Dear Laisim mimal,
Azom te,
Pawlpi 7 na. Laodekia. Mg 3:14-22. Hih pawlpi min akhiatna in, Mite thu kikhensak ta cihna hi. Ahun pen, 1844 pan in leitung bei dong huam hi.
"Amen, ahi mi,Adik amaan Teci pang, Pasian piansakna bulpipa thupiakna in, Na gamtatna, sa lah sa lo, vot lah vot lo, na hihna ka thei hi. Na vot leh vot vet, na sat leh sa vet ka deih hi. Lumlel pan ka kamsung pan kong siakhia ding hi, ci hi. Zawn'na lunggimna thuak in, ahehpih huai-mittaw, puanlo niklo-a guakdin'na hih lam na kithei kei hi. Sapna om lo hi, ka hau hi, na kici hi. Na hauh nadingin mei tawh halsiangsa Kham citak, na mit nuh dingin mitza leh na guakdin' zahmawk sel nadingin puantualpaak, ka kiang panin hong lei in",ci-in hong hansuah hi. Ka it mite ka taai hi. Kongkhak kiangah dingin ka kiu hi. Kong hong hon' mi kiangah sungtum in, nekhawm, dawnkhawm in, Keimah in ka zawh ciangin Ka Pa Tokhom ah ka tut theih mah bangin amaute ka tutpih ding hi,ci hi.
Hih pawlpi hun pen, Pasian in leitung beisak nuam ta a, Amah it taktak te tungah Ama ciamtehna koih nuam ta ahih manin Mg 14 sunga vantung mi 3 te in abaanbaan in tangko sak ta hun ahi hi. Tua tangkona pen, eite mitmuh in vantung ah vantung mite hong leeng dangdan in hong tangko ding hi lo hi. Hih leitunga tua thupuak luan' zia na kisepna panin ih thei thei ding hi.
Tu in, vantung mi masa leh anihna thupuak pen na kitangko khin a, tu laisakin a 3 na thupuak akitangko san laitak ahi hi. Vantung mi masa thupuak pen, Mi nam khempeuh, pau nam khempeuh, mipawl khempeuh te tungah atawntung Gospel thu tangko a,'Pasian kihta unla, Amah bek bia un. Bang hang hiam cih leh, Ama thukhen na hun hong tung zo hi. Mg 14:6,7. Vantung mi nihna in,'Mipawl khempeuh Hehna leenggahzu agui sak Babylon apuuk zo hi, apuukzo hi',ci hi.Mg 14:8.
Vantung mi 3 na thupuak pen leuleu,"Sapi leh a milim bia a, aciamtehna akhut tungah leh atal tang tungah angah leh, tua mi mei leh kaat tawh kibawlsia ding hi." Hih thu ah,"Pasian thukhamte leh Jesu upna Teci apang misiangtho te thuakna a om hi,"ci hi.Mg 14:9-12. Hih amasa leh anihna tangkona pen America panin, Tuiphum pawlpi mi William Miller leh Episcopalian te J.V.Himes, Methodist te Josiah Lithch, Congregationlist te Charles Fitch, leh Baptist te Joseph Bate te in, kum 1840 pawl in na tangko uh hi. Pasian thukhen na hun hong tung ta hi. Topa Jesu hong pai kik baih ta ding hi, naci uh hi. Hih khaa nasepna Movement ah, kua pawlpi ci tuan lo-in Thukhen na hun hong tungta hi ci-in kithu hual takin tangko khawm ciat uh hi.
England gam ah, Anglican pawlpi te Edward Irving, Puritans te; Robert Winter, leh leitung uk ahi M.P.Hennry Drumond te in na tangko uh hi.
Germany gam ah, Lutheran pawlpi ahi, John A, Bengal in tua thu mah na tangko a, Russia gam lawhto in, pawlpi tuamtuam te in abiakinn khawng uh khakcip zaw in, konglak mun nuamte ah mihon kaikhawm in,"Pasian thukhen na hun hong tung zo hi,"ci in na tangko uh hi.
Hollan gamah, Heinzepeter, Switzeland gam ah, Louis Gausen, America khanglam gamah, Jesuits pawlpi Lacunza in tangko a, Spain gam dong lawh hi. Scandanavia gamte akici, Sweden, Norway, Denmark gamte ah, uhaam sa in atangko leh gam ukte in thong sungah na khia a, Pasian in alamdang mahmah in nasem a, naupang neu thong Upadi cing nai lote vive tangko sak leuleu hi. Leitung mun tuamtuam. Middle East, Asia, cihte ah Joseph Wolff, Jews Rabbi te tapa khat, RCM pawlpi sung a alutpa tangko kawikawi hi. Leitung pau nam tuamtuam 56 bang siam a,"Pasian thukhen na hun hong tung zo hi,"ci kawikawi hi. A gamgam-a hih thu atangko te pen, khat leh khat kithu za atangko hi lo hi. Amau om mun tek pana Pasian Khasiangtho in hansuah-a LST mun hilhkholhna len in atangko ciat mawk uh ahi zawhi.
Oct22,1844 in America-a tangkote pawl in, Dan 8:14 sung hilhkholhna a Biakinnpi sian suah na pen, Jesu hong pai dinga leitung siansuah ta ding hi ding hi,ci-in, mihing 50,000 bangin Jesu na dawnkha uh hi. Tua lai ah, Mg 14:8 a, Babylon apuuk zo hi, apuuk zo hi, acihna vantung mi nihna thupuak zong atung khinta ahi pah hi.(Ahih hangin hih Babylon puukna pen, tu dong mah in akitangko lai baan ah, vantung mi 3 na tangkona akizawh siang ding ciangin zong, vanglian mahmah tawh kitangkona hong om lai ding hi.) Ahih hangin Jesu hih leitunga hong pai ding na hi nai lo zaw in, Gupna ngah ding mi leh ngah lo ding mi va khentel, thukhen nasep va semta ahi zaw hi. Tua mun panin Ama Kumpi gam ding va saang dinga, A Anaa ding leh ami dingte va thoh in, Dan 7:9,10. Tua khit ciangin leitunga amite la dingin hong pai ding hi phing hi. Tua biakinnpi siangtho bel mun pan hong paikhiat ma-ava thaam sungteng, hih leitung ah, vantung mi 3 na thupuak na kitangko laitak hi a, Pasian ciamtehna Sabbath leh Sapi ciamtehna Sunday pen, mite mai ah adeih zawkzawk teel theih ding in na kihilh tel ding hi. Hih tangkona in, kua pawlpi, kua upna, kua gam leh lei cih deidan nei lo-in, mihing khempeuh zak ding thu ahi hi.Mt 24:14
Vantung mi masa genna en leng, Na khempeuhte piangsakpa bek bia un, ci-in hong sawl pha saan hi. Eite in piangsakpa Pasian pen mah bia a kinei ih hi khin zo hi. Ahih hangin tua vantung mi masa in bia hong sa nai lo hi. Bang hang hiam cih leh, ih biakpa pen na khempeuhte piangsakpa Pasian pen ahihna teci pang, ni 6 sunga tuate khempeuh bawl-a ani 7 ni tawlnga pa ahihna lak, Sabbath pen tangkha lo hon mawk ahi uh hi. Pasian mah bia-a kinei in, alangpangpa' kheksak bawltawm nipi maan lo Sunday pen, na tang khin hon mawk ih hi lai hi. Na khempeuhte bawlpa ahihna liahkhuh dinga akhek sak Sunday tang hial mah lah ahi ngei hi. Tu ngawngaw in, A thukhen hun hong tung keeita ahih teh, tua pen piangsakpa kilang sak Sabbath maan pen tawh,"Pasian bia ta ve un,"ci-a hong sawl ahi hi.
Pasian thumaan pen ahun zui-a hong lahkhiat beh toh zel hi a, athumaan pen a omsa mah kitheih beh toto zel na hi hi. Nungzui pite nangawn in, amau hun in saang khin zo lo ding uh ahih manin, thumaan a om khempeuh na lak khin nai lo hi. Jn 16:12. Ahun zui-a Khasiangtho in ahong lahbeh to zel hi napi, pawlpi khat akiphuh ciangin, tua apawlpi phuh lai uh a, amuhkhiat sa uh a kip sak sa uh upna ciang longal, anungsang ciangin LST thu takpi mah hi taleh, thumaan kimuh beh zel te pen saan'beh nuam lo-in langbawl zaw zel ciat mawk uh hi. Thumaan sangin aphuh sa uh pawlpi kitap khak ding it zaw kha pahpah zel uh hi. A kipsak sa ciang bek mah uh ah kilungkim sak in belh tentan uh a, Dawimangpa tawh kop in thumaan kimuh beh a om teh langdo zaw zel uh hi. Hih Laodekea pawlpi tunga thu kipia pen leitung buppi Khristian khempeuhte tungah kibulh thei hi. 6T.77.
Tua hi a, LST sung thumaan nialtheih loh ahih nak leh, nidangin ih na theih nai loh, ih na zuih nai loh thu ahih leh, ih zaak, ih theih ciangin zuih toh pah lel ding Topa in deih hi. Lk 6:46. Tua bang hi lo-a, ama din'mun ngei bang lo akibehlap thumaan hong om cianga na nial zel, ana nolh zelte Keimah in zong ka nolh ding hi,ci hi. Mt 7:21-23.LUMLEL te.Pasian maan mah lah bia vanglak, adeih banga lah bia nuam lo zel laklawh te pen LumLelte hi a, akam pan ka siakhia ding hi,ci hi. Mg 3:15,16. Tua man in Khristian akicite hi a, a Puansilh uh-Adoctrine(upna) uh, din'mun meelmeel zong nei nawn lo-in,(gtn: Biakna kibang veve, khuakhat keh khua khat sia te gen kibang lo)kibang nawn lo mawk-a, Doctrine meelmeel zong anei mumal nawn lo uh hi mawk a, Niklo,Puanlo aguakdin te, hong ci hi. Mittaw. LST thei mahmah kisa kha uh a, Pasian thumaan LST deihna thei nai lo lua ahih manin mittaw te hong ci hi. Hauh nading, Kham ci leuleu hi. Kham pen gamtat hoih, ki-itna hi a, Khristian te mah hi napi uh in, ki-it lo lua uh a, amau pawlsung mahmah zong kimudah in kiphelkhap khap mai uh a, mun tampite bangah leitung uk kumpite in abiakinn kongte uh akalh sak phot kul pahpah hi. Tua bangin apawlpi uh kikhen khamkham mai in, upna bangpi kilam dang lah hi het lopi in, pawl za tampi kisuah pong hel uh hi. Tua bang na hih laiteng uh zawng mahmah in, Khristian zong hi nai kei mai uh teh, ahong ci ahi gige hi.
Hansuahna.Kongkhak kiangah dingin ka kiu hi. Kong hong hon'inla, na Zahmawh sel nading Puantualpaak-Thu upna maan Doctrine cihna, na mittaw nuh ding mitza, mit muhna pen LST thumaan muhna, a zatui pen Spirit of Prophecy bute, na hauh nading Khamtak, ki-it na maan, Pasian aa bang ahi te neih na, Ka kiang pan hong lei in, ci-in hong sawl hi.
Khapna. Tua banga kong hong hon' mi kiangah sungtum in, nekhawm, dawnkhawm, nungta khawm in tua akisapnate kong pia ding hi, ci hi. Ka zawh ciangin, Dawpkholh thukhenna azawh ciangin, a zo mite a Pa Tokhom ah tutpih ding hi. Mawhnei te daan thuak dingzah khentelna Tokhom ah tutpih ding hi, ci hi. Mg 20:4-7;1Kor 6:1-3. Ih gensa bangin ahunhun ate letsong kibang lo-a, hih hun-a a Zo mite, thukhen Tokhom ah tu ding hi ci ahih teh, thukhen mang sem ding hih tuak hi.
Ciamtehna. Mg 8:1. Tuu no in ciamtehna 7 na ahon'ciangin vantung tawmvei sung gamdaii hi, ci hi. Banghanghiam cih leh, Van laidal zial bangin kizial a, Topa leh avantung mite hih leitung ah ong paisuk uh a, vantung hong nusia pak phot uh ahih manin, vantung gamdaii hi. Vantung-a omlaite in lah, hih leitunga thupiangte ensuk in, vai dang sem lo tadih uh ahih manin, gam daii hi. EW.15,16;DA.693
Vantung nangawn tawmvei sung gamdaii sak zo zah-a thupi in Topa in ama mite la dingin ahong paisuk ciangin, tua a laak ding amisiangtho te lakah nang zong na kihel thei ding hiam? 1Jn 3:2,3. Amah tawh kibang-a asiangtho te bek la ding hi, ci hi. Vantunga om Ka Pa deihna banga agamta te bek ka la ding hi, ci leuleu hi. Mt 7:21-23. A Pa deihna bang hiam? Adeih leh adeih loh khentelna atomkaih penpen Pasian thukham 10 te ahi hi. Thukham apalsatte mawh nei kici hi. 1Jn3:4. Tua thukham sungah Sabbath tang ding zong kihel hi. Tua thukham leh Jesu a lenkop te bek misiangtho te kici hi. Mg 14:12.Satan in zong tua thu nih lenkop te bek mah mudah hi. Mg 12:17. Tua thu nih lenkop khol lo Khristian te bel, Dawi in it mahmah-a puah zaw hi. Ama nasepna picing sak thei zaw uh hi, ci lai mawk hi. GC.khawk 27 leh 31 sung sim in.
Nang zong vantunga laaktoh te lakah na kihel nop leh, hih tangkona nunung thu a awlmawh lote lak panin hong paikhia in. 2Kor 6:17,18. Babylon te laka na kidiah diah leh, amaute thuak ding gimna daan te a kibuak suk ciangin na thuakpih khawm kha ding hi. A manlangin hong paikhia in. Mg 18:4.
Laisim mikhempeuh Topa tel siam nahong pai ciat ta hen. Ih Topa hong pai baih ta ding hi.
Lungdam
Kimnu/nunu.
No comments:
Post a Comment