Azom te,
Pawlpi 3 na, Pergamos. Mg 2:12-17. Hih hun-a pawlpite min dingin, Pergamos akhiatna- Pahtawi cihna min na kipia hi. Bang hang hiam cih leh, Constantine kumpipa hong khan ciangin Khristian te bawlsia sak nawnlo-a, puahzawk pahtawi zawk hun hong hi ta hi. A kum in 313-538 ciang huam hi. Langnih-a hiam namsau aneipa athupiakna in: Na laizang ah Satan tokhom kinga thu ka thei hi. Dawimangpa ai-awh ding;"Pa" akici te nialngam, Antipas akhan'dongin Ka min nial lo-in, thahna athuak dongin ka Teci apangte ka thei hi, ci hi.
Constantine tawh ME kituhpa Milvian Bridge pawlte tualgal om a, tuate sim dingin kumpipa agalkapte tawh akuankhiat leh AD 321, Oct 27 ni in, mangmu uh a, Ni tungah singlamteh khat kiphut mu uh hi. A vekpi u'n, en uh a, mang lo hi. Amau zong mainawt ngam nawn lo phot in ciahkik uh a, Khristiante'Bishop pipa Sylvester dong uh hi. Sylvester in,"Kumpipa aw, Ni ataan' mahmah hangin tua Singlamteh tunga kithatpa bawlsa mah hi lel a, nang mahmah zong hicia-a lian kumpi ahong suaksak Pasian pen bia lo-in, ni nabiak mawk pen, tua na muh singlamteh tunga kithatpa Pasian biak ding kilawm zaw hi, hong cihna ahi veleh! Tham lo-in ko Khristiante in, tua singlamteh pen galzawhna lim-a ka neih uh hi a, tanglai Joshua te Mosi te hun in zong, gal asim uh ciangin akhut tegel zaak in singlamteh lim in bawl le-uh agalte uh zo hi,"ci-in tanglai Isrealte galzawhnate na genpih hi. Pocket Bible Handbook.H.H.Halley.670.
Tua ciangin kumpipa in, Khrist Laan tawh galsim ding hong ngaihsun hi. Sylvester kiangah,"Thupha hong pia inla, ka gal ka va zawh leh, kei zong Khristian hong suak ning,"ci-in khaam hi. Agal va sim a zo mang hi. Tua ciangin amah kudai Khristian hong suaka, ahih hangin a sunglam upna pen akikhel het lopi ahi hi. A min bek Khristian hi a, alungsim pen Ni pasian mah a um lai hi. Ama mai-a kumpi sem masate in Khristiante akhelbawlna-a Biakinn kihalsak te khawng kumpi sumbei in lam kik sak hi. Tua bangin Khristiante hong angtang mahmah hi.
A laizanga Dawi tokham kinga, Satan in, direct taka Khristiante abawlsiat ciangin pung semsem uh a, tu in anian hong hei leuleu a, Khristian sungah lut in tua kumpipa zang in, pawlpi uk ding ahi ta hi. AD 321, Marh 7 ni in, kumpipa in, Ameng khat piakhia a, Agam buppi sungah, Khristiante' Pasian mah bia dinga, ahih hangin ama ni pasian biakni ahi Sunday ni in bia dingin thu pia hi. Hih pen, leitunga Sunday Law om masa pen hi pah hi.
Lawki kumpite in abawlsiat luat den na lak panin asuakta sak, Khristian na pen a angtang sak mahmah hih kumpipa thupiak pen, pawlpi makaite in lung dam lua in na nial ngam lo in na zawp pah mawk uh hi. Ahih hangin pawlpi mi nautang pawlkhat te in na mang nuam lo-in Sabbath mah na tang tentan veve uh hi. AD 325 kum ciangin Necea khua ah Council pi khat hong nei uh a, Sabbath asukmit theih nadinguh, Sunday ni pen, ih tanh pi leh, ih Topa thawh kik ni hi-a, agalzawh ni hi."Topa Ni,"ci ni, ci-in hong kipsak uh hi. Ahih hangin mi pawlkhat in Sabbath mah na paaikhia nuam lo teitei uh a, AD 364 kum ciangin Laodekea khua ah Councilpi khat hong nei leuleu in, mipi thukimna, ME tawh Sunday ni mah zuitek dingin hong kipsak to leuleu uh hi. Ahih hangin Pasian thukham nambat 4 na ahi, Sabbath pen aphiat nuam lo mah na om lailai hi. Neander's Church History.2vol.300.
Note lakah Balaam nungzui pawlkhat om. Bangci bangin Balaam nung zui om kha thei uh hiam?Isrealte Khanan gam zuanin hong kikhiin lai in, alampi dung uah, gamtuamtuamte nawkgawp uh a, kumpi tuamtaum te in na hua mahmah hi. Moab mite kumpipa Balak inzong na hua mahmah a, asamsia dingin Pasian kamsang Balaam na cial hi. Ut lo phot sam napi in sum tampi piak behbeh a, sum tamlua ahih manin, sum etlah na hangin Balak cialna, Isreal te samsia dingin zui hi. Tua mah bangin hun paisa a, akihal sak biak inn khawng kumpi sum nangawn tawh alam kik sak kumpipa Constantine thu pen leitung nate hangin sel ngam lo-in Pasian Thukham nambat 4 na pen, adangte lak pan a zong Pasian in amite aciamtehna a azat penpen phiatsak hel se ding cih thei gige in, pawlpi makai te in Sabbath phiat-a tua taang in Sunday zat ding na thukimpih ta thong uh hi. Tua thu agen na in, amaute lakah Dawi tokhom hong kinga a, maute lakah Balaam nungzui pawl om hi,
Hansuahna. Kisik kik in. Tua bang na hih kei leh ka kamsung pan pusuak namsau tawh kong su maimang ding hi, ci hi.
Khapna. A zo mi, angahmi longal in atheih zaw loh minthak gelhna suangpaak leh aki seel Manna ka pia ding hi, ci hi.
A ciamtehna. Mg 6:5. Tua huna pawlpite omzia Sakol vom tawh ciamteh hi. Bang hang hiam cih leh, pawlpi upna leh zuihna pen, nibiakna tawh hong kihel ta a, pawlpi makaite in lah zuih ding hong thukimpih hiau mawk ta uh hi. Tua sakolvom atuangmi khut sungah, tawikhaina om hi. Bang dinghiam? Thumaan upna manphatna leh leitung nate lel manphatna tawikhai nading ahi hi. Mangbuh leh Kawlmim zong aman kikim nai lo hi. Mangbuh pawta khat in hamu man hi. Kawlmim pen pawta nih hamu in kingah hi. Thumaan ah zong amanpha, akul pha sawnsawn om hi ngel ding hi. Thukham10 palsatna te leh pawlpi thukham thu hoih dangdangte kikim lo lailai hi kha ding hi. Sathau leh leenggahzu sukha lo dingin sawl hi. Ki-itna leh Pasian upna paipi pen beek sukha het kei le-uh deih hi.
Hih Pergamos pawlpi hun akipan Dawimangpa in a tokhom pawlpi sungah nga in nasem a, apua pana asep sangin picing thei zaw hi. Lawki kumpi din'mun panin Khristiante asuksiat lai in, tua bawlsiatna thuak Khristian te bei zaw lo-in pung semsem zaw a, upna leh zuihna ah zong hatzaw sem khauh zaw sem mawk uh hi. Ahih hangin Satan in atokhom pawlpi sungah nga in hong inntek sak ciangin pawlpi lah hi-kumpi lah hi, tawh hong uk-a, ama deihna picing thei zaw mahmah hi.
AD 431 kum in Ephesus khua ah council pi khat hong nei uh a, ni pasian biakna sunga milimte, amin leh alim khel in, Jesu lim, Mary lim, Peter lim cih bang tawh laih in Biak inn sungte ah koih thei ding, amai ah kun in zahtakna pia thei ding cih hong phuan leuleu uh hi. AD 787 kum ciangin Necea ah council khat hong nei leuleu uh a, tua lai ah kipsak pha leuleu uh hi.
AD 440 kum pan in Leo 1 na pa makaipi hong suak-a Bishop bek kici nawn lo-in pope min hong pua ta hi. Tua khit ciangin pope Gregory 1na pa 590-601 sung pope hi a, pawlpi leh leitung uk khawm masa pen pa hi. Nicholas 1na pa, 858-867 pen, pope lukhu cialthum pha, akhu masa pen pa hi. Pope innocent 3na pa, 1198-1216 pen lukhu cialthum tunga title"Pasian Tapa taang-a sempa," cih na ahi, VICARIVS FILIIDEI asuang pa hi. Inguisition or Holy office akici, amau thunialte sitna (Heresy) te danpiakna zum ahong cilpa zong hi.
AD 330 kum in Constantine kumpipa in nisuahna lam ah azum tuah in, azum din'na khua pen, ama min zui in Constantinople khuaci-a, Rom gam pen phelnih suah in, anisuah na lam gam teng, Constanople khua panin amah'n uk-a, anitum na lam gamteng Rom panin pope te ap hi. Leitung leh pawlpi uk khawm uh hi. Thukhen zum ah tu in thukhen uh a, phiangsiah khon papal state nei uh hi. AD 534 kum in nisuahna lam gam teng kumpi asem Justinian in,"Nitumna lam gam lutangpi pope thu nial pepeuh in sihna thuak ta hen,"ci-in thupia hi. AD 538 kum ciangin, sabbath tang teitei a sunday tang nuam lote khawng, milim bia nuamlo te khawng, neekkhawm bawlna-a upna maan lo apom nuam lote khawng, pope thunialte kumpi thunial hi, ci-in bawlsiatna, sisan luan'na, thahna te hong kipan takpi hi. Tua pen kum 1260 sung sawt ding Anaa pen kipan ta hi a, Dan 7:25 sunga hilhkholhna pen ahi hi. Pope Anaa liat penpen laitak pen, leitung buppi adingin khuamial penpen hun suak-a, tu dong mah in tua hunte akigen ciangin, Dark Ages-Khuamial khang hunsung, kici peuh leh mikhempeuh in theih sa in akinei ahi hi.
Zoplai ding
Lungdam
Kimnu/nunu.
No comments:
Post a Comment