Thupat na,
Mi tampite in mangmuhna laibu leh Daniel bu pen, "akisincip, mite theih zawh loh thu hi," ci-in ngaihsun uh hi. Ahih hangin alaibu mahmah in, athugen kipatma leh athugen tawp ciangin, "Hih lai sim in, hih hilhkholnate thei in, za in, azui mi in, thupha angah ding hi" cizaw hi. Mg 1:3. Tua khit ciangin athu muh teng gengen a, azawh ciangin, Mg 22:7 ah, athu khupna in,"Hih laibu ah a om thu, anung cianga hong piang ding nate genkholhna thu thei-a, azui mi in thupha angah ding hi" ci leuleu in thu khum hi.
Bang hangin mite in 'hih laibu thu theih zaw loh hi, thusim kisincip hi', ci-in (Prejudice) ma seh kholh mikmek uh hiam? Hilhkholhna thu sintel ding ngaihsun lo uh ahih man mah in, Jews makaite in zong, Jesu na theikhial uh a, singlamteh tungah na that kha uh hi. Amaute pen Pasian teeltuam minamte hi uh a, mawhna pan Gumkhia dingpa Messiah a lam-en pah penpen te ahi zaw uh hi. Minam dangte in Pasian maan atheih loh laitak un, amau minam bek in Pasian maan thei-a, abia te ahi zaw uh hi. Ahih hangin amau lam-et Messiah pen, kamsangte in apian'na ding mun, apian'na ding zia, apian'na ding hun kitel takin genkhol napi in, tua genkholhna te sin in theitel ding hamciam lo uh a, asintel mi khat om leh langbawl zaw uh a, thu thei dinga makai ahite in lah sintel nuam lo uh ahih manin, ahong pian'cianga omzia ding pen thei het lo sapi in Messiah na mot lam-et ngitnget uh hi.Hong piang mah ngei a, Messiah ahih lam thei lo-in na that kha ta uh hi. GC. khawk 1 nasim in.
Tu hun in zong, Theology ci-in, Pasian thuthuk sin na asang semsem kinei a, sang semsem in, Pasian tawh kigamla semsem hiau mawk zawsop uh hi. LST thu nangawn a ut adah un lumlet uh a, (2Tim 4:3) a LST' gen nop thu pen seelsim in, amau deihna banga adawk theih nadingin deihkaih in hei uh hi. (Eph 4:14)GC.558;445;507;EW 220. Tu in ih LST nangawn, Consultant te deih banga kibawl hi a, nidanga Version te bang nawn lo-in, adeih lohna lailai uh alom in nilkhia uh a, pawl khatkhat te, Adjective peuh behlap in akhiatna kibang nawn lo dingin bawl uh hi."Amaute pilna lian nei hi," ci-in mite inlah muang mawk uh a, ahih hangin amaute zang in Dawi in nasem a, LST nangawn Pasian deihna thugui pai pen heikhiat sak in, amau deih bangin a lumlet uh ahi gige zaw hi. Mite in hih hilhkholhnate asintel thadah nadingun, ma kihtak khol sak uh a, tua thuthuk te kuamah in thei zolo hi, ci-in Gumpa Jesu migit luatna mot lam-et sak khin hiau uh hi. Jews te bang ih hih hon nadingin Satan in Theology siam mahmah akici te zang in mi khempeuh hong mai-hum hiau ahi zaw hi.
Hih mangmuhnate pen akithei zo het lo ding hi leh, Pasian in naupang teng-ta kineih lah hi lo-a, agelh in na gelh sak vet lo ding hi. Kithei tel thei dinga, kiman'na nei ding ahih manin na lak-a, na gelh sak hi zaw hi. Revelation-Mangmuhna cih pah phot pen, abulh cil te in, tua kammal tawh ana bulh kha pah phot mawk uh a, akizui hon pongmawk ahi ven, akhiatna maan pen, Lahkhiatna, cihna hi zaw hi. Tham lo-in, tu lai biakna makai lampial kha phot laklawh te in, Thu kisincip hi a, akithei zolo, alauhuai hi, acih pen uh, lampial mungpi ahi RCM pawlpi in abuppi-in apawlpi mite uh sim sak lo-in,"Lauhuai hi," acih bangmah uh limla-a, anung uh zuihna khat mah ahi to zel hi. A laibu mahmah in, amah leh amah 'Ka lauhuai hi' kici zenzen lo-a, athu sima, thei-a, azui mi in thupha angah ding hi, acih zawk kimlai hi ngiau mawk hi. Mg 1:3, athei thei lo phadiak bel om mah hi. Thei mah taleh zong, azui nuam lo, om to lai zel hi. 1. simding, 2. Theiding, 3. Zuiding, tua ciangin aphattuamna pen ngah thei ding, ci pan lai hi. Lampial pawlpi tampi te makai te in," Asin mahmah zong sin kei un," ci-in khaamcip uh a, akikhaam zolote bang pawlpi pua ah nawhkhia ding, ci in-a munmun-a makaite in pawlpi thukham peuh bawl behbeh lai uh hi. Bang hang hiam cih leh, amite in va sin in, vathei leh, zui nuam kha ding uh a, Gupna va ngahlawh zo kha ding, cih Dawimangpa in haza ahi hi. Tua Satan pen mihing mitmuh in kam hong pau lo-a, ih mitmuh-a ama pau tangin biakna lampial makaite zangin hong kampau ahi hi.
A masa-a theih ding: va sin in va thei mah taleng, azuih huai kei leh zui lo ding hi lel a, ava kisin ding peuhmah phal himhim lo pah mawkte' khalau na pen bang hang hiam? ci-in ngaihsut huai pah mai hi. Kei hong awi na ah, va sin inla, va thei inla, azuih huai kei leh zui kei in. Azuih huai leh lah zui inla, a LST' hong khapna om bangin athupha va ngah in. Tua hi leh, hampha zaw ni e..
Hih mangmuhna (Lahkhiatna) laibu-a thu omte apiakhia pa pen Pasian hi a, Jesu Khrist tung tawn in, vantung mi in John tunga hongpiak sawn ahi hi. Mg 1:1. Tua bangin a kamsangte in zong mihing dangte tunga ahong gensawn lailai uh ahi hi. Daniel in amangmuhna ah, ahun hun-a kithei thei phing ding thute zong na mu a, Dan 12:4 ah, Hun bei taktak ding cianga akhiatna hong kitel thei phing dinga, kitangko phing ding thu thuk zong na nei mah-a, tua pen na genkhia pah zaw hi. Daniel bu leh Mangmuhna bute pen, leitung tangthu leh Pasian thu atonsuksuk te tellah na hi a, teltakin sin leng, pawlpi maan leh lampial pawlpi te akitel lah penpen na laibu ahi hi. Tua man in Satan in, mite in sim-a a teltheih zawh khak ding uh phal lo pha mahmah ahi zaw hi.
Pawlpi 1 na pan zoplai ding,
Lungdam
Kimnu/nunu.
No comments:
Post a Comment