Dear Laisim khempeuh
Azom te,
Dan 7:25."Amah in asangbelpa langdo in thu lianpipi gen ding a, asangbelpa'misiangtho te langdo in, hunte leh thukhamte phiat sawm ding hi. Ama khut sungah hun 1,hunte leh hunphel kipia ding hi." Tua pope Anaa in bangteng simkhia hiam sit suk dih ni.
(1). Pasian langdo in thusia agen na. (Pasian agensiatna) pen, amah Pasian ai-awh a akigen na hi a, Pasian pen mihing peuh in a ai-awh thei, mihing bang lel khat maha agen na aneu bawlna hi. Jesu zong Jews te huat na lianpen"Pasian Tapa hing" a cih kam mal ahi hi.
(2). Misiangtho te athah na LST thu om bangbang leh thukham bang azui nuamte, ama phuahtawm thute zui nuam lo suak ahih manin agamgam a athah ahunhun a athah kigawmgawm in mihing 50,000,000 val bang that khia hi.
(3). Hun te laih sawm ding hi. Daniel mangmuhna hih alian 7 sung pen, BC 530 kum a kilak hi a, ahong tung nai lo, hong piang lai ding thu hilhkholhna ahih mah bangin, AD 321 kum in, ni kibiak ni Sunday pen Sabbath laihna in kheksak takpi hi. Ni bia kumpipa, Constantine in, thuman upna tawh hi lo ME deihna tawh Khristian hong suah ciangin, tua kumpipa in ani biak ni zahtakna pen Khristian khempeuh in zuihpih leh deih in Pasian biakna ni dingin 7/3/321 in mi khempeuh in Sunday ni tang dingin thupia khia hi. Mipi in a zuih nop kim pah loh ciangin, 325 kum in NICEA khua ah Council pi khat sam uh a, Sunday pen, Topa thawh kik ni zongh hi ngawn ahih teh, 'Topa ni' ci pah lel ni, ci in kipsak uh hi. Mi hoih Pasian um taktak te thukim thei tuan lo in Sabbath mah tang veve lai uh ahih manin, tuate zuih teitei akul dingin, 336 kum in Laodecea khua ah ki khop khat sam kik uh a, mipi ME tawh, Sunday ni tangciat ta dingin kipsak to leuleu uh hi. Hih thukham nambat 4 na sabbath pen sunday a alaihna bek uh zongh hilo lai in, ni khat leh ni khat kidei na nitak ni tum ciang ahi kimlai, zankim nai 12 ciang hi sak uh hi. Hunte laih sawm ding acihna pen, akigen kholh khit kum 800 bang ciangin tungphing ahih manin, kuamah in zong tua hilhkholh na phawk in na nei nawn lo zaw tamai hi.
(4).Thukhamte kheksawm ding. Thukham nambat 2 na, "Milim bawl in bia kei in," cih pen, nibiakna sunga milimte pawlpi sunga hong lutpih a, Jesu lim peuh, Mary lim, Piter leh misiangtho dangdangte lim peuh hi sak uh hi. Pasian thukham zui nuamte in nabiakpih nuam lo zel uh ahih ciangin, AD 431 kum in Ephesus Council ah, misiangtho te lim bia thei ding thu kipsak uh a, abia nuam lote, bawlsiatna thuak sak uh hi. Thukham nambat 2 na in, Milim bawl ken la, amai ah kunken, ci mawk ahih ciangin, akilangtanga tua thu palsat ahih loh nading un, Thukham nambat 1 na in, kei lo Pasian dang nei kei in, ci khin a, Pasian dang neih loh ding huam khin hi, milim bawl ken la, bia ken, va cih thuahthuah ding kul nawn lo hi, ci-in, tua nambat 2 na pen aphiat in phiatkhia uh hi. Thukham pen avek pi 10 apha hi a, 9 bek hong pha hiaumawk ahih ciangin, 10 mah a cin kik theih na dingin, nambat 10 na pen phelnih suah uh a, Na vengte zi, a inn leh lo, aganhing te deihgawh haza ken, cih pen, Na vengte zi haza deih gawh ken, ci-in tuam lak uh a, nambat 9 na hi sak uh hi. A dangteng pen 10 na hi sak uh hi. Tu mahmah in RCM pawlpi te thungetna laibute en lecin, thukham 10 te kigelh na sungah, amau bawltawm na ah nambat 2 na pen, Na Topa Pasian min zangkhai zat ken,cih, na hi pah mawk dinga, tua pen, Pasian hong piak na Original sungah bel, Milim biak khamna hi, amau bawltawm na Topa min zang khai zat loh ding gen na pen, a Original ah, nambat 3 na hi zaw hi. Ex 20:7,ah en in. A Original sunga, nambat 4 na pen Sabbath siangtho taka tan' ding thu hi a,amau bawltawm na sungah nambat 3 na nahi pah leuleu ding hi.
(5).Amau khut sungah Anaa sawt hun 1, hunte, hunphel kipia ding hi.
Hun khat, Kum khat ni,......360
Hun te-Kum nih ni,.............720
Hunphel-kumlang, ni..........180
Gawm....1260 ni.
Hilhkholhna ah, nikhat pen kum khat in tuat in, Eze 4:6. Tua ci tuat leng, ni 1260 pen kum 1260 mah hi pah lel a, pope Anaa tawh mite akithah kipat AD 538 panin French kumpi Napoleon galkap te in pope pivs 6 na pa amatkhiat Feb 10, 1798 AD kum ciang tawh kituak pah lian takpi leuleu hi. Tua hilhkholhna ni or kum 1260 Anaa nei pen midang kingawh thei lo hi.
Hih kineu hong pusuah na pen, Babylon pana simsuk kumpi kilaihlaih te a 4 na pan a, ki 10 hong pokhia te laka ki 3 botkhia pen hi a, tua pen midang kingawh thei lo leuleu hi. Mi kimkhat te in, Pasian maan deih lo Communist te khawng hi ding hi, ci uh hi. Tua Communist te pen, Russia ahi a, China ahi zongin, Babylon pan kumpi kilaih suk a 4 na te pan ahong pokhia hi lo in, kumpi dang 3 te zongh botkhia ngei lo uh hi. Kumpi sim suk a 4 na ahih loh photna tawh, amaute kibulh thei lo hi. Tua tham lo-in, LST gen Anti-Khrist ding pen "Pasian om lo hi" a ci te ding hi lo zaw a, " Pasian om mah a,tua Pasian ai-awh in kei mah ka hi hi," aci te ding hi zaw hi. 2Thes 2:4. Pasian biakinnpi sungah tu-in "Kei mah Pasian ka hi hi," hong ci ding hi, ci mawk ahih teh, Communist te pen in Biakinn pi sungah tu lo, biakinn kum lai khawn GAWDAM vankholhna peuh in zatsak ekh ekh zaw a, "Kei Pasian hing," zong ci ngei peuhmah lo uh hi. Khrist hi lo napi-a, "Kei Khrist hing," aci pa mah 'Khrist zuai' ci-a Topa Jesu genkholh pen hi zaw mah lo ding hiam? Mt 24:23-24.Tua bang din' mun alen pen, pope longal adang khatbek om ngei zenzen lo hi.
Laisim mimal Topa'n thupha hong buaksuk hen..
zop lai ding
Kimnu/nunu
No comments:
Post a Comment