Mi Thupite' Thupina Ahang Thu Sagih Om Hi
Leitung ah mi thupi, mi lawhcing i cihte in mi ngeina in ahih ngeiloh uh, mi ngeina in ahih vetloh uh ahih ngitnget uh thu tampi om a, tua lak pan nam sagih i gen ding hi.
1. Muhkholhna tawh Thuthak Vaithak gelkhol uh hi. Mukhol, gelkhol cih pen mi lawhcing leh mi thupite in ahih ngitnget uh khat ahi hi. I nuntakna pen eima a hi a, i nuntakzia ding i ut bangbangin gelkholh theihna i nei hi. Gelkholhna cih pen i gamtatzia ding, i sep ding, ihih ding, i hihloh ding, i paina ding, pailohna ding, nek ding nekloh ding cih bang khempeuh ihihma in i gel kholhna ahi hi. Gilkial ciang anne cih hilo zaw in annek hun ding gelkholh huna nekna cihna hi. Ihmut suak ciang ihmu hilo in gelkholhna hun a tun ciang ihmu ding cihna hizaw hi.
I nuntakna ah a thupi mahmah thu thum om hi - ei tunga thupiang, ei piansak, haksatna khatpeuh i tuak ciang i phutzia. Tua teng lak pan a tawpna pen thupi pen hi kici hi. Gelkholhna pen i nuntakna ah i tuak thu khatpeuh bangci mualsuah ding cih tawh kizom hi. I pelh theihloh thu om a, a piang khat peuh a hoih lama i lak theih a kul pawl om hi. Bangci saan ding, bangci puaksiam ding, bangci thuaksiam ding, dah ding maw nui ding cih khempeuh eima lungsim pan pusuak kul hi. Bang thupi i sa pen hiam cih zong i theihtel mahmah ding kisam hi. Ei hong kikhelsak thei thu tampi pen ei deihna banga i kaihsiam ding thupi hi. Thupi i sak tampi ei deihna banga i piansak theihloh om a, tua bang thute ah i hun leh sum leh thatang i beisak leh a mawknapi ahi hi.
Ahi zongin thupi isak tampi ei deihna banga i piansak theihte ei-adinga manpha in i piansak theih leh a hampha ding eimah ihi hi. A lungduai zolo, a lungkia baihte in amau khel theihloh thute ah hun leh sum beisak uh a, thupi a sak uh kiam deuhdeuh hi. Khatveivei ei hihtheih hetloh dingpi i hih teitei a, i lawhsam hi. I lawhsap ciangin 'hihkhial' ciin i kisik pong a, lah i bawlpha thei nawnkei hi. Gelkholhna nei, muhkholhna neite in bel ahih khialh uh leh zong akhialhna uh theipah, phawkpah in kibawlpha kikpah uh a, a tawpna ah lawhcing veve uh hi. Ei adinga ahoih ding i piansak theih khempeuh ah a lawhcing i hih den theihna dingin kuhkal leh hanciam taka i hih ngitnget ding ahi hi. Tua banga i hih ngitnget ciangin a lawhcing dinga lamphei tawna paipai ihi hi.
2. A piang ding theikhol uh hi. Kalsuanna khatpeuh ah kalsuanzia nam thum pha hi. Bang ngimna nei ka hiam? Bangci tun ding ka hiam? Bang pianga bang met ding ka hiam? Nasep siamna pen nasep peuhpeuh ahi ding bang liana sepkhiatna ahi hi. Makai siam i cihte in a hoih nate semkhia uh hi. A piang ding theikhol cih ciangin bangci kalsuan ding, bangci zop ding, bangci khup ding cih gelkholhna ahi hi. Tua bang gelkholhna, lampi tot ding ziksa lampi nei lecin na tupna hong tunpih ding hi. Lampi ah bangbang na tuak zongin na mualsuahna dingin na lampi bangci puahpha ding, na lampi bangci khel ding cih hong mukholsak ding hi.
I nuntakna ah ngimna i neih peuhpeuh a ciim mahmah, a thuk mahmah, a manpha mahmah ahih ding ahi hi. Thudik thuman tawh sepna, ngimna hi ding a, a tun hun ding, a sep hun ding, a sepzia ding cih khempeuh a hoihpen, a kilawmpen, a ziakai hetlo in a kisemkhia ding ahi hi. Nangma nuntakna tawh tehkak ding hilecin - na pian hun, na khangno hun, na khangham hun, na tek na huai hun, na hun nunung ding cih bangin gelkholhna na neih ding ahi hi. Banghang hiam cih leh tuate khempeuh na cidam nak leh na nuntak sung na phut khak ding thu, na pelh theihloh thute ahi hi. Na huntawp ni ciangin bangci in mite in hong thei leh na ut hiam cihte na ngaihsut kholh ding ahi hi. Na om nawnloh ciang bangci'n hong kiphawk leh na ut a?
3. A masa ding a nunung ding khentel uh hi. Mihing in sepnop kihau mahmah a ahi zongin i hun leh i nuntakna in hong cinlo ding hi. Tua manin a masa ding a nunung ding i khentel siam kul hi. Mi thupi i cihte in tuate na khentel siam mahmah uh hi. A nuntakna vuah a tup a ngim khat uh a lawhcinna dingin a nuntakna uh kham ngamin na sem takpi uh hi.
Bangci na hih uh hiam cih leh a sepnop tampi uh laidal tawh gelhsa in nei uh a, tua sung pan bang sem masa leng met pen ding hiam cih tengkhia in sem masa uh hi. Nisimna Calendar ah git khol in muhbaih dingin koih uh a, a gal pan zong et theih dingin koih uh hi. Laibuno tawh gelh in a ip sung vuah pua in a paina peuh vuah pua kawikawi uh hi. A manpha ding, a thupi dingte sem masa uh a, a sep man kei uh leh a thupilo zaw deuh, a manphalo zaw deuhte nusia zaw uh hi. Tua banga ahih den uh ciangin a nisim hunzatzia uh a hoih theithei dingin gel kholh thei uh a, a hoih sem masa le uh mi hampha suak in mite adingin a manpha suak uh hi. Khatveivei bel hun zeek hilo in mitawh kilawmtatna kikholhna te zeek kisamzaw hi.
Khatveivei tua banga eima hun in hong cin nawnloh ciangin ei seploh a mite hong seppih dinga i piakkhiat theih om hi. Tua banga mite hong huhna pen a manpha mahmah suak leuleu hi. Mimal khanna bek hilo in na lianzaw sepkhiat theihna a suak hi. Mite in hong huh theih ding ciangin nasep ding a pia bek hilo dingin a sepzia ding zong a lak thei hih ding thupi kaan hi. Mi pawlkhat in bel a sepzia ding laklo in a sepkhiat ding bek thupisak uh hi. Ngaihsutna tuamtuam om hi. 4. Mi khempeuh hamphatna ding ngaihsun uh hi. Sepna khatpeuh ah ken hamphatna ka ngah leh midangte in zong hamphatna a ngah ding cih ngaihsutna pen lungsim picing leh bulkip nei ngaihsutna pan hong pai hi. Kei met ding midang sum ding cih ngaihsutna pen mite uk nopna lungsim pan hong piang hi in, a tungnungzaw a om kei uh leh a nih tuak un a sum uh hi. Kei sum dingin midang met ding cih zong a tamzaw hoihsakna zuihluatna ahih manin hoihkhinlo hi. Midang a sup na dingin ken zong sum ngam ing cih ngaihsutna pen ahoih hetlo ngaihsutna hi. Kua met kua sum cih khual selo a mi khempeuh ading a hoihpen ding ngaihsutna mah picing pen hi.
Kizopna, kihotheihna mah a thupi pen ahih leh mi tamzaw in hoih a sak pen zuihna mah thupipen suak hi. Kizop, kihotheihna a thupilohna mun ah a zo khat om a, a lel khat om zong a sialo hi.
5. Mi hong theihsiam masak ding sangin midang i theihsiam masak ding thupizaw hi. Mi tawh i kiho ciangin mite i muhna leh a mizia ding i upmawh khat ompah hi. A taktak in i upmawh na bang khinlo a, i theihtel mateng i upmawh dan kikhelkhel hi. Tua manin mite mizia upmawh nei pahlo in amau mizia tel masak sawm hamtang ding ahi hi. A thugente uh limtak ngaihsak masak ding. A lunglutna te uh bang taktak hiam cih tel masak sawm ding. A lungdamna, a hehna cihte bang hiam thei masa hamtang ding.
Tua hileh na kituahpih mi peuhmah in hong zahtak dinga, nang hong tel mahmahte in hong thupi muh pah lian ding hi. Hong kithupi muh khit ciang pil hong kisa, siam hong kisa, siam hong kisa cihna hita hi. Nang mite thupi bawl masa, theisiam masa na hih manin nang zong hong kithupi muh, hong kithupisim cihna hi.
6. Mihing kilamdanna tuamtuamte telsiam uh hi. "Saipi amah bek in lian, mihing khat bek lianlo," cih Zomi Paunak ah om bangin mi khat bek thupisim leh mi tawmcik thupisakte pen mi khempeuh thupisakte sangin thupilo zaw hi. Cihnopna ah kibatlohna tuamtuamte kitheihsiamsak tuahna in kilemna leh kilawmtatna piangsakzaw a, kibatlohna nengcik khat nangawn thupisak luatna pen kilawmtatna leh kikholhtheihna a siasak te ahi hi. I kibatlohna tuamtuamte gawmkhawm lehang i kipumkhatna ding hizaw a, kipumkhat peuh leng hong thahatsak dingte hipah hi. Tua ahih manin ngaihsutna toi cik tawh omlo in ngaihsutna tuamtuam zong a telsiam dingin lungsim liatsak ding ahi hi. Kibatlohnate kitelsiam leng kizahtakna zong hong ompah hi.
7. Ngaihsut khialh, hihkhialh leh zong kipat kik theih hi ci uh hi. Mi thupi, mi lawhcing i cihte in a ngaihsut masak uh, a sepkhiat masak uh a lawhsap uh, a hih khialh uh leh zong a bul pan kipan kik ngam, kipan ngap tazen uh hi. A hihtuak mateng uh lungduaitak, lungkia hetlo in kipan kik ngap tazen uh hi. Tua man mah in lawhcinna leh thupina tang uh hi.
Lawhcinna leh thupina nam tuamtuam om a - pumpi, kha, lungsim leh neih leh lam ah ahi hi. Pumpi kikepzawhna, nek leh dawn kidekzawhna, cidamna ding kikepsiamna, hoihna ding leh siangthona ding kipuahzawhna, kimawl hun, tawldam hun cih bang a kilekkima hihzawhnate na nei hamtang uh hi. Kha thu ah zong amau upna leh muanna limtak kemcing dingin na hanciam uh a, a lungsim luanzia uh leh ngaihsutzia uh kiuksak uh hi. Kiniamkhiatna leh thumanna, lungduaina leh thuakzawhnate neisak hi. Lungsim hatna dingin laibu sim ding gina tak nei den in kaikhawm den uh a, laigelh in a nasepzia ding uh zong gelkhol hamtang uh hi. Mi thupi leh mi lawhcingte laigelh leh ngaihsutziate thupibawl in theihsawm hamtang uh hi. Mi tawh kizopna leh kikholhna, kilawmtatna leh kihotheihna cihte thupi bawl in lawm thak neihna ding hanciam den uh hi. Pumpi, kha, lungsim leh nek leh dawn, neih leh lam khantohna khempeuh a kilekkim in a nuntakpih theih uh ciangin mi thupi, mi lawhcing suak semsem in, mite in zahtak semsem uh hi.
Hau Za Cin
Phuitong Liim
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
No comments:
Post a Comment