34. Sikha Thu Upna.

                                      34.Sikha Thu Upna
(551)
            LAISIANGTHO in apulaak vantung misiangthote nasepna pen
Khristiante adingin hehnepna leh lungmuanna bulpi khat hi napi,
Laisiangtho hilhna tawh aki lehbulh sikha thu in mi tampi upna lumlet
gawpin, muhna a mialsak khit ciangin lam a pial sak hi. Mihing in a
sitheilo pianpih khaa kinei hi cih upna pen Lawkite kiang pana a ki taw
upna ahi hi. Pawlpi lampial hunsung a Khristian upna thugui dinga hong
kiguang tawm upna manlo ahi hi. “Misite in bang mah thei thei nawn lo
uh hi” cih Laisiangtho in tel taka ahilh thu pen tua in a phiat khia hi.
Tua manin “gupna luah nading mite keem dingun, sawltak nasem ding
khate”(Heb. 1:14) a cihte pen tua misite’ khaa hi ci in um hiau mawk
uh hi. Laisiangtho in bel tuate pen vantung mite hi uha, sihna a om ma
pek nangawn-in mihing tawh kizopna ana nei khin zo uh hi ci-in gen hi.

             Mi khat asih khit ciangin phawk-theihna nei khaa khat om lai
hi ci-a upna pen a diak diak-in misite khaate in a hinglaite adingin na
hong seem thei hi ci-a upna ahi hi. Tua in tu lai sikhaa thu upna a
ultun nading a lampi a ziik sakkhol upna ahi hi. Misite khaa pen
Pasian leh A vantung mite mai-a va kilaak thei, a ni danga a pilna uh
sangin pil zaw lai uh ahih leh, bang hangin ahing lai te thu hilh-a leitung
khuavak sak dingin hong ciah kik phot lo uh ahi hiam? Mite up bangin
a sisate’ khaate in khua phawk in laam laam zaw zen uh ahih leh, adah
a akap-kap ahinglai alawmte un siatna athuak loh nadingun hong pai
in hehneem zel lo mawk uh ahi hiam? Sih khit ciangin (552) phawktheihna
nei khaa khat om lai hi ci-in a umte adingin huu saa tawh
amaute kianga hong kihil sikhaate pen Pasian kiang pana hong pai hi
kei, ci-in koi ci nial thei mawk mah ding uh ahi hiam? Satan gamtatna
pen Khasiangtho’ nasepna mah a ki sak theih nading lampi a hong
suak hi. Tua pen Satan in a ngimnate a tangtun sak theih mah mah na
khat a hi hi. A puuk vantung mite in misiste khaa bangin kibawl uha,
thupuak sawltak bangin hong kineih uh a hi hi. Tua bangin misisate
leh ahinglaite kizom thei bang keek in hong kigen uh ciangin, dawi
mangpa in ami khemsiamna tawh mihingte lungsim a bumzo mah mah
ahi ta hi.

              Mihingte mai ah a sisate alawmte uh’ meel suun khat peuh a lak
thei hi. A meel puak dan, a kampau, leh a awsuahte a tel mah mah in
kibangsak lin-lian zah in a lim ciin’ dan siam mah mah uh hi. Mi tampi
in tua a lawm itte uh tawh kimu kik thei in, vantung ah lungdamna tawh
kidim cih a zak uh ciangin lung dam pih uh hi. Tua tawh lung hiang
nawn lo in a thugen teng ngai-in a zui pah uh hi. Tua bang in a om uh
ciangin “a kheemthei khaa te ahi zongin, dawigilote thu hilhna ahi
zongin” azui uh ahi gige hi.

             Misite amau kiangah hong hawh thei takpi hi ci-in mite in a up
uh ciangin, pianthakna neilo a a site bang diak a hinglai a lawmte
kiang ah a va hawh dingin Satan in deih diak hi. Bang hang hiam cih
leh, tua bang mite na ngawn in vantung ah mun hoih ngah-in nuam va
sa uh hi ci-a a kigen ciangin, midik leh midiklo zong a ki lamdanna om
tuan nawn lo cih a suak sak pah hi. Hih upna khial in mun zaa hong
zeel baih mah mah hi. Sikha khua pan hong pai-a kibawlte in khat vei
vei thupiang dingte gen khol uh a, a kidop theih nading uh hilh kholin,
zong hong maan thei zel hi. Tua banga mite muanna hong kip
ngah khit phot uh ciangin upna lam ah Laisiangtho bang lopi hong
hilh pah uh hi. Leitung a om lai a lawm itte uh hoih nading a
lunghimawh mah mah bangin hong kineih uh a, thu kawng heek-in
upna khial, alauhuai pi pi hong guang uh hi. Thumaan pawl khat a
genna uh zong om sak uh a, thupi lian pawl khat hong piang dingte
bang gen khol uh hi. A genkholh uh thupiangte in amau thugente
uptham cing ahihna teci pang sak-in, tua lak ah khemnaa zuauthu hong
zeplut uh hi. Tua khemnate zong mipi in maan ding hi, ci-in um-in
Laisiangthothu zah-in saang uh hi. Pasian thukham hemkhia uh a,
hehpihna Kha Siangtho nasepna neu bawl-in Thuciamna sisan pen a
niin in mu sak uh hi. Tua sikhate in Khrist’ Pasian hihna leh Piangsakpa
ahihnate nial-in, amaute tawh aki kim lel in gen uh hi. Vantunga
galphuang cil pa in Pasian a langdona khawl nai lo hi. Vantung pan a
apat hi-a leitungah kum tul guk dek tak bang zom in ado ni loh hi. Tu
hun ciangin ngimna thak tawh heii-in khem beh lai a hi hi.

              (553) Mi kim khat te leu leu in hih sikha tawh kizopna pen,
mitphial bang lel in a tuat khak uh hangin, tua akilang na tampite
nungah mihing bawltawm theih het loh vangliatna khat in na a sem ahi
zaw hi. Kiu kek kek-a hopih cih bang pian pan-a ki pan tu lai sikhathu
upna pen mihing lahtheih mitphial siamna hilo in a puksa vantung mite
in mihingte a khemna nasepna hi zaw hi. Mihingte’ suk siat nadingin
azat gaalhiam hoih pen pen dinga a bawl ahi zaw hi. Sikhathu upna
pen mihing bawl tawm mawk hi ci-in a neu seh vialmi tampi tak in ava
maitang muh uh ciangin, mihing bawltawm mawk theih hi lo takpi hi
cih a va mu tel san pan uh hi. Tua in amaute a kheem zo ding hong hi
ta hi. Tua khemna pen Pasian vangliatna takpi ding mah in um to sak
pahhel sawnsawn lai hi.

              Hi bang mite in Satan leh a sawltakte na lamdang bawlte a muh
uh ciangin Laisiangtho thumaan pen a enthawl pah mai uh hi. Satan
huhna tawh Pharoah-ii mit phial siamte in zong Pasian nasepna lim ciing
in lak thei ve ve uh hi. Khrist hong pai ma deuh-in zong “Satan bawlna
hangin zuauna tawh kipawl vangliatna, na lamdang leh dipkuat huaina
apawlpawl te tawh ahi zongin, kisiatna tawh a ngah mite ading diklohna
kheemna a pawlpawlte tawh ahi zongin” Satan vangliatnate hong ki
dawk kik ding hi, ci in Paul in zong na gen hi. 2 Thess. 2:9, 10.
Sawltak Johan in ni nu nung ni-a na lamdang kilak dingte a genna ah
“Mite maitangah vantung panin leitung dongin mei a kiasak dong in na
lamdang a lian mah mah a lak hi.” ci hi. Mang. 13:13, 14. A kineih
tawm na tawh Satan in mite a kheem nadingin mitphial bek zangh ding
ci lo zaw hi.

               Khuamial kumpipa in sawtveipi sung a zat zuau-khem nadingin
aneihsa avangliatna zat kizen in a siam mah mah hi. Amawhzolna ciangin
mipawl tuam-tuamte tungah amau omzia a cial cial tawh kituak ding in
zoldan a siam mah mah hi. Mi teisate tungah sikha thute pil leh tei zawkan
omzia tawh khem ahih manin, a (554) thangzaak sungah kailut zo ve ve zel
hi. Sikha thu-a pilna pen James in a genna ah, “Tua bang pilna in vantung
pan hong tung pilna ahi kei hi; leitung pilna, pumpi pilna, dawi gilo pilna
ahi hi.” ci hi. James 3:15. Vantungmi Seraph bang keek in kilanga gamlak
ah Khris ava khempa in iplah ahuai thei bel meel pua in mi hing te a khem
hi. Thu lianpipi gen natawh migina phalote lawp pak sak pak dan a siam hi.
Ki-itna leh thupha bawlna khawng thupi asa bang lim-in thu gen siamna
tawh mite a huup hi. Ngimna-sang zaw nei dingin mite toktho in, amau
pilna suangin a kisaktheih sak mah mah khit ciangin tawntung Topa
simmawh dingin a bawl hi. Leitung bup Honpa nangawn mualsang dawn
tungah pai pih thei a, leitung kumpi gam teng leh a minthan na teng uh
Zeisu mai-a a laktheihpa-in a mimal tawh ki tuak pen pen ding mawhzolna
hong keng ding hi. Pasian kepna tawh a na kidal kei buang uhleh tua
mawhzolna in mite’ lungsim lum let ding hi.

                Abatzawhloh ding leh akiphallo lung pilna nei in, dinmun
sangzaw alunggulh na ding in Eden huan sungah Evua lungsim toktho
in, mot phatna tawh a mawhzol bangin, tu hun in zong Satan in tua
mawhzolna teng mah zangin mite hong zol hi. Amah puuksak thusia
pi pen zong tua mah hi a, tua bang pian mah tawh mite susia dingin a
ngim hi. “apha leh a sian thei-in Pasian tawh na ki bang ding uh hi” a
ci hi. Piancil 3:5. Sikha thu Upna in a hilhna ah, “mihing pen khantoh
ma nawh nam a hi hi; a piantuung-akipan khang toto in, a tawntung
dinmun ahi pasian suah dongin khang to to ding hi” ci-in hilh hilh hi.
Tham loin “Mihingin ama lungsim utna bangin gamta dinga, dang khat
in amah va ukse lo ding hi”. “ Ama lungkimna tawh a khensat a hih
man-in, thukhensatna a maan ahi hi. Tua ahih maninThukhen tokhom
nang ma sung ah a om hi” ciin hilh uh hi. Sikhathu ahilh siate khat
genna ah, “Khaa lam thu phawk theihna” a neih ciangin, “lawmte aw,
mi khempeuh in mawhna sung ah a puuklo pasian nam vive I hi hi:” ci
hi. A dang khat leu leu in, “Picing in adik mi khem peuh Khrist ahi
pah uh hi” ci hi.

               (555) Mihing dinmun man tehna tawi suang ahi Pasian dikna leh
picinna sangin piansak nate thupi sak zawkna lungsim Satan in ong
guang hi. Pasian thukham nget dikna mun ah mihingte hoihsak gamtat
pha leh kuhkalnate ong guang hi. Tawi-suang banga mihing nuntakna
teh na ding in mawhnei, a khial den mihing’ pahtak thukhunte,
thukhensatnate in mihing a ding kitehna tawi suang asuak ding in Satan
in ong guan hi. Tua bang gamtatna te in Pasian lim leh meel sun in
khantohna ahih sangsik in dikna pan kiamsuk na ahi zaw hi.

              Pilna lam leh Khaa lam thu ah, I et bang zui-in I ki kheel hi.
Lungsim in a ngaihsut sut khat pen dam dam-in pumpi in a zui hi. I saan’
pen pen mah ki it sem sem in, ki zahtak sem sem hi. Mihing in aneih thei
sianthona, a hoihnaa, leh a thumaanna dinmun ciang khat sangin sang
zaw ding pianpih nuntakna nei lo hi. Mi khat in amah pumpi a thupi pen
in angaih sut hangin tua sanga sang zaw in sangkhaan to zaw thei tuan lo
ding a, dam dam-in niam sem seem lel ding hi. Asang khaan’ thei Pasian
thupha beel lo in amah leh amah adin sawm leh akiam suk hipah hi.

             Ci leh sa lunggulh na tawh ki diah in, gualnop azangh, a
khuaval, a zulhtatte in pilvaanga a kipuah anavak mite sangin Sikhathu
um baih zaw uh hi. Bang hang hiam cih leh amau omzia zui-a
khem theih nadingin mun hoih tam zaw hi.Tua ding mah in Satan in
mite gi-nat lohna leh athanemna munte a zong niloh hi. A mimal thanem
theihna munte ciamteh in, hun hoih a omciang in mawhzolna in pelh
lo-in a zangh pah lian hi. Kideek kidaamna meel nei nawnlo-in, ahi
ding zah vaal-in mihingte uangtat sak-in, apumpi, a lungsim, leh a
nuntakna tha teng a kiam sak hi. Tua banga pumpi kepna meel nei lo
mi tul tampite in a ngongtat ganhing pianzia vom dingin susia khin
thamlo in a susia sia lai ding hi. Tua nasepn a picin theih nadingin
Satan in sikha zangh-in, “ thukham khempeuh sangin mihing a
saangkoih zaw pilna in pilna maan ah hi.” “A hi khempeuh in man in
dik” ahih manin, “Pasian in mawhsiatna khat bek anei kei hi;” “aki
palsat mawhna khempeuh zong mawhsiatna in akaai sak kei hi,” a ci
sak hi. Mite in amau tupna pen thukham saang pen hi, suahtakna pen
ut banga nuntak theih nading phalna hi, mihing pen amah leh amah
kisit tel lel hen, ci-in a hong pom uh ciangin mun cin gam cin pan-a
phulkhia siatna leh kiamsukna pen lamdang sa in alung hi mawh ding
kua om nawn ahi hiam? Mi honpi in tua amau leh amau hoihsak banga
gamtat theih suahtakna pen (556) lungdam takin saang uh hi. Ki
khalna kamkaih pen lunggulhna ngawng ah vawh uh hi. Lungsim leh
nuntak thatang teng ganhing pianzia in ukcip khin hi. Satan in tuate
noptak sa-in, a ngeen tawh Khrist nungzui akici mi a tul tul-in khuh in
a lom lom-in, a luak hi.

             Pasian in tua thaang kisiahte telmuh zawh nading khop
khuavak leitung ah hong pia ahih manin, kua mah in tua sikha-thu
taksan kul lo hi. Tua sikhathu-upna thubulpi in Laisiangtho thu a kitelcian
pen pente nangawn langdona ahi hi. Laisiangtho sungah
Misite inbang mah thei thei nawn lo uh hi, a ngaihsutna khempeuh
uh kisia hi, ni nuai-a na kisem khempeuh theih nei nawn lo uh hi.
Leitunga a itpente uhhi ta leh, nuamna dahna hita leh phawk nawn
lo uh hi,(Thuhilhsia 9:5) ci hi.

               Tham loin, Pasian in misisate’ khaa kineih in a hong kilakte tawh
kizop ding khaam hi. Hebrewte hun lai-in zong tu hun-a sikha-hopihte
mah bangin misisa-te tawh kiho thei a kinei mi pawlkhat a om hi. Sikha
khua pana hong lengla a kinei tua “meltheih khaate” pen Laisiantho in
“dawi gilo’ khaa” hi ci hi. ( Gamlakvakna 25:1-3; Late 106:28; 1 Kor.
10:20; Mang,. 16:14.teng saikak in). Dawi lawm neite pen Topa adingin
kih huai ahih manin, mulkim huai takin sih daan kipia pah hi. Siampilaibu
19:31; 20:27. Dawi lawmnei cih min mah mah pen ki lipkhapin,
Khuamial Hun omzia lahna bang khat in aseh uh hangin tua sikha-thu
in mite atul zaza, a maakmaak-in bum hai khin hi. Leitung pilna lam
tawh kop in a kalsuan ciangin, pawlpi tampi zo gawp-a, leitung ukte
pahtakna ngah-in kumpite zum sungte na ngawn azeel khin hi. Hih
zuau khemna lianpi pen a kilipkap taanglai-a dawi lawmneihna pen mah
thaksuah kik in, a hong “piang thak” ahi hi.

             Hih in sikha-thu ahi hi cih na ding teci ih mat zawh kei phial leh
zong theih dingin, thumaan leh mawhna, a hoih a siang pen Khrist
sawltakte leh a nin pen pen Satan naseemte kikaal a dei dan het loh
mawk na pan bek in zong Khristiante adingin sikhathu-upna a kikhen
tel thei ding ahi hi. Mi khansia pen (557) pen khat peuh vantung ah
om-in a ki paakta mah mah-in Satan in mite tunga a genna ah: “Bang
zah in gamtat siatna ahi zongin, Pasian leh Laisiangtho up leh uploh ahi
zongin bang mah thupi lo hi. Hoih nasak bang bang-un gamta nungta
ciat lel un. Vantung in no mau inn ahi hi” ci uh hi. Tua sikha-thu nasem
siate in, “Topa in a sia-gamtate a hoihin ngaihsun a, zon itin amaute
tungah lungkim takpi hi…thukhen ding in Pasian koi lai ah om ahi hiam?”
Mal. 2:17 a ci uh hi mai hi. Pasian kammal in bel, “A phate sia ci a,
khuavak dingin khuamial koihin, khuamial dingin khuvak …akoihte in
gimna ngah ta uh hen “ ci hi. Isaiah 5:20.

             Akhemthei khaa te Sawltakpite ong kineih in, leitungah sawltakte
a om lai uh a Kha Siangtho humuapna tawh a gelh uh laisaingtho thute
tawh a kilehbulh in thu hong gen ta uh hi. Laisiangtho pen Pasian
Khasiangtho kiangpan humuap na tawh kingah ahina nial uh ahih manin,
Khristiante lam et bulpi teng sia sak uh-a, vantung lampi hong lak
khuavak a mit sat uh hi. Satan in leitung buppi mai ah Laisiangtho pen
tangthu bang lel hi a, minamte hai lai a om zia tawh kituaka kipia hi ciin
um sak ding a, tu hun adingin tua zah pi-in ki thupi seh nawn loin, tu
hun tawh kituak nawn lo ahih manin ki paai khia ta hi ci-in pom sak hi.
Laisiangtho-a Pasian kammal let cinten nading munte ah tu lai-a sikha
te hong puak thuthakte pom zaw sak hi. Tua bangin uk theih nading
zawi (lampi) bawl a, ama deihna bang bang leitung bupin a um sak hi.
Amah leh a nungzuite thu a khen ding laibu pen paam paih-in a utna
peuh deenna-a, leitung bup Honpa pen zong mi mawk mawk khat lel
sangin lamdan zawknaneituan lo sak hi. Han cing Rome galkap te in
Jesuh’ thawhkikna thu a maanlo-a a gen nadingin siampite leh upate in
a kam hum uh a, thu hi lopi-a a theih sak mah bangin, hih sikhaa naseemte
in zong Honpa nuntak lai a thu piangte leh a na lamdang bawlte nangawn,
a bawl lo mah sa in a ki-up theih nadingin hanciam uh hi. Tua banga
Jesuh ahepkhiat khit uh ciangin amau in na lamdang bawl in Khrist
nasepsa nate sangin nasia zaw mah mah ci-in gen ding uh hi.

             Sikha-thu Upna in tu in a sepziakheel ta hi. A huat huai zaw
diak mun teng Khristian min tawh khuh in a liah sak uh hi. Ahih hangin
kum tampi sung mipi mai ah hilh in laikhetna te (558) pan ahawmkhiat
uh thute kilangh lua mah mah khin hi. Tua a hilhsa thu upnate pen kisel
cip-a, nial kik theih zong hi nawnlo ahih manin, a sep ziate uh pan-in ki
lang khia ve ve hi.

              A sepziate uh nidanga te sangin neuseh zawk ding hi het lo-a,
khemsiam zaw uh ahih manin a lauhuai zaw lai hi. Amasa lai-in Khrist
leh Laisiangtho pen nial uh hi. Ahih hangin tu ciangin anih-in ka saang
uh hi ci sak napi, Laisiangtho pen piangthaklopite deih zui in khia uha,
a thugil thupi tatate in khiatna mel nei lo dingin asuah hiau mawk uh hi.
Itna pen Pasian nuntakzia thupi pen hi ci teei napi, sia leh pha theihna
ciang bang lel-in neu seek-in lungsim ginat zawh lohna in anei zawsop
uh hi. Pasian’ thutang in mawhna a deih loh luatna, Ama thukham
siangtho’ deihngetna thute lah muhkhak lohna ah koih cip uh hi. Mite
in thukham sawmte zong dangka si banga a seh lel nadingun kihilh hi.
Laisiangtho upna thuguite bulphuhnanusia in, mi a huupthei, a zaknop
phuah tawm taangthu te mite in aa pom zawkna dingun a makaih uh hi.
Tua teng ciangin Khrist pen a kinial ngeisa zah mah-in hong kinial kik
hi. Satan in tua khemna pen a kiphawk khak loh nadingin mite thuman
muhna lungsim mit a hum sak hi.

                Tua sikha nasepna leh a huzaap a lauhuaina a phawk mi tawmno
bek a om hi. Mi pawlkhat in thei tel nuam in ava neh zel uh hi. Amau in
um tak sam lo uh ahih ciangin tua sikhate uksunga va kipiak ding pen
kihtaak huai sa saam uh hi. Ahih hangin a khamna gamgi khengin ava
kalsuan uh ciangin mi suam pipa in a vangliatna tawh amaute na bum a,
amau kimuanna lungsim nabang lo-in lehheii zo ve-ve hi. Khat vei ama
ut banga a lungsim uh akaih sak theih khit nak leh lah galmat salkhawiin
a khawi pah zel ahi hi. Amau thahatna bek tawh tua abumna leh
bilthak neihna pan in suakta kik zolo uh hi. Lungsim tamkham leh
muanna tawh Pasian kianga kingen thungetnate a hong dawn ciang bek
in tua thaang awk te ki honkhia zo pan bek hi.

              Gamtat hoih lo zongsatna leh mawhna thei gige-a nop asa mite
in Satan mawhzolna a sam sam uh a suak hi. Tuate in Pasian kiang pan
paikhia in, amau a vil vantung mite (559) taisan uh ahih manin, gilopa
in a khem ciangin belh ding nei lo suak uh a, baihlam takin puuk in
matsa suak uh hi. Tua banga Satan’ vangliatna tual sung a va lut mite
in a tawpna ah bang suak ding cih a ngaihsun kha het kei uh hi. Amau
sep theih na ciang ciang tawh mi dangte khim-sawn ding leh a susia
dingin ki zangh sawn thei pah uh hi.

               Kamsangpa Isaiah in, “Amaute in no kiang ah phun suausuau
in a pau mualmual vankah theite leh aisan theite kiangah thu
dong un. Mite in amau pasiante thu dongin, mihingte’ thu pen misite
dot ding mah hilo ahi hiam hong ci ding uh hi. Thukham leh
Laisiangtho thu tawh kituak in thu a gen kei uh leh tuate sung ah
khuavak om lo hi na ci un “ Isa. 8:19, 20(KJV) ci hi. Mi khat peuh
in mite pianpih omziate, leh sih cianga omzia tawh kisai thumaan a
theih nop leh Laisiangtho sung ah kitel takin a om hi. Tua pan mah
in sikha hopihte genna leh Satan nalamdang bawlte zong ki mankhia
thei mah mah lel hi. Ahih hangin mite in ci-le-sa lungsim deihna
banga suahtak mah ut zaw in, mawhnate it uh a hih man-un, paikhia
nuamlo uh hi. Pasian hilhnate awlmawh loin, khuavak a muh khak
ding uh a mit uh hum uh a, Satan in a ma ngimna sungah akihel
dingin puan gat bangin gan khawma, Satan samat a suak uh hi. “Bang
hang hiam cih leh, tua mite in gupna ngah nadingun ki-itna tawh
kipawl thuman a sang kei uh hi” tua ahih ciangin “amaute in thuman
thutak umlo in, gitlohna-ah nuamsa in, zuauthu um dingun khemna
in hahkata a sep thei na thu Pasian in amaute lak ah apiang sak hi.”
2 Thess. 2:10, 11.

             Sikha-thu kihilhna a na nialte in mihing bek nial hi loin, Satan
leh a vantung mite zong a do uh ahi hi. Amaute in alianbelte,
vangliatnate, leh vantung tawh kipawl mun a a om gilo khaa te tawh
kido na ah a lut uh a hi hi. Vantung sawltakte vangliatna nang zo lo in a
tawkin kei buang leh Satan in a siksa leitang pan in letmat khat zong a
nungtolh het lo ding hi. Pasian mite in amah pen in Honpa’ nan’ bangin
“ci in Laisiangtho sungah kigelh hi” cih kammal bek tawh a nangh zo
ding uh hi. Tu nangawn-in Satan in I Topa khang lai-a a let ngeisa bang
mah-in Laisiangtho kammalte len ding a, a khiatna pen ama khembawlna
lam-a a lut thei dingin lumlet ding hi. Hih khemna hun haksa lakah a
kip din nuam mi peuh mah in ma nuntakna akihut nadingin Laisiangtho
gen thumaan a theih tel peel mawh ding ahi hi.

                Mi tampi in meel theihte leh ih lawmte banga kineih in alau huai
pen (560) pen upna lampial ahilh dawite tawh kitalsik ding uh hi. Tua
sikhate in eite hong khasiat mah mah bangin hong kigen ding uh a,
amaute I up theih nadingin nalamdangte hong bawl ding uh hi. Tua thu
thei khol-in kigingsa-in ih om dinga, misite in bang mah thei nawn lo uh
hi, tua a hong kilak mi pen gilo dawite’-khaa hi cih Laisiangtho sung
thuman ah kip tak in ih ding ding hi.

              Eite mai ah “leitung khempeuh ah atung ding ze-etna hun “ a
om lai hi. Mang. 3:10. Ama upna Pasian kammal tunga a phut kip lo
mi peuh mah tua ze-etna in zo ding hi. Satan in “gitlohna tawh a
siamtheih tawp in khemna seem in, mite a uk zawh nading hanciamna,
beh lap lap den lai hi. Ahih hangin ze-etna a thuak mipa in thukimna
tawh ana kipiak ciang bek in tua mi a zo theih ding hi. Bang hang
hiam cih leh “lungduai taka thuak dingin kong thupiak na man
nungsangin, …ken zong nang kong pengkhiasak ding hi. “ Mang.
3:10(ZIV), cih pen Honpa hong khapna ahi hi. Amah muang khaa
khat pen Satan zawhthawhna in a suksiat ding sangin, vantung hawm
nusiat liang zawin amite hum dingin a vantung mi khempeuh na ngawn
van pan a sawl khia nuam zaw ding hi.

             Pasian thukhenna pan ka suakta zo uh hi ci sak ding, migilote
tunga hong tung ding a lau huai khemna khat kamsangpa Isaiah in
hong gen kholhna ah, “Eite in sihna tawh thuciamna khat ih bawl zo
a, Leinuai tawh thukimna khat ih nei zo hi; a tumcip ding tuiciin
hong tun’ ciangin ei hong ban lo ding hi; bang hang hiam cih leh
zuau thu ih beela, zuauna ah ih bu hi” (Isa. 28:15) aci sak hi. Hihte
pawl pen tu-a kisik kik nuam lo-a ngawng khauhte, mawhneite daan
piakna om ke’n teh ci-a a ki hehnem in a ki lung muangsakte, mihing
khempeuh nin ta le uh bang mah dei-danloin vantung ah ki lato
nadinga, Pasian vantung mite bang hi ding hi hang, a cite kihel uh
hi. A thupi zaw lai khat in, buaina hunah (561) vantung Pasian pen
a midikte bukna kulhpi a hong suah ciangin amaute buk nading mun
kulhpi-in Satan piak sikha-thu upna tawh khemna zuauthu pen bek
ahi hi.

              Tu khang mite in gen zawh loh a lamdang mah mah in mittaw
uh hi. Mi tul tampi in Pasian kammal pen muantham cing saloin
Satan khemnate muang mah mah zaw uh hi. Kamsangte leh sawltakte
thu upna bang a leen tentaante pen a kho ngap lote leh mi zahpih
thei te in ciamnuih bawlna-in nei uh a, Khrist leh hotkhiatnading
geelna tawh kipawl thumaante nuihsan uhhi. Amau tunga tung ding
thukkikna thu khawngte nuihzak bawlna-in nei uh hi. Pasian cih
bang a mang nuam leh zui nuam napi thu tampi thei lo-a tha neem a
taksang baihte lungsim patau sak uh hi. Amau in sihna tawh thuciam
bawl zo uh a, Hell tawh thukimna nei khin uh ahih ciangin, Pasian
thuk kikna in amaute sukha thei het lo dingin thukip nei khin ci-in a
kitelsa bangin lung muang uh hi. Bang mah in amaute lungsim pholh
khia thei het lo hi. Mi khempa tawh kinak zop lua khin uh a, a
lungtang puak in thu zawh lua khin ahih manin a thaang awkna panun
a suak ta kik zo nawn kei uh hi.

              Satan in leitung bup a khem nading nasepzia sawt veipi a geel
khol hi. A nasep kipatna bulpi in Eden huan-a Eve tung pan kipan to
a, “ na si kei ding uh hi” “na nek ni un na mitte uh ki hong dinga, sia
leh pha thei-in Pasian tawh na kibat ding lamtak uh Pasian in thei hi”
Piancial 3:4, 5, a cihna pana kiphut to pah a hi hi. Dam dam-in behlap
to to a asisate khaa silo in ahinglaite tawh ong ki zom in na sem lai uh
hi cih sikha-thu upna ciang a tun’ ta a hi hi. Ama deihna leh a ngimna
zah a tun’ khin nai lo lai ahi hi. Ahih hangin hunbei kuan hun tawmno
bek a neih laitakin adeih tan atun dongin sem khin ve-ve ding hi.
Kamsangpa in, “uiphuk tawh kibang a kihuai kha pawl thum a
pusuakkhia ka mu hi. Amaute in nalamdangte lakin Vanglian tawntung
Pasian’ ni lianpi-ah gal do-in leitung khempeuh pan kumpite
kikhawnsak ding in a paikhia dawi gilo’ khate ahi uh hi “ ci hi. Mang.
16:13, 14. (562) Pasian vaang leh Ama thu a umte ki kem tuam dinga,
tuate lo buang leitung buppi in hih khemna sung ah lut khin ding uh
hi. Mite pen amau lung muan nadingin ki khim phot ding a, Pasian
hehna hong kibuakna bek in khangh-lo sak phing ding hi.

                Topa Pasian in agen in ah, “Keimah in thutan’na pen khau
khai bangin ka bawl dinga, thuman’na pen khaukhai sikbawk bangin
ka bawl ding hi; gial in na zuau buk uh dengkhia dinga, tui in na
bukna mun uh susia ding hi. Tua ciangin sihna tawh na thuciamna uh
kiphiat dinga, leinuai tawh na thukimna uh kip lo ding hi; a tuum cip
ding tuiciin in hong nawk ciangin note hong sugawp ding hi “ Isa.
28: 17, 18, a ci hi.

                  Laisim mimal khempeuh Topa kilam thakna hong suaksak ta hen.


Lungdam
Kimnu/nunu.