Dear Laisim mimal,
Azom te,
Pawlpi 6 na,Philadelphia.Mg 3:7-13. Hih pawlpi min akhiatna pen, Sanggam banga ki-itna cihna hi a, gamdanga sangmangte in thu hong puakkhiat sung, 1792-1844 sung huam hi.
Asiangtho, athumaan, David kong hon'na anei mi athupiakna in, kuama khak zah loh in hong-a, kuama hon' zaw loh in khak hi. Na mai ah, kuamaa khak zawh loh dingin ka hong hi, ci hi. Tawmkha thahatna nei in, Ka thu na zui-a, Ka min nial lo-in na sepnate ka thei hi. Leitung khempeuh in athuak ding ze-etna te panin kong dal ding hi. Amanlang in kong pai ding hi. Na kumpi lukhu kuamah in alakkhiat loh nadingin na neihsa kiptak kem in, ci hi.
Hih hun huam sungteng pen, Gospel thu gamdanga hong kipuak khiat laitak hi a, thupuak mangte pen kuama guaih loh in Khasiangtho hansuahna tawh amau leh amau kivak in Gupna thumaan athei nailo gamte ah hong puak uh hi. A tun'na gamte na kihai lai lua ciat a, sasial ne, mihing sa peuh ane lai te na hi hi. A masa pawlkhatte bang na go in asa na ne lel uh hi. Tua bangte amin kidawk kik lo mai hi. A min akidawk kik ih cihte, asi thei lo zah in suakta to zel a, hong kidawk kik thei uh na hi zaw hi. Ama hon'te kuamah in khak zo lo a, ama khakte kuamah in hong zo lo acih mah bangin, misane gam te nangawn ah Gospel thu alut nadingin kong hong-a kuamah in dal zo lo hi.
India gamah. 1793 kum in William Carey hong lut hi. Khedap khui nasep sem in kivaak a, Gupna thupha hong puak hi. Calcutta hong tun' ciangin College sia khawng hong sem kawmkawm hi. Kamphen muan'huai pi khat zong hong suak hi. Khatvei akhualam va ciah kik a, Missionary Society va phuan a, England panin sangmang apuak khiat uh ciangin nungzuih-a ahuh theih nading uh Society hong piangkhia hi. 1812 kum in hong pai kik a, USA pan-a hong pai Adoniram Judson tawh hong ton in, Tembaw tungah thu kikumkum in, tuithehna sangin tuiphumna maan zaw ci-in mu saka,(Sangmang) Thu puak mang veve hi sam napi, Calcutta hong tun'uh ciangin khua laizanga gunluang Hoogly tui sungah tuiphum hi. Tua ciangin Judson zong tuiphum mang hong suak hi.
Kawlgam. 1813 kum ciangin Judson hong zinsuak a, Moulmein khua hong tung hi. Kawlgam pen milim bia hatna gam hi a, Pasian bia dinga hilh mangpa pen na bawlsia mahmah uh hi. Ni 7 sung bungbu khai-a, azi gal et sak,cih bang, thong sungah khia a, khua khat leh khat kikal gamla pipi, zanggam leitang sa pen khedap bulh lo-in akhekia tawh lam pai sak cih bang, akikhumcip sungin athu kiza lo-in a zi na si hiau mawk cih bang, zi nei kik zel ta leh sihsan thithe a, atawpna ah, amah mah kudai cina a agam lam uah kibawl ding ci-a Tembaw tuangpen, Tembaw tungah si a, aluang tuipi sungah kipaai hiau lel, cih dong thuak hi. Leitung ah bel mun leh gam nei lo ngel mah sam uh hi. Hankhuk nangawn nei zo lo hi. Gamdang apaite zong amah sangin agenthei zaw nangawn tampi om uh hi.
Africa. 1792 kum in Robert Moffat lut hi. Carey sangin kum khatin lol zaw lai hi. Tua phual ah na innteek a, 1813 kum ciangin David Livingston hong paithuah ciangin ama tanu tawh na teeng sak hi. Livingston pai pen Kawlgam a Judson hong pai kum hi. Hi mite tangthu te gen ni ci leng, sau lua, zaknop lua, thupi lua hi. Livingston bangte, azinkawina ah si-a, tungkik nawn lo lel a, akizon'zon ciangin Tanganzika tuili gei ah, atutsa in keulum in kimu hi. Khatvei zong, Humpineelkai in apehlup deksa hi-a akawlkihawm guh kitan sa hi.
Sengam. 1807 kum in, Robert Morrison lut hi. Sawltakpite Thomas in zong gam monglam te na baan ngei ahi nam?cih upmawhna om hi. Khristian nasepna kizeel in, gamkhunglam Mongol gam teng bangin Pasian Thukham sawmpen, agam Upadi in zang pah hel ngei kici hi. Athuak siatna te bel, gen khit zawh hi lo ciat hi.
America khanglam gam. Allen Gardina in thu va puaka, tuipigei dung sukte bang, guahtam lua-a lo kikho thei lo, ama thu-a po nahtang lak bebek hi-a, nahtang bekbek an in akine gamte bang ah zong thu va lut veve hi.
Khanglam Tuipi sung thukulh lakte. John G.Patton leh John Williams te va lut uh a, sasial net, mihing sa zong ane te lakah Gupna thupha va puak uh hi. John G.Pattan tangthu akigelh na khat ah, sih theih nading 61 vei kipelh in suakta hi, ci hi. Laodekea khang hun in ahuam khit nangawn in hih tuikulh lakte ah, Pasian thu tangkona nunung, Thukhen na hun tangkona ahi Mg 14 sung, vantung mi 3 te tangkona apua sangmangte pai ciang nangawn in na hai lai mahmah uh hi.
C.H.Parker te lut dan kigen na tawm hong gen leng: C.H.Parker pen, migawng, mi kungkang, satak nei lo khat hi. Solomon tuikulh panin abaan zopna ding gamveel in gunkuang neu tawh ka pai uh a, gunkuang muk-ah kei tu in ka hot a, ka lawmpa pen gunkuang taw-ah tu in aheikawi ci hi. Ka painopna tuikulh ka tun'uh ciangin, tua sasial ne mite in hong mupah uh a, hong dawntuah pah uh hi. Gunkuang muk pen tuipigei leilak ah ka kingasak uh a, suangtaal zapi mun nuam khat ana hi laizang hi. Kei pen gunkuang muk-a tu ka hih manin hong kaikhia pah uh a, suangtaal tungah hong thallup sak uh hi. Ka satak limciit na eu theih nading zong kawikawi a, ka tan satak leh ka phei satak akhal in eu nuam uh hi. A temta te uh, ningthum nei, akiu ciat ahiam hi a, a utna peuh ah phut leh, akaih nalamlam, a bun kawikawi ding ahi hi. Ka khuknuai tan satak kipatna pan phut dingin kisa zel in, ka satak pen guinei lua sa ahih manin, eu tham sa lo-in, ka pheilam hong zawt to hi. Ka pheituam ipsunga ka mohthoh puak hong maikha hi.'Hih bang hiam?' ci-in a mit tawh hong dong a, kei zong atang ngam hetlo pen, tatkhuan ngah suak ka hih manin, ka ipsawk in, mohthoh lakhia in dal khat akam ah ka hen leh, ne-a limsa in, a omlaite hong kituh lialua uh a,bei pah hi. Ka pheilang khat hong zawt leuleu-a Kawlphit ka puak mai kha a, kei zong lakhia in ka muut a,'Kei ading tamkhang suangpi, Nangma sung hong beel sak in'cih la ka muut ciangin zaknop sa uh a, ka thallupna zong sawtpian ta sa uh a, hong phong to in ka tutsa in la ngaihte ka muut muut hi.
Ka hong am mahmah ta ahih manin,Ka lawmpa kiangah amau theih loh in, hong mut khel zolo ding na hi hiam?ci-in ka zol niloh hi. Amah zong,gunkuang tawlam ah tangkhia ngam lo-a toncip ahi hi. A tawpna ah, ka lung-am lua ahih manin amau pia in, ka khut tawh lak in, tu in nitum ta hi. Zing ciangin hong paikik nungin, Moh tampi hong puak nung, tu in va ciah phot nung, ci-in ka nget leh, akhuan hong pia zenzen uh hi.'Kagawm'luat na in ka nuntak na uh hong huu bilbel hi, ci hi,' ci-in kigelh hi.
Tua zah thamlo gentheihna thuak in, bangtawh ih guaih het loh, ana kikhelbawl gawp lel pipi te in Gupna ih ngah nading hong deihsak in, amau nuntakna khaam liangin Gospel thu hong puakna pen, SANGGAM banga ki-it na hi tham lo-in sanggam sangin zong ih zaw ahih manin pawlpi min, Philadelphia na pia hi.
Khapna. A zo mi, Ka biakinnpi khuam ka suaksak ding hi. Tua nung ciangin mundang ah paikhia nawn lo ding hi. Tua mi tungah, Pasian min leh Jerusalem khuathak min leh Keima minthak ka gelh ding hi,ci hi.
Ciamtehna.Mg 6:12-17. Tuu no in ciamtehna 6 na ahon'ciangin, thakhat in nakpi zinling hi. Ni mial hi. Kha sisan bang hi. Ak site kia zaizai hi. Van laidal zial bangin kizial hi. Mihing Tapa vanmeei tungah tuangin hong kumsuk hi.(tomkaih)
Tuu no in ciamtehna ahon' zel,khatna pan gukna dong hi ta a, vantunga Ama ciam teh na hon' dan pen e'n va muhpih lo hi hang. Ahih hangin tua hilhkholhnate hong tun' suksuk dan tawh et in, kithei thei hi. Tu in 6 na ahon' khit zong kum za val sawtpi paikhin ta hi. Nov 1,1755 in, tua ma in tuazah-a nasia zinling a om ngei lo zah leitung zinling ciamtehna lakah anasia penpen LISBON zinling akici hong liing hi. Tua zinling nasiat zia pen akim in ih sim nop leh GC,khawk 17 na, Tua Lisbon zinling akipan tu dongin zinling nasia kinawh semsem lai hi.
Nimial leh kha sisan suak. May 19,1780 in piang leuleu hi. Kha sisan suak zong tua ni zan mah hi. Leitung na lamdang ciamtehna laibu te ah anasiat zia, alauhuai zia, amulkim huai ziate kigelh ciat hi. GC,khawk 17 sungmah nasim in. Kamsangte hilhkholhna leh Topa Jesu in Mt 24 sunga agen sukna ah, akammal akizom in agen suk ziauziau lel uh hi napi,hih thupiangte khat leh kaht kikal kum tampipi kihal hi. Zinlingpi kipat leh Nimial kikal zong kum 25 kihal hi.
Aksi kia. Nov 13,1833 ni zan hi. Atung sim ding laibu sungmah na en in. Nimial leh Aksi kiat kikal kum 52 kihal hi.
Van laidal zial bangin kizial. Hih pen tu ni dong kizial nai lo hi. Hih hong kizial leh tua vantung kikeek a, kihongkhia van panin Gumpa, Topa Jesu vanmeei tungah tuang hong kilang ding hi ta hi. Tuu no in ciamtehna 7 na ahong khiat ta tawh akizom hong hi ding hi. Tu in van kizial ding pen kizial nai lo bilbel lai ahih manin, Amah dawn dingi ih kigin'theih nading ahun om lai suak hi.
Ahih hangin ih kidop mahmah nading akul khat pen, tua limlahna te amasa leh azom kikal kum 25 bek sawt a, anihna leh athumna kikal kum 53 sawt hi. Hih van kizial ding ih ngakna pen aksi kiat khit kum 160 val zo ta hi. Sawtvei kihal lua khin ta zaw hi.
Hih 6 na ciamtehna akihon' hun sungteng in, Pasian in leitunga Amah a it tatak te leh apuatham bek tawh abia ahi te, Mk 7:6-9,Tahun leh taang ahite khentel nadingin Ama mi te Sabbath maan tawh ciamtehna ngah dingin samkhia sak a, Satan nungzuite pen in Sapi ciamtehna Sunday mah khah nuam lo tentan sak in Sapi ciamtehna ngah sak ding hi, Mg 7:1-9;14:9-12 ci hi. Tua ciamtehna nasep hong kizo leh, Tuu no in agual hon' suksuk ciamtehna te lakah a nunung pen, 7 na hong hong dinga, van laidal zial bangin kizial in, hong kihongkeek ta dinga, vantung tawmvei sung gamdaii ding hun atungta hong hi ding hi.
Hih lai asim khempeuh Topa'n kilam thak na hong suak sak ta hen.
Zoplai ding.
Lungdam
Kimnu/nunu.
No comments:
Post a Comment