28. Dawpkholh Thukhenna

                                        28.Dawpkholh Thukhenna
(479)
             KAMSANGPA Daniel in, “Ka et lai takin kumpi tokhomte a hong
kikoih hi. A nungta tawntung mi Pa khat in tua tokhomte tungah
a tu hi. A puante vuk bangin ngo a, a samte tuumul hoih tawh a ki bang
hi. A tokhom in meikuang lengpei tungah kinga-in meikuang zua-zua
a; tua sung panin meikuang gunpi a hong luangkhia hi. Ama nasem ding
mihing tul za om a, amai-ah mihing tulza sawm a ding uh hi. Thukhen
nading hun kipana laibute a kiphen hi.” ci hi. Dan. 7:9,10.

             Tua bangin kamsangpa in mangmuhna sungah mi khempeuh
amau gamtatna ciat bangin “kisit tel in leitungte thu kikhenpa mai a
nawk ding uh ni lianpi ni a mu hi.. Laphuakpa in, “Mual liante leh leitung
na bawl ma pek, a tawntunga kipan a tawntung dongin nangmah in
Pasian na hi hi,” (Late 90:2) ana cih anungta tawntungpa (Tangkumpu)
in Pa-Pasian pen a hi hi. Amah pen nuntakna nei khempuehte hong
meen’ khiatna bul ahi hi. Thukham khempeuhte naak leh thukhenna ah
thukhen dingpa a hi hi. A siangtho vantung mite ‘a tul tul a then then
in’ a na sem in teci pang ding in a kim ah a om uh hi. ‘Mihing tawh a
kibang mi khat meii tunga hong pai ka mu hi. A nungta taawntung
mipa(tangkumpu) kiangah pai in ama kiangah a ki pia hi. (480) Amah
in vangliatna, minthan’na leh kumpi za ngah ahih manin minam kimte,
minam tuamtuamte, pau nam tuamtuamte khempeuh in ama na a sem
ding uh ahi hi. Amah in a tawntungin uk dinga, akumpi gam a bei ngei
kei ding hi.’ Dan. 7:13,14. Hih mun-a agen ‘hong pai’ na in misiangthote
lading in leitungah nih vei hong paina agen ahi kei hi. Palai nasem dinga,
a zawh khit ciangin a Palai sepna hanga a luah ding ukzawhna leh
vangliatna la ding in Tangkumpu kiang ah a pai gen ahi hi. Hih hong
paina pen hilhkholhna in a gen ni 2300 beina 1844 kum-a Siangtho Bel
Mun a paina pen hi hi. Mihingte tang dinga sisan tawh mawhsutna ma
hial in, tua a sisan a bel mikhem peuh phattuamna dingin anunung bel
anasep ding ahi lemtuahna bawl ding in Siangtho Bel Mun Pasian mai
leh vangtungmi honpi mai ah a lutna ahi hi. Nopna ngah thamcing ding
kua teng om cih vantung laibupi sung pan va dawpkhol in va siangsak
ding hi. Tua ahih manin Dawpkholh thukhenna zong ahi hi.

                Lim ciing Siampite sep lai a a ki sik kik mawhneite ki pulaak in
Pasian mai ah hong pai uh a, mawh thoihna sisan hong keng uh hi. Tua
ciangin Biak-buk sung Siangtho Mun ah sisan lim ciinna tawh a mawhna
te uh a ki koih cing hi. Ki Lemna Ni kici Sian Suah ni ciangin tua a ki
koih cing mawhna teng Siangtho Bel Mun Hehpihna Tokhom mai ah
kipai pih in Kilemna bawlna tawh a ki siansuah khia a hi hi. Tua hi a,
hih siansuahna api pen kibawlna ah a ki pulaaksa Pasian mite mawhna
teng bek ki sem a hi hi. Mi gilote mawhna te thu kikhen ding pen a
tuam hi a, nung sang ciang hi ding hi. “Pasian innkuan te amasa belin
thukhenna ding hun a tung zo hi. Eite a masa-in thu hong khen leh,
Pasian’ Lungdamna Thu a zuilo mite thu a zawhna bang a hi ding hiam?
“ 1 Pet. 4:17.

              Vantung ciamtehna laibute sung ah a min uh leh a gamtatna ciat
uh ki gelh a, tua zui in khentatna ki bawl ding hi. Kamsangpa Daniel in
a genna ah, “Thukhen nading hun kipana laibute a ki phen hi.” ci hi.
Mangmupa in a tuam dang khat gen beh lai a, “Laibu te zong kiphen uh
hi. Nuntakna laibu ahi a dang laibu khat a kiphen hi. Tua asi mite in a
gamtatnate bang laibu sungah a kigelh mah bangin thukhenna a thuak
uh hi. “ Mang. 20:12.

               Nuntakna laibu ah Pasian na sem dinga hong kipia ngei min
khempeuh a om hi. Jesu in A nungzuite tungah, “vantung khua sungah
na min uh ki khum ahih manin na lungdam ta un” (481) ci hi. Lk. 10:20.
Paul in a nasep pih muanhuaite “nuntakna laibu sung ah a min uh ki
khum” ci hi. Filipi 4:3. Daniel in “a piang ngei nai lo haksatna hun”
ciang en suk suak-in Pasian mi “Pasian’ laibu sunga a min kigelh na
mite in gupna angah ding hi “ ci in pu laak hi. Mangmupa in Pasian
khuapi-a lut dingte “Tuuno ‘ nutakna laibu sunga min ki khum” teng
bek hi ding hi ci hi. Dan. 12:1; Mang. 21:27.

             “Phawkna laibu” pen Pasian mai ah ki gelh-in, tua laibu sung
ah, “Topa kihta a A min a ngaihsun mite” gamtat hoihna teng ki gelh hi.
Mal. 3:16. Amaute in upna tawh a paukhiatnate uh, itna tawh a septe
uh, vantung ah a kigelh den na na hi hi. Hi thu tawh kisai in Nehemiah
in, “Ka Pasian aw, hih thu tawh kisai in kei hong phawk in la, ka Pasian’
inn leh a nasepna dingin ka sepsa gamtat hoihte maimangsak kei in.”
(Neh. 13:14) ci hi. Pasian phawkna laibu sung ah thumaan nasepna
teng mual thei lo hi. Mawhzolna ki nolh zote, gitlohna a ki thuak zote,
migitna aw-khum luangkhia te khempeuh a om bang bangin a ki khum
hi. Kipiakna khempeuh leh Khrist hanga athuak uh dahna kahna
khempeuh ki ciamteh hi. Tua zui in Laphuakpa in, “Ka sin liin’nate
nangmah in na ciamteh khin hi; ka khituite na thawl sungah thun in!
Tuate na laibu sungah omlo a hi hiam?” ci in pulak hi. Late 56:8.

            Mawhneite mawhnate kiciamtehna bu zong a om hi. “A pha
hita leh a sia hita leh, a simtham-a ih hih simte nangawn, ih hihna
khempeuhah, Pasian in thu hong khen ding hi.” Thuhilhsia 12:14. “Ke’n
kong cihin ah, mite in mawkna thu khempeuh hangin thukhen ni ciangin
tel dotna a thuak ding uh hi. Bang hang hiam na cih uh leh, na thu genna
hangin mawhsakna tawh na kipelh ding uh hi. Na thu genna hangin
thukhenna na thuak ding uh hi.” Honpa in ci hi. Matt. 12:36,37. A
simtham ngaihsutna leh lungsim puakte a khial het lo-a a ki ciamtehna
bangin hong dawk ding hi. Pasian in khuamial sunga ki seel nate
khempeuh khuavak sal sak dinga, lungsim tawnga vaihawmna teng na
ngawn ki lang khia ding hi, 1 Kor. 4:5 ci hi. “En un, amaute dan piak
ding ka khentat khina, a maute’ thuak dingte laisungah kiciamteh khin
hi. Amau’ mawhnate ka mawk koih kei dinga, amau mawhna leh a pu a
pate’ mawhnate ka thukkik ding hi.” Isa. 65:6,7.

               Mi khempeuh gamtatna te Pasian mai ah ki sit pha kik hi. Muan
huai omna te (482) hi ta leh muan huai-om lohna te hi ta leh ki lak kik
si sek hi. Vantung laibu-a a min omna mai ciat ah a akinial theilo dingin
a kam pau khialhna te uh a ki pan a huai hamnate uh, a sep ding bang a
sep lohna te uh, a simthama a mawhna te uh, kheem bawlìn alungsim
tawnga asel thusim teng zong ki ciamteh hi. A awlmawh loh uh vantung
pan-a taaina kammalte, hun hoih leh hamphatna nei napi a thangzatnate
uh, leh huzap nei napi a lehzat nate uh a ciamteh sitset hi.

              Thukhenna ah gamtat khempeuh leh thukhem peuh kikhensat
na dingin Pasian thukham in tehna thu bulpi a hi hi. Tua ahih main
mipilpa in zong, ‘Pasian kihta un la, a thukham khempeuh zui un. Tua
in mihing hong ki piansakna thubulpi ahi hi. Bang hang hiam na cih uh
leh, apha hita leh, asia hita leh Pasian in na gamtatna khempeuh uh
thukhenna ah hong suah ding hi,” Thuhilhsia 12:13,14 ci hi. Sawltak
James in a sanggamte a lamlahna ah, “Suahtakna thukham tawh thu
hong khen ding bangin kampau in gamta un” ci hi. James 2:12.

              Thukhenna sunga “a picing “ mi khempeuh in midikte thawh
kikna ahi thawh kikna masa ah tho kik ding uh hi. Jesu in, “Leitung
luah thamcing ahi sihna pana a tho kikte in, vantung mite tawh a ki
kim-a Pasian tate a suak uh hi a, thawhkikna tate a hi uh hi” ci hi. Lk.
20:35,36. A gen kik lai na ah, “Gamtatpha a gamta mi in nuntakna
ngah dingin hong tho kik ding hi, “ ci hi. Johan 5:29. Midik misi sa te
in thamcing hi cih thukhenna a ngaah khit uh ciangin “nuntakna ngah
dingin hong tho kik” ding uh hi. Tua ahih ciangin amaute in thukhenna
mai ah a mihing-in a om kul loin a nuntakna ciamtehna te ki sit in ki
khen sak ding hi.

              Jesu in amaute sit-ni sem in Pasian mai ah deih sakna tawh ding
ding hi. “Mi khat peuh in a mawh khak leh Pa mai ah eite Palai (sit-ni)
mi dik Jesu Khrist I nei hi: 1 Johaan 2:1. “Khrist in a limciing bek a hi
khut tawh ki bawl siangtho mun ah lut hi lo a, vantung mah mah ah
Pasian mai ah eite adingin va lut a hi ta hi.” Tua ahih ciangin Amah
nungta a amaute adingin Palai sem hi cih um in Pasian kiang hong zuan
mi, Amah in a tawp dongin a hon thei hi.” Heb. 9:24; 7:25.

              Thukhenna laibute ki leem a, Jesu a um mite nuntakna te Pasian
mai ah ki sit (483) hi. Leitunga piang khia masa sa-in Palaipa in a
khang khanga kizuite sit suk suk a, a nungta laite a nu nung sak hi. Min
khempeuh ki lokhia a, tel takin ki sit suk hi. Min pawl khat ki saang a,
min pawl khat a ki nolh hi. Mawhna pawl khat ciamtehna bu ah pulaak
loh maisak loh-in na om lai-a, nuntakna laibu sung pan a min uh ki
phiat-in, agamtat hoihna omsa te Pasian ciamtehna laibu panin ki phiat
khia leu leu hi. Topa in Moses kiang ah, “Kua kua ci lo Kei tunga hong
mawhte ama min Ka laibu pan ka phiat ding hi,” ci hi. Pai. 32:33.
Kamsang Ezekiel in zong, “Midik in adikna pan ki heikhia-a mawhna a
bawl leh,… ama dikna omsa khempeuh ki phawk sak nawn lo ding hi”
na ci hi. Ezek. 18:24.

              A maan taka mawhna ki sik a Khrist sisan tawh ki siansuah ding
upna nei mite, vantung laibu sunga a min mai ah, ki maisak hi, ci in ki
gelh hi. Amaute in Khrist dikna a tang kha te hi ta a, a gamtat lai
nadingte uh Pasian thukham tawh a ki tuak ding mite hi-in amaute
mawhna te ki phiat khiat sak a, amau leh amau mah in zong tawntung
nuntakna ngah ding thamcing cihna ngah uh ahih lam a ki thei thei uh
hi. Topa in Isaiah zangh-in a genna ah, “Keimah, Kei teek teek mah, in
na palsatna te kong phiat sak a, Keima mai sak ahih manin na mawhna
te kiciamteh nawn lo ding hi” ci hi. Isa. 43:25. Jesu in, “A zo mi puan
paak ki silh sak dinga, a min nuntakna laibu pan ka la khia kei ding hi.
Ama min Ka Pa leh vantung mite mai ah ka pulaak ding hi.” Mang. 3:5.
“Tua ahih ciangin kuama peuh in mite mai-a Kei hong pulaak leh Kei
zong vantung a om Ka Pa mai ah a min ka pulaak ding hi. Ahih hangin
mite mai-a Kei hong nial peuh mah vantunga om Ka Pa mai ah ka nial
ding hi” ci hi. Matt. 10:32,33.

              Leitung zum-a thusitna lungtang sukha pen pen te in nuntakna
laibu sunga ki khum minte leitung buppi Thukhenpa mai-a sit telna tawm
tawm bang hong tel thei sak hi. (484) Sianmang Palaipa in Ama sisan
muanga suakta zote’ palsatnate mai sak ding, amaute Eden inn ah ki
koih kik ding, Amah mah tawh a “gam masa” a luah khawm nading uh
a thuum sak hi. Mikah 4:8. Pasian in mi a bawlna te a vai hawmna te
Satan in bang-mah-lo suah nuam in a hanciam hangin Khrist hangin tua
nasepna te ki taang’ tun’ ve ve in mihingte a puuk ngei lo bang hi kik
sak hi. Amah in A mite mawhna mai sak a a dik kin bawl sak ciang lel
zong hi lo lai in, a kicing kitaangsapna om loin Ama minthan’na hawm
a, Ama tokhom ah tut pih hi.

             Jesu in Ama thupha saang a mi dingte a seh seh lai takin Pasian
maitang ah Satan in nial in, amaute zong thu palsatte mah a hi uh hi,
ci ni loh hi. Mi kheem lianpa in amaute a ginalo dingin tawholh a,
Pasian a muan’na uh khah khia in A itna tawh khen khia nuam a, A
thukham palsat le uh ut in hanciam hi. Tu in amaute nuntak sung
ciamtehna laite kawk in a gamtatna uh a ginalo mun te amau te Honpa
a minsia sak thei munte, ama hansuahna tawh mawhna hong bawlna
munte uh lak a, “Hihte kei mi ding hi zaw uh hi” ci in tul sal sal keei
zen hi.

              Jesu in amaute mawhna mot nusiat hi lo a, amaute ki sik kikna
leh a upna te uh lam to in lak a, “Amaute a mi mal min uh tawh ka thei
hi. Ka khut peek tung ah ka gelh zo hi. ‘Pasian mai-a hong ki thoih I
cih pen a lungsim ki tam kham, lungtang ki sikte hi, Pasian aw, tuate
Nang na mot neu sim kei ding ka um hi,’” ci hi. Late 51:17. Ama mite
mawhsakpa kiang ah, “Topa in nang hong taai hen Satan aw; Jerusalem
a teel khia Topa in nang hong taai hen: hih in singkhuah tum baang
tetkhiat a hi hi,” ci hi. Zekhariah 3:2. Khrist in A mi muanhuaite Ama
dikna silhsak ding a, A pa mai ah “A minthang pawlpi, a kawk baang lo,
sa ton loin” a lak nuam hi. Efesa 5:27. Amaute min in nuntakna laibu
ah tuangaa, “amaute siangtho takin kei tawh ka kithuah ta ding uh hi.
Amaute thamcing hi” ci in ki gelh hi.

              Tua bangin kiciamna thak-ii khapna tang tung ta ding hi,
“Amaute mawhna ka (485) mai sak ding hi. Amaute mawhna ka phawk
nawn kei ding hi” a cihna thu a tun’na a hi hi. “Tua ni ciangin Israelte
mawhna ki sit dinga ki mulo ding hi. Judah mawhnate kizong khia
dinga ki mu lo ding hi.” Jer. 31:34; 50:20. “Tua ni ciangin Topa
meengsel ki melhoih sak dinga, ki minthang sak-in leitang in amaute
ading gah hoih pen te gah in, tuate pen Israel a suakta te a hi uh hi. Tua
ciangin Zion-a ki nusia te leh Jerusalem-a laite siangtho kici dinga,
Jerusalem-a hinglai min ki gelhte zong kihel ding hi.” Isa. 4:2,3.

             Dawpkholh thukhenna leh mawhna te siansakna nasep pen Topa
nihveina hong pai ima in a ki zo siang sa a hi ding hi. Misite thu laibu-a
kigelh bang bangin ki khensak ding hi ahih manin a thu khempeuh uh a ki
pholh khiat khit matengin leh a thukhenna a ki zawh matengin mite
mawhna phiat khiat ding hi thei nai lo hi. Ahih hangin sawltak Peter in
kitel takin a genna ah, Thu um mite mawhnate “Topa kiang pana ki thak
suaksakna hong tun’ ciangin Amah in Jesu Khrist hong sawl dinga” tua
ciangin ki phiat siang sak ta ding hi, ci hi. Sawltak 3:19, 20. Dawpkholh
thukhenna a ki zawh ciangin Khrist hong pai dinga, Ama letsong dingte
keng dinga, mi khempeuh amau gamtatna ciat bangin pia ding hi.

              Limciin nasep lai in siampilianpa in Israelte adingin siansuahna
bawl in, hong pusuah ciangin mipite thupha a pia hi. Tua mah bangin
Khrist in zong Ama Palai nasep a zawh ciangin hong kilang dinga,
“mawhna baang loin hotkhiatna” ah Amah angak mite tawntung nuntakna
thupha pia ding hi. Heb. 9:28. Tua siampi in Biak-inn pan mawhna teng
la khia in amah mah in hong pua khia a, nawhmang-keel lutungah pulaak
in a suat mah bangin, tua hun ciangin Khrist in zong mawhna khempeuh
hong tawi-in Satan, mawhna teng a phuankhiapa leh a pungsakpa, tung
ah suan ding hi. Nawhmang-keel in tua Israel te mawhna teng lu khuk-a
“mihing teen’ lohna mun” ah a ki nawh mang hi. Siampilaibu 16:22. Tua
mah bangin Satan zong ama hanthotna tawh Pasian mite in a bawl uh
mawhna te pua in kum tul khat sung leitungah kikhum cip ding hi. A
leitung pen nuntakna nei dang om loin ki hawm sak dinga, a tawpna ah
migilote ki haltumna mei sung ah tua a puak mawhna (486) teng liausumdaan
Satan in thuak ding hi. Tua bangin hotkhiat nading vaihawmna kizo
to ta ding hi. Mawhna khempeuh zong ki phiat siang -in, mawhna nusia
nuam mite ki honkhia ta ding hi.

              Thukhenna hun dinga seh khiatsa ni 2300 beina 1844 ciangin
Dawpkholh thukhenna ki pan ta a, mawhna te ki phiat phiat ta hi. Khrist
min hong puak ngei mi peuh mah phin ciil takin ki zong khia in ki sit hi.
A hinglai te leh a sisa te a vek un ki sit ding hi. “Amaute gamtatna bang
bang laibu-a kigelh te ki sit ding hi.

             Mawhna a ki sik kik lo-a a ki nusia lo te, kimai sak lo ding a,
Pasian ni lianpi ni cianga tua mawhneipa lang-a pang dingin ki koih
ding hi. Mawhna a bawl lai-in sun ni taang nuai-a a bawl, zan khuamial
hun-a a bawl zong hi thei hi; ahih hangin ei ki sik-pih ding Pa mai ah a
vek in ki lang sil sel hi. Pasian vantung mite in tua mawhnate a malmal
in tecii pang uh a, nial theih loh in laibu sung ah ciamteh uh a hi hi.
Mawhna khat pe peuh, pate, nute, zite, tate, lawmte’ theih loh ding ki
iim in, ki nial in, ki hum cip kha thei ding hi. Kua mah in theih pih loin
mawh bawl mi bek in thei a, mawh bawl ahihna ki thei lo ahih manin
nop tak a sa kha thei hi. Ahih hangin vantung-thukante mai ah tu in
hong ki luui khia ta hi. Khuamial laka a mial pen pen, simtham zo siaha
a simtham pente, a tawntung Pa mai pan in ngaihsutna neu no khat na
ngawn ki liah thei lo, ki liah zo lo hi. Pasian in thumaan lo peuh mah
ciamtehna nei a, ngaihsutna hoihte ciamteh zel hi. Amah mi hoih banga
a ki bawltawm sei sai nate peuh in kheem zo lo hi. Amah in gamtatnate
seh leh khial ngei lo hi. Mihingte lungsim sung maan lopi mah tawh ki
kheem thei lai a, Pasian in bel a zuau phuahna teng sal a, sung lam
nuntakna te sim khia hi.

               Diipkuat huai lua! Ni khat khit ni khat, kumkhua-in pai ding,
vnatung laibute in a khel no no ciamteh ni loh ta zen hi veh! Kammal
khat a ki pau khia khinsate, gamtat khat a ki ta khia khinsate, a ki la kik
zo lah hi mawk lo.

             Vantung mite in a sia a pah ciamteh ni loh uh hi. Leitunga a
vanglian pen a gualzo pen in zong ni khat bek ciamtehna na ngawn dok
kik thei nawnlo hi. I gamtat I kampauna, I thusim tawngnung pen
nangawn in zong amah tawh kituak thaman a nei den ding hi. Tuate in
I nuam nading, leh I dah nading ahi zongin I thu hong ki khen sak na ah
lang leekk sak ding hi ngiau hi. Eite in I na mang ngilh phial zongin tua
te in a diksak ding leh (487) mawh sak ding ahi zongin tecii na pang
ding uh hi.

              Lim suaih siamte in maisuah khawng a hi bang banga dawk sak
theih bangun vantung laibute sung ah a hi banglian-a ki ciamteh gamtatna
lim a om hi. Vantung mite et et tua ciamtehna te ki neu ngaihsut lua
kha hi. Muh theih leh muh mawhte ki deina daal ki hongkhia hen la, na
khempeuh mu theile’hang, I kampau khempeuh leh I gamtat khempeuh
kiciamteh niloh ahih lam thei leng, nisial a I pau khiat tampite leh I
bawl tampi te paulo, bawl loin ih nusia zaw mah mah ding I hi hi.

              Thukhenna sung ah I talen neihte I zat dan zong nasia takin ki
sit tel hi. Vantung in eite ciat a hong piak Talen I bang ci zat hiam?
Topa in a hong pai ciangin a pa-khak sumbul a meet a ngah ding hiam?
Eite in a hong kipia khutsiamna, lungpilna, khuakpilnate Topa Pasian
minthan’ nadingin I zangh hiam? Leitung mite noptuam nadingin ih
zangh hiam? Ih hun, ih laikung, ih aw, ih sum, ih huzaapnate ih
bangci zat hiam? Mi zawngte, mi thuaksiate, tagahte, meigongte
tungtawn-in Khrist ading bang i hih hiam? Pasian in eite Ama thu
siangtho kikholhna tuibeem bangin hong bawl hi. Eite hong kipia
thumaan khuavak tawh mite hotna ngah nadingin pilna I ngah sak
nam? Khrist thu a um mi khat ka hi hi, cih lel in man nei lo hi. Ki itna
in a zuih leh bek a manpha, a citak ahi hi. Itna in sepna a pian sak leh
bek, vantung muhna ah manpha ding hi. Itna hanga sepna khat
pepeuhte pen mihing muhna ah bang zah in a neu zongin Pasian in
saang veve a, letsong pia kik teek teek hi.

             A kiseel mihing huaihamnate ding khia ze za a, vantung laibu
sung ah ki dawk hi . Mihing tunga bawl dingte a kibawl kim lo te leh
Honpa nget thu a ki zui lo, a ki mang ngilh sak maite zong na kiciamteh
sisek hi. Amaute in a hun, a lungsimuh leh a hatnate uh Khrist neihsa
kimlai bang zah vei Satan na pia zelmawk uh hiam cihte mu kik ding uh
hi. Ciamtehnate vantung mite in vantungah a piak uh ciangin dah huai
thei lua hi. Mi teitang, Khrist nungzui ka hi a cite gige mah leitung
nopsakna leh leitung nate tawh a na ki diah cip na uh mu uh hi. A
sumte, a hunte, a hatnate uh milaka a ki dawk nading uh leh a duh a dah
uh neekna lel-in zangh uh a, ki awnghon-in gamta lel-in thu ngen-a ki
aapna, (488) Laisiangtho sung thumaan zongkhia a ki niam khiatmawhna
pulaakna hun ki tawm zat mah mah hi.

             Satan in a ki sim khin zolo ngiimna tuam tuam tawh I lungsimte
uk sawm den a, I hoih theih pen nading lampite awl mawh lo thei ding
a vai hawm hi. Mi kheem mangpipa in siansuahna thumaan leh
vangliatna-kimm nei Palaipa thute I theih tel khak ding deih loin thumaan
mudah mah mah hi. Jesu leh A thumaan tawh mite a kipelh theih nadingin
na khempeuh a mi-ii lungsim bang ci hei khiat zawh ding cih te thei hi.

               Honpa Palai sep a phat tuam pih nuam mite in Pasian kihtaakna
a hi Siantho-kimna leh amau kikal lah bang mah a ki guang ding phal lo
uh hi. Hun manpha te leitung nopna zon’na peuh, mi lak dawkna,
hamphat zon’na, cihte peuh sangin lungsim tak tawh thu ngen a Pasian
thumaan zon’ khiatna in zangh zaw ding uh hi. Pasian mite in Biakinnpi
thu leh Dawpkholh thukhenna thu a tel takin a theih ding uh kul
hi. Mi khempeuh in amau ciat adingin Siampilianpa nasep leh a din
mun a tel siang ciat uh kul ding hi. Tua hi kei leh tu hun-a theih ding a
kisam upna thei loin, Pasian in ama sep ding a Adeih sem loin om kha
ding hi. Eite ciat a kua ma peuh in I khaate hon ding maw paai ding cih
nasep I nei tek hi. Eite ciat in Pasian thukhenna mai ah thu I nei tek hi.
Eite ciat in Thukhen-mangpa mai sik tek ding I hi hi. Tua lipkhap huai
thukhenna a kitut ciangin laibute a ki leem ding thu ngaih sun in, Daniel
tawh tua ni tawp ni teh eima thuneih ei mah hong ki sit ding ahihna
phawk ding bang zah-in thupi hiam cih ngaihsun ciat ni.

              Hih thu-ii khuavak a ngah kha mi khempeuh in Pasian in tua
thumaan teci pang dinga a sawlna a ngahte ahi pah uh hi. Vantung a
Biak-buk pen mihing adinga Khrist nasepna munpi a hi hi. Tua mun in
leitunga a teeng mi khempeuh tawh a mi mal ciat in ki zom uh hi. Tua
thu in hotkhiatna vaihawmna zia a pulaak hi. Hun beina hong lak suk a,
dikna leh mawhna kikal-a kidemna pan zawhna ngah dong a omzia ding
teng hong lak hi. Tua thu tel siang taka theih ding a kul pha pen a hi hi.
I upna hong dong khat a om leh siang taka hilh thei ding kisam hi.

              (489) Khrist in mite ading van Biak-innpi ah Palai a sepna pen
hotkhiatna nasepna vai tampi te lak ah singlamteh tunga a sihna zah
lian mah-in a kisam a hi hi. Ama sihna tawh tua nasep a ki pan hi pan
a, van A kah toh khit ciangin zawh siang nadingin a sem zom a hi hi.
Eite in upna tawh tua puandal sung ah va lut ve-in, “I makaipa in ei
adingin zong a lut” hiam cih I theih ding kisam hi. Heb,. 6:20. Tua lai
lah Kalvary mual pana khuavak pen hong ki leng kik hi. Tua mun panin
hotkhiatna thu thak ta tel zaw in I mu thei ding hi. Hotkhiatna nasep
zawh nadingin vantung in supna lian pen a thuak kul a, ki thoihna a
kibawl pen zong a ki palsat thukham’ nget lak ah a lian pen a hi hi. Jesu
in Pa’ tokhom zuatna lampi hong hon sak a, Ama Palai sepna tawh
Amah um-a, muanga a zuite khempeuh Pasian mai ah a puak hi.

                “A mawhna a hum mi hamphalo ding hi. Ahih hangin ki pulaak
a a nusia mi in migitna thupha ngah ding hi.” Paunak 28:13. Mite in
amawhna sel sim a, mawh lo banga a om ciangun Satan in amaute tung
ah ki sial in Khrist leh siangtho vantung mite kiang ah lah san hi; tua
bang a om uh ciangin a mawhna te uh pulaak meng meng in nusia pak le
uh hong deih sak mah mah hi. Gamtat thel baangte hangin Satan in a
bumpi-a uk theih nading han ciam a, hih a thelbaan’na te uh zom to to
in hong picing thei leh ci in a vil gige a hi hi. Tua ahih manin amah in
Khrist nungzuite pen a tawntung in sul zuih a, kheem theih nading mun
zongin amaute suah taak zawh lohna mun ding a tun’ ciangun a
kheemsiam tawpna tawh buan paai hi. Ahih hangin Jesu in amaute
deihsak a, Ama khut liam mapawn tawh, aki sun a pumpi tawh lak in
Ama nung a zui nuam mite khempeuh kiang ah, “Ka hehpihna in nang
adingin kicing hi” ci hi, 2 Kor 12:9. “Keima haakol zam in kisuan un
la, kei kiangah hong kisin dih un, Keipen kiniam khiatin neem hithiat ka
hih manin ka kiangah na tawl uh a dam ding hi. Bang hang hiam cih leh
note kong suat ding ka hakkol nuam a, na puak ding uh van zon a zang
mah ahi hi.” Matt. 11:29,30. Tua ahih ciangin kua mah in ama
thelbaan’nate a ki damsak thei lo ding sa kha kei hen. Pasian in tuate
zawh nadingin upna leh thupha guan ding hi.

              Eite in tu in siansuahna ni lian ni hun-a nungta kha mite I hi hi.
Limciing siampite sep lai in Siampilianpa in siansuahna a bawl laitakin
Israel te a vekpi in amaute ki sit tel uh hi. Topa mai ah ki niam khiat in
a mawhna te uh ki sik kik in om uh hi. Tua bang hi kei (490) le uh a
mite lak pan un ki khen khiatna thuak ding uh hi. Tuate bawl mah
bangin nuntakna laibu ah a min uh tuang lai ding a deih mi in tu in hun
tawm bek a om lai sung ah Pasian mai ah ki niamkhiat a mawhna te
kisik kikna dik tawh I ki sit tel kul ding hi. I lungsimte thuk takin
zongkhia in kalhkhiat kul hi. Khristian a kici pi pi zaang khaai om
khuaval om dan pen paih khiat a kul hi. Zawh toh a sawm, hoih lohna
vai teng a paai khia nuamte in nakpi-in a hanciam ding uh a hi hi. Ki
gin’kholhna pen mimal nasep a hi hi. Eite a mi lom in hotna hong
kipia ding hi lo hi. Mi khat ki aap zawhna leh sianthona in mi dang
sung ah ki sapna te hutt sak thei lo hi. Pasian mai ah minam khempeuh
te thu ki sit kim het ding ahih hangin, mimal ciat in a mi dang om
nawn het lo amah kia thu nei ahi zah-in tel tak phin ciil takin sittel
ding hi. Mi khempeuh ki sit dinga kawk baang lo, saton lo ding in ki
deih a hi hi.

               Siansuahna nasep a ki zawh siang nading thupi lua a, ciliap huai
lua hi. Hun tomno sungte mah thupi lua hi. Vantung Biak-inn ah
thukhenna pai pai keei ta hi. Kum tampi mah pai khin ta hi. Kizo baih
mah mah ta ding hi. Bangzah in kizo baih ta ding cih a thei om lo hi. A
thusitnate a hinglaite tung ah tung ta ding hi. A zahtaak huai lua Pasian
mai ah mite thute ki pholaak ding hi ta zen hi. Hih hun laitak ciangin
vaai dang khempeuh sangin a thupi zaw, khaa khempeuh in I phawk
ding thu in, Honpa hong lamlahna, “Thu ngen in ngak un, a hun ding
thei lo na hih man un.” Maku 13:33. “Na vil kin ken kei leh guta
bangin na kiang kong tung dinga, kong pai lam na phawk kei ding hi,”
cih a hi hi. Mang. 13:3.

              Hih Dawpkholh thukhenna a ki tawp ciang pen mi khempeuhte
sihna ngah ding maw nun’na ngaah ding cih ki khentel khit ciang hong
hi ding hi. Topa vaan meii tawh hongkilat kik ma deuh in hun hoih ki
khak ding hi. Mangmuhna sung ah tua hunding lah kholhna ah Khrist
in, “A thutanglo te tua ci suak hen; a kih huaite kih huai suak hen; a
dikte dik lai hen; a siangtho te siangtho suak hen. Ngai un, a man
langin Ka hong pai ta ding hi; mi khempeuh amau gamtatna bang ciat
piak ding thaman kong keng hi,” ci hi. Mang 22:11,12.

             (491) Midikte leh migilo te leitungah a muat thei pumpi ciat
mah tawh nungta khawm lai uh hi. Mite in huan bawl-in, innte lam-in,
ne in dawn in, vantunga Biak-innpi pan a ki khel kik zo ngei nawn lo
ding khen satna ki bawl khin hi cih thu peuh mah a phawk kha het kei
ding uh hi. Tuiciin tun’ma in Noahte Teembaw ah lut in Pasian in kong
kalh nelh a, mi hoihlote a pua-ah a khah khum hi. Ni sagih sung mite in
amau thuak ding daan ki kip sak khin ahih lam phawk loin a om ngei un
om lai uh a ki dawm loin nuntak gualnopnate zangh lai uh a, a hong
tung pah vat ding thukhenna nuihsan in a zah pih uh hi. “Tua mah tawh
kibangin” Honpa hong hilhna in: “Mihing Tapa hong pai ciangin tua
bang mah hong hi ding hi” ci hi. Matt. 24:39. Gam daai takin phawk
khakloh-in zan-a guta bangin mawhnei te ading a kipia migitna ki dok
khia kik ta a, mite mai lam among beina, khentelna kipia khin hun hong
tung vat mawk ding hi.

               “Tua ahih ciangin ngak un:…Tua bang na hih kei uh leh tha
khat-in Amah hong pai dinga, na ihmut laitak uh hong tuak kha ding
hi.” Mk. 13:35,36. Ngak zo lo-a leitung lam a lawp lua te tung ah
kisiatna tung ding hi. Sum meet bawlte in a ngah theih nading uh delh
a, noptatna a uuk te in uang tat-in, kizep a thupi sakte in a ki zep nading
uh bawl bawl in, tua bang zel zul laitak keek mah in leitung buppi
Thukhenpa in khentatna pulaak ta ding hi. “Nang hong ki tawi khai in
naleek zo kei hi” ci khia hiau ta ding hi. Dan. 5:27.

                   Laisim mimal khempeuh Topa kilam thakna hong suaksak tahen.


Lungdam
Kimnu/nunu.