Pupate Cidamnalam Pilna (v)

Lungsimpumpi kilamtohna ding kimawlna
Ih Pu ih Pate hunlai-in leitung minampite neih ngeina khempeuh neikim uh hi. Tua ngeinate lakah Cidamnalam ahi thatang kimawlna cingtakin om hi. Khua khatleh khat lawhdan kilamdang taleh ineih khempeuh kibang hi. Khangdawngte in tua kimawlnate, naupang nihleh thum kikholhna-mun, mipi omkhawlna-mun khempeuhah zang uh hi.
Taangmite pen eizahin anneek tuidawn namkim lo ahih hangin cidamin khansau mahmah uh hi. Cidamna-lam pilna zong saumuh mahmah uh a, ei alaklawhte in amau khekhap kizuizo lo hi. Azatdan khempeuh pumpi ki-uksiamna nei uh hi. A kisamzah sang-a tamzaw zang lo hi.
Kimawlhun tamlualeh nuntak kikhualna sumzonna hun leh nasep silbawlhun palausak beklo-in thatang kisiatna suak zaw thei hi. A neek ciangin, ahoihbek ne in dawn uh a, kimawlleh zong ciangtanin mawl uh hi. Na khempeuhah akhengval leh a kisamlua om tawntung hi. A ' lua ' khempeuh in phattuamna piangsak lo hi. Munkhempeuhah ahoihbek zatsiamna pen kikhualnalam pilna ahi hi.


Pumpi pen a tawntungin gamtang ding-a kibawl hi. Ei kisekna tungtawnin pumpi cidamna leh haatna kilamto ding hi-a, gamtatna tam seemseem leh cidamin thakhauh tektek hi. Nasep hanciam aa si ki-omlo hi. Anngawl aa si ki-om bek hi. Thadahte hehpih ding hilo hi. Thasalna neih tawntung ding kisam hi. Lam napai ciangin naikhat tai-3 sangin tawmzaw lo ding hi. Nitumna gam mite in, lampai zekai lualeh,Asia lampai ken, kici uh hi. Tawlngakhun simloh thagui thatang sal ding kisam hi.


Zomite neih kimawlna
Khanghamlam kimawlna Naupanglam deuh zat kimawlna
1. Khau kisut 1. Lingkineih (lingkhuk)
2. Kanteh 2. Cikpimeikai
3. Muitum(Thau tawh muitum) 3. Kibuanna (uikhun,zutanglai, ect)
4. Seningmaw. 4. Maimitsin(mialzawt)
5. Peuuliip(tungtupeuliip) 5. Singlaam
6. Guatah ( Guatah laam guakan) 6. Bukteh
7. Doldep 7. Seng
8. Luai 8. Tengta
9. Suanglotteh 9. Suangsai (suangthai)
10. Thalkap 10. Tai kidem
11. Tawn aa tek 11. Siallei gatang
12. Sapi(Sapi-umtuah) 12. Ciangsaat
13. Ciangsawn 13. Gatangkap
14. Mine-tane 14. Siksiliplip
15. Khaukan 15. Sial kisi

Tuhun bangin kimawlna ding muntuam omlo hi. Omkhopnamun naupang kicina khempeuh ah kizang hi. Anneek khit leh luphunma hun awng teng kimawlna in kinei pen hi. Naupangnote ahihleh innkuanpihte lokuan sungin innngak vengnaupangteng kikhawmin kimawl thei uh hi. Luphun a cin ciangin Aiba kila a utlo pimahin kikhen uh hi. Mangpha kipaih kawmin innciat uh zuan uh hi.


Zongsatna hoihlo ngeina
Minamdang neihloh Zomite bek neih khat pen Tuibuuk ahi hi. Hih tuibuuk pen koipan ngahkhia uh hiam kathei kei hi. Khangluite in thupiseh mahmah mawk uh hi. Zomi-Chin minam khempeuh in nei uh hi. Tuibuuk teep khempeuh gamkhat sungah omleng Zomi namkim pen kha ding hi.


Zomi ih Pu ih Pate leengla muakna hi. Tangval leengcilte tuibuuktheei kiguan hi. Nungak tangvalte tuibuuk kipia-in thupatna in zang uh hi. Tenpih dingzah aa kingai ahihleh numeite in alawmpa tuibuuk guanpah hi. Mothak teekvakte in ihmutloh sungteng buukteep uh hi. Anneekhun kaal lobuang nasepkawm mahin tawlnga lo-in a mukleh buuk kithuah tawntung hi. Teekvak zolote a pasal tawh tul lo uh hi. Mothakte aadingin tuibuuk pen teekte lungdamsakna ding-a poimawh khatna hikha ding hi. Khanglui lai-in nupa kikhenna piangsak mun pen hi. Tuhun khuamu zawdeuhte in tuibuukhaite zahaite zi dingin kideihlua nawnlo hi.
Zomi zat vante lakah paihding om cileh tuibuuk paihmasak huai hi. Zatep mah bang ahi hi. Tuibuuk, zanah, kanza, bingnam khempeuh in hoihna hong pia lo hi. Bing leh kanzate pen ganhing zatui leh bukkhuh-za in kizang hi. Gilsan zatui hoih mahmah ahi hi. Zatuilam mipilte lamlahna bangin kizang keileh mihing suksiatna galhiam hoih pen ahi hi. Gam khat leh khat kisuksiatna ding-a kizang khangnote manthanna galhiam hoih mahmah khat ahi hi.
Pumpi thatang haatna dingin kimawlna ih hanciam mah bangin hong susia khamtheih zatui khempeuh kidophuai hi.


Sa sangin gahleh-teh hoihzaw
Khamtung aa kine ankhempeuh ankung panin kilotawm, leisung panin tawhleh huanin kine ahih ciangin neeksunsun limci-in cidamhuai mahmah hi.Maiteh, ankamteh leh beteh ih neek ciangin hingsitsetin akungtungpan lawhleh beelsung kitun a, anthak kine hi. US leh akhangto gam khempeuh in sabung, singgahbung, antehbung leh kha-2 kha-3 kikoihsa ante vive kine hi. Anlim namkim aneekzawh tei hangin natna hoihlo tampi zong ngah uh hi.
Ei nuntakpih anneekte pen, Vaimim, taang, buh, anpi-in kinei hi. Anpawmin aalu, baal, hakai, kawlkai, mai, be cihbang bek ahi hi. Sathaunel ngahna ineihsunte pen maitang-si, sising, sipi cihkhawng bek ahihi. Vaimim leh gatamtui, vaimim leh be leh anteh kihuan a, tua pen buh omlohna mun-a anpi aa kine ahi hi. Buh neekna munaa teeng singtaanggamah, buh huanin anteh them leh ci bekmah kimeh hi. Mai, aalu, be kawlkai, baal, hakai cihte pen abekin saatkham a, ahulin kihuan hi. Americangam mimasate zong nidangin ei neekmah bang ahi hi. Tuhun aa mite sangin nakpi-in cidam zaw uh hi. Khanglui mite sialkan kidem uh hi. Sialtal golpen kanzo uh hi. Song Theu akhanlai-in Kawl panin Kapteel khua nitun hi,ci-in kigen hi. Sun-an din taangzuha thawlkhat bek pua hi. Thagui thatang lamsang pen mite kibanlah tuanlo hi.


Mizawnggamah mehteh-mehgah bek kinezo a, sanete ki-eng mahmah hi. Ahih hangin saneek tamlua pen hoihlo hi. Cidamnalam Science mipilte in Vegeterian thupisak mahmah hi. Tuhun saneekdan pen Sodom leh Gomurah tawh kibang hi, ci-in Billy Graham in gen ngei hi. Satam neekloh pen zawnna ahih hangin hamphatna namkhat ahi hi. Mehteh mehgah hoihtak naneekzawh aaleh sa pen anhoih pen hilo hi. Ahoihna khempeuh natna lungno in zui tawntung hi.


Sianthona-lam polhteh
Zogam pen mualtung ahihmanin khuahun siangtho hi. Huihsiangtho zong leilohin nuamtakin kingah hi. Ahizongin Japan galma leh tuhun khuata nuntak pen sianthona-lam sangsia mahmah hi. Sangsia cihpen zawngkhal cihna hi. Tua pen theihlohman leh neihlohman zong hilel hi. Theihlohman leh neihlohman aa kingah zawngkhalna pen kizongsangin kipaikhia zolo hi.


Chin pouh hong kicih ciangin kuamahpeuh in zadah hi. Khangluite kipumsil ngei zenlo uh hi. Tuhun mualtung aateeng khangthakte zong nipikaalkhat khatvei manman kipumsil tawm mahmahlai kha ding hi. Khuadamna mun panin zanggam khualumna atun ciang cigikuahin uih mahmah hi. Tuazah hinapi pawlkhatte kisilnuamlo laimawk hi. Tua zah aa ninte pen Pawite leh Paihte minpua Tedim mi kihidiak hi. Mizogam sanggamte pen sianthona-lam ei sangin madawk zaw uh hi. Tuitawmna mun aate siantho zawlai se hi. Sianthona pen tuitam hang hituanlo hi. Puansianel khat tawh pumpi kinawtsiang thei hi. Ut ding bek kisam hi.
Nidangin sing kisui Zo-kuangpi tawh an kithuk hi. Innkuanin kuangkhat kisawkkhawm hi. Ankuang ankeu sawpin ui zang thei uh hi. Nauneute an kimuam hi. Zubeel khat sungah peeng kiphut a, cidamtawh damlo tawh kikhelin dawnkhawm ngengek uh hi. Zatep tawnkhat pen mi nihleh thum kihawm hi. Tuibuukthei nei khempeuh in a mai-a-suak mi amuh khempeuh muam sak hi.


Puansilh-nikten kineithuah cih omlo ahih ciangin kisawp ngeilo hi. A puantungdimin khah om hi. A lutungah hiktui pakziazua hi. Hik ki-etsak a, amuh ciangin a haatawh cipkhamin nuamsa mahmah uh hi. Singtaang gamah eekbuuk kituamneih lo hi. Mi kimuhlohna khempeuh eekbuuk hilel hi. Singbullian leh sawlbawk liahna khempeuh eekthakna ahi hi.
Ei simgamlamte in gan kikhahzaulo ahih ciangin, innnuai-ah vok kikhawi hi. Innsungpi baallei kiu-ah sual suvangin eek-awng kici hi. Tua nuai-ah suangpeek sahbiubeu khat kiphah hi. Tua suangpeek tungtu khempeuh vok aa hipah lel hi. Zingsang-tung kheging a zak uh ciangin vok omzahzah suangpeek kiimah kigualin umcih dimdiam uh hi. Akia masasa kituhin ciaknianua uh hi.

Tua eekbawk thote tawh ankuang ki-uumkhawm hi. Innsung huihnung siangtho lo hi. Zomite damlohpih natnate pen siantholohna pan leh zawnna pan aa kingah vitamin kisam hipipen hi. Naupang hutvei, gilsan, gilpuak natna tawh si tam hi.


Ei Kawlgam-Zogam cidamnalam naseem Physician leh nurses, midwife naseemte innsung nuntakzia imuh ciangin, gamdang mite tawh kisangkhaih mahmah hi. Natna khat a omleh bang zatui tawh damthei cihciang khawngbek thei uh hi. Hih natnate apianlohna dingleh natna lungno a kilawhloh nangin bangci kidal ding cih, ngaihsun banlo hi. Vanzat kuang leh keu, silh leh ten sianthona, pumpi-sianthona, innsung innpua sianthona anneek tuidawn sianthona gammite makaih dingte pen nautaang tualmite tawh kilamdanna neilo mawk uh hi. Mipilte in " Prevention is better than cure" naci uh hi. Cina khoi sangin, analo ding-a kidalkholhna hoihzaw ci uh hi.

Khamtung Zomite lakah naupang site pen hutvei, gilsan tampen hi. Hih natnate pen siantho lohna pan a kilawh ahi hi.


Duhna bektawh neken, cidamna dingin ne in.
* Sa tamlua ne kei in.
* Mehteh mehgah atamzaw ne in.Tehhing or antehsial in sisanthak piangsak hi.
* Hunman takin ne inla, nai-4 sangin kinaizaw sak kei in.
* Athau tamlua ne kei in. Teh ngiatin sathau zang in.
* Akhum tamlua ne kei in.
* A al khengval ne kei in.
* Tuivot leh an meh kei in. Asawt ciangin gilpi angawi susia ding hi.
* Nisimin tui hai-4 sang aa tawmzaw dawn kei in.
* Sianthona in cidamna leh khansauna bulpi ahi hi.


Cidamnalam picin ding hanciam ciangin kimawlna namkim bek thamlo-in, neek leh dawn lamsang zatsiamna zong poimawh mahmah hi. Anezo luate thau khengval uh hi. Zunkhum, sikhang, gilpi cancer, cihte pen neek khengvallua panin kipan tamzaw hi. Mihaugamah mithaute pen pumpi ki-uk zolo ci-in neu-et uh hi. Leitung makaihoih a teel uh ciangin pumpi ki-uksiam a, neek leh dawn kikhalhzote abualthau meimai lote kimuang diak hi. Pumpi kikhalhzolote pen mibanglo-in kingaihsun hi.


Hun leh thatang zeeksiamte in agah ahi hauhna leh nuntak nuam ngah ding uh hi. Anhoih tensiamna leh anneek hunmanna in cidamna leh khansauna hong pia ding hi. Thatang haatna leh cidamna dingin kimawlna namkim kisam hi. Anhoih anpha tensiam ding kisam hi. Ahoihbek tawikhai a zatsiam ding kisam hi. Neekhunman tak aa neekding kisam hi. Lungsimnopna ahi Khalamnuntak khamuanna (peace) zong kisam hi.


Cidam leh cidamlo tawitehna
Mipil mihaugam nitumnalam gamte-ah thaulua-natna kikihta mahmah hi. Sa, sathau, beer, zu, soda leh akhumlua neekloh ding, ci-in nakpi-in kham uh hi. Biakna lam missionary te in mihaugam aa kihanthotna zangin mizawngte thuhilh thei uh hi. Ei kiangah vitamin kisamte ngahna ding lampi hilhding hizaw hi. Zatep-tuibuuk lei sangin anlam behlap zawkding kisam hi. Zatuman tawh sumbeiteng pen anhoih neekna hileh pumpi cidamin zatui kisam khollo kha ding hi. Ankhamluatna mun-aate leh kialluatna mun-aate pattahdan kibang theilo ding hi.


Hih anuai aate pen The Dietary Guidelines Advisory Committee, A Joint Effort of The US Department of Agriculture and US Department of Health and Human Services pan a kibawl ahi hi.
Height Weight Weight
Ages 19-34 Ages 35 +
4' 8" 83 - 110 95 - 120
4' 9" 87 - 115 98 - 124
4' 10" 90 - 119 102- 129
4' 11" 94 - 124 105- 133
5' 97 - 128 108- 138
5' 1" 101 - 132 111- 143
5' 2" 104 - 137 115- 148
5' 3" 107 - 141 119- 152
5' 4" 111 - 146 122- 157
5' 5" 114 - 150 126- 162
5' 6" 118 - 155 130- 167
5' 7" 121 - 160 133- 172
5' 8" 125 - 164 138- 178
5' 9" 129 - 169 142- 183
6' 140 - 184 155- 199
6' 1" 144 - 189 159- 205
6' 2" 148 - 195 164 210
Micidamte atunsanna leh agihna kikokim a, a tungaa bangin kiteh thei hi. Avalleh kidop ding a kiamzawkleh hanciam tohtoh ding ahi hi. Limtah ci-in duhzahzah neek muaimuai pen micingtakte ngeina hilo hi. Pau in, Ankham luatna in mawhna hi, ci hi.

Pumpi aading kisam Vitamin
Pumpi tungaa kisam Vitamin leitawm sangin anneek tungpanin ngah leeng hoihzaw hi. Leitawm aa nezote in ahoih tensiam ding kisam hi.

Vit-A
Mittang thahaatsak, mit cidamsak ante pen antehhing lamsang leh singgahmin, singgahpuam, asan, ahing, aeng gahtuamtuamte leh carrot panin tam kingah hi. Vit-A tawmleh mittang thanem a, mitmang a, natna tuamtuam piangsak hi.

Vit-D
Vitamin D in guh leh taang khauhsak a, cidamsak hi. Nitaang kisam hi. Bawngnawi tungpan tampi kingah hi. Ngasa leh sasinte tung panin kingah hi. Vit-D tawm leh guh leh taang thanem hi. Khanciipin mihing gollo hi. Innsung aa naseemte in nitaang ngahna dingin hunlaak zel kisam hi. Tua lo-in mihingte kidol hi, taaksuah zolo hi.

Vit-E
Vun cidamin meelhoihsak hi. Mehteh mehgah pan-a kila sathau tungpan kingah hi. Khaitak leh gahleh teh tuamtuam panin kingah hi. Aaktuicik panin kingah hi. Vit-E tawmleh simaltawm a, mihingte thakiam hi. Thaneilo hi.

Vit-K
Vit-K in simalthak piangsak hi. Antehhing sialneekna panin tampi kingah hi. Sasin tung pan kingah hi. Simalthak tawmh ahih ciangin mihing cidamin khansau hi. Anteh sialneek hanthawn un.

Vit-C
Natna lungno tampi dal hi. Meima dambaih sak hi. Singgah namkim pan, aalu tung leh singtehhing tungpan kitamngah mahmah hi. Vit-C tawmleh hani-ah sisan luang thei hi. Haa kiplo hi. Mehteh-mehgah anteh kicinglo natna ahi SCURVY natna kingah hi.

Vit-B1
Gilpi an-gawi thahaatsak hi. Lungtang nasep hoihsak hi. Voksa, tang ahi umtang, maitang, singgah-tang leh sasin leh mainam tuamtuam panin kingah hi. Vit-B1 tawmlualeh Beri beri natna kici laulawng-dipkuabaih, lungtang kisat, gilpi an-gawi thanem natna kingah hi.

Vit-B2
Pumpi thapia ahi Protein kingah hi. Sasin, bawngnawi, cheese, aktui, pateh, tehhing, ankampaak hingte (Brocoli) leh silngodaat panin kingah thei hi. Tuate lo-in thadim cih omlo hi. Vit-B2 tawmleh kampak, leina in ankam lim lo hi. Mihing thazawm hi.

Vit B6
Gilpi kilumlet, gilsung kitok damlohnate dalna ahi hi. Sasin, sanam, singmin, antehhing tuamtuam leh brocoli kici ankampak-hing panin kingah thei hi. Vit-B6 omkeileh luaksuak, gilpi kilumlet, gilpi thanem natna piangsak hi.

Vit-B12
Thazawngkhalte dimsak hi. Ganhing pan-a kingah sa, nawi, leh aaktui pan kingah hi. Vit-B12 omkeileh mihing zawngkhalin thabei-in kisi thei hi.
Mihingte aadingin singgah singmin, khaigah leh taknei an tuamtuam, singgahtang, siagah, almon tang tuamtuam leh mehteh-mehgah namkim , tehhing sialneek namkim, sa, sasin, ngasa neekding kisam hi. Sanelote in be tampi neek kul hi. Be hoihtak naneekzawh leh sadaat kisam nawnlo hi.
Zomite pilding kipan ihihtei hangin cidamna dingin annek kisiam nailo hi.


Pumpi leh Tui
Ei Zogamah tui kilei nailo hi. Leitung muntuamtuamah a kilei hangin nadangte sangin mantawm zaw hi. Zingsang thawhcil a tuidawntawh natna siahuai tampi kihemkhia zo hi. Tulai cidamna lam Scientist mipilte in tui-tampi dawn ding nasiatakin hanthawn hi. Pumpi pen 3/$ tui ahi hi. Tui kangcipleh 1/4 bek pha ding hi. Pumpi tungah tui tampi kisam hi. Tui hangin natna tampi dam hi.


Japan Zatolam mipilte muhkhiatna-ah Lutang na, pumpi tawlin thakham natna, lungtangtawh kizom natna, guh leh taang thagui na, lungtang kisat natna, thau natna, huih-thaguibawk natna, haihut natna, TB natna, gilpi natna, gilsan leh gilsunglam natna, zunkhum natna, naubu natna, cancer natna, mitna, naksung natna, gong-tawl natna tuamtuam khempeuh tuidawnna in damsak hi.
Bang hunin dawn ding
* Zingsang hanawtma-in hai-4 dawn in.
* Hanawt kamkhuah namanzawh minutes-45 mateng bangmah ne kei in.
* Minutes-45 khit ciangin ngeina bangin ne in.
* Zing-an ahi a, nitak-an ahizongin naneek khit ciangin minute-15 ma-in tui ahi a, andang khat ahizongin ne ken.
* Khangham cinate in thakhatin hai-4 ne zolo ding hi. Tawmtawmin kipanin hai-4 a neekzawh dongin kisin ding hi.
* Hih ngeina nazuihleh cinate in lungkimna mu hamtang ding hi.
Dawntanvei ding
1. Sikhangnatna (Highblood pressure neite) ni-30
2. Gilpi natna (Gastric) ni-10
3. Zunkhum (Diabetes) ni-30
4. Sungpailo, ekkhak(Constipation) ni-10
5. Cancer (meima damhak) ni-180
6. TB ni-90
7. Arthritis guhleh taang nate in atawntungin zangsuak zo leh hoih hi.


Zatui tamneek luatna hangin ahoihlo sukkhak piang thei hi. Tui-zatui in sukkhak neilo hi. Japan minamte leh Chinese minamte in tuisa leh an meh thei uh hi. Tuivot zanglo hi. Gamkhangto nailo munte ah tuisiangtho haksa hi. Tui huanmin hamtang leeng hoih hi.
Anneek khit a, tuivaot dawn pen nuamnapi a thau lamsang khalsak hi. Angawi thanemsak pah hi. Tamveipi tua bangin zang leh gilpi natna leh natna tuamtuam piang thei hi. Cidamin thahaat inla Zomite lamto in.

"Early to bed and early to rise is Healthy, Wealthy, and Wise"
"Lumbaih inla thobaih in. Tua in Cidamna. Hauhna leh Pilna hi."
"Ankhamluatna in mawhna hi."
"Naseemlote in neekding kilawmlo hi."

Thang Siangh