Thu masa: Noah pan in khan 11na, Shem pan in khangsawmna Abraham in Pasian khat bek om hi cih bang ci up hi ding hiam cih lunglut huai hi. Abraham hun ah anungta Pasian khat bek om hi cih a um leh thuzui om nawnlo hi ci in, LST in hong hilh hi. Abraham hunlai Leitung omzia te, Halley's Bible Hanbook tungtawn in kikum khawm ni. Sau simsim ahih man in, hun awng na neih ciang bek in sim in.
Shem Khangthu (Pian.10-11 chs): Noah tapa thumte sungpan in khat ahi Shem pen Zeisu khanggui sutna ah a ki hel khat a hihi (Lk.3). Halley genna ah, Adam pan in Noah ciang kum 1600 val ding in hong gen hi. Adam leh Enok tapa Methuselah kum 243 sung nungta khawmlai hi cih hong hilh hi. Methuselah leh Noah kum 600 sung bang nungta khawm a, Tuiciin tunkum in Methuselah si hi (Tuiciin hang hilo). Methuselah leh Shem pen kum 100 sung nungta khawm hi cihna hi, Noah in kum 500 a phakciang in Shem, Jafet leh Ham, tapa thum nei hi ci in Pian.5 sungah kimu hi. A Vanglian Pasian tawh lawmta bang in a kikhawl Adam in, Pasian omzia a suan le khakte hilh suksuk a hih man in, Adam suan sungpan in Abel, Seth, Enok, Methuselah (?), Noah innkuante in Pasian khat bek upna ah nungta hi cih kimu thei hi. Tuiciin tunzawh Noah kum 350 nungta lai a, Shem pen kum 500 nungta lai hi, Shem khansungteng kum 600 a hi hi. Shem leh Abraham kum 80 sungphial nungta khawm hi ci in, Halley's Handbook sungah ih mu hi. Shem pan in khang ngana Eber (Hebrew) in tapa nih (Peleg leh Joktan) nei a, Peleg hun in mite leitung ah ki thehthang ta hi. Hih thu ih ngaihsut ciangin, Babel tausang a ki lamlaitak in Noah leh a tateng cidam lai hi cih kimu thei hi. Noah pen Abraham suahma kum nih lai in si hi ci in, Halley's handbook sungah ki gelh hi.
Abraham leh leitung: Terah innkuante Khaldea gam Ur khuapi ah teng uh a, Terah in tapa thum (Abraham, Haran, Nahor) leh tanu Sarai nei hi. Abraham in a sanggam nu Sarai ten pih hi (pa kibang, nu kibanglo). Terah in milim biakna zui a (Josh.24:2), Nahor in a pa biakna milim biakpih hi. Ahizong in, Abraham in a hih leh apa biakna zuilo in, a pupi Shem, Noahte Pasian khatbek bia hi (H.B.H.). Abraham hunciang in, leitung ah kumpi tuamtuam a minthang omkhin ta hi. Babel tausang lamlai in mi minthang Nimrod in Babylon, Nineved khuapi te sat hi. Nimrod ukna sungah thunei mahmah a hihna tawh kizui in, a sih khit nangawn in Nimrod pen pasian bang in ngaihsun uh a Marduk pasian ci uh hi, Ni (Sun) bang in a vanglian pasian cihna hi. Hih Marduk pasian ci in a biak khit uh ciang in, a ma nung ah mi minthang Tarmuz, Assur (Assyria gam phutpa) te zong pasian ai awh zah in vanglian hi ci in, pasian bang in tuat uh a, a mau lim (image) te bia uh hi. A hizong in, Nimrod zah in a vanglian omlo hi ci uh ahih man un Nimrod min ding in Marduk a phuahsa uh pen mi minthang tuamtuam hong khan ciang in, Nimrod mah lian penpen hi cih ngaihsutna tawh Bel cih min vawh uh hi. Tua pan in, Sin (Ni pasian), Tarmuz (kha-pasian) ci in trinity(Babylonian trinuty: Bel, Tarmuz, Sin) upna hong kipanto hi. Ton thumna pa Sin in zi nei a, a min pen Nangil a hihi, Sin zipen nusian ci in, Khaldea gam, Mesopotamia gam, Babylon gam leh Assyria gamte ah bia uh hi. Izipt thu pen a tuam in at lai ni. HI bang in, mi minthang biakna hong khauhpai semsem in, mi minthang te lim (image) bawl uh a, milim biakna hong tamto semsem hi. Leitung nate tuamtuam (singkung, aksi, tuipi, singkung, suangpi) biakding hong khang semsem a, hih hun laitak in, Abraham in Pasian khat bek upna khahsuah lo in, kiplet veve hi.
Melkhizedek kua hiding hiam? Abraham kum 75 aphak khitciangin, Ur khua pan in Haran, Haran pan in Hebron (Kanaan) ah Topa thuciamna gam ah pemta in a om laitak in, a sanggampa tapa Lot in zui hi. Lot tawh gam a hawm khit zawh hunlai takin, Lot pen Babylon kumpite in sim in zo uh a, Lot leh a nasem teng sal ding in man uh hi. Hih thu Abraham vengpa in a zakciang in Abraham khiang ah thu va zasak a, Abraham the Hebrew (Pian.14:13) cih Hebrew min a khatveina ih muh masak na mun a hihi. Abraham in galdo theiding mihing 300 val tawh Lot va honkhia zo hi. Abraham in galdo thei ding hizah a neih pen, Abraham pen kumpi neu khat a hihna ki mu a, Eber beh sungah beh lutang ahihna zong kimu thei pah hi. Galzo in hongciah ciang in, Salem kumpa Melkhizedek in na dawntuah a, hoihtak in na muak hi. Hebrew tradition laigelhna te sungah hih Melkhizedek pen Noah tapa Shem hi ding in um uh hi. Thuman lampi a tawn Noah suan le khak sungpan in Shem leh Abraham bek om hi, ci in ki genthei hi (source from Halley's Bible Handbook).
Abraham in Hebrew min a neih theihna: Piancil 11 Shem khangsimna ah a gukna Eber min ih mu a, Original Hebrew LST ih etciangin Eber min leh Hebrew min a at dan kibang linlian hi. Ham tapa Mizzraim leh Izipt min at dan kibang a, Ham tapa te sungpan in mi minthang, Cush (a tapa Nimrod), Izipt, Kanaan cihte kimu thei hi. Thu bulkante in a genna vuah Noah, Shem, Eber, Peleg, Abraham te pen phungsung ah beh lutang ahihna uh ahi hi, tua a hih man in, midang te sang in Abraham pen the Hebrew cih tawh ki thei kimciat hi ci uh hi.
Abraham upna: Abraham hun in mite in mi minthang khatpeuh, mi thahat khat peuh nasem in, zong bia takpi uh a, ahizong in Abraham in anungta Pasian khat bek om hi cih a pupi Shem tungtawn in a upna lenkip tinten hi. Abraham, Shem, Noah, Methuselah, Enok, Seth, Abel, Adamte pen anungta Pasian khat bek a omlam a limzuih phadeuhte a hi uh hi. Pasian khat bek om hi cih pen Adam in a mit mahmah tawh amuh hi in, tel phadeuh ding hi. Adam thu pen a tapa Abel leh Kain te in zong tel mahmah ding uh hi. Ahizong in, Kain pen asanggampa Abel a thahna pan kipan in, a lungsim pen Pasian khiang pan in galtai bang in kituat den a hih man in, Adam innkuan sungah maingal ngeilo hi. Tua a hih man in, Kain suan le khak sungah Pasian zahtaklohna hong limkhan zaw a, zi khat sang in tamzaw neihna, tualthahna cihte hong kimu suksuk hi. Abel a sih hang in, Pasian in Seth tungtawn in Adam leh Eve lungdam sak kik hi. Tua ahih man in, Adam innkuan sungah Seth suan le khak pen Pasian tate cih khangsimna kimu suk thei hi. Abraham in, a nungta Pasian khat bek om hi cih pen, a pupite upna khahsuahlo hi cih kimu thei hi (source from H.B.H).
Abraham leh kumpi minthangte: Eber tapa Peleg hun ciang in leitung ah mite ki thehthang hi cih ih LST in hong hilh mah bang in, Noah suan le khakte zong Babel tausang pan in hong ki thehthang uh a, Nimrod in Babylon leh Nineveh khuapi hong sat in, tua mun ah kumpi hong sem pah hi. Biblical Archaeology sungah Babel tausang pan in mite Pasian in a thehthang khitciang in, tausangpi lamding zom thei pak lo uh a, ahizong in Babylon ah inn lian mahmah thum Nimrod makaihna tawh lamkik uh hi, cih kimu hi. Ham tapa Izipt in zong Nile gun leh the Great sea kimatna ah khuapi sat a, Babel tausang tawh a kibang pian lamding bekbek a lungsim ah om ahih man in, a tunna mun pen Izipt gam hi pah a, tua mun ah inn lianpi lam hi, tua pen the ancient Pyramids of Ezypt kici hi. Hih innpi lamna tawh kisai, gal lelhna tuamtuam tawh zo thei pak lo uh a, Mosi te hun dong ah zomto lai uh hi (source from Biblical Archaeology). Izipt ah ki ukna leh gam kimaihna Abraham hunciang in, na picing mahmah khinzo a, Izipt ah kumpi masa penpen Menes hi in, dynasty 12 na hun ah Abraham zong Izipt ah antaw ding in vahawh suk hi. Ur leh Khaldea gamte ah zong kumpi minthang tampite sung pan in Hammurabi a kici Babylon kumpi khat om a, ki ukna, laipilna, siamna tuamtuam pupi hi ci in, Hammurabi code cih tudong in, min thang mahmah hi. Ham suan sungpan in mi minthang mahmah khat hong khangkhia a, Kanaan tawh gamgi ah teng hi. Hih pa pen Philistine ih cihcih pa ahi hi. Philistine gam sung ah khuapi mahmah khat ahi Gerar cih om a, Abraham hun in Gerar kumpipa Abimelek tawh Abraham va kimu thei hi, antaw mah ding in va hawh kha a, Izipt gam ah a pai lai mah bang in a zi va tanlawh dek tak hi.
Upna ah ih pupi Abraham: Abraham hun in mite bangzah in khangto a, milim biakna khauhpai thei mahmah hi ta mah leh, Abraham in a upna khahsuah ngeilo hi. A up Pasian khat bek a om lam tel lua mahmah ahih man in, a tapa neihsun Isaak tawh meilhal biakna pia ngam zahdong ding in, a up Pasian muang ngam hi. Azi Sarah in, mihing tawh meihal biak ding pen ih pupi te khansungin om ngeilo hi, na upna tuam deuh hi cih kha ding hi, ahizong in, a up Pasian sungah a ki ngakzawhna pen, a lamdang mahmah upna a hi hi. A paikhial upna tawh a kibat laitak nangawn in, a up Pasian tel lua a hih man in, a lungkham lo hi.
Thukhupna: Hih Abraham tungtawn a, ih ki hopsawn thute pen LST bulkanna pan hi a, a lunglut huai mahmah thute a hi hi. LST in hong hilhna ah, Abraham omma in KEI ka om hi ci in, Zeisu in a gen pen, Zeisu thu thuktakin ih gentoh lai ding pen next lesson a hi hi. Pasian tampi, milim biakna, leitung nate, etc. biakna tuamtuam te pen Babel tausang pan in hong picing to semsem a, tua pen Rev. Dr. Khen Za Sian in a laigelhna khat ah "Babylon thusim" a cih sungah kicing takin kisim thei hi. Babylon upna in tulai leitung Christian te sung nangawn ah hong ukcip suk a hih man in, Khaldea gam upna a taisan ngam ih pupi Abraham thu lungngai thak kik ding hi hang. Hih ih gen thute a tamzaw pen LST sungleh Halley's Bible Handbook pan in, ih lak khiat hi a, source dang tampi ih hel man naikei phot hi. Topa in laisim mimal khat ciang thupha hongpia ta hen. Amen.
Rev. Dr. Suan Za Khup
No comments:
Post a Comment