremiah.
Thuakzawhna aneithei lo, maizawhna anei theilo alungtom ahehbaih lungsimkip lungsimkho aneihak hinap'n Jesu nung zute lakah amuanpen Peter.
Leitung pumpi mahmah damhetlo ta leh Pasian adinga ahanciam tantan Paul.
Suangtumtawh kidengin, cikziathuai takin bawlsiatna athuak laitakin Pasian in hunkhiahet lo in, tua bawlsiatna athuakzawh nadingin tha pia zaw hi.
Sanggam aw, tu'n nang bang gen laiding na hi hiam? ihmai ah Tangmisiangte in ih etteh ding, ihtha lak ding in hong lak khin zo hu hi.
Laisim mikhempeuh Topa'n kilam thakna hong suaksak ta hen.
Lungdam
Kimnu/nunu.
No comments:
Post a Comment