Suangpi tungah Inn lamni.

(Mihaipa in sehnel tung inn lam)3          tua inn in kisia lo hi.

(Guah ong zu-in, tui ong khangto hi)3    tua inn in kisia gawp hi.

(Mipilpa in suangpi tung inn lam)3         tua inn in kisia lo hi.

(Guah ong zu-in, tui ong khangto hi)3    tua inn in kisia lo hi.

  

Hih la tomno ong hilh Sabbath School siama nu ka thei a, siama nu in zong hong hilhlai hunte phawk mahmah lai-in ka um hi. Action-la ahih man in mangngilh ding haksa tuaituai mahmah hi. Sasa-in, sakikkikleng, acih nopna thuk tetek, zai tetek ding dan hi. Thuk ngaihsut semsemin a laimal en gega lehang eite hong it ih Topa Zeisu' Kammal hizen hi. Ih sepding ih bawlding ong gengen nahi hi. Sakhituihuup a om hangin huihpi guahpi typhon, tornado, tuiciin flood, tsunami  tung veve ding hi. Na bukna uh a muanhuai theihna dingin Suangpi tungah inn lam un, ong ci na hi hi. 

 

Mi nih in inn lam tuak uh hi. Akhat pa in sehnel tungah lam ahih manin zobaih zawzen hi. Hoihsak mahmah omsak keng kangkeei hi. Ong tawlnga hi. Meikhu leh tuivot helin a lawmpa ong gal-et hi. A lawmpa in suanglak ah a innkhuam nangawn phutkhinzo nailo hi. Tua leh, bang ong ci hiam cihleh he..he.hei..Noah in zong Tembaw khat kum 120 val shikhop hiven tua mah a bangding naive maw ong ci lehleh hi. Lawmpa zong hanciam takin ong semsemin a tawpna ah a inn lam

ong zo ngawngaw hi.

 

Tuuk ong tung guah ong zu hawktui ong khangin sehnel tunga inn kilam a sehnel tawh bangtawh ong taaihi. Suangtung leh suanglak a kilam inn bangmah ong cilo hi. A foundation khauhlua ahih manin hawktui in bangmah cihzolo nahi hi. Innkhuambul phuhna tua suangpi in Zeisu ahih man nahi hi.  Sehnel tungah inn kilamthei veve ong kicih hangin up hetloh ding, taksan hetloh ding Zeisu in ong vaikhak khol hi.

 

Olive mualtung a Olive singkungnuai ah huih siangtho diikin Topa Zeisu na tu hit-hiat hi. Nungzuiteng zong Topa kiangah hong pai uh a, thu dotna ong nei uh hi. Topa aw, "Hih thute cik ciangin hong piangding a, nang na hong paiding hun leh hun beina ding bang lim hong om ding ahi hiam, hong gen in," a ci uh hi. Matthew 24:3. 'Hun' leh 'Lim'.

 

Topa Zeisu in nungzuite' dotna ong bangci dawn hiam? Aneu 4. "Mite' khemsa in na tatlohna dingun na kidawm un" ci-in ong dawnggiap mawk hi. Nungzuite' dotna leh Topa Zeisu' dawnna kituak nasa uh hiam? Bangdingin Topa in hih bang

in dawng sukgiap mawk hiding hiam? Atomin dawnsakpak pongleng "Kei' kong paikik hunding bel Pa Pasian Calender suaih hi in kuama theihpih hikei, hun beima a piangding lim leh nalamdangte bel ong genkholning in limtakin kidawm un," na zak khempeuh uh um pahpahkei un, na muh khempeuh uh sang pahpahkei un, Khazih kineihkhemte leh kamsang kineihkhemte

ong piang ding a, mi tampitak umkhial sakin, ahihzawh leh a teelsa mite nangawn a khemna dingun lim leh na lamdang lian pipi hong bawl ding uh hi, tua ahih manin kidawm un, mite khemsa in takei un, Thuman thu kiptakin lenin nungta zaw un, aci nuam zaw hileh, kilawm ka sa hi. Ciaptehding khat ah Pasian' zat upkhialhsakna/zuau thahat (strong delusion) leh

Satan' zat khemna (lie), upkhialhsakna cih namnih om hi. Mihaipa bangin koizawhiam cih khenteltheilo-in sehnel tungah ih  bukna inn ih lamkhak ding ih Topa in ong lunghimawhpih mahmah hi. Hih thu ah pilna kisam mahmah hi.

    

May 21, 2011 Harold Camping kici Christian Radio Broadcast minister pa in tu ni, Sabbath ni nitak 6 pm sharp in leitung bei

ding hi, ci-in a radio station omna California pan kisuanghetlo takin tangko khia hi. Ama pawlpimi tampitak in a neihsa teng zuakin thungenin kigingsa-in ngak demdam uh hi. Florida ah nitak 6 pm ong satta, beinuamsuai aihleh kuaman bangmah ki phawkkhalo hi. Taxas ah 6 pm ong sat leuleu, California ah 5 pm hita. Kuamah rapture nailo, amau kiangah 6 pm ding nai mahmah ta, thu ngen keei, kisiansuah keei uh hituak hi. Tua laitak Amazing Fact thugenpa Dough vapai in Harold Camping kiangah nitak 6 pm satma in na vanneih teng khempeuh ong zuakpak in, ci-in $ tengkhat tawh vakun hi ci hi. Lawmpa in zuaknuam tuanlo hihtuak hi. CA ah 6 pm ong satta, bangmah ong pianglo. Tua leh bang ong ci uh? Thu tampi om hi. Hih bang danin Leitung beiding a genkhol thopthop Christian thugensiam peuh ki om zanzan hi. A um tampi om sawnsawn.  

 

Genkholhnate theilua-tellua kisa-in ih omphiauphuau hangin den mahmah ciang ih tungah bang ong piangding cih a gen khol thei kuamah ki omlo hi. Tua ahih ciang bang?...Zeisu tawh nisimin ih nuntakkhop dending No.1 a thupi penpen hi. Ki kholhpih lawm nih ka nei-a, khat in: lawm aw, i pawlpi doctrines, theology cih bualbualte lah thei sekeng e, Singunau sang ka kah a kipan SDA biakna pen laisiangtho tawh kituak kasa penpen a, esp in a Sabbath mahmah minlawh dingin ngaihngut ngut kasak man leh thupi kasak manin SDA ana suak kahi hi. I siaten Daniel & Revelation ci-a, gengen leh lim a alahlah te zong teltuanse keng, a bang a hiam ci-in ong gen hi. Ka lungsim sungah kei zong atua bang mah hiveng e, ka kici hi.     

A khat leuleu in i pawlpi bel thangahhuai sakeng ci-in biakna dang ah ong kikhopsanin piangthak keei hi. Ahang ka theihpih kei hi. Lamka khuapi ah Gangte te khat ong vak hiauhiau hi. Thahdo tangval pawlkhat in ong manin; nang kua minam? ong dong uh hi. Kuki cih dinga lah hilo, Paihte cih ding lah hilo, Mizo hing cipong mawk hi, ci hi. Tua acih khit teh bangmah cih lo in khah uh hi, ci hi.

         

Tua ciangin ka lawm masapa kiangah lawm aw, tua Maangmuhna sung a sapi cihcihte ken zong teltuan keng, ong aki gen

gen hangin zong mangngilh pahpah ingh. Tuabang ganhing sapi cih zong a tatakin leitungah a omlam kigenngei nailo hi. A lim la bek hi-a, a gennop thu bulpi tatak the issue of worship biakna vai mah hi, ci-in, siate gen ngeiteng ka ciakpih hi. Bang siksanin SDA pawlpi tung tawnin Pasian bia ihi hiam? Bangdia Sabbath mah ci tentan ihi hiam? Tuuno tawh kibang Sapi thu ka gen dan ding thei keng. Ahi zongin Laisiangtho sung a piangkhinsa tangthu bulphuhin nengcikkhat suut ni, ka ci hi. Mangmuhna 12, 13, 14 ka suutzen uh a, ama zakngei-kei' zakngei. Laisiangtho lo, laibu dang neilo kahih manun Elijah tangthu ka lem uh hi. 

 

Elijah tung tawnin Mount Carmel a piangngeisa van pan meikuang kia mah tawh kibang hun nunung biakna man leh manlo kidona lianpi ah tua bang meikuang van pan ong kia leuleu ding hi. Ahi zongin tua mei kuang koi ah ong kia ding hiam cih leh, Kamsangpa Elijah tatzia ciing a biakna manlo kamsang kineihkhemte ii phuatkhiat biakpiakna tautung ah ong kia ding hi. Tua pen biakna manlote' na lamdang bawl miracle ong hita ding hi. John in ong hemgen khin hi.

Elijah ii experience enkik dih ni. 1 Kings 17:1 Elijah in Ahab kiangah,"A mai ah ka dinna Israel Pasian, Topa a nungta ahih mah bangin keima thu tawh loin daitui ahi a, guah ahi zongin hong tungding kumte sungah omlo ding hi," a ci hi. 

Hih laisantakah bang thu ong piangvat hiam thei khang. Aneu 2 na ah Elijah kiangah Topa' thu ong tung a, hih lai pan ki hemkhia in la, mun khat ah bu in ci-in a bukdan ding kigen hi. Enpak leng, Elijah in keima thu tawh a cih khak pen Topa a lungkimpha mello aitam cihnop huai hi. Kamsangte' zatzel kammal ahi Topa' ong thupiakna tawh cikha hileh, bang apiang tam? Ahi zongin Elijah in Topa cih mang ahih manin Ahab in munciteng a zonzon hangin a khekhap nangawn muzolo hi.

   

Tua ciangin Elijah kiangah Topa' thu hong tung a, tua luitui kang nusia in la, Gentile khua sung a meigongnu kiang manawh in pai in, ci-in asawl hi. Elijah zong Topa' sawlna bangin ding khia-in a paipah hi. Meigongnu tawh ong kituak a, phukhong vei hiding hiven ka neek ka dawn ding nong bawlsakpak theidiam, a ci hi. Kei leh ka tapa nekding huankhat bekbek neilai ve ungh in tua khitteh gilkialin a siding hitamai ve ungh e. Bangbang ahi zongin Pasian' thu na theihna tawh kizui-in kei' ading ong huansak masaphot pongpong lecin kialpi a vendongin na tasamkei ding hi. Nupinu in upna tawh zinpa' adingin ann ong huan masa hi. A huankik ding ann ong omtawntung hi. Pasian' thu a upna hangun Pasian in ann na vaakvaak hi. Tua khit ciangin a tapa ong si hi. Movie en bang hileng Part 1 ong manta hi. Part II ah Elijah in Thu ong ngen in a tapa ong hingkik hi. Tua leh nupinu in Elijah kiangah bang ong ci hiam cihleh, "Nang, Pasian' mi na hihna leh Topa in nang tung tawnin thu a gen takpi ahihna tu-in ka thei hi," a ci hi. Hih thupiang khempeuh ih et ciangin Pasian' thu, Pasian' deihna, Pasian' tawsawn vive banga ong piang cih i mu thei hi. Nupinu' ading ngaihsutsak pongleng "Lamdang mah ei! lawmlawm, a si ding himah hi veng. Pasian! Pasian! Pasian! cilo-in a om diam?

 

Elijah tungah Topa' thu ong tung leuleu a, "Ahab kiangah pai in la, va kilak in" ci-in a sawl hi. Topa! a bangci na hiam? 

Ahab in ong dopbawllo ding hi. Ong thatnuam a ong sih zonzn hilo maw? Topa in nang tawh kong omkhawm ding hi, ci hi. Ahab tawh va kimaituah hi. Topa' thu tawh bu zel, kimaituah zel hi. Guah tui kiat ding khawng kikumkum zen ding uh hi.

 

Ahab in Elijah a muh ciangin, "Israel mite a lungkhamsakpa, nang na hi hiam?" a ci hi. Pasian' thu-Pasian' kammalte bangin ih ziuh-ih gamtat tak ciangin zuau thuzui leitungmite in mi lungkhamsak, thu tangpek ong kicihding mah na himawk hi. Elijah in "kei hikeng". Nang leh na pa' innkuanpihte hizaw uh teh na cikik setset hi. Tua ciangin Topa' thu ong lut a, Carmel Mualtung ah Boxing heavyweight championship kitupna pawi bawlding ong kigeelta hi.  Baal vs Yahweh.  

 

Baal kamsang 450, amau thangahna dandanun biakpiakna ong kipan uh hi. Biakna tau maiah diangin kikhukin, awng zelzul ngen uh hi. A ki dawt manman kidawtin, a ki at manman tem tawh siluan dong ki atin human sacrifice sun thapai thungenin kikoko uh hi. A tawpkhakna ah a pasian biak uh ahi the god of storm and lightning in khua phasakin guah zulo, keek hang in biakna tau tunga bawng ki em ding ong kanglo mawk hi. Bil in khuaza lo, khut in hih theih neilo himawk hi.

 

Elijah in biakna tau ong bawl hi. 1 Kings 18:36 Biakpiak hun ciangin, comma phot dih ni. Biakpiak hun, bang hun hiding? Kua hun seh hiding hiam? Hih biakpiak hun pen Pasian in Moses tung tawna a sehsak nitak biakpiak hun ahi hi. Elijah in tua hun lian mah teelin suangtum 12 la a, biakna tau Pasian' thupiakna tawh ong lam hi. Tua khit ciangin kiko kul selo, dian lua

lua zong kulselo, kikhuuk keei, kibalkeei cih zong kulselo, simple takin Pasian' kiangah thu ong ngen hi. Elijah ii biak Pasian in zong tha ngahkeei a, huhu-haha ci-a thunget ding zong na lunggulh tuanlo hi. Banghanghiam? Pasian in ong itlua khin a hih man hi. Tua ciangin Topa' meikuang hong kia-in, meihal biakna a kizang bek hilo, a kim a leivui, hawklam sunga om tui nangawn kangcip zawzen hi. Pasian' thu tawh ahihna khempeuh na lamdang ong suak hi. Pasian' thu banga agamtat manin na lamdang meikuang ong kia hi. Meikuang fire kiatding a ut manin Elijah in Pasian' thu a zui, abia hi peuhmah lo hi.  

 

Pentecost ni (Jews mite' khuado ni) a na lamdang Khasiangtho kibuak zong tua bangmah ahi hi. Peter in Babel tausang ki lamma a 'language' pau kizang ong pautheisak in ci-a na lamdang a ngen hi zenzenlo hi. Peter in tua khuado ni-in, Pasian' thu um vive a hih manun Joel 2 sunga genkholhna teng genkik a, teci apang kikkik bek ahi hi. Pasian in a pai mi khempeuh

ii telkimding deih ahih manin pau kitelkim ding pau namkhat a napiasuk pak ahi hi. Mi leh na lamdang pen mite in Pasian' thu a uptheihna ding teci pang dinga Pasian' piansak, Pasian' bawl ahi hi. Peter in na lamdang pianding lamen a Pasian' thu a gen hilo hi. Pasian' thu bulphuhin thu ong gen, teci ong pan manin Pasian' kiang pan na lamdang ong piang ahi hi.

 

Satan in ni tawpni hun ciangin leitung mi khempeuh khemna dingin hih na lamdangte hong lehzat ding hi, cih Mangmupa John in ong hemgen kholkhin hi. Fire 'meikuang" tawh kisai khemna ong limgen simsim hi.

Gulpi in tua ganhing tungah ama aana pia ahih manin mite in tua gulpi a bia uh hi. Aana tawh abiasak hi, hilai ei. Hun nununglam ciangin Biakna tawh kisai kidona lianpi omding hi. Bang bia a, kua bia ihi hiam? Bang thu bulphuh a bia i hiam?

Bang hangin tuuno tawh kibang ganhing kibia hiam? Namsau tawh a si ding zahin a kisat liamsa hinapi a liamma ong damkik manin miten lamdangsa-in a bia uh hizen hi. Nalamdang tampi bawl a, mi khempeuhte' muhin van panin leitungah meikuang nangawn kiasak thei hi. Tua bang na lamdang a bawl manin mite in a bia uh ahi hi. Na lamdang bawl bulphuhin biakna ong nei uh a, miten umin zui lungluung uh hi. Na lamdang cih pen muhtheih (a kimu thei) ahi hi. No.1

 

Neulai a kipan Spirit of prophecy ci-in, sunday law ong tun ciangin aana tawh sunday ong kitang sakding, gimna namkim, bawlsiatna namkim tawh ong kibawlsia ding, gamlak ah bu ding cih bang danin uang genin ki lauthawngsak gawp ngei hi hang. Tulian laitak US ah death sentence ong kipiading hileh thuakhak lua in umkei mai ingh. Gamlak ah buk ding ciang khawng hilel ngel ahih leh, Elijah bang samlo ding i hi maw ka ci hi. Banghanghiam cih leh tuate sanga thuakhakzaw ding a nasia zawding khat om hi. Tua in banghiam cih leh "Satan' khemna" deception ahi hi. Hih khemna umin zui kha vanglak leng koi ah bu ding? Ei leh ei ih kizon kulding hiven. Tuaman mahin Topa Zeisu in kuama khemsa-in ta kei un ong ci hi.

   

Fire tawh kisai kidemkikna ah; Hun nunung ciangin Elijah bang mi a om diam? Yes! The Remnant ten Elijah' thupuak mah a  tangkoko ihi hi. Baal biakna a om diam? Amin a kibatlianloh hangin kinaih mahmah inteh. Van pan meikuangkia ong omkik diam? Meikuang ong kiat ciangin Elijah biakna tautung ong kia nawnlo ding hi. Pasian' kiang pan zong hinawnlo ding a, van pan ong kia meikuang ong hiding hi. Pasian' meikuang mah tawh ong kilamdanglo ding hi. Mei kuang taktak a hidiam? Hithei/hilothei. A thu bulpi pen 'a khauhpai mahmah khemna' ii lim hi a, remnant te' biakna khial hi,  Remnant te' lam ah Pasian panglo hi, remnant te Satan' khemna thuak te hi, remnant te' biakna ah leitung vantung ki-itna zong om beekkei, en mah un, om hileh, Khasiangtho letsong na lamdang bawlna khat beek neiding uh hi, neilo uh hi, cih tetti lahna dingin tua na lamdangte amau' biaknatau tungah ong kia ding hi. Akiatsak theihna dingun zong Pasian in khaamlo dallo mawk hi. Akhuan azii pia hi. Tua pen Pasian in Atelsa mite a ze-etna hi. Remnant te' biakna sangin Aanaa tawh akibia sak pawlpi' biakna a man zawding tawh ong kibang ding hi. Misiangtho te' lungduai ding thuakzawh ding ong kisam mahmah hi.

 

Nidangin 'seeing is believing' i ci-a, hun nunung ciangin ong kilehbulh ding a, 'khemna lianpi' kawlte' pau leh a tuh, a sit ahilo, Zeisu tuh, Paul tuh na mu ding hi. 2 Thessalonians 2:3. Paul in zong 'kuama khemsa-in ta kei un' ong ci hi. Ih mittang tegel suanglua kei ni. Upkhialhna dingin na lamdang tampi i mulai ding hi.  Topa Zeisu leh Paul tanghial ii warning ong piakngiat ahih manin ka'ng ngaihsut kei ni. Topa in Moses kiangah 'note' lakah kamsang ong piang in lim leh na lamdang ong lak thei-in amau te' nung zui-in, adang pasiante va bia ni' ong cih leh tua kamsangpa' thu na ngai kei ding uh hi. Topa na Pasian mah uh na lungsim khempeuh uh leh na nuntakna khempeuh uh tawh na it zaw un, na ci hi.  Tua hi-in khemna cih zong midangte' ong khemna pen phadawm lai. Ih ki-itpih ih lawm ih gualte' khemna pen thuakhak phadeuhin thangpaihhuai phadiak hi. Hun nunung a ong piang ding lim leh na lamdang a cih phatdiak pen false christ and false prophet te hi.   Ei' tha suangin um keining, zui keining, cilanlan kha peuhmah keini. Khem dingin ong kipan vanglakleh, hmm... Pasian' kiang teekteek a om vantung mite phawk huai hi. Pasian' khutme lian tawh kibawl mawhna nei ngiatlo Eden taihthuat Adam leh Eve phawk ni. Biakna man ih zonsawm leh, lungsim takpi, pilna leh thahatna tawh zon ding hi. Tua lo a, mit, bil, naak, kam, khut le khe khawng tawh ih zon leh pawlpi manlo ih mu pelmawh ding hi.  

 

Topa Zeisu in thunget danding ong hilh ngei hiam? He. Ze-etna ong thuaksak kei in.

Ahih zawhleh bang? A teelsa mite nangawn...uh hi. Hih bangteng atomno in ih et pak ciangin false movement te tatzia, biak zia te miracles, miracles, miracles bebek bulphuh phadiak uh i mu hi. Pawlpi man tawh a kalsuante' kiangah miracle omlo ding cihna hilo hi. A omkeiphial mahlehzong Laisiangtho Pasian' kammal tungah kiptakin kinga a ih kalsuan ding thupi hi. A manzaw ding bangkeekin tetti evidence, na lamdang sign, tua pawlpi ah i muphial zongin ih upna ih khahsuahloh ding, the just shall live by faith alone not by bread. Tua hileh Topa in a tawpdong a thuakzo misiangthote ong ci ding hi. Pasian' theih i hih ding a kisampha pen hi. En, Zeisu ih theih hangin Zeisu in annne kimlai ong theingei keng ong ci leh, bang? 

 

Tua in neulai-a ka la saksak 'mipilpa in suangpitung innlam' cih ong phawksak hi. Sehnel tungah innlam ih omleh suangpi ih tuahkhak dong thuk tawhbeh ni.

zoplaiding..........

laibu a ong kibawl ding ngaklahna tawh malep pak,