32.Satan' Thaangkamte

                                   32.Satan’ Thaangkamte
(518)
                   KHRIST leh Satan kidona tu in kum 6000 dek tak bang pai khinta
a, a sawt loin bei ta ding hi. Tua ahih ciangin mite ading deihsakna
tawh Khrist nasepte susia dingin a hanciamna a zah nih-in khan to a,
khaate a mat nadingin, gilopa in thaangte a kam kawi kawi hi. Ama
deihnapi pen in Lungdamna Thu Palai sep khawl-a mawhsutna a bei
dongin mite ki sik kik se loin khuamial sungah len cip thei leh a ut pha
pen a hi hi.

             Ama vangliatnate dalna tuam om khollo a, pawlpi leh leitung in
kikhelna mel neise loin a om hit hiat uh ciangin Satan bel lung muang
mah mah hi. Bang hang hiam cih leh ama matsa khaa te in, “Gupna ka
ngah nadingin bang ka bawl ding hiam?” ci-a a dot uh ciangin tua mun
ah dingg-in Khrist vang leh ama vang tawi khai-in Kha Siangtho
huzaapna talsik-in na dal tan hi.

              Pasian vantung mite Topa mai-ah thuko dingin a hong ki laak
ciangin amaute lak ah Satan zong hong kihel hi, ci-in Laisiangthoin gen
ngei hi. Job 1:6. Tua bangin ava ki hel ciangin Pasian bia nuam hi loin
midikte a bawlsiat nop luat zawk man a hi zaw hi. Tua bang pian ngiimna
mah tawh mite in Pasian bia dingin hong ki khop uh ciangin zong hong
kihel zel uh hi. Eite muh loh-in simtham-in biakna pia mite lungsim a
uk theih nadingin nakpi-in a hanciam hi. Galsiam galkapmang te in gal
do nading a hun a tun’ ma-in geel sa-in a koih bangun a nasep ding
geelsa-in a koih zel hi. Pasian thu puapa in Laisiangtho munte zong
khia in mite tunga a hilh ding ciamtehna a bawl ciangin na et pih gige
zel hi. Ama siam theih zah-in tua thuhilhna in (519) mite a lawn loh
theih nadingin a hun a mun na uk a, a na nawng kaai sak zel hi. Tua a
ki hilh thu a zak ding a kitaangsam pen pen mi khat peuh mun dang
khat-a a kihel loh a pha mawh het ding thu khat peuh na om sak a, tua
mun panin kisam khia sak helse-in tua thu zakha lo dingin a bawl hi.
Tua thu za leh nuntakna a ngah zo ding mi hoih ahih manin a tua cih loh
nadingin a hih theihzah-in a na dal hi.

             Khaa lam khua mialna in mite tuamcip ahih manin Topa naseemte
lungkham mah mah uh ahih zong Satan in a mu gige hi. Amaute
thungetna kammalte zong za gige hi. Awlmawh meel neih lohna,
thoptatna, thadahnate a bei khiat nadinga Pasian hehpihna leh vanglian
a ngette uh zong a ngai gige hi. Tua ciangin tha nuam takin hong seem
to pah zel hi. Mite zol-in, uisan na, leh a dang zongsatna khat peuh
tawh a lungsim te uh mawl sak phot-a, zak leh theih ding akisam mah
mah thute thei lo sak hi.

              Laisiangtho sim leh thunget a awlmawh lote ki thuzawh baih hi
cih pen Satan in tel mah mah hi. Tua ahih manin ahi thei zah-in lampi
zongin mite lungsim manlah sak hi. Mi pawlkhatte in mi hoih hi’ng kici
nuam napi uh in, thumaan om bang zui lel peuh ning ci loin, a kilempih
loh khat peuh’ mawhna leh a upkhialhna zong niloh thei uh hi. Tua
bang mite pen Satan khut zat a hi hi. Sanggam te a mawhna a zong den
mi tampi om uh hi. Pasian leh anung zuite in na a sep ciangin tua Satan
khutzat mite zong na mot omlo zel uh hi. Ama naseemte in Amah bia
uh hi. Thumaan zuite aki muhkhhialh nadingin a kammalte leh gamtatnate
a maan lopi in gensiat sak uh hi. Khrist adinga naseem kuhkal pen pen
te bang mi khempa peuh, mi’ kheemsa peuh ci in gen sia uh hi. Mi gina
leh mi thupi te mah zong a leh lam lam-in heek uh hi. Thu theikhin nai
ngaplopite a gensia uh hi. A siangtho a dikte nangawn misia mi kheem
theite, ci-in a ngaihsut theih zah-un a gensia uh hi.

            Ahih hangin kuamah taksan se kul lo hi. Amau in kua’ mi hi a
kua’ nungzui hiam, kua’ na seem uh hiam cih pen kithei thei lel hi.
“Amaute gah en le’uh teh, amau lungsim na thei ding uh hi.” Matt.
7:16. Amau nasep in sihna gunei, mi gensia Satan omzia mah zui-in
“ih u ih naute, I Pasian mai-ah sun tawh zan tawh a mawhsak” (520)
mah bang lian uh ahi hi. Mang. 12:10.

             Mi khem lianpa in khaate siah nading lampialna a nam nam-in
a nei hi. A suksiat nop mite’ duh leh deih theih theih ding na khat
pepeuh lampial nadingin siahna in koih khol gige hi. Pawlpi sung ah
acitak lohna, khalauna leh uplahnate a piangsak pianthak lohnate a
guang hi. Pasian nasepna tawh kizui in khantoh ding leh manawt ding
alunggulhte khaktan a sawm hi. Khristian zong hi mah sam napi, Pasian
a um tak zolo mitampi in, asan dingin thumaan pawlkhat hoih asak uh
hangin, upna maanlote Laisiangtho hilh upna zah mah-in guang khawm
thei lai hi.

               Mite in bang bang um taleh bang phamawh hiam cih dinmun pen
Satan’ mi kheemna hoih pen a hi hi. Amah in thumaan pen deih takpina
tawh ana kisan’ ciangin a saang mi in sianthona ngah lawh ahih ciangin
tua thumaan pen a taksalo, a huut akhial Lungdamna thu dang khat a
suah sak theih nadingin bawl hi. A kipatcil pan phet-in Pasian nasemte
in zuauthu hilh siate langdo-in nial uh hi. Tua zuauthu hilhna pen migilo
hi bekmawk loin khialhna lam vive pantah hi a, mite’ maibing sak a hi
uh hi. Pasian thumaan a heii te Elijah, Jeremiah, leh Paulte in khauhtak
leh dual lo takin langdo-in nial uh hi. Thumaan len misiangthote leh
upna maan a thupi sim lo mite aki hua mah mah uh hi.

               Laisiangtho khiatna aki leh lak-a, phuahtawm peuh in a ki
hilhna te, Khristian lak ah upna kaa zia zua a ki-tukalhte pen mite
buaisak-in thumaan atel theih loh nading uh a galpa nasepna ahi hi.
Tua banga Khristian sung ve ve pawlpi kilem lo-a ki phelkhapna a
piangsak thu in Laisiangtho amau deih bang taka kaai a, a saan’nate
hang uh a hi pah hi. Amau deihna bul akipsak nading bek in hanciamin
a sim man uh ahi zaw hi.

               Upna maanlo leh Khristian gamtat maan ahi lo khat peuh zuihnop
man in pawl khat te in (521) Laisiangtho sung mah hinapi atung anuai
tawh kizom lopi-in ama deihna tawh kituak aneu khat sung bek peuh
lakhia lian-in zangh thei uh hi. Tua bangte abaan sim lai le uh a thubulpi
deihna kitelkhia pah lel dinga, amau cih tawh a ki-lehbulh khiatna nei
peuh na hi thei zaw sop ding hi. Gulpi thukawi pilna mah zui-in, akisai
lopi-in amau pumpi deihna tawh a kilem thei dingin a zom mawk uh a hi
lel hi. Tua bangin mi tampi in Pasian kammal lumlet uh hi. Kim khate
ta leu leu in amitkhaa uh-a a muhna bangun limlahna tawh kigen
Laisiangtho munte amau upkhialhna zui-in akhiatna la uh a, Laisiangtho
teci pangsak bangin kinei in amau deih banga akhiat uh tawh akhel avet
in Laisiangtho sung thuhilhnate genkhia se uh hi.

             Bang hun bang hun hi taleh thungetna leh kiniamkhiatna lungsim
leh zuihnopna lungsim tawh Laisiangtho akisim loh ciangin a kitel pen
pen munte leh a gennop pen pen munte na ngawn ahaksa pen pen mun
te bang mah suak-in a khiatna maan pan in kiheiikhia kha pah pah hi.
Papal makaite in Laisiangtho munte alom no no in amau deihna tawh
kituak dingin teelkhia uh a, amau vaihawmna a huh theih dingin zangh
uh hi. Tua hangin mite in amau thu-in Laisiangtho sim-a, a khiatna a
theih na ding uh hamphatna a taan lawh uh hi. A tatak in cile hang
Laisiangtho buppi mite kiang ah pia-in a om bangin a simtek ding uh a
hi zaw hi. Tua hi leh deih kaihna tawh Laisiangtho hilh sawnna cihte
om selo dinga, amau leh amau in sim in, a telna bang bang uh amau
adingin hoih zaw mah mah ding hi.

               Laisiangtho pen Piangsakpa’ deihna athei nuam mi khempeuh
adingin lamhilh-a zat dinga hong ki pia ahi hi. Pasian in a kician mah
mah hilhkholhnate mihingte tung ah hong pia hi. Vantung mite leh
Khrist mah mah in Danielte, Johnte tungah mailam thu piang dingte a
theih theih nadingun na hilh hi. Eite hotkhiat nadinga akul munte theih
zawh loh-dingin na koihlo hi. Tua thute in thumaan deih taktaka azong
mite buai nading leh lamkhialh nading na lak zenzenlo hi. Topa in
Habakkuk tung ah, “Nang ka hong muhsak thukhem peuh, a sim nop
mahmah dingin,….taai kawm na ngawn-a sim theih dingin bawl in” na
ci hi. Hab. 2:2. Pasian kammal te pen lungsim tak leh thungetna tawh
a ki sim leh a kitel mah mah dinga kigelh a hi hi. Thumaan deih takpi
khempeuh in thumaan mu ding uh hi. (522) “Thuman mite’ tungah
khuavak hong taanga” hi. Late 97:11. A kiseel van manpha zon bangin
thuman azong lo pawlpi peuhmah in siangthona ah a ma uh sot zo lo
ding uh hi.

             Suahtak nopna leh zaleen’na paulap in galpa thangzak mulo ding
in mite mit-taw sak in a khemna tawh Satan in ama deihna ah atun zel
hi. Mihing’ geeltawm thusuak tawh “Ka suakta uh hi,” acih nateng pen
uh galpa lawhcinna ahi zaw hi.

            Mi tampite adingin pilna tawh nate telkan in zonkhiat theihna
pen sam-siatna a suak hi. Pasian in leitung ah pilna siamnate a
kimuhkhiat nadingin khuavak tampi piak dingin thu a pia hi. Ahh hangin
lungsim pilna saang pen nangawn Pasianthu tawh a kimakaih kei leh
amau muhkhiat thute leh Pasian lahkhiat thute kitukalhsa in abuai lel
ding uh hi.

            Mihing muhkhiat pilnate pen, leitung nate ah hi ta leh, khaa lam
thute ah hi ta leh, a them neng bek hi a kicingtaak hi nailo hi. Tua ahih
manin amau muhna pawl khat pen Laisiangtho genna tawh kilem thei lo
tampi om hi. Mi tampi in mipilte muhkhiatte “pilna a kici khem” thute
pom bel in nei uh hi. Tua tawh Pasian kammalte sittel zaw sop uh hi. 1
Tim. 6:20. Piangsakpa leh A nasepnate pen mihing’ lahtel theih dingin
aki muhpih zo nawnlo tampi a om lai hi. A muhpih banloh uh thute pen
amuhtheih nate omzia thukhun te tawh alah tel theih loh uh ciangin,
Laisiangtho pen muan theih ding hi lo hi cih sak zen zen uh hi. Tua
banga Laisiangtho Lui leh Thak thu amuang zolo mite hong kalsuanto
lai uh a, mongnei lo Vangliatna nei Pasian om lo hi dingin hong um to
leu leu uh hi. A kipiangsak nate in mong neilo vaang a nei zaw dingin
seh uh hi. Tua caingin, amau aleenkip ding thuman sikkawipi pen khah
suah uh ahih manin uplahna suangpi tawh a kitat tat lel dingin tua bang
mite ki nusia ta hi.

             Tua bangin Dawi khemna tawh mi tampi lamkhial uh hi. Mihingte
in amaute a piangsakpa sangin pil zawk ding hanciam uh a, mihing
ngaihsut pilna bek tawh khang tawntunga kitelsiang ngeilo ding thute
zon khiat a sawm uh hi. Pasian in Amah leh A thu hong theihsak nopna
ciang lel mah theih tel sawm hi le uh Jehovah vangliatna, minthanna,
lamdannate thei in amaute neuna leh bang mah tham ahih lohna te uh
mu ding uh a, amaute leh atate uh adinga kilak nate hangin (523) lungkim
zaw ding uh hi.

            Pasian in eite tung lahkhiat ding a sawm loh, ahong lahkhiat
ngei lohpite theih khiat teitei sawm-a zon tei teina pen Satan mi khemna
ah a picin’ theihna khat mah ahi hi. Tua bang linlian hang mah in Lucifer
in a van dinmun a taan ahi hi. Amah in Pasian thusim teng
atheihpihloh manin lungkim zolo hi. Amah akipia dinmun sang mahmah
muna asep ding akilak pen hawmthawh in awlmawhlo, donlo zaw mawk
hi. Vantung mite hansuah a, ama lungkim loh banga lungkim lo teng
tawh puukna hong piang sak hi. Tu in amah in tua lungsim mah mite
lungsim-a a guan zawh nadingin thun a, Pasian hong sawlnate awlmawh
lo dingin a makaih hi.

             Laisiangtho thumaan ahi bang taka saang nuam lo mite in lungsim
a hai sak thei lel phuahtawm tangthute, zon beh beh ding uh hi. Khaa lam
thu ah ei leh ei ki ukna, kiniamkhiatnate akiam ciangin amau lungdamna
hi sem sem hi. Tua bang mi in amau ci le sa deihna asep theih nadingun
apilnate uh a niamkhiat uh hi. Amau leh amau pil kisa lua uh ahih manin
Pasian makaih-a Laisiangtho simding leh nakpi thungen-a kisik kikna
lungsim khawng kul sa lo uh hi. Tua ahih manin khemna dal nading a nei
lo uh a suak uh hi. Satan in tua bang lungsimte’ ut-te na pia zel a, siing
kuang leh ai-kuang khek bangin, thumaan mun ah khemna a na koih sak
zel hi. Tua bang mah-in papacy in avangliatna mite tung ah zangh hi.
Thumaan ah singlamteh om ahih man-in pua nuam lo uh hi. Singlamteh
pelh nading lampite mah hong tawh to leu leu uh hi. Tua bangin a nuam
bek leh ngeina bang bek in mang-a Pasian thu a awlmawh lote in leitungte
tawh kilamdanna nei lo ding uh hi. Biakna thumaan pana lampialte ci-a
mawhsakna a thuak dingin kinusia ding hi. Thumaan nial a sawm viu veu
het te in lamkhialh theihna khempeuh ah zui pahzel ding hi. Khemna nam
khat a en ngam lo khat in a dang saang veve mawk ding uh hi. Paul in tua
bang mite a genna ah, “tua mite in gupna ngah nadingun ki-itna tawh
kipawl thuman a sang kei uh hi. “ “Tua ahih ciangin amaute in thuman
thutak um loin, gitlohna-ah a nuamsa mi khempeuh in thukhenna ngah na
ding un, zuau thu um dingun, khemna in hahkata a sep theihna thu Pasian
in a maute lakah a piangsak hi.” 2Thess. 2:10-12. Hih (524) kihilhna
eite mai ah kikoih ahih ciangin I saan’ thu bangci thu hiam ci in I kidop
ding hoih hi.

              Mi khempa’ lawhcin theihna te lak ah a thupi pen pen in sikha
hopihte hilhna leh na lamdang bawlna te a hi hi. Mite upmawh loh
hetna munte ah khuavak vantung mite bangin kibawl-in Satan in a ngeen
na phah pah pah hi. Pasian thu nakpi thungetna tawh simle uh khuamial
lak ah mite kinusia mawk lo dinga, amaute in upna maanlote thei tel
pah ding uh hi. Ahih hangin thumaan nial uh ahih manin, khemna in a
pum mat ding suak uh hi.

            A lauhuai lampialna dang khat om leu leu hi. Tua pen Khrist-ii
Pasian hihna a nial upna a hihi. Hihleitunga mihing a hong om ma in
Khris pen a om ngei nai lo hi ci uh hi. Hih upna pen Laisiangtho ka um
hi aci mite lak mah ah tampi a om hi. Ahih hangin amau upna pen
Honpa in A Pa tawh a kipumkhat in, Pasian-hihna, leh atawntunga hihna,
Amah mah in apulaaknate tawh kilehbulh mah mah hi. Hih bang hilhnate
pen Laisiangtho a lehlam ta-in saang ding I hil kei leh lungkim taka up
theih mawk ding peuh mah hi lo hi. Tua in mite lungsim sung ah
Honpathu neusim sak tuam mahmah tham loin Laisiangtho zong Pasian
hong piak ahihna pan niamkiat sak tuam peuh mah hi. Lauhuaina
apiansak zah mah bangin zong nial hak hi. Mite in Khrist ahihna
Laisiangtho pan ahong nial khit uh ciangin i va kikuppih hangin zong
phatuam zo nawn khol lo a, kiselnate in bun ta leh a lungsim uh sukha
zo lo hi. “Leitung lungtang a nei mi in Pasian’ Kha Siangtho’ nate
amang kei hi. Bang hang hiam na cih uh leh, tuate haina a sa uh a, tuate
Kha Siangtho bek tawh kikhen tel thei ahih ciangin amah in a thei zo
kei hi. “ 1 Kor. 2:14. Hih bang upna nei mi peuhmahin mite hotkhiat
nadinga Pasian vaihawm na ahi Khrist nasepnate, ahi ding bangin saang
kha theilo leh a mankha theilo uh ahi hi.

             Lungsim khel leh a lauhuai mah mah lampialna dang khat a om
lai hi. Tua pen Satan in pumpi nei mimal hi lo hi cih upna ahi hi. Tua
upna pen kizel baih mah mah hi. Laisiangtho sunga amin akigengena
pen mihingte lungsim gilo leh lunggulhnate limla a kigenna hi lel bek hi
ci uh hi.

             Pulpit tampite panin taang zai takin akihilh thu ahi, mi khat asih
ciangin ama ading (525) in Khrist nihveina a hong pai hi pah lel hi, cih thu
tawh mite lungsim lampial pihna in van meii tawh ahong pai nading upna
bei sak hi. Kum tampi sung Satan in, “En un, Amah inndeih sungah om
hi” acih densa hi a, mi tampi in hih kheemna hangin gam mang uh hi.

             Leitung pilna in thungetna kisam lo hi ci in hilh hi. Mihing pilna
mah in thungetna ahong dawn kik ding a om hi lo hi. Hong kidawng
phial hi mah leh zong ngeina susia hi dinga, na lamdangpi khat hi ding
hi. Na lamdang ahi lo dingpi khat hi thei mawk, cih pen a om-in om lo
hi ci uh hi. Amau in, van leh lei na khempeuhte in ki ukna ngeina kip
khat a zui hi uh a, Pasian mah mah in zong tua ngeina kip tawh kituak
loin bang mah bawl lo hi ci uh hi. Pasian mah mah zong tua Ama
bawlsa ngeinakipte in hencip in ukzaw a, Amah mah in a lehzuih bangin
gen uh hi. Pasian thukhamin a Pasian nangawn a To-peng saklo bangin
agen uhhi. Tua bang hilhnate pen Laisiangtho tawh kilehbulh hi. Khrist
leh nungzuite in nalamdangte bawl takpi mah hi lo uh ahi hiam? Honpa
in leitung mihingte laka hong teen lai mah bangin tu mah mah-in zong
nungta a, upna tawh thu ngetnate hong za in hong pia nuam den a hi hi.
I pianlim in ei pianlim sanga gol zaw tawh akizom ih hi hi. Upna tawh
thu I nget manin hong kipia thupha pawl khat pen ngen lo hi le hang a
hong piak loh ding kim lai hi a, tua pen Pasian in eite adinga hong seh
sak khat mah a hi hi.

              Khristian pawlpite lak ah upkhialhna tuam tuam leh lungsim
mialsak thu tampi sim zawh loh in hong lut hi. Pasian kammal in
akipsaksa gamgi suang phuh khat I khiin khiat ciangin a thaman bang
teng in hong zui hiam cih pen kigen khin zo vet lo hi. Tua banga gamgi
a botkhia ngam mite lak ah thumaan khat a nialna bek tawh a khawl
thei mi tawm mah mah hi. Mi a tam zaw in thumaan khat khit ciangin
khat pai khia zel ding a, thu um lo a bat dongun behlap lap ding uhhi.

             Theology lampialnate in mi tampi upna kip nei lo suak sak hi.
Tua thute om zen zen lo hi leh Laisiangtho a um thei ding mite ahi uh
hi. Tua thu a saan’ khit uh ciangin Laisiangtho hilh thutangna, migitna,
thupha bawlnate saang thei nawn lo uh hi. Pasian kammal om bangin a
saan’ ding nial sak zaw ta hi.

             Hih pen Satan in a nasep a zawh theih nadingin a ngimbulpi khat
hi den hi. (526) Pasian muanna leh Ama thu muanna a suksiat zawh
nading sangin a deih zawk bang mah om lo hi. Tua akhalau upna kip lo
galkap honte mai ah Satan pen amakai lutangpi in dinga, ahih theih
tawp suah-in mite ama dinmun bang a tun’ theih nadingun kheem in a
makaih hi. Tua bangin uplahna pen kizepna puanhoih silh bangin nei ta
zaw uh hi. Tu in mi tampi in Pasian kammal omte muanlahna tawh en
uh a, A neipa zong tua bang mah-in muang zo lo uh hi. Bang hang hiam
cih leh, Pasian thu in mawhna kawkkhia in mawh sak hi. Tua hilhna a
saang nuamlo phot te in tua aana paikhia nuam uh hi. Laisiangtho
simna sabuai siangthote pana thu kigente a ngaih uh zong a Laisiangtho
leh a sermon pen amawh mat nop man uh a hi hi. Ahih ding bang hihlo
uh ahih manin amau ki awnghonna leh a kidiksak nop manun thu umlomi
asuah lawh hel mi tawm lo hi. Pawl khat leu leu pen a tha dah man uh
leh a ki sak theih manun mi kiplo a suak uh hi. Zahtakna ngah thamcing
dingin nakpi-a sepna leh kipiak zawhna kul ahih manin, amau ngimna
ah a sangzaw pilna leh pahtawina a ngah nadingun Laisiangtho gensia
in a hun uh a zangh uh hi. Ciangtan nei mihing lungsim tam zat lua uh
ahih manin Pasian pilna khuavak ngah lo uh a, zong thei tel theilo uh
ahih manin a gensiat nading uh a zong zaw ta uh ahi uh hi. Mi tampi in
thu um lo, thu khel, leh biakna nei lo-a om lel khawng thupina in hong
la zaw ta mai uh hi. Mi hoih-a a kidawk hangun a lungsim nuaiphah
pipen uh in kisaktheihna leh ki-pum-muanna a hi hi. Mi tampi mah in
mite in lamdang asak ding thu khat peuh Laisiangtho sung pan-in
muhkhiat pen nop a sa uh hi. Pawl khatte in a kinial nop manun akhial
lam ah pangin gensia phot uh hi. Amau in thangsiahpa thangkam sunga
akitawl saan lel uh ahih lam akithei kei uh hi. Tua bangin a uplohnate
uh a langtang in gen uh-a, a dinmun ding uh zop a sawm uh hi. Tua
bang gamtatna in mi hoihlote tawh kipawl uh ahih manin Paradis
kongpua ah amau leh amau kikalhnelh a suak uh hi.

              Pasian in A kammal Laisiangtho sung ah Ama nunzia le gamtatna
ateltak-in gen hi. Mihingte hotkhiatna thu tawh kisai thute zong kitel
tak-in gen hi. Ahong kikhaam Kha Siangtho huhna tawh tha nuam taka
a zong mi in tua thumaan ama adingin a tel thei ding a hi hi. Mite in a
upna uh (527) a phuhna ding uh mun kip Pasian in apia hi.

               Ahih tei hangin aki-ciangtan mihing lungsim in aki-ciangtanlo-
Pa ngimna leh vaihawmna pen kimtakin theih pih khin zo lo hi. Pasian
pen mihingte zontawm muhtawm zawh theih hi lo hi. Tua ahih ciangin
Ama thupi’na leh vangliatna aliah puandal pen zum mawh liang-a va
leemkhia-a, teel siang zawh ding hanciam pen, asawm-in sawm kei
zaw ni. Sawltakpa in, “Pasian’ hihna leh pilna leh siamna in bangzahin
thuk hiam! A thukhennate kuamah in thei zolo hi! A paina lampi zuiin
ih zon’ hangin ih mu zo kei hi! “ ci hi. Rom. 11:33. Eite theih
pihna ciang pen Amah in eite hong kem a Ama hong huhna tawh ki
gamtang in, mong neilo itna migitna leh vangliatna tawh hong don hi
cih ciang bek a hi hi. Van-a ih Pa in nakhempeuh pilna leh thumaanna
tawh uk hi. Eite in lungkim lo leh muang zolo peuh-in a om ding ih
hikei hi. Zahtakna tawh ki ap-in amai ah ih kun lel ding ahih zaw hi.
Amah in eite ading a hoih ding ciang, leh Ama hong vaihawm sakna
teng hong thei sak ding hi. Tua baan teng pen vangliatna khempeuh
len Khut leh Itna tawh kidim Lungtang neipa khutsung ah lung muang
taka ih ap lel ding ahi hi.

              Pasian in ih upna ding ciang etsan hong pia ahihcingin uplah
nadinga paulap theih khempeuh abei dong in hong khinkhiat sak se
khollo kha ding hi. A um lah nuamte in paulap zong le uh na om zel
ding hi. Pasian thumaan saan’ nading anial photte in ahong dal khempeuh
a kinilkhiat-a uplah nading a om nawn het loh dong ngak niloh leh, tua
mi in khuavak hong zuan ngeilo ding hi.

             Pasian muanlahna pen lungsim thaksuak mite pianzia ngeina hi
a, Ama adingin muhdah huai hi. Ahih hangin Upna in Kha Siangtho
guat hi a, tua pen ki puah leh a khang sem sem a hi hi. Lungsim khensatna
leh kithasaan lo-in upna ah kuamah thahat thei lo hi. Pasian hong piak
upna khoi nading tecite thudon loin, muanlahna idawksak ciangin
uplahna pen amah leh amah thakhauh sem sem in, hong kip sem sem lel
ding a hi hi.

              Ahih hangin Pasian in piak dinga hong khap Ama thuphate
muanglaha akhalau mite pen Amah neu seh-a a zahtak lo ahi hi. Khrist
kiang ah midangte ava tunpih cih thadah amaute huzaap in midangte
Khris kiang panin a nawhkhia zaw ding hi. Tua bang mite pen a (528)
gahlo singkung hi a, amau hiang zaam kawi kawi-in kung dangte’ ni
taang ngah nading deep-in, a liimvot ah a si sak hi. Tua bang mite
kiang panin, akhan tawn tawlnga loin amaute langpanna teci bek akidawk
den ding hi. Amau in muanlahna leh kiplohna khai-cii tuh uh a, pel loin
agah alo kik hamtang ding uh hi.

             Uplahna pan asuakta nuam tatak mite zuih ding lampi khat bek
a om hi. A tellohna munte uh mawhzonga a dot kik uh sangin a telsiang
sak ding khuavak a ngah beh nading uh hanciamle uh khuavak lian zaaw
a ngah beh ding uh hi. A theihsa uh thute ah zuih ding leh sep ding a
om teng hoih takin sem le uh tu-a a uplahna munte uh ah theih-telna a
ngah ding uh hi.

             Satan in tua banga khem theih dinga a omte tungah thumaan
mah abang ve ve, khembawlna zuauthute a hilh pah geih hi. Tua ciangin
thumaan tawh kizom ki-pumpiakna leh ki apnate aneilo mihingte a zo
thei pah hi. Ahih hangin thumaan deih taktak-a bang zah-in haksa ta
leh a thei nuamte ama vaangin lencip zolo zel hi. Khrist in “leitunga
piang mi khempeuh a vaaksak” thumaan leh khuavaak ahi hi. John 1:9.
Thumaan Khaa in mite thumaan om khempeuh ah a makaih dingin hong
ki sawl zo hi. Pasian Tapa vangliatna muang in, “Zong un, na muding
uh hi” Matt. 7:7. “Mi khat peuh in Pasian’ deihna hih ding a teel leh, ka
thuhilna Pasian pan hiam…., cih amukhia ding hi. “ John 7: 17(ZIV).

             Satan leh a pawlte in amaute a do nading uh-a a vaihawm thusimte
Khrist nungzuite in tawmtheih pih lua mah mah uh hi. Ahih hangin vantunga
tu-a vaihawmnate khempeuh a thei khinpa in Ama sehna bang a kisep zawh
theih nadingin a uk ding hi. Topa in mawhzolna meisa thuak dingin A mite
a phal hi. Tua pen amaute thuaksiatna leh gimnate muhnop asa hi lo-in, tua
thuaksiatnate mahin a tawpna ah amaute zawhna ngah sak zo ding ahih
man hi zaw hi. Amah in avangliatna tawh mawhzolna tawh kipelh dingin
Amite liah den lo ding hi. A hangin, tua banga liahna tawh amaute picing
thei zawlo ding uha, sittelna thuaknate in amaute dawi’ khimm-na panin
dal thei zaw-in kiging thei zaw ding uh a hi hi.

             Migilote hi ta leh dawite hi ta leh in Pasian nasepna pen dalcip
zo lo uh hi. A (529) mite a panpihna zong liahcip zolo-in, khakcip
zolo ding uh hi. Bang hang hiam cih leh amaute in lungsim kisik kiknate,
ki-pulaaknate, leh mawhna nusiatnate, ban-ah upna tawh Ama hong
khap thuphate a ut bang bangun a ngen thei uh hi. Mawhzolna khempeuh
leh langdona huzaap khempeuh te a kilang a hi a a simtham a hi zongin,
“Tha gum hatna hang hilo, vangliatna hang zong hilo, keima tung pan
nangah Kha hang bek tawh na ma na tun’ zo ding hi” mipite Topa in ci
hi. Zechariah 4:6.

              “Topa mit in midikte en hi, a bil in zong amau thungetna a ngai
hi…Note in thupha lamah lungsim a nei mi na hih uh leh, kua in note hong
bawlsia ding hiam?” 1 Pet 3:12,13. Balaam zong letsaung lianpi in a khimm
lai-in nuamtakin Israelte samsia ding, kithoihna biak piakna tawh Topa in
A mite samsia sak dingin a hanciam laitak-in Pasian Kha Siangtho in thusia
a lawhkhiat nop kammal dal a, Balaam in “Bangci bangin topa in a samsiat
lohpi ke’n samsia thei ding ka hi hiam? Topa in a to lohte ke’n bang ci to
ding ka hi hiam?” “Midik sihna bangin kei hong si sak in, kei beina pen ama
beina bang hong hi sak in” ci hi. Kithoihna bawl pha leuleu uh a, a kipat
phat kik uh hangin kamsangpa in, “Ngai dih un, Ama thupha piakte kei
zong thupha pia dingin hong kisawl a, kei thu in ka lum let thei kei hi.
Amah in Jakob sungah mawhna mu lo a, Israel sung ah thang huaina mu lo
hi. Topa pen Amah Pasian hi a, amaute lak ah Kumpipa khat otna aw ka za
hi”. “Jakob bum zawh nading omlo a, Israel phuisam nading thu om theilo
hi. Tu hun laitakin Jakob leh Israel thu ah Pasian in bang bawl sak hiam a
ki cih ding hun a hi hi.” Gamlakvakna 23:8, 20, 20, 21, 23; 24: 9. A
thumveina biakna tau lam lailai in Balaam in samsia dingin kipan leu leu hi.
Ahih hangin a utlo kamsangpa muk in Pasian Kha Siangtho in Ama teelsate
hamphat nading teng lo khia ngit nget mawk a, amau galte haina leh
muhdahna taai taai kha zaw mawk hi. “Nang thupha hong piate in thupha
saang hen la, nang hong samsiate in samsiatna thuak ta hen” ci zaw zek
mawk hi.

             Israel mite pen hih hun laitakin Pasian tungah thumaan uh a,
Ama thukham a zuih lai teng uh hih leitunga vangliatnate leh Hell
nangawn in amaute zo zo lo uh hi. Ahih hangin Balaam in a samsiat
ding a kiphal lo Pasian mite tung mahah atawpna ah khembawl-na tawh
amaute mawhna ah hong tun zo ve ve hi. Pasian thukham hong palsat
uh (530) ciangin Ama kiang panin amau leh amau hong ki khenkhia uh
a, amaute susiapa vangliatna thuak dingin ki nusia hi.

             Satan in Khrist a beel mite laka a thaneem pen pente na ngawn
khuamial sunga mipi te tawh tehna-in hat zaw pek zel lai cih thei hi. Amah
tel takin va kilang leh nial in nolhkik thei ding cih zong a mu hi. Tua ahih
manin singlamteh galkapte thahatnate kaihkhiat phot nading lampi zongin,
ama galkapte tawh lam gei ah buk-in na bok khi khe uh hi. Tua mun anawkte
a susia dingin pang gige hi. Ki niamkhiat taka Pasian tawh ki zop den na
leh Ama thukhamte zuihna bek tawh eite ih suakta thei ding hi.

               Thungetna a om kei leh ni khat nagawn zong lungmuan’na ding a
om lo ahi hi. A diak diak-in Topa kiang ah Ama thumaan ih theih siam
nading ih ngen pha deuh ding hi. Mawhzolpa deihnate tel thei-a bang cih
le’ng ama zolnate dal zo ding cih thute ih ngen pha deuh ding hi. Satan in
Laisiangtho siam mahmahpa khat ahi hi. Laisiangtho bu mah leen in a deihna
mun khat pen a deih bangin akhiatna lak hi. Tua tawh eite hong puuksak
nadingin a seem hi. Eite in ki niamkhiat takin Laisiangtho sim in Pasian ih
mit suan den ding a kul hi. Satan vaihawmnate pan ih kikep tawntung
kawm-in upna tak tawh thu ih ngen tawntung dinga, “Khemna hong
thuaksak kei in” ih ci tawntung ding hi.

               Laisim mimal khempeuh Topa thupha hong pia ta hen.


Lungdam
Kimnu/nunu.