30. Mihing leh Satan Kikal-a Ki-elna.

              30.Mihing leh Satan Kikal-a Ki-elna
(505)
              NANG leh numei kikal, na suan-lekhak leh ama suan-le-khakte
kikalah kilangneihna ka koih ding hi; amah in na lutang hong sunim
dinga, nangin ama khetul na sunim ding hi.”, Piancil 3:15. Pasian in
mite apuuk khit cianga Satan a samsiatna in hunbei dong khang
tawntunga dingin hilhkholhna namkhat mah asuak hi. Leitung minam
khempeuhte thuak ding kidona lim zong hi khol pah hi.

               Pasian in “Kilang neihna ka koih ding hi” ci hi. Hih ki langneihna
pen pianpih nate hi lo hi. Mihing in Pasian thukham hong palsat ciangin
Satan tawh kilem-in pianzia gilo nei hong suak uh hi. Mawhnei mite leh
mawh phuangcilpi kikal ah kilangneihna omlo hi. A nih mah un lampialna
tawh gilo khawm uh hi. Lampialpa pen midang khat in hong khasiat-a
ama nung hong zuih sak mateng a mot din khawl ding pa hilo hi. Tua
ahih ciangin apuuk vantung mite leh migilote kithuah thei mah mah uh
hi. Pasianin dallo hi leh Satan leh mihingte kipawl-in vantung langdo
ding uh hi. Satan a el cih thadah, mihing akici peuhmah kipawl-in Pasian
langdo ding uh hi.

             Satan in vantung mite tualgal bawl dingin a zol mah bangin
mihingte zong mawhna bawl dingin zol hi. Tua pen amau kipawl thei in
vantung dohuan le uh a deihna ahi hi. Amah leh apuuk vantung mite
kikal ah Khrist muhdahna uh ah kithu hual in kinialna om ngeilo hi.
(506) Thudangte ah bel kithutuak loin kinialna tam hi. Van leh lei
khempeuh Ukpa langdo nading ah bek kiptakin kipawl uh hi. Ahih
hangin amah leh numei leh asuan akhakte uh’ kikal-ah kilangneihna
koih ding cih thupiakna Satan in azak ciangin ama guat mihing lungsimsia
pen kidaltan sak-in, bang khat peuh tawh ama aana anolh theih hun uh
hong om ding cih a thei pah lian hi.

              Tua ciangin Satan in mihingte amuhdahna hong uang san hi.
Bang hang hiam cih leh Khrist tungtawn-in amaute pen Pasian itna leh
amigitna angah thei ding uh hong hi ta uh hi. Amah in mihingte hotna
ding Pasian vaihawmna pen daltan nuam hi. Pasian kizahtak loin, a
nasepte niin baang henla maisia mu leh vantung abuai mah bangin leitung
buai-in hawmsuak leh a ut a hi hi. Tua ciangin amah in hih buaina teng
kawk-in Pasian in mihing na bawl vialse thaman a hi ve cih san hi.

             Khrist thupha in mihing lungsim sung ah Satan alangneih nading
uh a guan hi. Tua bangin thupha in amaute khel-in thaksuak sak lo hi
leh mihing in Satan’ sila suakto den ding a, Satan’ deih bang bangin
seem to to den ding uh hi. Ahih hangin tua thuthak hangin mite in
Satan tawh akizopna uh hong palsat thei uh hi. Tua Khrist guan thupha
vangliatna in gilo- buluhpa hong dal thei ta hi. Akuama peuh mawhna
bawl nuamlo-a kih huai asa mite, mawhna lunggulh na nial-a azo mite,
in tunglam pana thubulphuh a zanghte ahi uh hi.

            Hih leitung in Jesuh a muak dan ah Khrist lungsim puak leh
Satan lungsimpuak a kilehngatna a kitel muh theih pen hi. Amah pen
ahau, alian, leh a thupigawp-in hong kilang lo hi. Tua man-in Jewste in
ana nolh uh ahi kei hi. Hih apuatham a kilang vangliatnate a vukcip zo
ding vangliatna a neih lam a mu uh hi. Amah siangtho in taksa ahih
manin, tua in a-Pasian-milote’ muhdahna apiangsak hi zaw hi. Amah
leh amah kiniala mawhbaang lo-a ki-aapna in mi kiphasakte leh mi
huaihamte a kawkkhiatna suak den hi. Tua bangin Pasian Tapa
kilangbawlna a hong piang hi. Satan leh gilo vantungmitein tua migilote
pawl uh hi. Thumaan bulpipa langkhat ah lampialte in a thahatna
khempeuh uh gawm-in langdo huan uh hi.

              Khrist nungzuite zong a Topa agalbawl mah bangun a galbawl
zel uh hi. (507) Mawhna in a hong nungsawn sawn dan mu-a, tunglam
pana thahatna tawh mawhzolna a dal mi khempeuh tungah Satan leh a
pawlte hehna so ding hi. Thumaan bulphuhte mudah-a tua thumaan
ahilhte bawlsiatna pen mawhna leh mawhneite a om lai teng ki zom
zomlai ding hi. Khrist nunguite leh Satan naseemte pen kilem theingeilo
uh hi. Singlamteh nialna pen daai nai lo ahih ciangin, “Jesu Khrisit
sunga kipin a nungta nuam mi khempeuhte in zong bawlsiatna athuak
ding uh hi.” 2 Tim 3:12.

             Satan sawltakte Satan’ thuneihna akipsakk nading in ama
makaihna sungah na seem seem in Pasian Kumpina langdo den uh hi.
Tua hang mah-in Khrist nungzuite kheem uh a, amuanhuainate uh khim
sak-in zol uh hi. Amau makaipa uh’ sep ngeina bangin Laisiangthote
lumlet-in, khiatna maanloin bawl-in, a ngimna uh tunsak ding hanciam
uh hi. Satan in Pasian asuksiat nop mah bangin a sawltakte in zong
Pasian mite gim pia nuam uh hi. Khrist sihna dong a tun lungsimpuak
mah in migilote hanthawn a, Jesuh nungzuite susia sak hi. Hih thute
khempeuh alakkhol hilhkholhna ah, “Nang leh numei kikal, na suanleh-
khakte keh ama suante kikal ah kilangneihna ka koih ding hi”, na ci
khol zo hi. Tua thu in hun bei donga kizom toto ding thu hi ta hi.

             Satan in a galkapte samkhawm-in, kidona sungah ama
vangliatna neih khempeuh tawh alom-in a deng hi. Bang hangin adal
lampangte in zong nakpi-in dalbeh zaw lai lo thong hiam? Bang hangin
Khrist’ galkapte ihmutsuak-in thudonlo uh hiam? Amautein Khrist
tawh kizopna pen neu neih kha uh hi. Kha Siangtho kitasam lua uh
hi. A Topa uh adinga mawhna a huathuai a etsathuai bangin amau
tuaci sa lo mawk uh hi. Amau in Khrist hih bangin khentelsa
nialkholhsa-in koih zo lo uh hi. Amau in gitlohna leh mawhnate in
gim apiakziate ngaihsun kim kha khol lo pah pah uh hi. Khuamial
kumpipa in lah tua thute aphawk loh nadingin na maihum lai hi. Satan
nasepna nakpi-a a huat khol loh mawkna uh pen ama vangliatna
leh a kheltatna tampi a theihloh hang uh hi zaw hi. Hi bangin mipite
kidiahcip hon uh hi. A galppa uh pen agilo vantungmite lungsim a
ukcip, ahat mah mah galkap Manglianpi khat ahih lam thei lo uh (508)
hi. Khate in hotna a ngah theih loh nadingingilo vantung mitein uk-a
galsiam tak-in vaihawm na nasia tak tawh Khrist alangdo denhel uh
ahih lam atelsiang nai loh hang uh hi zaw hi. Khristian akicite lak ah
leh Lungdamna Thu hilhsia ahite lak na ngawn ah Satan omzia tel
taka kigenna kiza ngeii lo phial hi. Khat vei vei pulpit pana thugen
dang tawh kizom-a gingkha pak zelte lo buang kithei kha ngei phalo
mai hi. Amaute in Satan nasepna, leh A khelpil luatnate ahi zongin, a
do pah lian dingin a om gige in, zongseem pah thei ahih lam awlmawh
lo mawk uh hi.

             Mite in ama vaihawmnate theihpih lo uh hi. Hih a gilo anavaak
atei setsat keei galpa in amaute suul a zui den hi. Inn sungvai tuam
tuamte, khuapi kongzingte, biakinn sungte, minam kikhopna sungte, leh
thukhen zumte ah buaina bawl-in, kheem-in, zol-in, numei pasal, naupang
zahlo in susia hi. Innkuan kitam sak-in, kihuatna khaici bangin tuh a,
kidemna kitotna, leh kiheekna kithahna te tawh a dim sak hi. Tua pen a
Khristian pipite mah in Pasian sehna bang bangh hi ding hi ve’n, Pasianin
pha asak bangbang hiphot ve, ci-in Pasian ngawh laideep uh hi.

             Pasian mite leitung tawh kikhena a tuampiannate uh susia nuam
in, a zawh theih nadingin Satan a hanciam den hi. Tanglai Israel te
zong Lawkite tawh kipawl in aki awilohna mun ciang dong alutngam
uh ciangin mawhna tawh hong kizom pah uh hi. Tua bang lim mah
tawh tulai Israelte (thu zuite) zong lampial uh hi. “Tua bang mite in
Pasian, meel a hi Khris’ vangliatna tawh a dim Lungdamna Thu a tan’sak
loh nadingin hih leitung a uk topa in a umlo tua mite’ lungsim mittang
uh a tawsak hi. “ 2 Kor. 4:4. Khrist nungzui dinga akhensat lo khempeuh
Satan naseem suak uh hi. A lungsimi athahat sak kik kik lote in mawhna
it uh a, bawl bawl leh paulap zon zon a thuah uh hi. A ki puahthak kik
lungsim in mawhna nial ding khentelsa in a koih hi. Khristiante in thu
umlo mite tawh hong kipawl ciangin amau mah mawhzolna sunga
kiphum a suak uh hi. Satan pen amau mit muh loh-in hong kihel a,
simtham takin a mit uh a hum sak hi. Amau in tua kipawlna hangin
amau tung ah siatna bang mah mu lo phot uh hi. Hun te hong sawt
ciangin leitungte tawh kibang seem seem uh a, nuntakzia, kampau,
gamtatte tel muh lo seem seem uh hi.

              Leitung ngeina zuihluatna in pawlpii pen leitung lam ah kiheii
sak hi. (509) Khrist lam ah leitungte kiheii sak ngei peuh mah lo hi.
Mawhna tawh ki zopna atam ciangin a siahuaina ki neu muh sem sem
sak hi. Satan naseemte tawh kipawl ding a teel mi a sawt loin ama
Topa a zahtakna bei ding hi. Ih nasepna lam lam ah thusitna I thuak
ciangin kumpi zum-a Daniel a kisit lai-a bangin Pasian in hong keem
ding hi ci-in lungmuang ding hi. Ahih hangin tua mawhzolna ah I kikausi-
phum leh amanlaangin a hiam a zekai-in a hiam I puuk kul
hamtang hi.

              Mawhzolna in ama huam sung a om dinga kiseh het lo mite
tungh a sepna picin thei zaw hi. Laisiamna leh talent hoih neite
kizahtakin kipibawl hi. Tua bang siamnate Pasian azahtakna taanga
kimang thei ding, Pasian pahtak a lawh sak zo dingin kituat kha hi.
Talent leh ngeinate pen Pasian hong piak hi mah hi, ahih hangin Pasian
I zahtakna taanga I zat leh bel Pasian tawh a hong kinai sak sangsik-in
Amah tawh hong kikhen sak a suak thei zaw ding a, samsiatna leh
thangsiahna a suak ding hi. Tua sanga khialhna gol zaw om lo hi. Mi
tampi muhna ah gamtat hoih hi, a kipuahpha mi hi, Khrist mi hi, ci-a
amuh theih uh pawl khat bel om hi. Tua pilna le siamnate in Khristian
nuntak zeem dinga, biakna maan lam-ah huzaap khauh sak ding ahi hi.
Tua bang a hih nadingin Pasian tung ah aap a kul ahi hi. Tua hi kei leh
siatna lam ah ki zangh kha thei ding hi. Mi pawlkhatte maitai in tei
uha, gamtat gilote ah zong kihel lo a kicih hangin a Satan’ khut zat
taktak ahi om thei hi. Simtham taka a kheem bawl a huzaap a omdan in
Khrist ading in mipil lo mitei lote sangin gal lauhuai zaw hi thei hi.

             Nakpi-a thungetna leh Pasian muan’na tawh Solomon in leitung
bup in lamdang sa-a a pahtawi uh pilna na ngah hi. Ahih hangin tua
thahatna Bulpi pan kiheii khia a ama ut banga mai hong nawt ciangin
mawhzolna a lel hi. Tua ciangin hih kumpite laka apilpenpa, lamdang
akisa zah-a vanglianpa in galpa khutzat hat pen khat hong suak h.

               Khristiantein Satan in mite lungsim mittaw sak dingin zong zong
hi cih mang (510) ngilh loin “eite in si-le-sa tawh kido ihi kei hi; asang
belte tawh ahi zongin, ukte tawh ahi zongin, vangliatna tawh ahi zongin,
leitung tawh kipawl khuamial ukte tawh ahi zongin, vantung tawh kipawl
munah a om gilo khate thawh a hi zongin ih kido “ ahih lam phawk den
ding kul hi. Efesa 6:12. Kha tawh kimuam kithuhilhna in kum za tampi
sung ging suk suk a, eite hun dongin hong hilh lai hi. “Kikepna tawh
ngak un. Bang hang hiam na cih uh leh, na gal uh ahi Dawimangpa in a
hawk thei humpinelkai bangin kua mi ka ne ding hiam ci-in zong kawi
kawi hi.”, 1 Pet. 5:8. “Dawimangpa khemna na nan zawh nading un
Pasian galhiam khempeuh silh un. “, Efesa 6:11.

              Adam pana eite hun dong I galpa in mite nenniam ding leh susia
dingin kithasaan tawntung hi. Tu-in pawlpite susia dingin a tha neih
tawp suah in ki sa hi. Khrist zuih a sawm mi peuh mah in hih atawlngalo
galpa tawh a kisual kul ding hi. Khristian khat peuh in Pasian a etteh
tek tek teh Satan’ do nop theih dinga ki bawl bawl a suak hi. Pasian na
nakpi in seem a, gilopa kheemna te pholaak a, mite mai ah Khrist apuak
uh leh, Paul bangin lungsim niamkhiatna takpi tawh mawhzolnate pan
khitui tampi tawh Topa naseem ahi khawm thei ding uh hi.

             Satan in a theihtawp suah-in mawhzolna lauhuai pen leh a
thukawi pen tawh Khrist na zol a, ahih hangin akuan sim-in na kithalsawn
lel hi. Tua kidona pen eite hong huutna hi a, Ama zawhna in eite zawhna
ih ngah theih nading ahi hi. Tua zawhna a deih mi khempeuh tung ah
Khrist in thahatna pia ding hi. Mi khat peuh amah ana-kipiak kei nak
leh Satan in mawk zo thei lo hi. Mawhzolpa in kuama tung ah utna pen
ukcip sak thei lo-a, mawhna pen hen gawp mawk thei sam lo hi. Lungkiat
nading bawl thei dinga, gen baang sak thei lo ding hi. Khirst in azo zo
hi cih thu in Ama nungzuite in pasal lungsim tak tawh mawhna leh
Satan a do ngam na ding thapiakna a hi hi.

                 Laisim mimal khempeuh Topa kilam thakna hong suaksak ta hen.


Lungdam
Kimnu/nunu.