Dear Laisim khempeuh,
Anti-Khrist zongh LST sunga agen na teng akim in ih theih lohpi in,mi khatpeuh,pawlpi khatpeuh kingawh ngam lo ding hi.Ahi lopi kingawh ngam lo ding ahih teh,ci-a,athei lo-a mot om ding lah amau sunga kihel gige hi kha mawk leng,lauhuai zel hi.Tua Anti-Khrist pen ih matkhiat zawh na ding zah-a, LST in gen napi lah, Dawi mangpa in LST theih tel luat ding phal lo a,ahum theih tawp in na hum zel hi.Anti-KHrist atatak pen Dawi mangpa teekmah hi pah mawk a,amah tatak pen hong kilang lo-in,Eden huan agulpi azat bangin leitungah kusale zangh in nasem hi. Tua akusale pen ih theihkhiat ding athupi pen hong suak hi. Tua akusale pen LST in tel takin na hilh khol ahih ciangin,apian zia, anasepkhiat te, apianhun dingte teltakin sit lehang,kimu tel thei veve hi.
Satan in,akhutzat pah kusale pen,Pasian langdo pahte hi het lo-a,Pasian sunga innteekpi te hi ung,aci zawbehlap te hi zaw a,tua pawlpi pen in LST pen,"sim kei un, na sim uh zongin akhiatna gen kei un,lauhuai hi," ci-in a LST buppi hum cip uh hi,ih zogamah,amau sangin Protestant te hong tung masa ahih manin LST pen na hawmkeek khin laklawh uh a,kikhaam thei pha mawn lo ahih manbek hi,amau pawlpi kia omna te ah,pawlpi mite in LST pen aneih ding zong phal lo zaw uh hi.LST sim ding akihansuah mahmah Protestant te lak ta leuleu ah, tua Anti-Khrist akitel dawksak penpen, Daniel bu Mangmuhna bu pen, tel hak a, lauhuai hi,mah ci sak leuleu hi,Acialcial in mite in LST asiam loh theih na dingin,maihum toto hi.Tuabangin maihum kei leh, mi khempeuh in LST siam sisek leh,ama nasepna kidawk pah mawk dinga, Hell a akikhulpih ding mi tawm ding hi.
LST pen, Dawi hong khem zawh loh na dinga kidalna,galhiam hi a,LST sim ding peuh laulhuai hi,ci zel leng,ih sin tangtangh in zong telhak ahih teh.LST sung thu munkhat la a, mun khat deih loh zel mawk pen zong Dawi maihum na khat mah hi lai hi. 2Tim 3:16-17ah,LST a om khempeuh in kimanh na nei hi a,nialkhiat tangtuam ding mun om lo hi,ci hi.Isa 28:10 ah,Thugui khat ih tel siang nop leh,tua thu mah akigen na LST mundangte tawh saikaak in,hia-ah tawm,hua-ah tawm,sutuah in,mun khatbek siksanh mawk lo-in,mun khat leh mun khat akhiat na, kigen sak,kitelhilh sak ding hi,ci hi.Tu in Anti-Khrist thu zong,thupi ahih ciang in,Khrist langpang agen na khempeuh kaikhawm in,ei upmawh bang mawk in akhiatna gen lo-in,a LST leh a LST mah akhiatna kigen sak diudeu dih ni.Tua bang diu-deu a ih matkhat thumaan te lah, um in,zui pah ni.
Dan 7:2 Daniel in,Zan-a ka mangmuhna ah,ngai dih in,vana huih lite tuipi lian tungah nungin om ka mu hi,ci hi.(Hilhkholhna ah, Huih nung pen galkido na agen na hi.)Zech 7:14;Jer 25:32(Tuipi acih ciangin,Mihonpi agen na hi.)Mg 17:15. Hih akhiatna pen ei khiattawm hi lo-in,LST mah in agen khiatna hi.
Dan 7:3 Tuipi sung panin sapi nam tuamtuam nam 4 hong pusuak a, amaute khat leh khat kibang lo-in,anamtuam ciat ahi uh hi.(aneu 17 ah,tua sapi nam tuamtuam 4 te in,leitunga hong thokhia ding kumpi lian 4 te gen na hi,ci leuleu hi.)
Dan 7:4-7 sim in, Amasa sapi pen Humpineelkaai bang hi.Humpineelkaai in gamsate lakah anampi pen ganhing kumpi akici ahih mah bangin, tua hun a, leitung bup a uk kumpi hi,ci-a akituat Babylon kumpi Nebukatnezar ahi hi.A kidawk thamcing a gam uk nih pha uh a, a tapa bawltawm Belshazar tawh lim la khawm in kha 2 nei hi.BC 606 pan 538 kum dong uk uh hi.Nebukatnezar sih khit ciangin Belshazar hong mang hi.Agam uk ulian tul khat tawh pawibawl a, Nebukatnezar manlai a,Isreal gam a biakinn pi sunga kham hai te tawh zu hong dawn uh hi.Tua lai tak in kawmtungah khut tawng khat in lai at a,MENE MENE TEKEL UPHARSIN ci-in gelh hi. Daniel bei in simthei a,zong khiatsak thei hi."Nang hong kitawi khai a,leek zolo na hih manin,na gamteng midang khut ah kipia ta hi,"acihna ahi hi.Tua akhiatna akigen khit phet in,Medes galkapte hong lut in aluah ta hong hi pah hi. Medes leh Persia te kikop in BC 538 pan 331 ding uk uh hi.Tua Vompi kamsunga naakguh 3 pen,amau mai-a tua gam anei ngeisa Lydia,Babylob leh Izipt (Ptyolemy)te agen na ahi hi.Medes leh Persia te in a ukna gam pen Dan 2:39a,sumsan kumpi ahi Kamkei lutang 4 leh kha 4 nei Alexander kumpipa in BC 331 kum in sutkhia leuleu hi. Kamkei lim tawh alah mah bangin,Alexander pen galdo hat in manlang mahmah a,nisuahna lam gam te nawk masa a,India gam Indus gunpi piau dong gal hong zophei hi.Ama min pua in khua hong phut kawikawi in,ama min zui khuapi 70 bang hong phut man hi.Ahih hang in CIsa nattun natna tawh ni 6 sungin,June 13,BC 232 in si ta hi.Akhut nuai-a galkap mang General 4 te in phel khap uh a,(1)Cassander in Greece gam(2) Lysimacus in Asia Minor (3) Seleucus in Babylon leh Syria (4) Ptolemy in Izipt cihbangin hawm hi.Muallak minam gamh-tat minam te hong laang uh a,BC 168 kum panin Roman Empire hong dingkhia hi.Grik te kumpihna hong bei ta hi. Hih kumpi 4 na te pen, Kumpi dangte tawh kibang lo-in, kihtak huai in gamh-tat in, a mai-a atuah teng pet zan in, tuancil uh a, ki 10 nei hi, ci hi. Dan 7:23,24 ah, tua ki 10 te pen hong om ding kumpi 10 te hi, ci hi.
Dan 7:8.Ka et lai leh, amaute lakah adang kineu khat hong pusuak a, ama mai-a ki 10 te laka ki 3 botkhia in, amau mun ah amah ding hi, ci hi. Dan 2 sunga alahna ah, sik kum pi ci a, Dan 7 sunga alahna ah sapi min kithei lo, akihtak huai phadiak sik-ha nei a, a cih zah khat in, Roman Empire te pen khauh mahmah uh a, gamh-tat in, kih tak huai hi. Topa Jesu zongh hih kumpi khan' lai tak in hong suak a, hih kum pi khut sung mah ah hongsi hi. Tua zah a sik lim vi ve tawh ki gen teh zaw zen gam hi napi in, Dan 2 sung a kheme 10 aneih mah bangin, Dan 7 sungah ki 10 mah nei a, amau sung pan mah in kikhenkhia in, phel 10 hong kisuaha tua te pen England, Germany, France, Italy, Potugal, Spain, Switzeland, Heruli, Vandals, leh Ostrogoths te ahi uh hi. Tua 10 te lak a ki neu in thum abawh khiat te pen, Heruli, Vandals, Ostrogoths te ahi uh hi. Tua kineu pen 'Papal state' a ki ci pope gam ahi hi. Ad 330 kum in, Constantine kumpipa in nisuahna lam ah kumpi khua tuah a, akhua satthak pen ama min zui in Constantinople ci hi. Tu in tua khua pen, Istanbul kici hi. Tua khua ah a tokhom angak ciangin, nitum na lam gamteng uk dingin Rom khua panin pope Zum pen Anaa ap hi. Tua bangin nitumna lam Roman Empire leh nisuahna lam Roman Empire hong piang hi. Rom khua a pope zum pen, nitumna lam Roman Empire teng uk dingin Anaa ap ahih ciangin, biakna mang lah ahi veve, leitung uk kumpi zongh suak hi. Bishop te, Father te leitung uk thukhen zum ah tu in, prelates te kici uh a,thukhen in phiangsiah khon uh hi. Tua pen kineu hong pusuak , ki 3 bot khia pen ahi hi. Amau upna bang azuihpih nuam lo te, Heruli pen AD 493 kum, Vandals pen AD 543 kum, Ostrogoths pen AD 538 kumin, akumpina uh vatmai in "Papal State" suak sak uh hi.
Nisuahna lam Roman Empire pen Constantine khuapi panin ki-uk a, Empiror Justinian hong maan' ciangin, AD 534 kum in, Decree khat piakhia a,"Nitum nalam Roman Empire sung ah, Rom khua a,pope thunial pepeuh thah theih nading akhuan om ta hen," ci hi. Tua mah zui in,pope thunial te kumpi thunial suak a,agamgam ah akumkum in, akibawlsia, kigawm gawm in 50,000,000 val bangin pope pawlte khutlum in sihna thuak uh hi. Pocket bible Hand book, Henry H.Halley.p.636.
Laisim mikhempeuh Topa'n thupha hong buak suk hen..
zop lai ding.
Kimnu/nunu
No comments:
Post a Comment