Adahhuai penpen Laisiangtho mun:

2011/12/16 nang khine <tunpi95@yahoo.com>

Jew Kumpi (Zeisu) munuam hawhnuam in nisuahna lam pan mipilte aksi tang zui-in ong paipai ci hi. Laisiangtho sungah nisuahna lam pan mipil acih Balaam khuapih te leh a khuaveng te khawng ka sak hiven, Inndia ten ko hi ungh, Sen ten ko hi ungh, Persia (Iran) ten ko hi ungh, ci nuamtek uh hi. Tuucing mihai  kici leh e! ko hi ungh akici nuamtam uh? Phadawm lai, Zogam zong 100% phial Christian suahzo ih hih teh  tua te' gam teng in zong ih Topa bia-in pahtawina letsong tampipi ong piakna ding uh thu ngetsak tawntung ni. ,

 

Ganhing lak pan bang neel pen? (Saham)

Pharisees a kicici kua te? (Pharisees cih te bel, hia Ezra leh Nehemiah hun lai-a, Hebrew mite namdang tawh kumpi Solomon banga kiteng tamlua in atu ata te un Hebrew pau theinawn lo, thukhat gen ding hileh, kamphen kul, tua leh, Nehemiah hehsuak lua in a pasal te kiangah hangawp, tai gawp, satphial na zi te uh ma unla, namdang zi peuhmah tenpih nawnlo ding kiciam sakin a sam bang bawh sakkha zawzen hi. Tua pan a ong pai suksuk biakna mi religious people, minam it nationalist, sam neilo, talkolh (mipil khempeuh talkolhkhin tuanlo) pharisees te ahi uh hi

Hih bel Laisiangtho siamte cih hilo a, laisiangtho simte cih ahi hi.

 

Adahhuai penpen laisiangtho mun zong dih ni: 

Matt 2:1 Herod in Judea gamah kumpi a sep hun laitakin Bethlehem khua ah Zeisu a suak hi. A suah khit phetin aksi thu lamsang a siam(Magi) mi

pawl khat, nisuahna lam panin Jerusalem ah hong tung uh a,......

Matthew sese zong bang dingin tua magi te address leh phone number beek na ciamteh lo hiam cinuam phial ingh. Tulai a IRS tax collectors te hi leh ngentel ngel mah uh hiven. Zeisu bia ding a i pai ciangin ih min leh ih sumpi puakzah ciapteh kulkhollo aci nuam aitam cileng lah, a letsong piak te uh pulaak zel e,

Bangbang hita leh, hih mipil thumten Zeisu munuam a, a upna uh leh a hanciamna uh theihhuai kasa zaw hi. Banghanghiam cih leh, a-inn a-Lo, a-it a-ngaih a-innkuanpih abeh aphung, adiakdiakin anasepsilbawl, ahun avai,..na zomtolai vua.. khempeuh nusia-in, khuamial sung pan khuavaak muhnop manin hun tampi la uh a, asum apaai apilna uh leh ahanciamna uh tawh Aksitang zui-in khual ong zinkhia uh hi. Vantunggam ah tuate tawh khut kilen ni, mate. Dahhuai naikei.

 

Jerusalem ong tuntak uh ciangin Matt 2:2 "Jew mite' kumpi ding ahi naungek a hong suak pen koi lai ah om ahi hiam? Laisiangtho simin kan mahmah uh cih kithei hi. Nisuahna lam pan ama aksi hong suah ciangin ka mu uh a, amah a bia dingin a hong pai ka hi uh hi" hong ci uh hi.

.

Dotna: Banghangin tua aksi in Topa Zeisu suahna Bethlehem ah paipihsuak peuhlo a, Jerusalem ah totpih khawlpih se hiding hiam? Zeisu suah ava tangko sak ding maw? Jew miten Zeisu asantheihna dinga gospel paiphot maw? 

 

Ulian makai ten tua thu a theilo hipeuhmah lo uh hi. Laisiangtho zong naktheihlua, Zechariah ii manggmuhna zong tellua, Simeon genkholhna zong theilua, Tuucingte' gen/tangko zong zalua, vantung a aksi zong mulua, theilua, 'theiluazaw' cihdan hi. Ahi zongin Jew mi ahilo lawki mipite'  thu dotna hangin amau zialetong kelluphum ong kitheikhiatna ding ahi hi.

Jews lo ten Jews te kiangah " Jew mite' kumpi ding ahi naungek a hong suak pen koilai ah om ahi hiam? ci-in hong kilehdotkik seisai leh na nabangci dawn diam? Lungngai phot dih aaw.  Phawkkik ding khat ah: Jerusalem pen muntuam gamtuam a aom Hebrew mite a' dingin biakna lam hita leh, pilna sinna ding hita leh, na khempeuh avaitutna uh phualpi a center mahmah mun ahi hi. Mipilte Jerusalem ong omtak uh ciangin , hih zahta mihonpi lakah kumpi ding naungek ih mukha zentam maw, mihonpi ih phuzo ih nawkzo zentam ci uh hikha ding hi. Amau lam-et bangin 

naungek en ding mi kiphu zuaizuai cih lah omlo, lungdamna pawi kibawl cih lah omlo, omlo, tamlua ahih manin lamdangsa uh a, hih Jerusalem ah "Kumpi ding ahi naungek koi ah om ahiam?" ci-a adong uh hipelmawh ding hi. Vantungah pawi kibawl, choir la ngaih kisa ziahziah, gamlumhethat mah hiven, Jerusalem, Judea gam ah "Silent Night" aimawk ve maw, kumpipa bia dinga hong pai himah hive ungh...Hih mipil ih cih te zong kumpi te mah hileh kilawm hi. Isaiah 60:3 Nangma khuavak sungah Gentiles te hong pai ding uh a, kumpite hong pai ding uh hi.  

 

Alian 2 aneu 3 ah Kumpi Herod in hih thu a zak ciangin patau/dipkua a, Jerusalem khuami khempeuh zong maitaituanlo uh hi. Laisiangtho bup sungah adahhuai, akhasiathuai penpen mun Matt 2:3 hikha ding hi. Herod bek hilo-in, Jerusalem khuami khempeuh zong troubled/disturbed ciat  uh hi. Kumpi ding naungek ong suak khinta. Kuamah na nuamlo na kipaaklo mawk uh hi. Dahhuai khasiathuai mahmah hi. 

  

Aneu 4-6. Tua leh Herod in siampi liante leh thukham hilh siate khempeuh kaikhawm a, "Koi lai ah Khazih suak ding ahi hiam?" ci-in a dong hi. Khazih na suakkhin tham hi. Pastor te leh Theologian te in Laisiangtho phen pahin, "kamsangpa in a lai gelhna sungah, "Judah gamah a om Bethlehem khua aw, ka mi Israel te a uk dingin nangma sung panin ukpa khat hong piang ding ahih manin Judah gam a uk khuate lakah a neu na hi het kei hi," ci ahih manin Judea gam sung Bethlehem khua ah suak ding hi," ci-in a dawng uh hi. Aw! Herod akinlo nahiam? a zangeilo takpi mah nahiam? Siampi te laithei te in bang hong hih pihpih uh ahiam?

 

Aneu 7,8. Tua ciangin Herod in tua mipilte samsim a, aksi a kilat hun teltakin a dot khit ciangin, Bethlehem khua ah a paina dingun sawl a, "tua naungek limtakin vazong unla, kei zong hong pai-in amah ka biak theihna dingin na muh khit uh ciangin kei kiangah thu hong zasak un," ci-in a vaikhak hi. Herod in a bia nuam hilo in, a that nuam hizaw hi. Abianuam aihtakin azuiphei pah kei ding maw, tai 5 bek kigamla hiven. Herod lah pailo, siampite, thukham hilhte, khuapihte apai khat zong omlo zawzen uh hi. Bang hang?

 

Aneu 9. Amaute in kumpipa' vaikhak thuteng a zakkhit uh ciangin paikhia uh a, nisuahna lamah a muh uh aksi mah mu uh a, naungek omna tung santak a tunmateng amaute mai ah tua aksi na pai hi. Tua aksi amuh uh ciangin nak lungdam mahmah nak nuam mahmah uh hi. Jerusalem khua mite leh kumpipa a' tawh kilehbulh uh maw. Hiauzensam.

 

:11. Inn sungah amaute lut uh a, naungek leh a nu Mary mu uh a, bokin tua naungek abia uh hi. A biak khit uh ciangin letsong piak dinga apuak uh gold, frankincense, myrrh te a pia uh hi. Herod kiangah a kihilkik lohna dingun a mang sung uh ah Pasian in hilhkhol ahih manin lampi dang tawnin a gam ciat uh ah a ciahkik uh hi.

Hih munsan takah nang hile cin na bangci ngaihsut diam? Ong ki welcome khollohna biakinn ah kikhawm kha lecin a hileh, na sumpi khiat ding a tawmzaw in khiamin na khiakha diam? Tua mipil thumte zong Judah kumpipa bia ding, letsong pia dinga kiging kimlai, a biakding Pa uh mizawng penpen te' inn sungah na kisialin, a Nu leh a Pa mahmah zong KUMPIPa' nu le pa dingin na gimnam hiaulo uh hi. Carpenter pa leh a zi na hilel tak hi. Hitakpi mah ding hiam aw, kici kha ding hi. Ahi zongin tua mipil thumte in lungkiat ding cih peuhmah ngaihsutin neilo uh a, a upna uh khah suah lo-in, azah tampi ngahkik ding lam-en hetlo uh a, ZAHTAKNA leh ITNA tawh bia in letsong manpha TUA naungek na piakhia uh hi.

"What Child Is This' ci-in La bangin na kiphuak zawzen hi.

 

A tunga dotna ah pai kik leng, Banghangin aksi in Bethlehem ah paipihsuak peuhlo ahiam? Ih ngaihsutna khat tek om ding hi.

Jeruasalem pen Hebrew mite a' dingin na khempeuh ah a phualpi uh ahi hi. Tuhun a ih pawlpi dinmun leh Jerusalem genteh theih ahi hi. Babylon tawh gentehkhak ding kamsangnu in phallo hi. Ih pawlpi' neih pilna sinna ding Sang te, Zato te, Laikhetna te khempeuh religious activity ading a thupi leh a kisam mahmah vive ahi hi. Jerusalem zong tua dinmun tawh a omkhinsa ahi hi. Zeisu ong suahlai takin Zeisu' suah phawkkhalo thei khalo liang dingin siampiten biakbuuk sungah bang sem uh himawkding ahi hiam? Bang ngimna tawh biakinn sungah nasem uh himawk ding ahi hiam? Tulai taka i pawlpi dinmun ( ii function zia) zong tua hunlai taka Jerusalem sanctuary service dinmun tawh i kibatsak khak ding dahhuai hi. 

Athu ala thei mahmah veucin, a thuneipa (Zeisu) koi ah koih nahi uh hiam? ong kici leh ih bangci dawn diam?

 

Herod mai ah Ding kawmin, mipil ten Kumpipa bia dinga ong pai hi ungh ci hi. Biakpiakna pia dinga Jerusalem ah ong pai uh nahi hi. Tua hun lai tak paisanpawi a kipan biaknapawi tuamtuam aneih ngeingai laitak uh ahih hang abiak ding PA Zeisu na kihelkha lo hi. Kaalsim a biakinn ah ih paipai zong Kumpipa bia ding mah a, apaipai ihi hi. Pasian' pawlpi, pawlpi man biakinn ah kikhawmkhatangh ci-in i khalam khualzinna tua biakinn ciang ah ih khawlsak khak leh Jerusalem khuamite ih bang pelmawh ding hi. Tua aksitang ih zuihsuak kei leh, Kumpipa i mukhakei ding hi. Kumpipa i muh nop leh Jerusalem pan Bethlehem ah aksitang zui a, paisuak kul hi. Khasiangtho makaihna tua lamlak aksitang mansuah kei ni. Jerusalem ah mawktam taam kei ni. Banghanghiam cih leh, Zeisu ong pailai takin Jerusalem khuamite troubled gawp uh hi.

 

Kumpipa ong paikikna ding naita a, ikiim ipaam ah lim leh nalamdang tampi ong piangpiang ta hi. Na lungsimsung ah na lau giugiau hiam? ahih kei leh na nuamsim hiuhiau hiam? Tua aksitang mitsuanin Kumpipa munuam theinuam bianuamin tanglai-a mipilte bangin "tua Kumpipa koi ah om hiam?" ci-a a kankan a zongzong nahih nakleh, Mipilten Kumpipa amuh uh ciangin a naknuam mahmah bangun nang zong nuamna tawh na kidim ding hi, tua lamlak aksitang na mitsuan nak leh!!!!!!!   

 

(zoplai ding, amin kithei mipil thumte)..................