37. LaiSiangTho Kidalna Lum.

Dear Laisim mimal,
Azom te,

                                          37.Laisiangtho Kidalna Lum.
(593)
THUKHAM bang leh Laisiangthothu banga thu a gen kei uh leh
amaute sungah khuavaak omlo a hi hi.” Isa. 8:20. Khua mial tawh
kipawl khaa gilote’ vangliatna leh khemna husapi a dal nadingun Pasian
mitein Laisiangthothu len ding uh hi. Satan khemna kelluphum teng
Laisiangtho in tel takin pholak mawk ahih manin mite in Laisiangatho
thumaan a theih khak ding dal theihna om khempeuh tawh a dal niloh
hi. Pasian thu hat in kipuah phatna a hatna mun khempeuh ah Satan in
na anak sep zaw kan zel hi. Ahangin Khrist leh a nungzuite a langpan
nunung pen adingin hanciam theih tawp suah-in tu in a thasaan hi. A
nunungbel khemna lianpi a sawtloin ih nawk ding hi. AntiKhrist in
nasep a lamdang pen eite mit muh in hong seem ding hi. Ataktak leh a
kheem pen kibang phial phial ding ahih manin, Laisiangtho tawh lo-in
khen tel hak mah mah ding hi. Amaute teci pan’na leh a na lamdang
bawl te uh leh a thugente uh I sit tel ding hi.

              Pasian thukham a om khempeuh a zui kim nuamte kilang bawlin
ki simmawh ding hi. Amaute Pasian sung bek ah ding thei ding uhhi.
Tua mite in hong tung ding thuaksiatna leh sit telna te a do zawh
nadingun Pasian thu leh A deihna theih tel uh kul ding hi. Pasian
gamtatzia, a gam uk zia, leh a vaihawmna te a telsaim uh ciangin Pasian
a zahtak in A deihna bangin a gamta thei bek ding uh hi. Laisiangtho
thumaan tawh a lungsim a hatsakte lo buang in kidona nu nung do zo lo
ding uh hi. Mi khempeuh in sit telna thuak ding uh hi. (594) Pasian thu
leh mite’ thu koi mang zaw ding? cih khentelna pen tu mah mah in I
neih ding hi ta hi. I khete Pasian thumaan suangpi tungah a kinga hiam?
Pasian thukhamte leh Jesu upna khahsuah loin ding kip dingin I kiging
khol hiam?

             A mah ki that dinga haan panin tho kik ding ahihna thu Honpa
in singkhuam tungah a ki khai lup ma-in a nungzuite a hilh hi. Vantung
mite in tua thute nungzuite lungsim sung ah aphawk sak kik-kik zel hi.
Ahih hangin nungzuite in Rome kumpi’ hakkol panin hih leitung bumpi
mah mah a hon khia dingin a lam en uh hi. A lam etpa uh in mai zum
huai takin sihna thuak ding cih pen thuak hak sa mah mah uh hi. Amau
ciapteh ding thuphamawh pen pente mang ngilh uh ahih manin, ze etna
hun hong tun ciangin a kiging lo a suak uh hi. Jesuh in gen khol kei leh
Ama sihna in nungzuite lam etna khempeuh bei sak kil kel ding hi.
Nungzuite tel mah mah dingin Khris in a genkholh mah bangin eite
tung ah zong hong piang ding hilhkholhna thu te kitel takin hong genkhol
hi. Hehpihna kong kikhakna tawh a kizoma thupiang dingte leh buaina
hun ciangin kigin kholh nading ziate zong kitel takin a hong gen hi.
Theih ding a phamawh hih thumaante a ki gen ngei kei leh mi honpite in
phawk kha lo ding uh hi. Gimna hun ciangin a kiging khollo a suah
theih nading in, hotkhiatna ngah zo ding zah-a thuman deihna lungsim
amuh peuh peuh Satan in matkhiat sak pah pah hi.

              Pasian in thu phamawh patau kona mite tunga hong piak ciangin
a phat mawhna zia zui-in vantung mite hong leenga a gen bang lim
tawh hong lak hi. Mi khempeuh in zong na lung himawh in ngaihsun
le uh a deihna a hi hi. A lau huai thukhenna in amawh kawk Sapi leh
a milim biakna ( Mang. 14:9-11) pen mite in lunghimawh in tel sin le
uh sapi ciamtehna bang ahi hiam cih theitel in, tua tawh bangci kipelh
thei ding cih zong thei le uh a deih a hi hi. Ahih hangin mihonpi in
thumaan za nuam lo-in a bil uh heii khia uh a, tangthu mawk mawk
lam ngat san khin uh hi. Ni nu nung ni ding en khol in sawltak Paul in
a genna ah, “Thuhilhna pha manglo in, bilthak nei-in, amau deihgawhna
bang thu hilh a tami, amau ading a koih ding uh hi.” na ci hi. 2 Tim.
4:3. Tua hun pen tu-in a hong tung ta a hi hi. Mipi in Laisiangtho
thumaan deih lo uh hi. Bang hang hiam cih (595) leh amau mawhnopna
leh leitung deihna tawh ki lehbulh ahih baan ah Satan inamau deih te
pia in khem beh lai uh hi.

             Ahih hangin Pasian in Upna khempeuh phuh nading leh kipuah
phat nadingin Laisiangtho bebek a leen nuam milom khat leitung ah nei
lai hi. Laisiamte lungpilnate, leitung pilna neite, pawlpi upna guite leh
counsel khensatna thute, a kilem ngaplo pawlpi tuam tuamte, a tam
zaw thukimna cih thute in biakna man leh maanlo khentel nadingin cing
lo uh hi. Upna khat pe-peuh leh thukham khat peuh ih saan’ ma-in
“Topa in hi bangin ci hi” cih tawh khensat pen thukhentatna maan hi
bek ding hi.

              Pasian thu sangin mite thu mah lawp zaw dingin Satan in mite a
hansuah den hi. Mite in ama ading amah mah in Laisiangtho zong khiaa
a theih tel ding sangin Bishop te peuh, Pastor te peuh, Upna thuhilh
Siate peuh makaihna zui lel dingin pan tah zaw hi. Tua makaite lungsim
ukcip-in, mipite zong ama deih bangin ki uk thei pah hi.

               Khrist in nuntaknathu a gen ciangin mimawl te in, zaknop sa in,
lungdam takin a thu gente ngai uh hi. Siampi leh makai tampi in zong
athugente a um uh hi. Ahih hangin siampi Liante leh gam-uk mang
lianpite in mawh sak in A thugente langpan ding bek ngim khol kinken
uh hi. Mawhsak nadingin langdo-a a hanciamna khempeuh uh ah Khrist
genthute in alungsim uh a leh zawh zawsop hi. Ahih hangin manial
nopna lungsim a pai man un, Pasian vangliatna leh pilna in Amah Messiah
ahihna kitel sak zaw hi napi, a nial hamtang ve ve uh hi.. Nial kei
le uh lah amau zong A nungzuite suah kul ding cih lah utlo zel uh hi.
Jesuh nialte tua mite pen a neu tuung uh a kipan mite’ zahtak dinga a
kihilhte a uh hi. Amau thuneihna aana tawh mite na ki uk uh a,
mipi’zahtak leh biak a nangahte na hi zel mawk uh hi. Amaute ki dong
uh a, “Bangci daan hiam? Ukpi te leh laithei te in Jesuh um lo uh hiam?
Amah Khrist ahih leh bang hangin hih mipil te in saang lo mawk uh a hi
hiam?” ki ci uh hi. Tua hi a, hi bang makaite thu zawhna hangin Jewte
a nambup un a Honpa uh a nial asuak uh hi.

              (596) Siampite leh Upate a tua ci gamtat sak khaa pen mah in tu
in zong Biakna-a mi hoih mi gina ka hi a ci tampite tung ah na asep lam
ong ki dawk lai ve ve hi. Amau te in tu hun ading a hong kipia
Laisiangtho thumaan pen sit tel in zongkhia nuam lo uh hi. Amaute in
a pawl tamna uh, a maipha ngahna uh, leh ahauhna uh suang uh hi. Tua
hangin thumaan keemte pen a tawmna uh, a zawnna uh, a kidawk zawh
lohnate uh, leh leitung tawh a ki helzau theilo a thu upna te uh hangin
neu-et in a mawh sak uh hi.

              Tua laitheite leh Phariseete neih lungsim leh azat uh aana maan
lo pen Jewste hun tawh bei khawm pah lo ding ahih lam mukhol hi.
Mihing aana tawh mimal lungsim deihteelna kiuk cipna hun hong tung
lai dinga, tua in pawlpi akhang khangin pawlpi gim pia mah mah ding hi
cihzong mu khol zo hi. Tua manin laitheite leh Phariseete nakpi-a a
taaina te na kiciamteh a, tua pen a hong tung lai ding khang thak te a
hong thu-hilhna zong a hi hi.

             Pasian na seemte bek in Laisiangtho khiatna gen thei ding hi
ci-in Rome pawlpi in thu a khung hi. Thuhilh Siate bek in Pasianthu
hilh thei ding thu ngah-in a dang teng in ngah lo hi. Kipuahphatna
(Reformation) in mi khempeuh tung ah Laisiangtho a pia khia hi. Ahih
hangin Romete khun tua ngeina in amau leh amau ading Laisiangtho
sim ding Protestantte nangawn a dal hi. Amau pawlpi in a khiatna a
bawl bang bek saang dingin kihilh uh ahih manin, Laisiangtho sung
pan thuman ki tel zaw a muh uh hangin amau upna phuhsa upna thugui
leh pawlpi pomsa upna bang lo peuhmah a saang ngam tuan lo mi tul
tampi a om hi.

               Laisiangtho sung ah zuau thuhilh Siate kidop nading a dim takin
om hi na pi in amau’ khaa kep nadingin a Siate bek uh a pum muan
kha ta leu leu uh hi. Tu hun-in biakna nei ka hi a ci mite mah hi napi in
a Siate uh hilhna baan ah ama upna letsanh gen ding bangmah a nei lo
mi tul tampi mah a om hi. Tua bang mite in Honpa hilh thu te nagawn
phawk-in nei nawn lo phial uh a, a Siapa uh’ gen bang bang pum muan
in mittaw sial khau let mai uh hi. Tua Siate a khial (597) thei het lo
ding ahi uh hiam leh? Laisiangtho khuavaak tawh ong makaih uh hi cih
ih thei tel kei buang leh khaa nuntak na dingin tua mite bang pum muan
theih mawk ding I hi hiam? Leitung zuih lampi ngiilsa panin pial khiatna
ding khop in hangsanna nei lo uh ahih manin, mi tampi in laisiamte
nung mawk zuih zuih uh hi. Amau adingin thuman zong khia-a sit tel
ding ngaap lo uh ahih manin lampialna sikkol in amaute a khih cip hi.
Tu lai tangkona thak Laisiangtho thumaan mu gige sa, leh Kha
Siangthoin zong tua tangkona panpih hi cih thei gige napi-in Siate lang
panna azuih man un tua khuavak tawh aki nungngat san uh hi. A lungsim
sung uh ah thuman a muh uh hangin siate’ vang nang lah in thu dang a
ngaih sun ngam kei uh hi. Mimal neih khensatna leh teeltheihna nangawn
thu manial midang khat khut sungah a tung sak hiau mawk uh hi.

              Satan in a matsa mite a lom hen nading lampi tampi a nei hi.
Khrist singlamteh gal-a a do pawlte tawh ki sak in, tanau-itna naikhau
hual tawh mitampi a henkhawm hiau mawk hi. Nuta pata hihna, ta nau
hihna ahi zongin kizopna, kipawlna khat peuh a neih phot nak uh leh
tua tung tawn in mimal khensat theihna lungsim gakcip sak hi. Tua in a
suahtakna ding un a zuihsa lampi leh a kizopna sa khau apeek tat zo
nawnlo zah dong dingin akoih hi.

              Pasian vangliatna leh thumaan ki khen khia thei lo hi. Laisiangtho
nei na pi-a ngaihsut lampialna tawh Pasian zahtak-a kibawl ve ve pong
mawk pen hi thei lo hi. Mite in up dan leh zuih dan thupi lo a, ih gamtat
maan thupi zaw hi ci thei uh hi. Ahih hangin gamtatna pen upna zui a
kalsuanna ahi zel hi. Khuavak pen ih batna om napi ih zuih theih nadingin
za nuamlo in, va mu nuam kei le’ng, tua khuavak a nialte ki suak in,
khuavak sangin khuamial mah a teel zaw I hi lel hi.

             Mihing muhna ah,”hoih hi ci-a i ngaih sut khak thu khat pen, sih
theihna ding thu na hi thei zawsop hi” Paunak 16:25. Pasian deihna
theih nading hun pha a kipiak an mun ah, lampialna leh mawhnateadingin
”thei khalo mawk inga” cih pau lapzon tawh ki maap lo hi. Khualzin
mi khat lamkabom hong (598) tunga, koi pen in koi lai mun hong tun’
ding cih lai ki suang a mu hi. Tua lamlak lai thu-sim loin, a dang khat a
zuih leh, lam dung ah bang zah in lungsim hoih le gamtat hoih nei in, a
lampi maan tawn bangin a ki ngaihsut hangin, lamkhial a tawn mah hi
ve ve hi.

             Ama deihna leh hong hilh thute theih in i zuih theih nading in
Pasian in Ama thubu Laisiangtho eite hong pia hi. Thukham theipa
khat in Topa ze-et dingin hong pai a, “Nuntak tawntungna ka luah
nadingin bang ka bawl ding hiam?” a ci hi. Honpa in Laisiangtho
sung mah leen-in, “Thukham sung ah bang ki gelha hi hiam? Bang
thu na sim kha hiam?” na ci kik hi. “Thei kha ke’ng “ cih bang lel
tawh a kua mah maap lo hi. Pasian thukham palsatna thaman daan
thuak ding panin peng sak lo hi. Bang hang hiam cih leh, tua thukhunii
deihna bulpite leh a nget thute tel taka kigenna Laisiangtho amau
khut sung ah om hi. Gupna ngah nadingin, mi khat peuh in ama hoih
sak bang, cih pong te, Siate in a hoih hi ci uh a, cih bang lel mawkte,
ki siksan thei loahih manin, mikim in ama nuntakna ahot na dingin
amah mah in Laisiangtho thumaan zong khia in a sit tel ding uh ki sam
a hi hi. Ama kizawh dan khauh in, Siapa in thumaan thei hi cih
muannate in gupna zon na ah zat ding dinmun kip hi lo hi. Amah in
vantung lam zuatna lamkabom-a lai kigelh pen nei hi. Tua lamlahna
bang bek zuih ding hi a, lampi dang khat leh thu dang peuh lunggulhna
tawh ki nawngkai sak lai lai ding hi lo hi.

             Ngaihsuttheihna lungsim a nei mi peuh mah ading athu lian bel
in Laisiangtho panin thumaan zongkhia in, tua thumaan zui-a mi dang
te zong zui sak ding a hi hi. Eite in kuhkalna tawh nisial-in Laisiangtho
sim-in, a thute khai kaak kawi kawi-in, mun khat leh mun khat i et kaak
ding ki sam hi. A mimal in Pasian mai-a eima ading thudotna a dawng
dingte i hih man in, Pasian huhna suangin thu zuih dan Pasian deih tawh
ki tuah sak ding i ngaih sun ding hi.

              Laisiangtho sung ah tel taka ki lak thumaan te pen laisiamte in pil
kisakna tawh sim-in tel hak leh zuih hak sa uh hi. Laisiangtho pen thusim le
thu thuk hi, ei’ theih phak loh khiatna nei khaa lam thu siim hi, ci-in hilh uh
hi. Tua bang te pen zuau thu hilh Siate a cihte a hi uh hi.

              (599) Tua bang mite kiang ah Jesuh in, “Note in Laisiangtho ahi
zongin, Pasian vangliatna ahi zong in theilo na hih uh ciangin, um khial
hilo na hi uh hiam? “ ci hi. Marka 12:24. Laisiangtho kammalte pen,
limlahna leh genteh sawnna a kizang a hih kei buang leh, a kammal om
bangin a khiatna laak pah lel ding hi zaw hi. Khrist in khapna khat hong
nei a, “Mi khat peuh mah in Pasian deihna bangin a gam tat nop leh, hih
thu Pasian’ thu” athei ding hi” ci hi. Johan 7:17. Mite in Laisiangtho a
sim uh ciangin agen thu a om bangin zuih pah lel leh, zuau thuhilh Siate
in a buai sak kei nak uh leh, nasep ki mainawt mah mah ding hi. Tu-a
lamkhial-a vak vai mi a tul mun tulte zong Khrist huang sung ah hong
lut ding uh a, vantung mite lungdam mah mah ding uh hi.

                Eite in ih lungsim hatna zah zah tawh Laisiangtho sim in, i pilna
leh i siamna vekpi zangh-in Pasian thuthuk mihing theih theih ciang
ding pen theih ding i hanciam ding hi. Tua baan ah, naupang bangin
hilh nop-in a thu man a om bang lungsim maan tawh up pah pah lel ding
ahih lam ih mang ngilh kei ding hi. Leitung pilna tawh Laisiangtho
sung thu haksate pen tel kheh zawh theih ngei ding hi lo hi. Mi tampite
mot hanciam bangin leitung pilna suang zaw loin, thungetna leh kiapna
tawh Pasian deihna tel nop takpina lungsim maan tawh Laisiangtho
I sim zaw ding hi. KEIMAH ahi alian mah mah Topa kiang panin pilna
I ngah nadingin hilh theih ding lungsim leh ki niamkhiatna lungsim tawh
Ama kiang I zuan ding hi. Tua hi kei leh gilo vantung mite in I lungsim
hum cip in, khauh sak ding ahih manin thumaan I man kha thei nawn
kei ding hi.

              Thuthuk hi ahih kei leh Thupi lo hi ci-in mitampi in a nusiat uh
Laisiangtho mun tampite pen Khrist Saang pana ki hilh mite adingin
lam lahna leh a hehnemna kammal thupi mah mah pen te ahi zaw uh hi.
Laisiangtho siam a kici Theologiante in Pasian thumaan tel hak hi a
cihna munte uh pen zui nuam lo uh ahih mana a thu thei tel nuaam lo
kineih in a mit uh a hum uh ahi zaw hi. Laisiangtho thumaan theih
siamna pen leitung pilna pan hi lo zaw-in lungsim ngimna khat bek
tawh thumaan deih tak takna pan ki ngah ahi zaw hi.

               Laisiangtho pen thu ngen lo pi-in mawk sim ding ahi kei hi.
Laisiangtho sung thu a manphatna ciap khak theih na ding leh a tel hak
munte telsiam na ding in Kha Siangtho bek in hong huh thei hi. Vantung
mite nasep pen Pasian thu I tel zawh nading, a deih huaina ih lung
sungah a ten nading, (600) leh a hilhnate telin, a kamciamte hangin
lawpna leh thahatna I ngah zawh nadingin a huh ding uh hi. Laphuakpa
tawh “Nangma thukham sung panin a lamdang nate ka muh theihna
dingin keima mitte hong hon’ sak in.”( Late 119:18) i ci khawm ding hi.
Laisiangtho sim leh thu nget thadahna manin mawhzolnate in nan
zawhloh ding lim in hong kilangh zel uh hi. Bang hang hiam cih leh
Satan pen Laisiangtho galhiam tawh do un a cih Satan pen Laisiangtho
galhiam tawh do un a cih Pasian kamciam pen zolna athuakte in phawk
den kha lo zel uh hi. Ahih hangin Pasian thu a thei nuam takpi te kim
kot ah vantungmite om uh a, a kisap pen hun ciangin a sap bangun
thumaan a phawk sak zel ding hi. “Galpa in tuiciin khang banga hong
vuh ciangin Topa Kha Siangtho in galpa langdo nadingin dial-kaih hong
lap toh sak ding hi.” ( Isa. 59:19).

             Jesuh in nungzuite kiang ah, “Ahih hangin ka min tawh Pa in
hong sawl ding Huhpa a kici Kha Siangtho in na khempeuh hontg hilh
dinga, no kiangah kong gen khempeuh hong phwkkiksak ding hi” (
Johan 14:26) ci in na khaam hi. Ahih hangin Khrist hilhna teng pen I
lungsim sung ah na vom phot ding hanga, tua pen haksatna hun ciangin
Kha Siangtho in hong phawk kik sak ding a hi hi. “Nang tungah kong
khialh lohna dingin ka lung sim sungah nangma thu ka khol hi,” (Late
119:11) David in ci hi.

              Tawntung nuntakna thumanpha a sa mi peuh mah in uplahna
hong lut khak loh nadingin ki kem ding uh hi. Khuampi banga akip
Thumaan khuampite teek mah zong hong nawk ding hi. Eeng kona,
muutna te, leh tu hun thukhel-kawi le a lauhuai dang dangte’ bat khak
loh dingin ki kep zawh hi lo hi. Satan in a ze etna leh mawhzolnate mi
a pawl pawlte omzia tawh kituak dingin siampha zel hi. Amah in laisiam
lote sim mawhna leh nuihsatna tawh zo thei hi. Laisiamte pen Science
lam leh Philosophy kici thu ngaihsutna lam tawh Laisiangtho muang
lah dingin leh a sim mawh sakdingin zo thei ve ve hi. Khangnote bang
zong Khristian dinmun bulpi muang lah sak hi. Tua khangnote’ Pasian
uplahna leh ki daaithahna te in baan nei to zel hi. Tampi takte in anu a
pate uh’ upnate ciamnuihna-in nei uh a, thupha pia (601) Kha Siangtho
pen simmawh uh hi. Heb. 10:29. Pasian zahtak a kaai sak ding leh
leitung adingin thupha a bawl ding nuntakna tampi takte uplahna huu
namsia in zaap keu khin hi. Mihing pilna tawh khensat-a aki sialhpih uh
thute muang uh hi. Pasian huhna ngah lopi-a thumaan Pasian thuk mu a
kici mitampi, tua bangin, Satan thangzaak sung ah awk zel uh hi.

              Eite in leitung tangthu sung ah a hun thupi bel laitakin anungta
kha te I hi hi. Leitung mite tun nading aki khensat ding hi ta hi. Ih mai
lam nuntak nading leh mi dangte nuntak gup ngah nading pen tu-a I
omzia te tunga ki nga ding ahi hi. Thumaan Kha Siangtho makaihna I
ki sam hi. Khrist nungzui khempeuh in I theih nop ding thu pen, “Topa
aw, bang ka bawl ding nong deih hiam?” I cih ding ahi hi. Topa mai ah
ki niamkhiat-in, an ngawl-in, thu ngen-in, Ama thute, a diak diak-in
thukhenna thu, ih lungngai ding hi. Pasian thu thuk tawh nuntak nading
I tel kan ding hi. Hun tomno khat nangawn mawk bei sak ding ahi kei
hi. I kiim kot ah na lianpi pite piang piang hi. Eite in Satan bumsa
leitang tungah I om hi. Pasian galvilte aw ihmu kei un. Galpa in hong
buk hi. Nang khamuangin na lusuk leh nang’ tungah hong zuan-in samat
bangin hong bawh ding hi.

               Pasian mai-a a om dan uh tel loin mi tampite in khem thuak uh
hi. Mawhnate bawl lo tei uh ahih manin a lungdamna te uh ki kum uh.
Ahih hangin Pasian nget thupha bawl ding pen awl mawh lo zel uh hi.
Pasian deih lungsim leh nuntaak picing a gah ding uh a awl mawh kei
uh hi. Pasian huan sung ah singkung khat hih lel bek ki tang cing lo hi.
Pasian in amaute thupha pia napi, a lam-et gahpha ahi thupha a bawl
theih dingte uh a bawl kei uh leh leiba-in siik kik ding hi. Vantung laibu
sungah tua bang te pen leitung a noksak lel te, ci in ki ciamteh hi. Ahih
hangin tua ciang pen lam et beina hi nai lo sam hi. Pasian migitna a
zaangkhai bawla a thupha a na sim mawhte tawh a ki bangin itna
lungduaina in makaih khawm lai hi. “Tua ahih (602)ciang in; ‘A ihmu
mi aw, khanglo in la, Sihna pan tho kik in! Tua bang ahih leh Khris in
nang tungah hong tang ding hi “(Ephet 5:14-16).

             Tel sitna hun hong tun’ ciangin amau nuntakna Pasian
thu(Laisiangtho) tawh amakaih mi hong kilang ding hi. Tuuk hun
sungin singkung khempeuh a kibangin a teh a dum khin hi. Khawkhaal
(American te Phalbi) ciangin singkung pawl khat a teh a pulh hi. A
hing den leh a tehpulh nam hong ki lamdang hi. Tua mah bangin
Khristian tak leh a kheem zong tu ta dih-in ki lang khia nai lo hi. Ahih
hangin a kilat ding hun hong nai mah mah ta hi. Pasian langpangte a ut
leh tho ta hen. Upna guptuam neite leh mi thuak zolote in a khut uh
viik kik ta hen; bawl siatna te hong so kik hen. Lung hiang neite leh a
ki-neihtawmte hoi ding a upna uh khah lel ding uh hi. Ahih hangin
Khristian maan ahi te pen suangpi bangin kip ding uh hi. Hun nop lai
sangin a upna uh khauh zaw lai dinga a lam etna uh kician zaw ding hi.

               Laphuakpa in, “Na teci pan’na te ka lung ngai-ngaai hi” “Na
thuhilhnate hangin thu theihtelna ka ngah hi; tua ahih ciangin a manlo
lampi khempeuh ka mu dah hi.” Late 119:99, 104. “Pilna nei-in, thu a
thei mipa in, a lungdam mi ahi hi.” “Amah in gun gei-a kisuan singkung
bang hi a, lui gei ah a zung kha hi. A tehte hing den ahih man in nisa
kihta lo hi. Kitatsat lo-in gah den ahih manin guah zuk loh kum cingin
zong lung kham tuan lo hi.” Paunak 3:13; Jer. 17:8.

                  Laisim mimal khempeuh Topa kilam thakna hong suaksak ta hen.
Zoplai ding,

Lungdam
Kimnu/nunu.